Yaɓooda 15
15
Luwah un kɔn ad Abram
1Go nyagt'n non ta lo Bɨraɓe ɗe ro Abramt kɨ ɗob koonyakamndilt, an: Abram, ot ɓool, mĩ der loi, nyabajii a i kɨbo ngãi kɨ tɔi 2Abram tur an: Bɨraɓe Luwah, ɗi a adɨm a? Ndɔmg ndɨ tɨgan kanj kad m'ooj ngon, na ngekõnduba kuj lom i Eliejer kɨ Damasɨt. 3Abram el tɔ an: Adɨm kohm al, na oo ɓer'n oojɨna kam ndogt lom la a i ngekõnduba lom ye. 4Kamla Bɨraɓe ela ta 'nten an: De'n non a õ nduba loi al, na ngon kami la a õ nduba loi ye. 5Bɨraɓe ɔrra kɨtɨga, na ela an: Un kumi kɨ dõ, i nɔl dɔrã, na i tɨda kɔr kɨmẽg, ĩla asɨ tɨda kɔrd Bɨraɓe ela tɔ an: Titbe la kohi a ĩn ye. 6Abram ad kamɨn Bɨraɓe kɨtɔ'n non la Bɨraɓe ooan det kɨ denesew.
7Bɨraɓe el Abram an: Mĩ la mĩ Bɨraɓe, m'tee sei kɔ kam ɓebo. Urt kɨ dɔning Kalde kɨtɔkad m'adi dɔning 'nten nyakagɓeit. 8Abram tur an: Bɨraɓe Luwah, titbãi m'a m'ger kad m'a m'ngaa a? 9Na Bɨraɓe ela an: I hɔ mand mang kɨ ɓala i mɨta, kɨ mand bĩã kɨ ɓala i mɨta, kɨ bal bat kɨ ɓala i mɨta, kɨ derngɔt, kɨ derr kul kɨdu adɨmd. 10Abram hɔ dãg'n non tube ada, na gangd dene joo joo, na ndah derr kɨkɨɗa sumba na kɨ kɨmad, na gang yelg dene al. 11Yelg kɨ ngésadã udɨn dɔ nin dãgt'n non, na Abram tuɓad kɔ. 12Na ji kàd kudt ye, ɓi tɔl Abram, na oo ɓool kɨbobe kɨ til kɨdiw kirir son dɔat.
13Na Bɨraɓe el Abram an: kɨ i ger maj, kad ngakai a ndɨn kam dɔningt mad kɨ i lod al. A ɗand ɓer tit, na deg a dan kumd ndo ɓal ɓusɔɔ. 14Na m'a m'gangta dɔ girrdegt'n a ɗand kɨlaɓert, nõbe, a teen kɨ nyag ngãi jidt. 15Na ĩ Abram, a aw kɨ kam kɨsokɨber ro bɔwigt, a duwɨn go teli bɨgat bugum. 16Kaglot lo ngaka kɨkõsɔɔ, ngakai a tel ɗen lot 'nten gog, kɨtɔ ɗagootal lo Amoriag asɨ loa al ɓaitɔ.
17Kàd ud woi na kam tilt, oon gajo kɨ su sah, kɨ horrg ndɔ jurjur tɔin mbɨna dãgt kɨ gang nõ. 18Ndɔt'n non, Bɨraɓe un kɔn ad Abram, an: Mad dɔning 'nten ngakai ko bah kɨ Ejipt't mbã kɨ bahbot, bah Eprat't, 19kɨ dɔning lo Keniag kɨ lo Kenijiag kɨ lo Kadmoniag, 20kɨ lo Hetiag kɨ lo Perejiag kɨ lo Repaiag 21kɨ lo Amoriag kɨ lo Kananag kɨ lo Girgasiag kɨ lo Jebusiag.
Цяпер абрана:
Yaɓooda 15: MlL
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Mbai Bible Revision © Bible Society of Chad, 2015.