Judit 7
7
Jiñi Holofernes tsa' kaji ijisañ Betulia
1Che' ti yijk'älel, jiñi Holofernes tsi' ixik'i iyaj jisayajob yik'ot jiñi yaño'bä xjisaya tsa'bä iyotsayob ibä ti itojlel cha'añ tsoltsolñeyob mi' majlelob k'äläl ti Betulia. Tsi' ña'tayob cha'añ ya' mi' imäktañob säyäljachbä bij ambä ya' ti wits yik'ot cha'añ mi' jisäñtel jiñi israelitajob.
2Jiñi iyaj jisaya jiñi Holofernes añäch che'bä jo'lujunpijk (120,000) xjisayajob yik'ot ojlil icha'pijk (16,000) wiñikob k'ächälo'bä ti kawayu'. Ma'añik tsikbilob jiñi mu'bä icha'leñob kuchijel yik'ot pejtelel jiñi wiñikob ti' yokbä woliyob itsäkleñob majlel. Ti jiñi jachbä k'iñ tsa' kajiyob ti lok'el majlel k'äläl ti Betulia.
3Che'bä tsa' k'otiyob ti t'ejl jiñi tejklum, tsa' imeleyob ilejchempat ti t'ejl jiñi ja' ambä ya' ti joktäl. Weñ oño'bäch jiñi xjisayajob, jiñ cha'añ tsa' ilaj bujt'uyob jiñi joktäl. Jiñi lejchempat tejchem ti Dotán k'äläl ti Ibleam, yik'ot tejchem ti Betulia k'äläl ti Ciamón, ambä ti' tojel Esdrelón.
4Che'bä tsi' k'eleyob jiñi israelitajob jiñi bajk'äl xjisayajob, käläxix tsa' kajiyob ti bäk'eñ, tsa' kaji isu'beñob ibä: «¡Ili xjisayajob mi' kajel ilaj jisañob ti' pejtelel pañämil! Ka'bälo'bäch jiñi xjisayajob, mi jiñik witstak mi jiñik joktäl mi jiñik chañbä witstak mi' kaj ilät'beñ jiñi iyalelob».
5Che' jiñi, jiñi israelitajob tsi' ich'ämäyob iye'tijib cha'añ tsäñsaya, tsi' itsuk'uyob k'ajk ya' ti chañbä ts'ajk, ya'i tsa' kajiyob ti käñtaya k'äläl che' tsa' ñumi ak'älel.
6Ti' yijk'älel, jiñi Holofernes tsi' choko majlel pejtelel k'ächälo'bä xjisayajob cha'añ mi icha'leñob xämbal ñumel ti' tojlel jiñi israelitajob ya'bä chumulobä ti Betulia. 7Che' ja'el tsa' kaji ik'elob jiñi bijtak mu'bä ik'otel ya' ti tejklum, tsa' ikäyä xjisayajob wolibä ikäñtañob melbilbä iyajñib ja' ya'bä añ ti' pat jiñi ts'ajktak. Ti wi'il, tsa' cha' sujti majlel ya' baki much'ulob jiñi xjisayajob icha'añ.
Chuki tsa'bä iña'tayob cha'añ jisaya
8Jiñi yumälob cha'añ xjisayajob tilemo'bä ti' tejklum Edom, Moab yik'ot jiñi tejklumtak ya'bä añtak ti ti' kolem ñajb, tsa' majli ik'elob Holofernes, tsi' isu'beyob:
9«Jatet kyumetbä lojoñ, awokolik ñäch't'añ jump'ejl xik'ojel mu'bä kaj käk'eñet lojoñ, cha'añ ma'añik mi' juñtikilik jiñi awiñikob xjisaya'bä acha'añ mi' kaj ti chämel. 10Jiñi israelitajob mach ya'ik ñukob ipusik'al ti ye'tijibäl cha'añ tsäñsaya, cha'añ chumulob ti chañbä wits, ya' baki wokol mi' lak mejlel ti letsel. 11Jiñ cha'añ, kyum, mi jatet ma'añik mi' acha'leñ jisaya bajche' woli iña'tañob, mi kaj ak'el bajche' mi' juñtikilik xjisayajob acha'añ mi' kaj ti chämel.
12»Chuki yombä mi amel jiñäch cha'añ ma' akälel wä'i ti lejch'empat awik'ot xjisayajob acha'añ. Che' jiñi, mi muk'äch awäk'eñoñ lojoñ at'añ, mik majlel lojoñ yik'ot mik ñup'elojoñ jiñi iyajñib ja' ya'bä mi' ipasel ti' ye'bal wits. 13Ya' ti jiñi melbilbä iyajñib ja' mi ich'ämob ja' pejtelel jiñi xchumtälob ya' ti Betulia, ixku che' ma'añobix icha'añob jiñi ja', mi' ikajel iyäk'ob ibä cha'añ ma'añik mi' ichämelob ti tikiñ ti'.
»Che' wolix iyäk'ob ibä, mi kaj kletsel lojoñ majlel yik'ot xjisayajob ya' ti ipam jiñi wits, ya'i ma'añik majki mi kaj käk' lojoñ lok'el majlel ya' ti tejklum. 14Jiñi wiñikob yik'ot x-ixikob yik'ot alp'eñelob chumulo'bä ti Betulia mi' ikajel iyajlelob ti chämel ti wi'ñal ya' ti bijtak icha'añ tejklum. Ma'añik mi kaj k'äñbeño'la lak p'ätälel cha'añ mi lak kjisañob. 15Che'äch bajche' jiñi, jatet mi' kaj awäk'eñob jiñi toj mulil tsa'bä ichobejtäyob, ti' kaj cha'añ ma'añik tsi' iyäk'äyob ibä che' tsa' k'ajtibeyob ti uts'at».
16Jiñi Holofernes yik'ot jiñi iyaj tik'ojelob icha'añ tsi' ich'ujbiyob jiñi t'añ, ya'i tsi' cha'leyob xik'ojel cha'añ mi' ich'ujbiñtel chuki tsa' ajli. 17Che' jiñi xtsäñsayajob icha'añ moabitajob yik'ot uxlujunbajk' (5,200) asiriojob, tsa' lok'iyob ya' ti lejch'empat, che' tsa' k'otiyob k'äläl ya' ti joktäl tsi' ich'ämäyob jiñi melbilbä yajñib ja' icha'año'bä israelitajob.
18Che' ja'el, jiñi iyaj jisayajob edomitajob yik'ot jiñi amonitajob tsa' letsiyob majlel ya' ti wits yik'ot tsi' imeleyob ilejchempat ya' ti' tojel Dotán. Tsi' ichokoyob majlel ja'el xjisayajob cha'añ mi' yajñelob ya' ti it'ejl Egrebel, läk'äl ya' ti Cus, ya' baki añ melbilbä iyajñib ja' icha'añ Mocmur. Ikolojbal jiñi xjisaya'bä asiriojob tsa' iwa'chokoyob ilejchempattak ya' ti joktäl. Weñ ka'bälob jiñi xjisayajob, yik'ot lejchempattak yik'ot ichu'bä añäl, jiñ cha'añ but'uläch tsa' käle jiñi joktäl.
19Che'bä jiñi israelitajob tsi' ik'eleyob cha'añ joy mäktäbilobix, yik'ot che' ma'añix bajche' yom mi' iputs'ijelob, tsa' ochi ich'ijiyemlel ipusik'al, wo'okñeyob tsa' kaji ik'ajtiñob ikoltäñtel ti Lak Ch'ujutat.
Jiñi asiriojob tsa' ijoyiyob tejklum Betulia
20Pejtelel jiñi xjisayajob asiriojob, tsi' joy mäktayob jiñi tejklum Betulia k'äläl ti chäñlujump'ejl icha'k'al (34) k'iñ.
Jiñi xchumtälob ya' ti tejklum ti se'el tsa' jiliyob iya'al, 21awilañ tsa' kaji ti tikiñ ya' baki mi' ilotob. Jiñi xchumtälob ts'itajax tsa' kaji ijapob jiñi ja' ti jujump'ejl k'iñ, ma'añik mi' ijastiyel cha'añ mi' lajmel itikiñ ti'. 22-23Jiñi alälob, jiñi x-ixikob yik'ot jiñi ch'itoñob tsa' kajiyob ti yajlel ti k'uñ-añ ya' ti yojliltak yik'ot ya' ti ti'tak jiñi tejklum. Jiñ cha'añ, jiñi xchumtälob ya' ti Betulia, ti' kaj ich'ijiyemlel ipusik'al, tsa' majliyob isu'beñob jiñi yumäl Ozías yik'ot x-e'telob icha'añ tejklum. Tsi' yäläyob:
24«¡La' iyäk'eñetla atoj la' mul Lak Ch'ujutat cha'añ tsa' atik'layoñ lojoñ! Jatetla ma'añik tsa' ach'ujbi la' mel jump'ejl t'añ cha'añ ñäch'tälel ti' tojlel asiriojob, 25wäle ma'añix majki mi' mejlel ikoltañoñ lojoñ. Awilañ, jiñi Lak Ch'ujutat tsa'ix iyäk'äyoñ lojoñ ti ik'äb jiñi xts'a'leyajob, muk'ix jkajel ti chämel lojoñ ti tikiñ ti' ti itojlelob ¡Mi' kaj ilaj jisañoñ lojoñ ti kpejtelel! 26Päyäyob tilel jiñi asiriojob yik'ot ak'beñla jiñi tejklum ti' pejtelel, cha'añ jiñi iwiñikob Holofernes yik'ot iyaj jisaya icha'añ mi' ilaj ch'ämob chuki yomob. 27Mach komik jk'el lojoñ bajche' mi' chämel jiñi kalobilob yik'ot x-ixikob; ñumeñ uts'at che' mi' sutk'iñ lojoñ ti tsätsbä e'tel ti itojlelob. 28Lak Ch'ujutat woli iyäk'eñoñla toj mulil cha'añ tsa' lak kcha'le mulil, yik'ot cha'añ imulil icha'añobä lak ñojte'elob. ¡Cha'añ ti' k'uxbiya Lak Ch'ujutat, mach awäk'oñ lojoñ ti chämel!»
29Ti' pejtelel ya'bä tempäbilob tsa' kajiyob ti uk'el cha'añ o'bolel ipusik'alob. Tsa' kajiyob ti k'ambä t'añ ik'ajtiñob ikoltäñtel ti Lak Ch'ujutat.
30Che' jiñi, jiñi Ozías tsa' kaji isu'beñob:
—¡P'ätesañ la' pusik'al kpi'älob! La'to lak lät' jo'p'ej k'iñ, jiñi Lak Ch'ujutat mi' kaj iyäk' k'uxbiya ti lak tojlel. ¡Jiñi Lak Yum ma'añik mi' kaj ikäyoñla! 31Mi tsa' ts'äktiyi jo'p'ej k'iñ Lak Ch'ujutat ma'añik tsi' koltayoñla, mi' kaj kmel chuki woli ak'ajtibeñoñla.
32Ti wi'il tsa' kaji ichokob sujtel yik'ot tsi' su'beyob cha'añ mi' cha' majlelob baki añ ikäñtaya ti jujuñtikil. Che' jiñi, jiñi wiñikob tsa' majliyob ba'añ ts'ajktak yik'ot ya' ti chañbä k'eloñibäl otot ambä ya' ti tejklum, ya'i jiñi x-ixikob yik'ot alälob tsa' majliyob ti' iyototob. Awilañ, ti' pejtelel tejklum añ ka'bäl k'ojolel yik'ot ch'ijiyemlel.
Цяпер абрана:
Judit 7: CholDc
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Biblia Chol de estudio con DC- Derechos reservados por SBM