Эклц 8
8
1Болв Бурхн Ноахин тускар, терүнлә кермд бәәсн цуг зерлг аңгудын болн малын тускар ухалв. Бурхн һазр тал сальк илгәнә, усн экләд татгдна. 2Һазр дор бәәдг ик булгуд хаагдна, теңгрәс хур ордган уурна. 3Усн һазр деерәс арһулхан хәрү татгдв. Зун тәвн өдр болад, 4доладгч сарин арвн доланла керм Араратын уулмудт ирҗ зогсна. 5Арвдгч сар күртл усн цаарандан татгдад бәәв. Арвдгч сарин түрүн өдрт уулмудын ора үзгдв.
6Дөчдгч өдртән Ноах кермд кесн терзән секәд, 7керә шовуг һазаран һарһна. Тернь һазр деерк усн хагстл, нааран-цааран нисәд бәәв. 8Дәкәд Ноах көглҗрһн шову һазаран һарһна. Тиигхләрн Ноах һазр деерәс усн татгдсинь медхәр седнә. 9Болв көглҗрһн суух орм эс олҗ чадад, хәрү Ноах тал нисч ирнә. Яһад гихлә усн цуг һазриг бүркҗ. Ноах һаран суңһад, көглҗрһиг хәрү кермдән авна. 10Дола хонад Ноах дәкн көглҗрһиг кермәс һарһна. 11Асхнднь көглҗрһн хәрү нисч ирнә, терүнә хоңшартнь шинкән таслҗ авсн олив модна хамтхас үзәд, Ноах һазр деерк усн татгдҗ одсиг медв. 12Ноах бас 7 өдр күләҗәһәд, дәкн көглҗрһиг һазаран һарһҗ нискәнә. Болв эн саамд көглҗрһн хәрү ирсн уга.
13Ноахин 601 насна негдгч сарин негдгч өдрлә һазр деерк усн хагсв. Керминнь бүркәг тер секәд, хәләһәд, һазр хагсч одсиг үзнә. 14Хойрдгч сарин хөрн доладгч өдрт һазр йосндан хагсч одв.
15Тер цагт Бурхн Ноахд иигҗ келнә:
16– Керм деерәс чи, чини гергн, чини көвүд, теднә гергд буутн. 17Чамла йовсн шовудыг, малмудыг болн цуг мөлкдгүдиг, әмтә-киитә тоотыг һазаран һарһ. Һазр деер тедн тооһарн олн болад, өсч йовтха.
18Ноах эврәннь көвүдтәһән, гергтәһән болн эврәннь берәчүдтәһән һазаран һарна. 19Аңгуд, һазрар мөлкдгүд, шовуд цугтан, һазр деер бәәҗ җирһдг тоот цугтан зүс-зүсәрн кермәс һарцхав.
20Ноах Деед Эзнд тәкл тәкдг орм тәкнә. Цевр малын болн шовудын цуг зүсн болһнас терүн деер бәрц бәрәд шатана. 21Деед Эзн сән үнр медәд дотран иигҗ келнә:
– Күүнә зүркнә ухан бичкндк цагаснь хар саната болсн бийнь, Би хөөннь күүнәс көлтә һазриг дәкҗ харашгов. Әмтә-киитә тоотыг хөөннь Би эн саамла әдл дәкҗ алшгов.
22Һазр бәәтл,
Тәрә тәрлһн, тәрә хадлһн,
Киитн болн һаң,
Зун болн үвл,
Өдр болн сө чилҗ зогсшго.
Цяпер абрана:
Эклц 8: ХКО_ӘБ
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Институт перевода Библии, 2002-2023