ማዢንቲ ማፃኣፔ 3
3
ዓሲኮ ዓይሢንቲሢ ዒፂሢ
1ናንጊና ናንጋ ጎዳ ማዔ ፆኦሲ ማዤ ቦዖ ቢያይዳፓ ሾኦሺ ሚርጌ ጪንጫ፤ ሃሣ ጌሻያታሢሮ፦ «ዱማ ዱማ ሚፃ ባቃሊ ዓኣ ቤዜሎይዳ ዓኣ ሚፆኮ ዓኣፖ ዒንሢ ሙዑዋጉዲ ፆኦሲ ዒንሢ ጎኔ ላኣጊያ?» ጌዒ ላኣሌሎ ዖኦጬኔ። #ዮሃ. ፆፔዻ 12፡9፤ 20፡2።
2ላኣሌላ ማሃዖ፦ «ዱማ ዱማ ባቃሌ ሚፃ ዓኣ ቤዞይዳ ዓኣ ሚፆ ዓኣፖይዳፓ ኑ ሙዓኒ ዳንዳዓኔ፤ 3ጋዓንቴ ፆኦሲ ‹ዱማ ዱማ ባቃሌ ሚፆኮ ባኣኮይዳ ዓኣ ሚፃሢ ዓኣፖ ሙዒፖቴ፤ ኩጮናኣ ካኣሚፖቴ፤ ዬያ ዒንሢ ማዼቶ ሃይቃንዳኔ› ሂዚ ጌዒ ኑም ላቴኔ» ጌዔኔ።
4ሾኦዣሢ፦ «ፔቴታዖ ዒንሢ ሃይቃዓኬ፤ 5ፆኦሲ ዬያ ዒንሢ ዓይሤሢ ዬያ ሚፆኮ ዓኣፖ ዒንሢ ሙዔ ዎዶና ፆኦሲጉዲ ዒንሢ ማዓንዳሢና ኮዦ ፑርቶይዳፓ ዱማሲ ዒንሢ ዔራንዳሢ ቤርታዺ ዔራሢሮኬ» ዒዞም ጌዔኔ።
6ላኣሌላ ሚፃሢ ኮሺ፥ ዓኣፖ ሙዓኒያ ናሻያና ዔራ ማሃኒ ዳንዳዓያ ማዔሢ ዛጋዖ ዓኣፖይዳፓ ዔኪ ሙዒ ዒዞና ዎላ ዓኣ ዓኒማኣ ዒንጌኔ፤ ዒዚያ ሙዔኔ። 7ዬካፓ ላምዖንሢ ቤዞማና ጶቂሥሢ ዔራቶ ዴንቄሢሮ፥ ካሎ ዔያታ ማዔሢ ዔሬኔ፤ ዬያሮ ቤሌሴ ጌይንታ ሚሢኮ ዒላዦ ዎላ ካንሢ ሲካዖ ጊልዲማ ማሂ ዔያቶኮ ካሉሞ ዓኣቼኔ።
8ዬኖ ኬሎ ዋንቶና ናንጊና ናንጋ ጎዳ ማዔ ፆኦሲ ዱማ ዱማ ሚፃ ባቃሊ ዓኣ ቤዜሎይዳ ሃንታንቴ ዑኡዞ ዋይዜሢሮ፥ ዓሢና ማቾና ናንጊና ናንጋ ጎዳ ማዔ ፆኦሲ ዔያቶ ዴንቁዋጉዲ ጌዒ ሚፆ ባኣካ ዓኣሺንቴኔ። 9ጋዓንቴ ናንጊና ናንጋ ጎዳ ማዔ ፆኦሲ ዓሢ ዔኤላዖ፦ «ኔኤኒ ዎካ ዓኣይ?» ጌዒ ዖኦጬኔ።
10ዓሢ፦ «ዱማ ዱማ ሚፃ ባቃሊ ዓኣ ቤዞይዳ ኔኤኮ ዑኡዞ ታ ዋይዛዖ፥ ካሎ ታኣኒ ማዔሢሮ ኔና ታ ዒጊጪ ዓኣሺንቴኔ» ጌዔኔ።
11ፆኦሲያ ዓሢ ኮራ፦ «ኔኤኒ ካሎ ማዔሢ ዖ ኔኤም ኬኤዜይ? ታ ኔና ‹ሙዒፖ› ጌዔ ሚፆ ዓኣፖ ዔኪ ኔኤኒ ሙዒያ?» ጌዒ ዖኦጬኔ።
12ዓሢ፦ «ሃና፥ ታኣና ዎላ ናንጋንዳጉዲ ኔ ዒንጌ ላኣሌላ ሚፆ ዓኣፖ ዔኪ ታኣም ዒዛ ዒንጋዛ ታ ሙዔኔ» ጌዔኔ።
13ናንጊና ናንጋ ጎዳ ማዔ ፆኦሲ ላኣሌሎ፦ «ዓይጎሮ ኔኤኒ ዬያይዴይ?» ጌዒ ዖኦጬኔ።
ላኣሌላ ማሃዖ፦ «ሾኦሺ ታና ጌሻዛ ታ ሙዔኔ» ጌዔኔ። #2ቆሮ. 11፡3፤ 1ፂሞ. 2፡14።
ፆኦሲኮ ዎጊፆ
14ዬካፓ ናንጊና ናንጋ ጎዳ ማዔ ፆኦሲ ሾኦዣሢም ሂዚ ጌዔኔ፦
«ዬያ ኔኤኒ ማዼሢሮ ቆልሞና ቦዖ ቢያይዳፓ ዱማዺ ጋዳንቂንቴያ ማዔ፤
ሃናኣፓ ዓርቃዖ ዳዲና፥ ሳዓና ጎቺንቲ ሃንቴ፤
ቢያ ዎዴ ዓጪ ሙዒ ናንጌ፤
15ኔኤና ላኣሌሎና ዎሊኮ ሞርኬ ታኣኒ ማሃንዳኔ፤
ዒዞ ዜርፆና ኔ ዜርፆና ቢያ ዎዴ፥ ኮሜ ዓሲ ማዒ ናንጋንዳኔ፤
ላኣሌሎ ዜርፃ ኔኤኮ ቶኦኮ ዳኣፃንዳኔ፤
ኔኤኒ ዒዞ ዜርፆኮ ዲንጊርዦ ዻዓንዳኔ።» #ዮሃ. ፆፔዻ 12፡17።
16ላኣሌሎማኣ፦
«ኔኤኒ ጎጳዼ ዎዶና ሜታሢ ታ ኔኤኮ
ኔ ሾዓ ዎዶናኣ ቆፂ ሜታሲፆ ታ ሚርጊሻንዳኔ፤
ጋዓንቴ ኔ ዓኒ ኔ ሱኡካዻንዳኔ፤
ሃሣ ኔ ዓኒማ ኔኤኒ ዓይሢንታያ ማዓንዳኔ» ጌዔኔ።
17ዓሢማኣ ሂዚ ጌዔኔ፦
«ኔ ማቾ ጌኤዞ ኔኤኒ ዋይዚ ኔና ታ ‹ሙዒፖ› ጌዔ ሚፆ ዓኣፖ ኔ ዔኪ ሙዔሢሮ
ኔ ማዼ ፑርቶ ማዾ ዛሎና ሳዔላ ጋዳንቂንቴያ ማዖም፤
ሳዓ ኔኤም ኮይሳ ሙኡዚ ዒንጋንዳጉዲ
ኔ ናንጎ ዎዶ ቢያይዳ ሚርጌ ኔኤኒ ላቢንቲ ማዼ።
18ሳዓ ኔኤም ዓንጊሢና ጋውዲና ባቃልሶም፤
ኔኤኒያ ሳዖይዳፓ ባቃሌ ባኮ ሙዔ። #ዔብ. 6፡8።
19ኔኤኒ ዓጪታሢሮ
ኔ ኬስኬ ዓጮ ባንሢ ማዒ ኔ ጌላንዳያ ሄላንዳኣና
ሙኡዚ ዴንቃኒ ሚርጌ ጮጋቲ ኔኤኒ ማዻንዳኔ።»
20ዓሢያ ዒዛኮ ማቻ ሼምፓ ዓኣ፥ ዓሲ ማዢንቲኮ ቢያ ዒንዶ ማዔሢሮ «ሂዋኣኖ» ጋዓ ሱንሢ ዒዞም ጌሤኔ። 21ናንጊና ናንጋ ጎዳ ማዔ ፆኦሲ ዓዳኣሜና ማቾናም ዒልዒ ዓፒላ ማሂ ኮሺ ማይሴኔ።
ዓዳኣሜና ማቾ ሂዋኣኖናኮ ጌኔቴ ጌይንታ ኮዦ ቤዛፓ ኬዞ
22ዬካፓ ናንጊና ናንጋ ጎዳ ማዔ ፆኦሲ ኬኤዛዖ፦ «ዓካሪ ዓሲ ኮዦ ፑርቶይዳፓ ዱማሲ ዔርዛ ዔራቶ ዔሬሢሮ ኑጊዳፓ ፔቴሢጉዲ ማዔኔ፤ ሃይፓ ሴካ ፔ ኩጮና ሼምፖ ዒንጋ ሚፆይዳፓ ዔኪ ሙዒ ናንጊና ናንጉዋጉዲ ዒዛ ታ ላኣጌኔ» ጌዔኔ። #ዮሃ. ፆፔዻ 22፡14። 23ዬያሮ ናንጊና ናንጋ ጎዳ ማዔ ፆኦሲ ዔዴኔ ጌይንታ ዱማ ዱማ ሚፃ ባቃሊ ዓኣ ቤዛፓ ዓሢ ማዢንቴ ሳዖ ጎሽኪ ናንጋንዳጉዲ ዒዛ ኬሴኔ። 24ፆኦሲ ዓሲ ዔዴኔይዳፓ ኬሴሢኮ ጊንፃ ዬኖ ቤዜሎኮ ዓባ ኬስካ ዛሎና ዼኤፒ ዒጊቻ፥ ዒዛኮ ኪኢታንቾና ቢያ ዛሎ ሺሪ ሺሪ ታሚጉዲ ዔዔኤታ ጬንቻ ዓፓሮና ጌሤኔ፤ ዬያ ዒ ማዼሢ ዖኦኒያ ናንጎ ሚፃሢ ባንሢ ዑኩዋጉዲ ጌዒኬ።
Цяпер абрана:
ማዢንቲ ማፃኣፔ 3: ጌኤ.ማፃ
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Maale Full Bible © 2008 by The Word for the World International and The Bible Society of Ethiopia, 2008.