Jona 2
2
Jona le naŋgo
1Maya borogiko e ŋgamoiye tɨne, Jona i naŋgo weya Giya le Loi. 2Iŋa:
“Mbaŋa inaŋgu vuyowo laghɨye e tɨne,
na ya una Giya idan,
kaero u thalavuŋgo.
Bode moli ramaremare e ghambanji,
ya una idan thalavu kaiwae,
na u loŋwa ghalɨŋaŋgu.
3U duutuŋgo e ŋambuwoko tɨne bode moli,
njighɨ i vaghɨliyaŋgo,
len bagodu laghɨlaghɨye thɨ bebe e vwataŋgu.
4Lo renuwaŋa yaŋaeŋge kaero mendava u kitenɨyathuŋgo e ghen
ko tembene ya thuweva len Ŋgolo Boboma.
5Mbwa i wovululuŋgo na i wovoŋguŋgo;
na njighɨ i garubu riwaŋguke laghɨye,
na njighɨko wolewaniye i ghavwa umbalɨŋgu.
6Ya nja e ŋambuwokote e ououko rɨgherɨghenji
e valɨvaŋgake iya ghathɨnɨmbako
ma mbaŋa regha i mavu.
Ko iyemaeŋge ghen, wo Giya, lo Loi,
u vaŋgunjoghaŋgo e yawayawaliŋgu bode moli e ŋambuwoko tɨne.
7Mbaŋa ya ghamɨno yawaliŋgu kaero ne iko,
amba ya renuwaŋakikiŋge na ya naŋgo e ghen, o Giya
na e len Ŋgolo Bobomana e tɨne u loŋwa ghalɨŋaŋgu.
8Thavala thɨ goruweya vatavatadɨŋgi
na ma e ghanji thovuye,
kaero thɨ roiteteŋge na
gharen ma i nja weŋgi.
9Ko iyemaeŋge ne ya wothu taraweŋge;
ne ya vakatha vowo na i voro e ghen
na ya vakatha ŋgoreiya va lo dagerawe e ghen.
Vamoru i mena weya Giya!”
10Amba Giya i vakatha borogima na i thegharaŋgiya Jona e njighɨko ghadidiye.
Цяпер абрана:
Jona 2: tgo
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2014, Wycliffe Bible Translators, Inc. All rights reserved.