Noo Mian 12
12
CAB. XII.
1Ec y tra shen, hie Yeesey trooid arroo er y doonaght, as var adsyn va sheer geyrt er accryssagh, as ren ad toshiaght dy phluckey jeeasyn jeh’n arroo, as dy ee.
2Agh tra honnick ny Phariseyn ad, doort ad rish, Cur‐my‐ner ta’n vooinjer ta kinjagh geyrt ort, janoo red nagh vel lowit dy ve jeant er y doonaght.
3Agh doort eshyn roo, Nagh vel shiuish er lhaih, cre ren David, tra ve hene as e heshaght accryssagh,
4Kys hie e stiagh ayns thie Yee, as die e yn arran casherick, nagh row lowit dashyn ny da’n vooinjer va marish dy ee, agh da ny saggyrtyn ny lomarcan.
5Ny, nagh vel shiu er lhaih ayns y leigh, kys er laghyn y doonaght ta ny saggyrtyn ayns y chiamble brishey’n doonaght, as foast cha vel peccah er ny choyrt nyn lieh.
6Agh ta mish gra riu, dy vel ayns shoh fer syrjey ny’n chiamble.
7Agh dy beagh fys er ve eavish, cre ta dy ve toiggit liorish y raa shoh, Ta mee ny sbooie er myghin ny oural, cha beagh shiu er gheyrey yn vooinjer niau‐chyndagh.
8Son ta mac y dooinney ny Hiarn, er y doonaght hene.
9As tra ve er gholl veih shen, hie e stiagh ayns y cheell oc.
10¶ As cur‐my‐ner va dooinney ayns shen va’n laue echey er shyrgaghey, as, dy voddagh oyr y ve oc dy loart noi Yeesey, denee ad jeh, gra, Vel eh lowal dy leihys er laghyn y doonaght?
11As doort e roo, Quoi’n dooinney nyn mast eavish, vees ynn cheyrrey echey, as my huittys ee ayns jeeg er y doonaght, nagh daar e greme urree, as nagh drog e ass ee?
12Nagh vel dooinney eisht foddey share ny keyrrey? Shen‐y‐fa te lowal dy yanoo mie er y doonaght.
13Eishtagh doort e rish y dooinney, Sheen magh dty laue, as heen e magh ee, as va’n laue echey er ny leihys myr y laue elley.
14¶ Eishtagh hie ny Phariseyn magh, as hug ad nyn goyrle dy cheilley noi, my‐chione yn aght oddagh ad e y stroie.
15Agh tra va fys ec Yeesey er, jimmee e veih shen: as deiyr earrooyn moarey dy leih er, as ren e ad ooilley y leihys.
16As hug e currym daue, gyn ad dy vrah e.
17Dy voddagh ve cooilleenit ny va loarit liorish Esaias y phadeyr, gra,
18Cur‐my‐ner, my harvaant ta mee er ny reih, my er‐ghraihagh jeh ta mee dy moar soiaghey ayns m’annym; nee yn spyrryd aym vaghey ayn, as soilshee e briwnys da ny ashoonyn.
19Cha jean e streeu, ny keaney, cha‐moo chlinnys annane erbee e choraa ayns ny straadjyn.
20Cuirtlagh vroojit cha jean e y vrishey, as lieen vees jaagh jeh, cha jean e y vooghey, derrey ver e magh briwnys lesh barriaght.
21As ayns yn ennym echey, nee ny Ashoonyn quaagh treshteil.
22¶ Eishtagh hoie ad kiongoyrt rish dooinney va drogh spyrryd ayn, as ve doall as balloo: as laanee e e, ayns wheesh as dy ren eshyn va doall as balloo chammah loart as fakin.
23As ghow ooilley’n pobble yyndyss, as doort ad, Nagh nee shoh mac Ghavid?
24Agh tra cheayl ny Phariseyn jeh, doort ad, Cha vel e shoh tilgey magh drogh spyrrydyn, agh liorish Beelzebub, prince ny drogh spyrrydyn.
25As va fys ec Yeesey er ny smooinaghtyn oc, as doort e roo, Ta dy chooilley reeriaght ta girree magh ny oi hene er ny choyrt mow; as cha vod ard‐valley ny thie erbee ta girree magh ny oi hene, shassoo.
26As my ta’n Jouyl tilgey magh Jouyl, te girree magh ny oi hene, kys eisht oddys y reeriaght echey shassoo?
27As my ta mish liorish Beelzebub tilgey magh drogh spyrrydyn, quoi liorish ta nyn gloan hene dyn dilgey ad magh? adsyn er‐y‐fa shen vees ny briwnyn eu.
28Agh my ta mish geyrt magh drogh spyrrydyn liorish spyrryd Yee, eisht ta reeriaght Yee er jeet hiu.
29Er nonney kys oddys peccagh goll stiagh ayns thie dooinney lajer, as e chooid y ghoal liorish roosteraght, mannagh gianle e hoshiaght yn dooinney lajer? as eisht nee e e hie y roostey.
30Eshyn nagh vel liam, te m’oi; as eshyn nagh vel chymsaghey mârym, te skeylley.
31¶ Shen‐y‐fa ta mee gra riu, Bee dy chooilley pheccah as raa mollaghtagh er ny leih da deney; agh goan mollaghtagh noi’n spyrryd noo cha bee er nyn leih da deney.
32As quoi‐erbee loarys fockle noi yn mac dooinney, bee eh er ny leih da: agh quoi-erbee loarys noi yn spyrryd noo, cha bee eh er ny leih da, edyr ayns y teihl shoh, ny ayns y teihl ta ry heet.
33Edyr jean‐jee yn billey mie, as e vess mie; er nonney jean‐jee yn billey olk, as e vess olk: son liorish e vess, ta enney er ny choyrt er y villey.
34O heeloghe dy ard‐nieughyn, kys oddys shiuish, ta olk, reddyn mie y loart? son magh veih stoyr y chree, ta’n beeal loart.
35Ta dooinney mie, ass stoyr mie yn chree echey, cur magh reddyn mie; as drogh ghooinney ass y drogh stoyr cur magh drogh reddyn.
36Agh ta mee gra riu, dy chooilley ockle niau‐chooie nee deney y loart, dy der ad coontey er y hon, ec laa ny briwnys.
37Son liorish dty ghoan vees oo er dty heyrey, as liorish dty ghoan vees oo er dty gheyrey.
38¶ Eisht dreggyr shiartance jeh ny scruderyn as jeh ny Phariseyn, gra, Vainshter, baillin cowrey y akin woid.
39Agh dreggyr eshyn, as doort e roo, she sheeloghe olk as maardyragh ta shirrey cowrey, as cha bee cowrey erbee er ny chur daue, agh cowrey yn phadeyr Jonas.
40Son ’naght myr va Jonas tree laa as tree uiyghyn ayns bolg y whale: myr shen bee mac y dooinney tree laa as tree uiyghyn ayns cree’n tallooin.
41Nee deney Nineveh girree seose ayns briwnys, as y cheeloghe shoh y gheyrey, er‐yn‐oyr dy ghow ad arrys ec preacheil Jonas, as cur‐my‐ner, ta fer smoo ny Jonas ayns shoh.
42Nee ben‐rein y jass girree seose ayns briwnys noi yn cheeloghe shoh, as ad y gheyrey: son haink ish veih ny ardjyn sodjey er y talloo, dy eashtagh rish creenaght Solomon, as cur‐my‐ner ta fer smoo ny Solomon ayns shoh.
43Tra ta’n spyrryd niau‐ghlen er gholl ass dooinney, te shooyl trooid ynnydyn chyrmey, shirrey fea, as cha vel e dy gheddyn eh.
44Eishtagh te gra, Chyndaa‐ym gys my hie, ass haink mee, as tra te cheet, te dy gheddyn eh follym, sceabit as soit magh dy stoamey.
45Eisht te goll, as cur lesh marish shiaght spyrrydyn elley ta ny smessey ny e hene, as ta’d goll stiagh as vaghey ayns shen: as ta’n jerrey ny smessey da’n dooinney shen ny’n toshiaght, As shoh myr nee eh taghert da’n drogh heeloghe shoh.
46¶ Choud as ve foast loart rish y pobble, cur‐my‐ner va e voir as e vraaraghyn nyn shassoo mooie, shirrey loart rish.
47Eishtagh doort fer rish, Cur‐my‐ner ta dty voir as dty vraaraghyn nyn shassoo mooie, as ta’d booiaght loart rhyt.
48Agh dreggyr eshyn yn fer dinsh shoh da, gra, Quoi my voir? as quoi my vraaraghyn?
49As heen e magh e laue hucsyn va sheer geyrt er, as doort e, Cur‐my‐ner my voir as my vraaraghyn.
50Son quoi‐erbee nee aigney my Ayr t’ayns niau, e shen my vraar as my huyr as my voir.
Цяпер абрана:
Noo Mian 12: NMian
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
historic text maintained in digital form by the British and Foreign Bible Society (Sheshaght y Vible)