Lúù 2
2
Zízɛ̀ ye‐gã̀
(Máfìù 1.18-25)
1Lúó e kília káa, Sízà Àgásà e wè‐vɔ dɔ lɛ̀ séĩ́ mɔ̀ weeá kélɛ̀, mia séĩ́ lɛ́ o kɛ Wólómà‐mìà zì sɛ́lɛ́ séĩ́ yía, lɛ o mɔ̀ o tɔ́ bɛ̃̀ɛ̃ɛ̃̀ é kɛ à ká kii yí. 2Lɛ̀ o kɛ mia lóní bèĩzɛ̀ e kéa ɓopìàa, Kɔ̀línìà e kɛ sɛ́lɛ́ líé‐sí‐mì ká Sílìà. 3Mia séĩ́ o ló o pà píé, kɛ ó o tɔ́ bɛ̃̀ɛ̃.
4Zósɛ̀ e gó Názàlɛ̀‐pɛ̀lɛ̀ lɛ́ e sɛ́lɛ́ lɛ́ ò si Gálàlíìa yí, áà lò Zùdíà. E ló à pɛ́lɛ yé ò si Bɛ́féléhɛ̃́ɛ̃̀, lɛ́ e kɛ Dèɓé ye‐pìà káa lɛ̀ mɔ̀. Zósɛ̀ e ló yi, ɓii e kɛ Dèɓé sùu‐là‐mì ká. 5Zósɛ̀ wà Melé, lɛ́ o wè dɔɔ̀ e kɛá kɛ ó o kíe sía, o ló kɛ ó o tɔ́ bɛ̃̀ɛ̃. Melé e kília, gí e kɛ à mɔ̀. 6Lɛ̀ o kɛ yía, lúó e ɓɔ gbaa kɛ Melé é la. 7E e gbe bèĩzɛ̀ ye gbaa à lɛ̀ mɔ̀. E sɔ kpɛ́nɛ́ à ká, e à wɔɔ tòlò‐pɛ̀ léɓèlè‐à‐yí‐pɛ̀ yí, ɓii wɔ̀lɔ̀ gbɛɛ lɛ̀ɛ́ gbaa kɛ ɓe o lɛ̀ɛ lɔ̀ɔ̀‐mìà wɔ̀lɔ̀‐kpɔ́‐kà wìa mɔ́ɔ̀ wɔ̃̀ mɔ̀.
Nyìɛ‐kɛ̀‐ɓáá‐mɔ̀‐mìà wà Wálà là vɔ‐mìà
8Nyìɛ‐kɛ̀‐ɓáá‐mɔ̀‐mìà dò o kɛ sɛ́lɛ́ e kília yí lɛ̀ dò mɔ̀. O kɛ yɛ̀í là, wáà o nyìɛ kɛ̀ wà ɓáá vɔ̀ mɔ̀ bĩ́míà. 9Ko Dàa‐mì là vɔ‐mì e ɓíé o là. Ko Dàa‐mì zì lɛ̀‐fɔ̀nɔ‐kɔ̀ e lɛ̀ fɔ̀nɔ o bà. O paà e kɛá túó ká. 10Kɛɛ vɔ‐mìa a gèe o lɛ̀ɛ, “Yékɛ̀ ká túó. M nuà lɛ zèe kɛ ḿ wɔ̃́ làṹ yiè gèe ka lɛ̀ɛ. Wɔ̃́ làṹ e kília, lɛ́ɛ̀ lo nuù géli gbùò kpó‐kpó ká mia séĩ́ là. 11Lúó e kéa káa, waà ka La‐mì ye Dèɓé pà. Ye lɛ́ e Kɛ́lɛ̀ì mia Dàa‐mì káa. 12Pɛ́ è lo à kɛɛ̀ ka lɛ̀ɛ wánà zɛ̀ɛ, gɛ̃̀ e ké. Káà lo nɛ́fú dɛɛ lɛ́ sɔ kpɛ́nɛ̀ lɛ à káa gɛ̃̀ɛ̃̀ wɔ̀ɔ̀á tòlò‐pɛ̀ léɓèlè‐à‐yí‐pɛ̀ yí.”
13Nɔ́ zá lea, Wálà là vɔ‐mìà kù gbùò zɛ̀ o gó Wálà‐pà, o dà gbaa vɔ‐mì bèĩzɛ̀ɛ bà. O kɛ Wálà tɔ́ ɓɔpìà, wáà gèè,
14“Tɔ́‐ɓɔ è kɛ Wálà kɛ̀lɛ̀ e pà lɛ̀í.
Zò‐yà‐gé è kɛ mia lɛ́ o kpóṹ là, lɛ́ à zò è dà o píéa kɛ̀lɛ̀.”
15Lɛ̀ lɛ́ vɔ‐mìàa o gó o píé, lɛ́ o ló gbaa o mɛ̀ĩ́ lɛ̀ía, nyìɛ‐kɛ̀‐ɓáá‐mɔ̀‐mìàa wa gèe o kíe nì lɛ̀ɛ, “Kɔ̀à lo Bɛ́féléhɛ̃́ɛ̃̀, kɔ́á wɔ̃́ lɛ́ à kɛɛ̀ lɛ, lɛ́ kɔa Dàa‐mì aà gèe kɔa lɛ̀ɛ gɛ̃̀.”
16À mɔ́ɔ̀ wɔ̃̀ mɔ̀ɔ, o ló tíè‐tíèe, o ɓɔ Melé wà Zósɛ̀ o mɔ̀. O nɛ́fúa gɛ̃̀ wɔ̀ɔ̀á tòlò‐pɛ̀ léɓèlè‐à‐yí‐pɛ̀ɛ yí. 17Lɛ̀ nyìɛ‐kɛ̀‐ɓáá‐mɔ̀‐mìàa o à gɛ̃̀ɛ, o wɔ̃́ lɛ́ vɔ‐mìa a gèe o lɛ̀ɛ é gbɛ̃̀á nɛ́fúa mɔ̀ɔ, o gbɛ̃̀ wáà gèè o lɛ̀ɛ. 18Wɔ̃́ lɛ́ nyìɛ‐kɛ̀‐ɓáá‐mɔ̀‐mìàa wa gèe míáa lɛ̀ɛ, e à kɛ mia séĩ́ lɛ́ wa maa lé e pa kpó‐kpó ɓo. 19Kɛɛ Melé e wɔ̃́ nì e kília kpɔ́ e gé, áà e yɛ́lɛ́ tàà à mɔ́ɔ̀ wɔ̃̀ yí. 20Nyìɛ‐kɛ̀‐ɓáá‐mɔ̀‐mìàa o yɛ́ o zí, wáà lò Wálà tɔ́ ɓɔ̀á sí, ɛ̃́ɛ̃́ wáà à tɔ́ kɛ̀ gbùò, wɔ̃́ séĩ́ lɛ́ waà gɛ̃̀, ɛ̃́ɛ̃́ lɛ́ waà maa mɔ́ɔ̀ wɔ̃̀ mɔ̀. Wɔ̃́ nɔ́ doó lɛ́ vɔ‐mìa a gèe o lɛ̀ɛ, lɛ́ à kɛɛ̀ e kɛ à káa.
O Zízɛ̀ tɔ́ kpɔ́
21Lɛ̀ lɛ́ lúó e die sálàka, lɛ́ nɛ́fúa bɔ̃́ɔ̃́‐sí‐lùò e ɓɔ à mɔ̀ɔ, o à tɔ́ kpɔ́ Zízɛ̀. Tɔ́ e kéa lɛ́ vɔ‐mìa a kpɔ́ à mɔ̀, kɛ bɛ̃̀ɛ̃ à lèe é tĩã́ à gí síìa.
O Zízɛ̀ nɔ Wálà lɛ̀ɛ Wálà‐kà wì
22Lúó e ɓɔ gbaa à mɔ̀ kɛ Zósɛ̀ wà Melé ó wɔ̃́ lɛ́ Móózè là Lɔ́ɔ̀ɔ à gèea kɛ. Ye lɛ́ e kélɛ̀, kɛ ó wɔ̃́ lɛ́ e kɛ o mɔ̀ ó kɛ, kɛ é o kɛ púlú Wálà lɛ̀ɛ, kɛ‐wɔ̃̀ káa. À mɔ́ɔ̀ wɔ̃̀ mɔ̀ɔ, o nɛ́fúa sí, o ló à ká Zùlúsàlɛ̀, kɛ ó à nɔ ko Dàa‐mì lɛ̀ɛ yí. 23Wɔ̃́ lɛ́ à bɛ̃̀ɛ̃ɛ̃̀ lɛ ko Dàa‐mì là lɔ́ɔ̀ɔ yía lɛ́ ɓɛ. A gèe kélɛ̀, “Nɛ́ gɔ̃à zɛ̀ séĩ́ lɛ́ o nɛ́ líé káa, lɛ à mɔ̀ ó o nɔ ko Dàa‐mì lɛ̀ɛ.” 24O ló kɛ ó sálà ɓo zi lɛ́ ko Dàa‐mì là lɔ́ɔ̀ɔ à gèe à káa ká. A gèe ó sálà ɓo tèŋè kpátálá pèèlɛ ká. Yé ye wá kília, ò à ɓo kúííà tèŋè gbɔ̃̀ũ̀ gbɔ̃̀ũ̀ pèèlɛ ká.
25Gɔ̃ doó e kɛ Zùlúsàlɛ̀. Óò à si Símìà. E kɛ mi kpeĩ, ɛ̃́ɛ̃́ à zò e kɛ gágà gbìnì‐Wálà‐lɛ̀ɛ pìà. E kɛ yàá lúó lɛ́ Éézɛ̀lɛ̀ è lo la‐ɓo sɔ̀lɔ̀ ɓoò à káa gɛ̀nɛ̀. Gɛ̀ɛ̀ Púlú e kɛ à píé. 26Gɛ̀ɛ̀ Púlú aà à zɔ̃̀ɔ̃̀ à lɛ̀ɛ kélɛ̀ lɛ̀ɛ́ ló gaà yé lɛ̀ɛ́ ko Dàa‐mì là Kɛ́lɛ̀ì gɛ̃̀ nɛ́ɛ ká. 27Gɛ̀ɛ̀ Púlú a kɛ Símìà e ló sálà‐ɓò‐Wálà‐lɛ̀ɛ‐kà wì. Lɛ̀ lɛ́ nɛ́fú lɛ́ ò si Zízɛ̀ɛ, mìà nì o ló à ká Wálà‐kàa wì, kɛ ó wɔ̃́ lɛ́ lɔ́ɔ̀ɔ à gèe ó à kɛɛ, kɛ ó kɛ à lɛ̀ɛ, 28Símìà e nɛ́fúa kpɔ́ e kɔ̀ là. E Wálà zúo ɓo, áà gèè,
29“Dɛɛ ká gbaa, m Dàa‐mì, ɓaà ɓɔ i zì wè‐dɔ‐wè mɔ̀ gbaa.
Íì bɛ̀i à mɔ̀ í à tó má m ɓà yɛɓo‐kɛ‐mì káa, ḿ ló zò‐yà‐gé yí.
30-31Maà i zì mia la‐zì lɛ́ ɓaà pɛ̀ kɛ sɛ́lɛ́ gbɛɛ̀ gbɛɛ yí‐mìà séĩ́ nyìɛ mɔ̀ɔ, gɛ̃̀ m nyìɛ ká.
32Lɛ lɛ̀‐fɔ̀nɔɔ̀ɔ lɛ́ lɛ ɓe kɛ é lɛ́ɛ́ ɓo ɓà zía là, tó sɛ́lɛ́ gbɛɛ yí‐mìà wáà gɛ̃̀ɛ ká,
ɛ̃́ɛ̃́ kɛ é nu tɔ́‐ɓɔ ká ɓà mia nì, lɛ́ o Éézɛ̀lɛ̀‐mìà káa làa ká.”
33Nɛ́fúa lèe wà à dàa o lé paà e kɛá wɔ̃́ lɛ́ Símìà a gèe, é gbɛ̃̀á nɛ́fúa mɔ̀ɔ mɔ́ɔ̀ wɔ̃̀ mɔ̀. 34Símìà e lúà kpɔ́ o mɔ̀, áà gèè Melé lɛ́ e nɛ́fúa lèe káa lɛ̀ɛ, “Lɛ̀ gɛ̃̀, nɛ́fú e kéa Wálà aà à sí, kɛ é à kɛ, kɛ Éézɛ̀lɛ̀‐mìà búnùzɛ̀ ó pèlè, ɛ̃́ɛ̃́ é à kɛ o búnùzɛ̀ ó dɔ o gã̀ mɔ̀. Lɛ́ɛ̀ lo kɛɛ̀ wɔ̃́ gɔ̃̀á lɛ́ mia búnùzɛ̀ ò lo mɛ́ĩ́ yɔɔ ɓoò à gbĩ mɔ̀ɔ ká. 35Zí e kéa káa, lɛ́ɛ́ lɛ́ɛ̀ lo ɓoò à ká o zì zò‐píé‐wɔ̃̀ lɛ́ à bĩ̀ĩĩ̀ lɛɛ là. Mi zò‐sìè‐mi‐gé wɔ̃̀ lɛ́ e kélɛ̀ gèlè‐gɔ̃‐làà lɛ́ ɓea, lɛ́ɛ̀ lo fɔ̃́ɔ̃̀ i dìè i zò yí.”
36Dɔ̀‐Wálà‐lé‐là‐mì lee zɛ̀ lɛ́ ò si Ánàa e kɛ yí. Léé e kília e kɛ Fánùɛ̀, lɛ́ e kɛ Ásà sùu‐là‐mì káa lú ká. Léé e kília, e kɛ lee kpáà ká. À gɔ̃ síì e kɛá pɛ́lɛ̀. Wà e dɛ̃ o kɛ o kíe píé kɛ̀ɛ̀ sálápèèlɛ píé. 37Lɛ̀ e kɛ kília, e kɛ gã̀ã ká kɛ̀ɛ̀ vũ̀ sálàka wɛ́lɛ́ yììsɛ píé. Lɛ̀ɛ́ gbaa kɛ gópìà sálà‐ɓò‐Wálà‐lɛ̀ɛ‐kàa wì. E gbini Wálà lɛ̀ɛ bĩ́ã́ ɛ̃́ɛ̃́ nyɛ́nɛ́ĩ́, áà lò e sṹũ yí, áà sɛ̀nɛ ɓò. 38Lúó nɔ́ e kília káa, lééa e nu yí. E Wálà zúo ɓo. Ɛ́ɛ̃́ e wɔ̃́ gèe áà gbɛ̃̀á nɛ́fúa gbĩ mɔ̀, mia séĩ́ lɛ́ o kɛ yàá Wálà là Zùlúsàlɛ̀ ɓò wɔ̃́ yí gɛ̀nɛ̀ɛ lɛ̀ɛ.
O yɛ́ o zí, o ló Názàlɛ̀
39Lɛ̀ o nyɛ wɔ̃́ séĩ́ lɛ́ ko Dàa‐mì là lɔ́ɔ̀ɔ à gèe ó kɛɛ, kɛɛ̀ mɔ̀ɔ, o yɛ́ o zí, o ló o pà Názàlɛ̀, lɛ́ e kɛ sɛ́lɛ́ lɛ́ ò si Gálàlíìa yía mɔ̀. 40Nɛ́fúa e fàa, ɛ̃́ɛ̃́ à mɛ́ e kɛ gágà. À paà e kɛá gíkã́ ká. Wálà là lúà e kɛ à là.
Zízɛ̀ e kɛ Wálà‐kà wì
41Kɛ̀ɛ̀ séĩ́ káa, Zízɛ̀ mìà nì o kɛ lópìà Zùlúsàlɛ̀ Dìè‐mia‐là Kpílìa kɛɛ̀ mɔ́ɔ̀ wɔ̃̀ mɔ̀. 42Lɛ̀ Zízɛ̀ kɛ̀ɛ̀ e kɛ vũ̀ doó wɛ́lɛ́ pèèlɛɛ, o ló kpílìa là zi lɛ́ ò loá teelea ká. 43Lɛ̀ lɛ́ kpílìa kɛ‐lùò e diea, o gbɛ̃̀ gbaa, wáà lò o mɛ̀ĩ́. Kɛɛ nɛ́fú lɛ́ ò si Zízɛ̀ɛ, e tó Zùlúsàlɛ̀. À mìà ni òó gbaa wɔ̃́ e kéa yí dɔ. 44O à gɛ̃̀ ɓɔ̀ɔ kélɛ̀ lɛ mia lɛ́ wà ye nì o kɛ lópìàa bà. O tááa ɓo lúó doó píé. O gbɛ̃̀ gbaa, wáà à nàà o mìà ni wà o ɓɛ́ĩ̀ nì fĩ̀ã̀ píé. 45Kɛɛ òó gbaa à gɛ̃̀. Wa mɔ́ɔ̀ yɛ́ ɓo o zí, o ló Zùlúsàlɛ̀ à naà ká. 46Lɛ̀ lúó yààka e diea, o à gɛ̃̀ sálà‐ɓò‐Wálà‐lɛ̀ɛ‐kà wì. E kɛ yàá pɛ‐zɔ̃̀ɔ̃̀‐mìà sɔ́nɔ́, áà e tóó dɔ̀ o mɔ̀, ɛ̃́ɛ̃́ áà wɛ̃́ĩ́‐lɔ̀ɔ kɛ̀ o kɛ̀lɛ̀. 47Mia séĩ́ lɛ́ o à wéè maa, o lé paà e kɛá à zì wɔ̃́ yí‐ɓo‐kɔ̀ kpálàa ɓɛ mɔ́ɔ̀ wɔ̃̀ mɔ̀. 48À mìà nì lé paà e kɛá lɛ̀ wa gɛ̃̀ɛ ká. À lòóò a gèe à lɛ̀ɛ, “Nɛ́fú, mɛ́ e kɛ lɛ́ ì wɔ̃́ sùua kɛ̀ ko ká? Kò i dàa ko zò aà dà zízàá kpó‐kpó ɓo i naà ká.”
49A gèe o lɛ̀ɛ, “Mɛ́ e kɛ lɛ́ kà mɔ́ɔ̀ m naa ɓo yo ɓɛ? Kàá à yí dɔ kélɛ̀ lɛ m mɔ̀ ḿ kɛ m Dàa píé kɛ́ì?” 50Kɛɛ òó gbaa wɔ̃́ lɛ́ a gee o lɛ̀ɛ yí ma.
51Lɛ̀ e kɛ kília, wà Zízɛ̀ nì o ló gbaa o mɛ̀ĩ́ Názàlɛ̀. Zízɛ̀ e e mìà nì wè kɛ à lɛ̀ mɔ̀. À lòóò e kɛ wɔ̃́ e kéa séĩ́ gɛ̀lɛ̀ kpɔ́pìà e kɔ̀ mɔ̀. 52Lɛ̀ e kɛ kília, Zízɛ̀ e fàa e gbĩ ká, ɛ̃́ɛ̃́ gíkã́ yí. Wálà wà mia ɓɔ̀ɔ nì o zò dàaà e kɛá à píé nɔ́ teele.
Цяпер абрана:
Lúù 2: MNT
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Mann New Testament © Bible Society in Liberia, 1978.