Mataio 23
23
Vaze Ibitoziꞌeteꞌe Azaḡa Roziro
(Mareko 12:38-40, Luka 11:37-52, 20:45-47)
1Ebu Iesuꞌa vaze ḡuḡuvaḡa zu ane tahiꞌatahiꞌa ziro, raenaꞌa, 2“Mose goro ḡoeꞌa ihozeꞌeteꞌe azaḡa zu Farisea azaḡaꞌe Mose goro ḡoeꞌa vaze ihozeꞌeteꞌe iḡuꞌano ehoreꞌohe. 3Eꞌanoꞌo zeꞌa nagini raeꞌeteꞌe egozenadu haḡaoꞌi. Rehano zeḡe haḡaiꞌe ago hegotoꞌi, mazaḡa zeꞌe zae ihozeꞌeteꞌe idunaḡano mene haḡaeꞌohe. 4Ze ihoreꞌe riga hune, eꞌanoꞌo vazeꞌa hegotoga mene idaḡa. Zeꞌe vaze daꞌo aduga boro ziniꞌohe, rehano ze ꞌevore huduꞌa tiba hina zu mene hune danazeꞌohe.
5Zeꞌa, vazeꞌa horozoga veize, ḡau niduꞌa haḡaeꞌohe. Badiꞌa ḡoere fefaḡa ufeꞌeteꞌe umaḡa ufeta rafane haḡaadu amusize rana tatuhe uteꞌohe zu dabuaze faḡafeꞌohe. 6Mui zamaḡano ehoro habaꞌa manoḡano zu nuꞌonuꞌo neḡa zamaḡano vaze boroboroꞌa ehoreꞌeteꞌe habaꞌano ehorihi raꞌohe. 7Vazevazeꞌa ne hunio hidine, 'Ihore Vazeḡa,'#23:7 Girikio, Rabi rae gubaze zouga urateꞌohe.
8Rehano vaze ꞌahoganiꞌa zae mazao 'Ihore Vazeḡa' rae huzoꞌidene gararozoꞌi, mazaḡa eḡe daꞌo zae ihore vazeḡa zu zae niduꞌaꞌe idaḡa daꞌo nego zu eze tiba heuḡa. 9Ebu rahao ꞌada vaze ꞌahoga 'Mama,' rae ago hunoꞌi, mazaḡa adureo Badiꞌa daꞌoꞌe zae Moze. 10Ebu vaze ꞌahoganiꞌa zae mazao 'Ibitohauꞌeteꞌe Vazeḡa' rae huzoꞌidene garazoꞌi, mazaḡa eḡe, Keriso daꞌo ibitoze vazeḡa. 11Zae boꞌaḡano vaze ḡihiꞌa reine, zae tuḡure azaḡa rae reꞌuma. 12Iniuꞌa bare niḡa mae itine, Badiꞌaꞌa niḡa mae ovoiꞌuma, u iniuꞌa bare niḡa mae ovoine, Badiꞌaꞌa niḡa mae ḡihiniꞌuma.
13-14Mose goro ḡoeꞌa ihozeꞌeteꞌe azaḡa zu Farisea azaḡa, zaꞌe zama guhi azaḡa! Fase vetuḡaḡa, aduga hidiꞌuma, mazaḡa zaꞌe Badiꞌaꞌa ibitozenoga urateꞌeteꞌe azaḡa ibize ꞌueꞌohe. Zaeꞌa bare mene urateꞌohe ebu urateꞌeteꞌe azaḡa zuni garareꞌohe.#23:13 Fare mirihiroteꞌe nuꞌe v. 14 eꞌe, raenaꞌa, “Mose goro ḡoeꞌa ihozeꞌeteꞌe azaḡa zu Farisea azaḡa, zaꞌe zama guhi azaḡa! Fase vetuḡaḡa, Badiꞌa aduga hidiꞌuma, mazaḡa zaꞌe ḡozoba ḡau ḡonotanadu mene mazagarozeꞌohe. Ebu vaze ḡehaḡa zamao faḡa kurauꞌenaꞌa, zaꞌe dubu vazeḡa manoḡa rae ḡurireꞌohe. Eꞌe uꞌano, aduga boro hidiꞌuma.” (Mareko 12:40 zu Luka 20:47)
15Mose goro ḡoeꞌa ihozeꞌeteꞌe azaḡa zu Farisea azaḡa, zaꞌe zama guhi azaḡa, fase vetuḡaḡa, aduga hidiꞌuma. Vaze tiba zamaḡa ḡihunadu zae ihore hegotoga veize za davara zu haba rana ragave onameꞌohe. Ebu vaze tiba maꞌetene, ani ihonadu zae teige haḡai sauꞌano hegoteꞌohe. Ebu zae teige, aniꞌa ire roga tuḡutuḡu diuḡadu adugaꞌe zae vitize ḡae ꞌaheu hide ibitohauꞌohe.
16Zaꞌe ubuma kuru azaḡa heuḡa, rehano ubuma kuru azaḡa ibitoziniꞌohe. Fase vetuḡaḡa, aduga hidiꞌuma. Zaꞌa raenaꞌa, 'Iniuꞌa kuru neḡa niḡano ḡoitoreꞌetaꞌaꞌe huga oꞌoꞌa. Ḡoitore aꞌe mene haḡaine zuni idaḡa. Rehano iniuꞌa kuru neḡa zamaḡano golo hina ḡoitorineꞌe riḡa, eꞌanoꞌo aniꞌa ane ḡoitore tihitihiniꞌuma.' 17Zaꞌe ubuma kuruga kauriḡa azaḡa! Za goloꞌe kuru neḡa vitine ufeta ḡihiꞌa rae raꞌohe. Rehano kuru neḡaꞌe ufeta ḡihiꞌa, mazaḡa goloꞌe kuru neḡa zamaḡano tiꞌeteꞌe uꞌano golo eꞌe zaḡoḡa rae raꞌohe. 18Ebu zaꞌe raenaꞌa, 'Iniuꞌa dibuꞌo fataḡa niḡano ḡoitoreꞌetaꞌaꞌe huga oꞌoꞌa. Ḡoitore eꞌe mene haḡaine zuni idaḡa. Rehano iniuꞌa dibuꞌo fataḡano ḡahunoneḡa hina ḡoitorine riḡa, eꞌanoꞌo aniꞌa ane ḡoitore tihitihiniꞌuma.' 19Zaꞌe hube hune ubuma kuru azaḡa! Za ḡahunoneꞌe dibuꞌo fataḡa vitine ufeta ḡihiꞌa rae raꞌohe. Rehano dibuꞌo fataḡaꞌe ufeta ḡihiꞌa, mazaḡa ḡahunoneꞌe dibuꞌo fataḡa rana tiꞌeteꞌe uꞌano ḡahunoneḡa eꞌe zaḡoḡa rae raꞌohe. 20Eꞌanoꞌo iniuꞌa dibuꞌo fataḡa niḡano ḡoitoreꞌetaꞌaꞌe dibuꞌo fataḡa ebu eꞌe ranao ḡau niduꞌa hina ḡoitoreꞌohe raꞌohe. 21Ebu iniuꞌa kuru neḡano ḡoitoreꞌetaꞌaꞌe kuru neḡa niḡano ebu deꞌea radiuꞌetaꞌaꞌe, Badiꞌaḡa niḡano ḡoitoreꞌohe raꞌohe. 22Zu iniuꞌa adure niḡano ḡoitoreꞌetaꞌaꞌe, Badiꞌa ehoro habaꞌa hina zu eꞌe rana ehoreꞌetaꞌaꞌe, Badiꞌaḡa niḡano ḡoitoreꞌohe raꞌohe.
23Mose goro ḡoeꞌa ihozeꞌeteꞌe azaḡa zu Farisea azaḡa, zaꞌe zama guhi azaḡa, fase vetuḡaḡa, aduga hidiꞌuma. Mazaḡa zaꞌe tirara mebaḡano eḡa ga murari teige komeꞌa fase veize gaubanana tiba Badiꞌa hauꞌohe. Rehano Mose goro ḡoeꞌano ḡau ufeta boroꞌe igi modeꞌohe. Aꞌe haḡai duduḡa haḡaeꞌeteꞌe, vaze vetuḡaziꞌeteꞌe zu mene ḡurineꞌenaꞌa, zama niduꞌa hina haḡaeꞌeteꞌe raꞌohe. Za ḡau boro ꞌadiꞌe haḡaoꞌi, ebu komeꞌakomeꞌa zuni haḡaoꞌi. 24Zaꞌe ubuma kuruḡa azaḡa heuḡa ebu ubuma kuruḡa azaḡa ibitoziniꞌohe! Zaꞌe vu zamaḡano ofene horoneꞌetene beuꞌe modadu gageꞌohe, rehano kameloꞌe une tauḡeꞌohe.#23:24 Ofene zu Kameloꞌe Badiꞌaꞌa ago anoꞌi rae reiroteꞌe ḡauḡa. Zeḡeꞌa manoḡa hidoga veize Badiꞌa goro ḡoeꞌa mene hegoteꞌohe.
25Mose goro ḡoeꞌa ihozeꞌeteꞌe azaḡa zu Farisea azaḡa, zaꞌe zama guhi azaḡa, fase vetuḡaḡa, aduga hidiꞌuma! Zaꞌe bioze zu siuvaze enoga daꞌo vuzuꞌe deheneꞌeteꞌe azaḡa, mazaḡa zamazeꞌe toraḡa zu ununuꞌa iriꞌaveꞌohe. 26Ubuma kuruḡa Farisea azaḡa! Bio zu siuva zamaḡa geno vuzuꞌe dehenoꞌi, ꞌougine enoga zu deheraꞌuma.
27Mose goro ḡoeꞌa ihozeꞌeteꞌe azaḡa zu Farisea azaḡa, zaꞌe zama guhi azaḡa, fase vetuḡaḡa, aduga hidiꞌuma! Zaꞌe rune iduḡa uruḡa hina feninoga heuḡa. Rune iduḡa enoga ḡianine manoḡa tauḡi, rehano zamaḡaꞌe rune azaḡa isine zu torare niduꞌa iriꞌaveꞌohe. 28Eꞌe teige, vazeꞌa zae ḡiazeꞌetene, duduḡa azaḡa rae zamareꞌohe, rehano zamazeꞌe zama guhi zu haḡai sauꞌaniꞌa iriꞌaveꞌohe.
29Mose goro ḡoeꞌa ihozeꞌeteꞌe azaḡa zu Farisea azaḡa, zaꞌe zama guhi azaḡa, fase vetuḡaḡa, aduga hidiꞌuma! Zaꞌe vouḡazeꞌa ibite zimiroteꞌe peroveta azaḡa ebu haḡai duduḡa azaḡa, zeḡe rune iduḡa neḡa ogoruꞌohe ebu rohorohoneꞌohe. 30Ebu za raenaꞌa, 'Eme vouḡafe madaḡano radifone, peroveta azaḡa goruzihi radu zeḡe teite mene tiburafo.' 31Zaꞌa ꞌouge raꞌetaꞌaꞌe, zaꞌe zae bare peroveta azaḡa goruziroteꞌe azaḡa mariḡa rae raꞌohe. 32Vouḡazeꞌa peroveta azaḡa goruziroteꞌe teige, zae zuni ꞌouge haḡaoꞌi! 33Zaꞌe mohe! Zarama ubugaubuga! Ire rogao mae feuzine feranogaꞌe mene idaḡa.
34Eꞌanoꞌo eḡeꞌa peroveta azaḡa, huhuzaḡa azaḡa zu Mose goro ḡoeꞌa ihozeꞌeteꞌe azaḡa zae vaḡe tuḡuziꞌuma. Rehano nuꞌe zaꞌa goruziꞌuma zu nuꞌe satauroziꞌuma, ebu nuꞌe zae nuꞌonuꞌo neḡano masiziꞌuma zu haba ꞌahoganonoꞌo haba ꞌahoga ze hegotadu sausauziꞌuma. 35Vouḡazeꞌa duduḡa azaḡa niduꞌa goruziro. Aꞌe ibite Adamu ubuga, duduḡa vazeḡa Abela mau runiroteꞌe eꞌeanoꞌo onao ḡonaḡano Berekia ubuga Zakaria maro. Zakariaꞌe dibuꞌo fataḡa zu Badiꞌa ne zaḡoḡa hune boꞌaḡano mau runiro. ꞌOugadu eꞌe naeḡa niduꞌaꞌe zaꞌa meꞌuma. 36E hube hune ziꞌohe, eꞌe aduga niduꞌaꞌe izidi eganiꞌa meꞌuma.
Ierusalema Aduga Hidiꞌuma
(Luka 13:34-35)
37O, Ierusalema azaḡa, Ierusalema azaḡa! Zaeꞌa peroveta azaḡa zimiro zu Badiꞌaꞌa tuḡuziroteꞌe azaḡa hadi hina zimi ruziro. Kokoroku roḡaeḡaniꞌa isaḡa zamaḡano ubuga gugubeꞌeteꞌe teige, e mada ḡehaḡa zae nuꞌozihi reiro, rehano zaꞌe mene uratiro. 38Eꞌanoꞌo ḡianoꞌi, neze fahau radiꞌuma! 39Ebu zaꞌe eḡe mene bare horohiꞌuma onamo zaeꞌa raenaꞌa, 'Zuhiꞌa Boro niḡano onaeꞌeteꞌe vazeḡa mae ḡihinoꞌi!'#23:39 Salamo 118:26”
Цяпер абрана:
Mataio 23: KSJ
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Wycliffe Bible Translators, INC.