Luka 20
20
Obuyinza bwa Yesu
(Mat 21:23-27; Mar 11:27-33)
1Lwali lulala Yesu bwe yali ng'ali kwegeresa abantu mu isinzizo nga bw'abakobera Amawulire Amalungi, Bakabona Abakulu, Abanamateeka, n'abakulu ab'ebika beesoloza. 2Baamukoba bati: “Tukobere, buyinza bwa kika ki bw'okozesa ebintu bino? Era naani eyakugha obuyinza obwo?”
3Yesu yaabairamu ati: “Zeena ka mbabuuzeeku ekibuuzo, munkobere. 4Okubatiza kwa Yoanne kwava mu igulu oba mu bantu?”
5Agho batoolera okwekobaana beene na beene bati: “Bwe tunaakoba tuti kwava mu igulu, aidha kukoba ati lwaki timwamwikiriza? 6Ate bwe tunaakoba tuti kwava mu bantu, abantu boonaboona baidha kutukuba amabaale, kuba bakikakasa mu myoyo gyaibwe bati Yoanne yali mulanzi.” 7Agho baamukoba bati: “Titwidhi ghe kwava.”
8Yesu yaabakoba ati: “Zeena tiibakobere buyinza bwe nkozesa bintu bino.”
Olufumo olw'abakozi ab'omu isamba
(Mat 21:33-46; Mar 12:1-12)
9Agho yaakobera abantu olufumo luno ati: “Ghaaligho omusaadha eyasimba eisamba lye ery'emizabbibu, yaataamu abakozi, yaaja mu nsi eyindi, yaalwayo.#Isa 5:1 10Ekiseera kyatuuka, yaatuma omugheereza aje y'abakozi amunonere ku biva mu isamba lye aye abakozi baamukuba era baamwiririzaayo ngalo nkalu. 11Kabiri yaatuma omugheereza owundi, oyo yeena baamukuba, baamukola ebiswaza era yeena baamwiririzaayo ngalo nkalu. 12Era yaatuma owokusatu, aye ono yeena baamusindiikiriza baamutoola mu isamba nga bamutaireku n'ebibwa. 13Mwene isamba yeebuuza ati, ‘Nkole ki? Ka ntume mutabane wange omugonzi, oba katyo banaamutaamu ekinhagansi.’ 14Aye abakozi bwe baamubona, baakoba bati, ‘Ono n'omusika, ka tumwite obusika bube bwaife.’ 15Agho baamusindiikiriza okumutoola mu isamba, baamwita.
“Kale mwene isamba aja kubakola ki? 16Aja kwidha azikirize abakozi abo n'eisamba aliteemu abandi.”
Abantu bwe baawulira ekyo baakoba bati: “Katonda ataganha ekyo kubaagho.”
17Yesu yaabalingirira yaabakoba ati: “Kale, ekyaghandiikibwa kino kitegeeza ki?#Zab 118:22
‘Eibaale abazimbi lye baaloba bati lizira mugaso,
n'eryafuuka empango ey'omusingi mu nsonda.’
18Buli muntu agwa ku ibaale eryo amenhekamenheka, ate bwe ligwa ku muntu, limumanhiangula.”
19Mu saawa eyo Abanamateeka ni Bakabona Abakulu baayenda bamugeme kuba baategeera bati mu lufumo olwo yali ayogera ku beene, aye baatya abantu.
Okugha omusolo gwa Kaisari
(Mat 22:15-22; Mar 12:13-17)
20Kale baagunirira baasasula abantu empiiya ab'okumuleba, abeefuula abeesimbu ate nga baayenda kumugemekeza mu by'ayogera, basobole okumughaayo mu mikono egy'ab'obuyinza. 21Baidha baamukoba bati: “Mwegeresa, twidhi tuti by'oyogera ni by'oyegeresa bituufu, toboola muntu yeenayeena, aye oyegereresa irala amagira amatuufu aga Katonda. 22Mpegaano tukobere, twikirizibwa mu Mateeka okugha Kaisari omusolo oba bbe?”
23Aye Yesu yaiguka mu katego kaibwe era yaabakoba ati 24“Mundage e dinari. Ekifaananie ekiriku n'ebighandiiko by'ani?”
Baamukoba bati: “Bya Kaisari.”
25Yesu yaabakoba ati: “Niini mughe Kaisari ebya Kaisari, ni Katonda mumughe ebya Katonda.” 26Era tibaaghanga kumugema mu bibono bye yayogera ng'abantu baligho, kale baasirika busirike nga beewuunhia kye yabairamu.
Ebigema ku kuzuukira
(Mat 22:23-33; Mar 12:18-27)
27Agho abandi ku Basaddukaayo baidha, abakoba bati ezira kuzuukira,#Bik 23:8 28baamukoba bati: “Mwegeresa, Musa yatughandiikira ati, ‘Muganda w'omuntu bw'afa, n'aleka omukazi aye nga talese baana, muganda w'omufu atwalanga namwandu oyo, yaafunira muganda we eizaire.’#Ma 25:5 29Mperaano ghaaligho aboluganda musanvu asooka yaafuna omukazi yaafa nga tazaire 30owokubiri yaatwala namwandu, 31n'owokusatu atyo, okutuusa boonaboona omusanvu bwe baafa nga tibazaire. 32Olumaliira omukazi yeena yaafa. 33Olwo mu kuzuukira omukazi oyo aliba muka ani? Kuba boonaboona omusanvu baaliku ba iba.”
34Yesu yaakoba ati: “Abantu ab'ensi eno babayiza ate babayira, 35aye abo abalibonebwa nga bagwaine okuzuukira n'okwingira mu bulamu obwo tibalibayira era tibalibayiza. 36Baliba nga tibakaafa, kuba baliba ng'oti bamalaika. Era baliba baana ba Katonda, kuba baliba bazuukiire. 37Era ku by'abafu okuzuukira kiragibwa bukalamu mu kitabo kya Musa, mu bigema ku kisaka ebikoba biti, ‘Musengwa Katonda wa Aburahamu, Katonda wa Isaaka, Katonda wa Yakobo.’#Kuv 3:6 38Kale ni, ti Katonda wa bafu aye wa balamu kuba eri Katonda, boonaboona baba balamu.”
39Olwo abandi ku Banamateeka baamukoba bati: “Mwegeresa, oizeemu bukalamu!” 40Era okuva olwo tibairayo kukana kumubuuza.
Ebigema ku Kurisito
(Mat 22:41-46; Mar 12:35-37)
41Yesu yaabuuza ati: “Lwaki bakoba bati Kurisito mwidhukulu wa Daudi? 42Ate nga Daudi mwene akoba mu kitabo kya Zabbuli ati,#Zab 110:1
‘Musengwa yakoba Musengwa wange ati:
Tyama ghano ku mukono gwange omusaadha,
43okutuusa lwe ndita abazigu bo ghansi gh'ebigere byo.’
44Kale oba Daudi amweta Musengwa we, memale aba atya kabiri mwidhukulu we?”
Mwekuume Abanamateeka
(Mat 23:1-36; Mar 12:38-40)
45Agho ng'abantu boonaboona bali ku muwulirisa, yaakoba Abeegeresebwa be ati: 46“Mwekuume Abanamateeka abagonza okuniaga nga bavaire ebivaalo ebireeyi, okulamusibwa mu biya n'okutyama mu bifo ebisinga mu sinagoga ni ku mbaga 47abakaavuula eby'omu ndhu dha banamwandu, baalwagho nga basaba nga beeraga. Ekibonerezo kyaibwe kirisingaku eby'abandi.”
Цяпер абрана:
Luka 20: Sog
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
Baibuli Ekibono kya Katonda © The Bible Society of Uganda, 2014