Judit 8
8
Ich'ejlel Judit
1Ya' ti tejklum Betulia ya' chumul abi juñtikil x-ixik ik'aba' Judit, jiñäch iyixik'al Merarí yik'ot ibuts ja'el juñtikil wiñik ik'aba' Us. Iliyi jiño'bäch iñojte'elob: José iyalobil Oziel, iyalobil Elcías, iyalobil Ananías, iyalobil Gedeón, iyalobil Rafaín, iyalobil Ajitob, iyalobil Elías, iyalobil Jilquías, iyalobil Eliab, iyalobil Natanael, iyalobil Salamiel, iyalobil Surisadai, iyalobil Israel.
2-3Jiñi Judit tsi' icha'le ñujpuñijel yik'ot juñtikil wiñik ik'aba' Manasés lok'emo'bä ti' ip'olbal iñojte'elob. Jiñi Manasés tsa' chämi ya' ti Betulia, che' ti yorajlel mi' tujk'el iwut jiñi cebada. Tsa' chämi cha'añ ka'bäl k'iñ tsa' ajñi ti' tojlel ik'äk'al k'iñ, che' woli ikäñtañ jiñi x-e'telob woliyo'bä ibuts buts kächob jiñi cebada. Tsa' mujki ya' ti lum ambä ti' t'ejl Ibleam yik'ot Dotán, baki ja'el tsa' mujkiyob jiñi iñojte'elob.
4Añix uxp'ejl ja'b yik'ot chäñp'ej uw bajñel chumul ya' ti yotot che' tsa' käle ti me'ba' jiñi Judit. 5Ya' chumul ti jump'ejl alä otot tsa'bä iyäk'ä ti melol ya' ti pam ikolem otot. Mi' ichäñ xoj jaykexambä ipislel cha'añ iyejtal che' añ ti me'ba'. 6Ti jujump'ejl k'iñ tsa' kaji icha'leñ ch'ajb. Kojach che' ti k'iñilel cha'añ k'aj oj yik'ot che' ti yochibal tsijibä uw yik'ot ti yañ takbä k'iñijel mu'bä imelob jiñi israelitajob ma'añik tsi' icha'le ch'ajb. 7Weñ it'ojol jax jiñi x-ixik. Ma'añ chuki añto yom, awilañ, jiñi Manasés iñoxi'albä wajali tsi' käybe ñukbä ichu'bä añäl. Añ icha'añ k'äñlemañbä yik'ot säklemañbä tak'iñ, wakaxtak, lumtak yik'ot x-ixikob yik'ot wiñikob iyaj e'telobä icha'añ. 8Che' ja'el, jiñi Judit tsi' chäñ ch'ujbi ikäñtesa Lak Ch'ujutat, ma'añik juñtikil mejlbä isu'beñ lekojbä imelbal.
9Jiñi Judit tsi' yu'bi bajche' jiñi xchumtälob tsi' icha'leyob t'añ ti' tojlel jiñi Ozías cha'añ ma'añix jiñi ja'. Che' ja'el tsi' yu'bi bajche' jiñi Ozías tsa' ilajayob it'añ cha'añ mi' iyäk' jiñi tejklum ti' tojlel asiriojob, che' ti' jo'p'ejlel k'iñ Lak Ch'ujutat ma'añik mi' ikoltañ jiñi tejklum. 10Che' jiñi, Judit tsi' choko majlel jiñi x-ixik iyaj e'telbä cha'añ mi majlel ipäy tilel jiñi Cabris yik'ot Carmis, jiñäch año'bä iye'tel ya' ti tejklum. 11Che'bä tsa' k'otiyob, Judit tsi' su'beyob:
—¡Yumäletbäla ti tejklum ti Betulia, u'biñla ti uts'at jiñi mu'bä ikajel ksu'beñetla! Jatetla, lekojax tsa' la' mele che'bä tsa' la' awälä la' t'añ cha'añ ma' kaj la' awäk' jiñi tejklum ti' tojlelob xts'a'leyajob che' Lak Ch'ujutat ma'añik mi' ikoltañoñla ti jo'p'ej k'iñ. 12¿Baki mi la' ataj la' aña'täbal cha'añ mi wersa k'ajtibeñ Lak Yum? ¿Awomla añumeñ ñusañla ti tojlel jiñi wiñikob bajche' Ch'ujutatäl? 13Jatetla, ma'añik chuki la' awujil, ¿Bajche' mi' la' cha'leñ tsätsbä xik'oñel t'añ ti tojlel Lak Yum machbä añik ip'isol ip'ätälel? 14Che' ma'añik käñä la' acha'añ chuki añ ti' pusik'al lak kpi'älob, ¿Bajche' mi' kaj la' akäñ chuki mi' ña'tañ jiñi Lak Ch'ujutat tsa'bä imele pejtelel chukitak añ?
»Mach che'ik bajche' jiñi kpi'älob, mach la' techbeñ imich'ajel Lak Yum. 15Jiñi ma'añik chuki mi imäktañ cha'añ mi' imel bajche' yom ti lak tojlel, mejl iyäl cha'añ ma'añik mi' ikoltañoñla ila ti jo'p'ej k'iñ. Jiñi Lak Yum añ ip'ätälel cha'añ mi' ikoltañoñla, yik'ot mejl iyäk'oñla ti chämel ti' tojlel jiñi mu'bä its'a' k'eloñla. 16Jiñ cha'añ mach la' aña'tañ axik' cha'añ mi' ik'extañ chuki mi' iña'tañ. Yom mi la' aña'tañ cha'añ jiñi Lak Ch'ujutat mach che'ik che' bajche' joñoñla; Lak Ch'ujutat ma'añik ibäk'eñ che' mi' ibäk'tesäñtel, mi muk'ik ijak' chuki mi' isu'beñtel imel. 17Jiñ cha'añ, chuki ñumeñ uts'at mejlbä lak kmel jiñäch mi lak k'ajtibeñla cha'añ mi' koltañonla, ¡Mejläch la käk' lak pusik'al cha'añ mi' ikaj ikoltañoñla! Mi yomäch Lak Yum ikoltañoñla, mi' kaj iñäch'täbeñoñla laj k'ajtiya.
18»Ti lak ktojlel añ chuki isujmbä: Wajalix che' ma'añix juñtiklel joñoñla mi' ich'ujutesañ chuki melbilbä icha'añ wiñikob. ¡Ti' pejtelel jiñi yumäñtel ma'añix majch mu'bä ich'ujutesañ jiñi kuybilbä ti ch'ujul! Jiñi lak ñojte'elob tsa'äch ich'ujutesayob, 19jiñ cha'añ Lak Ch'ujutat tsi' yäk'eyob itoj mulil. Ti jiñbä k'iñ jiñi xts'a'leyajo'bä ti lak tojlel käläxix tsa' itik'layob lak ñojte'elob: Tsa' xujch'ibeñtiyob pejtelel chuki añ icha'añ, ya'i tsa' tsänsäñtiyob. 20Ixku wäle, joñoñla kojach mi lak ch'ujutesañ isujmbä Lak Ch'ujutat. Jiñ cha'añ ya'äch añ lak pijtaya ti' itojlel cha'añ ma'añik mi' ikajel ibajñel käyoñla.
21»Mi' tsa' ich'ämäyob xts'a'leyajob jiñi lak tejklum, che' jiñi pejtelel Judea ti' joytilel mi' kaj ilaj jisäñtel ja'el, yik'ot mi' ikaj ilaj xujch'iñob majlel chuki añ ya' ti ch'ujulbä ajñibäl icha'añ Lak Ch'ujutat. Mi che'äch mi' yujtel che' bajche' jiñi la'ix chämikoñla, awilañ, añächix ti lak ktojlel chuki mi ikaj iyujtel. 22Awilañ, Lak Ch'ujutat mi kajel ijok'chokoñ ti lak tojlel mi tsa' chämiyob yik'ot mi tsa' ajk'iyob ti majtañ e'tel jiñi lak pi'älob, yik'ot che' mi' ijisäñtel lak lumal. Mach jiñik jach jiñi, awilañ, jiñi xts'a'leyajob, mi kaj itse'tañoñla, ya'i mi' kajel iyäk'oñla ti kisiñ. 23Jiñi Lak Ch'ujutat mi' kaj ik'äñ jiñi tsätsbä e'tel ti lak tojlel cha'añ mi' ku'biñla kisiñ, jiñ cha'añ mach mejl lak pijtañ cha'añ uts'at mi' kaj laj kajñel.
24»¡La' lak kpäs-eñob jiñi lak pi'älob jump'ejl xuk'ulbä käñtesa! Añ ti lak tojlel jiñi ikuxtälel lak pi'älob, yik'ot jiñi ch'ujulbä ajñibäl icha'añ Lak Ch'ujutat cha'añ ma'añik mi ijejmel.
25»¡La' lak käk'eñ wokolix iyälä Lak Ch'ujutat, jiñäch tsa'bä iyäk'äyoñla k'el lak pusik'al, che' bajche' tsi' imele ti' tojlel lak ñojte'elob ti wajali! 26La' k'ajtiyik la' acha'añ chuki tsi' imele ti' tojlel Abraham, yik'ot bajche' tsa' k'elbeñti ipusik'al Isaac. Che' ja'el la' k'ajtiyik la' acha'añ chuki tsa' ujti ti' tojlel Jacob ya' ti Mesopotamia, che' woli ikäñtäbeñ itäñäme' jiñi iyichañ ik'aba' Labán. 27Jiñi Lak Ch'ujutat tsi' iyiläbeñtelob ipusik'al, cha'añ ñumeñ toj-añob chuki mi' imelob, che'äch woli imel ti lak tojlel wäle. ¡Mach yom mi' iyäk'eñoñla lak kilañ wokolil!»
28Che' jiñi, jiñi Ozías tsi' jak'ä:
—Tojäch at'añ, isujmäch chuki tsa'bä awälä. 29Mach kojik jaxto woli ku'biñet lojoñ ti t'añ che' mi' apäs aña'täbal. K'älä che' aläl xch'oketo tsa' apäsä ap'iplel yik'ot awutslel. ¡Ti' pejtelel wiñikob yik'ot x-ixikob ilaj yujilob! 30Awilañ, yom mi' ik'otel aña'tañ cha'añ lak kpi'älob woliyob ti chämel ti tikiñ ti'. Jiñ cha'añ ma'añix bajche' tsa' mejliyoñ cha'añ mik laje' lojoñ kt'añ. Wäle mach mejloñix lojoñ kwäläk sutk'iñ lojoñ t'añ. 31Kome jatet juñtikil x-ixik ka'bälbä iñopbal ti Lak Yum, yom mi' ak'ajtibeñ cha'añ mi' chok tilel ja'al, cha'añ mi' bujt'el jiñi yajñib ka'al lojoñ. Che' jiñi ma'añix mik chämel lojoñ ti tikiñ ti'.
32Che' jiñi, jiñi Judit tsi' jak'ä:
—U'biñla ti uts'at chuki mi kaj ksu'beñetla. Wäle mi kaj kmel jiñi e'tel mu'bä ikajel ichäñ k'ajtisäñtel ti' pejtelel k'iñ ti lak tejklum. Pejtelel jiñi tatälob mi' ikaj itsiktesäbeñob iyalobilob. 33Kukula ti ili ak'älel ya' ti kolem ochibal cha'añ tejklum, ya'i mi' kaj la ak'eloñ ti lok'el majlel kik'ot juñtikil x-ixik jkaj e'telbä. Che'äch mik su'beñetla che' maxto ts'äktiyem jiñi ijo'p'ejel k'iñ, jiñi Lak Ch'ujutat mi' kaj ikoltañ Israel tij kaj cha'añ tsa' kmele jke'tel. 34Mach yomik mi la' k'ajtiñ chuki jiñi mu'bä kaj kmel, mi kaj la' akäñe' che' tsa'ix kmele jiñi tsa'bä kña'ta.
35Jiñi Ozías yik'ot x-e'telob tsi' isu'beyob:
—¡Kuku ti ñäch'tälel apusik'al! ¡La' ikäñtañet jiñi Lak Yum yik'ot la' ik'äñet cha'añ mi' ajisañ jiñi xts'a'leyabä ti lak tojlel!
36Che' jiñi tsa' lok'iyob majlel ya' ti' iyotot jiñi Judit, ya'i tsa' cha' sujtiyob majlel ya' baki añob iye'tel.
Цяпер абрана:
Judit 8: CholDc
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Biblia Chol de estudio con DC- Derechos reservados por SBM