Marcos 14
14
Boe Eimijerage Ere Tumeardae Tawuje Tuwo Jesus Bito
1Merimode pobe dukeje Judeu doge emode tuwadae Páscoa towuje. Nou ewadae kejere emode ia tuge amireu tuginaiwu kowuje. Fermento metukare nou amireu tada. Čare nou ure Judeu doge enomea maku Pao Kurireu aiwuge eimijerage etaidure tuwo tugeragu Jesusji tuwo bito. Nou jorduware Judeu doge eno bakaru jiwuge etaidure tuwo Jesus bito jamedu. Mare etaidukare boe erduwawo nou tumeardae pegareuji. 2Emagore pui. Egore: – Pamode pageragu Jesusji nou Judeu doge ewadae keje dukeje boe ekorigodumode pai rugadu. Emode bato pui turo pegawo pai. Dukodire paromodukare aino ewadae keje.
Jesus Uture Boe Eda Betânia Ka
3Jesus rakojere boe eda Betânia keje Simão uwai tada. Nou Simão iere Biri Pegareu jamedu. Jesus mugure nono nou bai tada ira keje togwage tabo. Nono ia aredu aregodure Jesus ae poari rogu tabo. Boe ere nou poari towuje tori tabo. Nou tori iere alabastro. Roreboe mori kurireu meture nou poari rogu tada. Boe ere nou roreboe towuje nardo tabo. Nono ča nou aredu ure nou poari rogu jado. Ure nou roreboe redo Jesus aora joki. 4-5Boe erdure nou aredu roino duji dukeje iage emago pegare nou aredu roino Jesus jituji. Egore: – Awu aredu ro pegare. Ure nou roreboe barigu. Nou roreboe mori kurire rugadu. Boe emaragodumode jii joru akedu ka tuwo tugeragu nou diero kurireuji tuwo akirodo nou roreboeji. Kočare ukare nou roreboe maku diero bagai tuwo diero kurido tuwo maku marenarue doge etai?
Nono emago pegare nou areduji. 6Mare Jesus makore nou boei. Akore: – Tagaba awu aredu pogurudo rore iduji. Rore i du moture Pao Kurireu jakai. Mare paga karega. 7Marenarue doge edumode tagabo jii toro rugadu. Tagaidumode taro pemegawo ei dukeje taro pemegado ei tagaidure jiwu meri keje. Mare imire itumode tabiji rugadu. 8Awu aredu jorduware nou inoduji dukodire ure nou roreboe redo iogi tuwo iwiri udo turugadu ituguduwo mototo iwi keje. 9Ča iwo tawie boe remawuji. Awu aredu rore iboe akedumodukare boe etaora piji jii toro rugadu. Boe etumode moto jamedu boe parugajeje tuwo boe erduwado emeartoruwo i iwo ekinorudo dukeje ereadodumode awu aredu rore iduji boe eiamedu boe ewiagai. Dukodire boe ewiagodumodukare awu aredu piji rugadu jii toro rugadu.
Judas Iscariotes Akore Tumoduie Jesus Maku Boe Eimijerage Pegareuge Etai
10Nou Jesus ure jorduwadowu Judas Iscariotes uture toro nou ure Judeu doge enomea maku Pao Kurireu aiwuge eimijerage etae. Judas Iscariotes makore ei tumoduie Jesus maku etai. 11Egarere nou Judas Iscariotes makore pudui boeji rugadu. Dukodire egore tumoduie diero maku ai. Du nou meri pijire nou Judas Iscariotes aiwore Jesus rore jiboeji tuiorduwo tumode Jesus maku boe eimijerage pegareuge etaiwu meri bagai.
Jesus Okwagemode Páscoa Kejewu Boe Ekeji Ture Jorduwadowugebo
12Páscoa meri boetojiwu aregodure dukeje Judeu doge ere tagu carneiro doge kugure ewido tuwo tuge pemegado nono turo mogadure tuwaduwo Páscoaji. Nou meriji nou Jesus ure jorduwadowuge enarare Jesusji. Egore: – Kaiba čemode page pemegado pawo kowuje, pawaduwo Páscoaji?
13Nono Jesus ure tugeragu imei. Ere pobe. Ure jorduwadowuge nure emage. Makore ei. Akore: – Tadudo toro ba kurireu ka. Tagaregodumode toro dukeje ia imedu aregodumode tadogi ia pori po tabo. Tadudo nou imedu rekodaji. 14Umode turemo ia baito dukeje tanarado nou uwaire bai čewuji ia paedumodewu bagai. Tagagodo aino: “Pagimijera aidure ia tumugumodewu bagai togwagewo Páscoa kejewu boe ekeji ture jorduwadowugebo nou boe edureu tada.” 15Tamagomode aino dukeje nou uwaire bai čewu umode tardudo ia boe edu tadawu bai pemegareuji. Nou bai pemegamode rugadu pagwagewo Páscoa kejewu pageji. Nonore tamode page pemegado.
16Nou Jesus ure jorduwadowuge pobedu doge eture nou ba kurireu ka. Erdure nou boeji nono Jesus akoino jiboeji. Nono ere tuge pemegado tuwaduwo Páscoaji nou bai tada rugadu. 17Nou boečoji Jesus aregodure nouia ture jorduwadowugebo nou bai ka nou ime pobedu doge etae. Dukodire enodo padure doze nono Jesus apo. 18Emugure nono ira keje togwage tabo rugadu. Dukeje Jesus makore ei. Akore: – Iwo tawie boe remawuji. Tagwagere itabo woe mare ia tagi tamode imagu boe eimijerage pegareuge etai.
19Nou Jesus ure jorduwadowuge eiamedu boe ekiarigodure. Dukodire enarare Jesusji tu tu puregodaji. Egore: – I na akagoino? Imi na?
20Jesus akore: – Tare doze. Mare umode tuge amireu pegodo nou carneiro kaguru tabowu emare umode imagu boe ekimijerage pegareuge etai. 21Marigudu Pao Kurireu ure boe ewie iwimoduie duji. Nou Pao Kurireu bataru padure bapera keje. Aino čare iwimode nou Pao Kurireu meardae koia. Mare boe pegamode rugadu nou ure imagu boe eimijerage pegareuge etaiwuji. Botumodukare dukeje boe pegamodukare ji. Mare boture. Aino čare umode imagu boe eimijerage pegareuge etai dukodire boe pegamode ji rugadu.
Jesus Okwagere Ture Jorduwadowugebo
22Ča enogwage kimore. Jesus ure tugeragu tuge amireuji. Imadure Pao Kurireu bagai nou amireu paru tabo. Nono ure nou amireu kado dukeje ure pedo nou ture jorduwadowugei. Akore: – Tagwagedo awuji. Ikodu reo tawiabutuwo iwugeje, irore jiboe keje.
23Nono Jesus ure tugeragu vinho kuruji jamedu. Nono imadure Pao Kurireu bagai nou uva kuru paru tabo. Dukejere ure pedo ei jamedu ekuduwo če. 24Nono Jesus makore ei. Akore: – Ikure nou uva kuru rema. Iku redodumode boe eiamedu boe ero pegareu moriče. Pao Kurireu ure boe ewie marigudu tumoduie turo maiwu maku boe etai tuwo boe ekinorudo. Aino čare iku umode nou Pao Kurireu bataru jetudo pudui rugadu. Nou iku koiare umode meartorure Pao Kurireu jiwuge etawuje tuwobeče tuwo ekinorudo rugadu. 25Mare iwo tawie. Ikudumodukare awu vinho kuruče pugeje jii toro itaregodumode mato ibagi pugeje du ka. Itaregodumode pugeje dukeje boe eiamedu boe eimijera kurireu mode imi. Nono ikudumode vinho kuru maiwuče tagabo.
26Jesus akoino dukeje urare Pao Kurireu bataru tabo nou ture jorduwadowugebo. Nono ere tudawuje nou ba kurireu piji tuduwo toro Oliveira Ri ao ka.
Jesus Jorduware Nuba Pedro Akomode
27Jesus makore ture jorduwadowugei. Akore: – Taiamedu boe tamode tagera ra ipiji. Pao Kurireu ure boe ewie marigudu. Nou bataru padure bapera keje. Akore: “Pao Kurireu umode nou jeture boeiwu bito. Nono nou boe eiamedu boe emode taodo nou tugimijera piji nono ovelha doge ero mogadure.”#14.27 Awu bataru padure Zacarias 13.7 keje. 28Mare iewodumode pugeje dukeje itumode tagododai toro Galiléia moto ka.
29Pedro akore: – Nou iage emode tugera ra apiji mare imire iromodukare aino. Imodukare ikera ra apiji rugadu.
30Jesus makore Pedroji. Akore: – Imode awie boe remawuji. Awu boečoji rugadu akagomode arduwakaie i dumode pobe metia bokware rugadu. Dukeje čare kagariga kudugodumode.
31Mare Pedro aidukare awu Jesus akoino pudui duji. Akore: – Boro. Iwimode akabo mare imodukare iwadaru udo nono akago mogadure. Imodukare ikera ra apiji rugadu.
Ainore Pedro akore. Nono nouia Jesus ure jorduwadowuge egore nono Pedro ako mogadure jamedu.
Jesus Makore Baruto Pao Kurireu Bagai Getsêmani Moto Keje
32Nono Jesus aregodure ture jorduwadowugebo ia iguru jetureu ka. Nou iguru iere Getsêmani. Nono Jesus makore nou ture jorduwadowugei. Akore: – Tamugudo woe. Imagomode baruto Pao Kurireu bagai.
33Jesus ure tugeragu Pedroji, Tiagoji, Joãoji. Uture ebo kuri nono. Dukeje kiarigodu rakare. Jorduware boe pegamode pudui duji rugadu. 34Makore nou ture tugeragu jiwugei. Akore: – Ikiarigodu rakare rugadu. Rakare tuwo iwido rugadu. Ča tadu rugadu woe tamagowo baruto Pao Kurireu bagai.
35Nono Jesus ure tudaru gu epiji. Nono ure tubu jodo moto keje tumagowo baruto Pao Kurireu bagai. Makore Pao Kurireu bagai boe pegakawo pudui. Makore Pao Kurireu bagai uwo tumeardae mekido. 36Akore: – Iogwa Kurireu nure aki. Aromode boe jamedu boeji. Boe ero pegamode idu utudo piji. Mare ukawo nono itaidu mogadure. Mare uwo nono akaidu mogadure.
37Nono Jesus ure tugirimi nou ture jorduwadowuge ewagai. Mare kočare enudure. Nono Jesus makore Pedro bagai. Akore: – Simão Pedro! Anudure? Amagodo Pao Kurireu bagai itabowu hora uwo mitotu je mare kočare anudure kuri je.
38Nono Jesus makore eiamedu boei. Ere pobe metia bokware. Akore: – Tameardae pemegare. Mare taraga bokware. Aino ča tanudukaba pugeje. Tamagodo itabo Pao Kurireu bagai baruto bope ukawo tumeardae pegareu maku tagai taro pegakawo.
39Nono Jesus ure tudaru gu epiji pugeje. Nono makore baruto nono tumago mogadure boetoji pugeje. 40Nono Jesus ure tugirimi nou ture jorduwadowuge etae pugeje. Jordure ei enudu kimore duji. Norire ekuji rugadu dukodire enudure rugadu. Nono erduwakare tumagomode jiboeji pugeje.
41Nono Jesus uture epiji pugeje tumagowo baruto pugeje. Dukejere čare ure tugirimi etae pugeje. Nono makore ei. Akore: – Tanudu kimo nure rugadu kana? Urugadu. Aino čare imagudumode boe eimijerage pegareuge etai kuri aino rugadu. 42Ča taragojedo. Pugeje. Nou ure imagu boe eimijerage pegareuge etaiwu aregodu. Paduwo togi.
Boe Ekimijera Pegareuge Ere Tugeragu Jesusji
43Jesus mako kimore dukeje Judas Iscariotes aregodure etae. Jesus ure jorduwadowu nure ema. Aregodure boebo. Nou boe etaregodure tariga kurireu tabo. Etaregodure rago tabo. Boe ekimijerage ere nou boe etudo toro Jesus bagai. Nou ure Judeu doge enomea maku Pao Kurireu aiwuge ere nou boe etudo toro Jesus bagai. Jorduware Judeu doge eno bakaru jiwuge ere nou boe etudo toro Jesus bagai. 44Nou Judas Iscariotes makore nou boei tugimadumoduie Jesus apo, tumoduie togwa to je koduto tuwo nou boe pegareuge erdudo taidure tuwo tugeragu jiwu nure ema duji.
45Dukodire Judas Iscariotes uture kuri Jesus ae rugadu. Ukimadure apo rugadu. Akore: – Jorduwareu nure aki.
Nono Judas Iscariotes ure togwa to Jesus je koduto. 46Nono nou boe pegareuge ere tugeragu Jesusji turaga tabo. 47Mare ia Jesus ure jorduwadowu ure tugeragu tariga kurireuji. Ure ia imedu bija kado. Nou imedu nou ure Judeu doge enomea maku Pao Kurireu aiwuge ekimijera kurireu utugare nure ema. 48Mare Jesus makore nou boei. Akore: – Ire boe emeardae pegado kana emeartorukawo tugimijeragei kana? Ro pegareu karegure imi. Kočare tagaregodure tariga kurireu tabo rago tabo tawo tageragu i nono taro moga ro pegareuge eidu mogadure. 49Iragojere tagabo meri jameduji Pao Kurireu uwai tada. Ire boe erduwado nono. Mare tagare tageragu i. Mare aino čare Pao Kurireu bataru jeture pudui rugadu. Tagaregodure tawo tageragu i nono Pao Kurireu bataru mogadure.
50Dukodire Jesus ure jorduwadowuge eiamedu boe eregodure Jesus piji.
51Nou boe pegareuge eture Jesus apo dukeje ia iparedu uture eregodaji. Dukodire nou boe pegareuge etaidure tuwo tugeragu ji jamedu. Nou iparedu ukudau areiare mitotu je. 52Mare uture piji tuwo činorudo nou boe pegareuge epiji tuwiri kedo tabo.
Jesus Rakojere Judeu Doge Ekimijerage Egorai
53Nou boe ere Jesus reko toro Judeu doge ekimijera kurireu uwai ka. Nou ure Judeu doge enomea maku Pao Kurireu aiwuge ekimijera kurireu nure ema. Nouia Judeu doge ekimijerage edu nono jamedu. Ure Judeu doge enomea maku Pao Kurireu aiwuge ekimijerage nure iage. Jorduware Judeu doge eno bakaru jiwuge nure iage. Boe eimijerage paru towuge nure iage. 54Pedro kodu jaere boei tudu tabo Jesus rekodaji boe erdukawo pudui. Nono aregodure nou Judeu doge ekimijera kurireu uwai ka. Nou uwai kejere ure tumugudo nono tugobaigaregebo joru okwai. 55Nou bai ja tadare nou ure Judeu doge enomea maku Pao Kurireu aiwuge eimijerage edure. Nou Jerusalém kejewu Judeu doge eimijerage eiamedu boe edure nono jamedu. Eiamedu boe etaiwore ia Jesus ro pegareu bagai. Ewiapagare batrarodureuge ewadaruji taiwo tabo nou Jesus ro pegareu bagai. Etaidure tuwo Jesus bito. Mare erdukare ia Jesus ro pegareuji. 56Boe egore Jesus ro pegaie. Mare ewadaru kodukare puregodaji.
57Nono ia boe ewadrarodure pugeje Jesus roji. 58Egore: – Čemeardure awu imedu bataruji. Akore ime eie Pao Kurireu uwai towuje. Mare tumoduie Pao Kurireu uwai kurireu butudo dukeje merimoduie pobe metia bokware tuwo nou bai rakojedo pugeje. Ia ime karega. Pudumie tumoduie Pao Kurireu uwai rakojedo pugeje.
59Mare awu ime ewadaru kodukare puregodaji jamedu.
60Nono nou ure Judeu doge enomea maku Pao Kurireu aiwuge eimijera kurireu ure turagojedo. Makore Jesusji. Akore: – Amagomodukare nou ewadaru jipagi kana? Boe rugadu ji kana egoino rugadu?
61Mare Jesus makokare boeji. Nono nou ure Judeu doge enomea maku Pao Kurireu aiwuge ekimijera kurireu unarare Jesusji pugeje. Akore: – Umode boe ekinorudowu nure aki? Pao Kurireu Onaregedu nure aki?
62Jesus akore: – Imi rugadu. Mare iwo tawie Imedu Onaregedu romode jiboeji. Awu inodu otobiji tardumode i imugure Pao Kurireu ukana pemegareu jagwai duji. Tardumode i ire irawuje baru piji boetugu tabo duji.
63Ča nou ure Judeu doge enomea maku Pao Kurireu aiwuge eimijera kurireu ure tugudau areia mega bowuje tugorigodure dukodi. Dukodire makore tumedage boe eimijeragei. Akore: – Ča. Pameardure awu Jesus bataru pegareuji rugadu. 64Unure tudo nono Pao Kurireure. Pagare akoino. Mako peganure Pao Kurireuji rugadu. Dukodi čare nuba tameardaere? Nuba paromode ji?
Nou boe eimijerage eiamedu boe ere tumeardaedo nono nou boe eimijera kurireu meardae mogadure. Emeartorukare Jesus akoinoduji. Egore pagaie akoino. Jesus ro pegaie rugadu. Tumoduie Jesus bito. 65Nono ere todoguru barigu Jesus joki. Ere areia kogudo Jesus jegajeje. Nono ere boeto Jesusji. Egokodure ji. Egore: – Ioguduba roino ai?
Nono nou tugobaigarege ere tugeragu ji pugeje tuwo boeto ji.
Pedro Makore Tuiorduwakaie Jesusji
66Pedro rakoje kimore nono nou bawadu keje. Nou ure Judeu doge enomea maku Pao Kurireu aiwuge ekimijera kurireu utugare aredu kodure nono. 67Nou aredu jordure Pedroji. Pedro mugure nou joru okwai ture tugera urudo dutabo. Nou aredu aiwore ji. Akore: – Ature Nazaré kejewu Jesus apo jamedu.
68Mare Pedro akore: – Boro. Iorduwakare kaba jiba akagoino.
Nono Pedro uture nou bawadu kejewu bai poro ka. Nono ia kagariga kudugodure. 69Nono nou aredu makore ia boei. Akore: – Jowu imedu ia Jesus ure jorduwadowu nure ema rugadu.
70Mare Pedro akore pugeje tuiorduwakaie Jesusji. Ča Pedro rakoje kimore nono ji je. Dukejere ia boe emagore Pedroji pugeje. Egore: – Galiléia moto kejewu nure aki nono Jesus mogadure. Ia Jesus ure jorduwadowu nure aki rugadu.
71Mare Pedro mako pegare ei tumagomodukaie boe remawuji dukeje Pao Kurireu uiago boe pegado pudui. Akore: – Iorduwakare nou tagagoino jiwu imeduji rugadu.
72Čare rore puku kagariga kudugodure pugeje. Dukodire Pedro biabuture Jesus makore puduiwu tuwadaru keje. Jesus makore Pedroji makomoduie tuiorduwakaie pudui dukeje nou kagariga kudugodumoduie rugadu. Pedro makomoduie tuiorduwakaie Jesusji dumode pobe metia bokware rugadu. Aino ča Pedro biabuture nou Jesus bataru keje rugadu jeture pudui duji rugadu. Dukodire kiarigodure turo pegareuji. Dukodire ragudure.
Цяпер абрана:
Marcos 14: borBiblia
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Wycliffe Bible Translators, Inc.