Лука 15
15
Глава 15
Мечэв боӈгав тэлэӈ
1Иисусу хоял тамам чакачимӈал#15:1 Тамам чакачимӈал – здесь: сборщики налогов, мытари., төнӈэкичилкэр бэил долчидавур дагамритан. 2Фарисеил, Итум хупкучимӈэл-дэ тикулритан, гөникэн: «Ноӈан төнӈэкичилкэрбу бэилбу алиммоттан, ноӈарнютан-да деббөттэн». 3Таракам Иисус ноӈартакитан өмэм тэлэӈу тэлэӈрин:
4– Хундулэ ӈи-вул няма боӈгаӈан бидэн, тарбач өмэн-нян бэрибдэн. Эв ноӈан таракам уюнмяр уюм боӈгав ониӈагла этэн эмэн, өмэм бэрипчэв бакакан гэлэттэй? 5Бакриди-нян, хокандин, мирлэй огэрдин, 6дюткий-нян эмриди, нимэкэлби, дялби эмдэтэн эридин, нян ноӈартакитан гөндин: «Миннюн ху-дэ хокаӈчилра, бэрипчэв боӈгаӈи бакрам». 7Хунтэки гөнэм, няниндула эгден өрэлдэн бидин, өмэн төнӈэкичилкэн төнӈэкичин аталабтакан, нян уюнмярбу уюм айгарарилбу, илрамкам этилбу надар, таррөчин өрэлдэн этэн бис.
Бэрипчэв мэӈэм тэлэӈ
8Тарбач өмэн аси, мян мэӈэӈэн бисэкэн, өмэм мэӈэм бэридин. Эв ноӈан, нейкэв нейкэриди, этэн биникэдилрэ, гэлэтэдилрэ, тарав бэричэй бакакан? 9Нян бакми, кэдикэлби, нимэкэлби эридин, нян ноӈартакитан гөндин: «Миннюн ху-дэ өрэлдэлрэ, бэричэй мэӈэм бакрам». 10Хунтэки гөнэм, тачин ангелал өрэлдэвэттэ, өмэн төнӈэкичилкэн бэй илрамракан.
Өмэн бэй хутэн мучучаван тэлэӈ
11Иисус часки тэлэӈэддин:
– Өмэн бэй дӫр нярудин бисин. 12Нодьмэр амантакий гөнин: «Амму, минду бөннэгэй ханиӈаку#15:12 Болдывун ханьӈатан – здесь: наследство. абдув бөли». Таракам амантан тарав бөннэй ханьӈатан хурэлди калтакач бөриттин. 13Амрак нөдьмэр хутэн, эйду абдуй чакриди, тэгэтки төртэки нуддин. Таду бидми, эйду эӈэей ачча окан мануканин, 14тарбач тараӈан эӈэен мануракан, тала төрлэ хэӈунь демкэн один. Ноӈан энтэкэе дёгалрин, 15таракам өмэнтэки бэйтэки, кэлмэн одай, ӈэнрин, тарак бэй чиввиннялбан косчидилрин. 16Ноӈан энтэкэе оматтин, чиввинял-да дебэннэвутэн дебэмчи мэн ури дялувкандай, нян тарав-да ноӈандун эстэн бөвэттэ. 17Өмнэкэн мэргэнни ӈэрилрэкэн, ноӈан гөнин: «Амму дюлан хоя кэлмэлни бис, тарбач эйду-дэ дялутта, би-си эду ач депчэлэч кэӈиркиӈдиддэм. 18Хордэку, амантакий мучудаку, гөникэн: „Амму, няним дэпки, хину-дэ дэпки төнӈэкичу овканив, 19Экич-тэ тек мину хин хуттис гэрбэттэ, нян кэлмэгэй-дэлу таракам мину гамчис“». 20Тарбач амантакий хөррин. Унэт тэгэлэ ӈэнэддэкэн, аманни укал ноӈман иттин, хути илралрин. Хуттэкий туттин, арчанин, хути кэмнирин, гуденин. 21Хутэн ноӈантакин гөнин: «Амму! Хэвкив дэпки, хинтэки-дэ төнӈэкичу овканив, экич тек мину хин хуттис гэрбуттэ». 22Аманни-си кэлмэлтэкий гөнин: «Хинмач аидьмару ойган эмулрэ, ноӈман тэтулрэ. Ӈаллан-да унькапӈан хорулра, унтаган-да тэтулрэ. 23Бэргэв хонӈачам эмулрэ, өтлэлрэ, малра, тарбач хэбдекэдеку хокаӈчидавур овкандим, 24мин хуту көкэчэ бичэ арран, бэрипти-дэ бакаптан». Тарав ноӈартан хөкаӈчидилритан.
25Акадьмар-аси таракам хевкэчидеклэ төрлэ гургэвчиддин. Мучудми, дюлай исадилми, икэм, хөкаӈчим долдарин. 26Өмэм кэлмэв эририди эмдэн, улгэмрин: «Якав тала?» 27Тарак ноӈантакин барагрин: «Хин нөс эмрин, аманси-да бэргэв хөнӈачам марин, нөс абгар, ини-дэ мучуракан». 28Акадьмар тыкулрин, эч-тэ дюла имэлрэ. Аманни, нёриди, ноӈман идэн эридилрин. 29Тарбач ноӈан амантакий баргуттин: «Тарбач би адыв-да анӈану хиндулэ бэлтэлкэӈчин гургэвчирэм, эрэглэ-дэ гөнчэгчинси неккоттэм, хи-си ок-та хонӈачаӈгаку эчис мар, би-дэ дялнюми хэбдекэдеку овкандаку. 30Нян хин хутэс мучукаран, тутэнрилнюн асалнюн ханьми абдуй ачча окан манракан, хи ноӈандун бэргэв хонӈачам марис». 31Аманни ноӈантакин гөнин: «Хуто! Хи эрэгэр миннюн бивэчинри, эйду, як-ка миндулэ бисни, хинӈи тарак. 32Хин хокаӈчиннас, өрэлдэннэс, хин көкэчэ бичэ нөс арриван, бэрипчэ-дэ бичэ бакаптыван».
Цяпер абрана:
Лука 15: eve
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© Библияв тулмачин Институт
Москва, 2001
ISBN 5-93943-008-2
ISBN 91-89122-50-X