Maatiyu 8
8
Gooduɗo Nyawu Nyaamoowu Laral
(Markus 1.40‑45; Luka 5.12‑16)
1Nde Yeesu jippoyii daga dow hocceere nden, yimɓe ɗuɗɓe tokkimo. 2Sey goɗɗo gooduɗo nyawu nyaamoojum laral wari diccii yeeso maako, wi'i, “Moodibbo, taa jaɓii, a waaway njamɗitinaayam.”
3Sey Yeesu forti jungo muuɗum, meemimo, wi'i, “Mi jaɓii. Yamɗutu!” Ɗon e ɗon nyawu ɗum alimo, o yamɗiti. 4Sey Yeesu wi'imo, “Faamu, taa' wi'uka koo moye, ammaa yahu kollaa hoore maaɗa to ardiiɗo diina, nden kokkaa cakkiri no Muusa wi'i ɗum waɗa ngam laaɓol maaɗa. Waɗu non ngam tabbitinanki yimɓe a yamɗitii.”#KLee 14.1‑32.
Hoolaare Mawɗo Sooji'en
(Luka 7.1‑10)
5Nde Yeesu natti gariiri Kafarnahum, sey goɗɗo mawɗo sooji'en Rooma wari to maako, e toroomo, wi'i, 6“Moodibbo, maccuɗo am e fukkii e wuro o jaraaɗo, e mo fiida e nawɗum kalluɗum.”
7Yeesu wi'imo, “Mi yahay mi yamɗitinamo.”
8Sey mawɗo sooji'en on nootii wi'i, “Moodibbo, mi fotaayi nattaa wuro am, ammaa metu tan, maccuɗo am yamɗitay. 9Ngam min e hoore am ley laamu woɓɓe sooji'en ngonmi, min maa, e mi laamoo sooji'en. To mi wi'ii o'o, ‘Dillu!’ o dillay. To mi wi'ii on ton, ‘Woroy!’ o waray. To boo mi wi'ii maccuɗo am, ‘Waɗu ɗu'um!’ o waɗayɗum.”
10Nde Yeesu nani non, hayɗini, wi'i kawrutuɓe e tokkimo, “E mi wi'a'on goonga, koo nder Israa'iila mi heɓaayi kooliiɗoyam ɓernde go'o bo o'o. 11E mi wi'a'on, yimɓe naa' Yahuudanko'en ɗuɗɓe ngaray daga fuuna e hirna ɓe njooɗoo ɓe nyaama nyamndu humto e Annabi Ibraahim, e Iciyaaku, e Yaakubu nder Laamu Allah.#Luk 13.29. 12Haanuɓe ngarta yimɓe Allah ammaa ɓe nganyi, ɗum faɗɗayɓe nder nyiwre ɓaleere. Ɗon ɓe mboyata ɓe nyerƴindira nyiiƴe.”#Maat 22.13; 25.30; Luk 13.28. 13Sey Yeesu wi'i mawɗo sooji'en Rooma on, “Yahu! Ngam a hoolake Allah, maccuɗo maaɗa yamɗitay.” Ɗon e ɗon maccuɗo soojiijo on yamɗiti.
Yeesu Yamɗitinii Yimɓe Ɗuɗɓe
(Markus 1.29‑34; Luka 4.38‑41)
14Nde Yeesu yahi wuro Biiturus yi'i esiraawo Biiturus debbo e fukkii, jonte kalluɗe e torramo, 15o meemi jungo maako. Jonte ɗen njoofi debbo on, o ummii, o fuɗɗi waddankimo nyamndu.
16Nde futuro waɗi, yimɓe ngaddani Yeesu gooduɓe ginni ɗuɗɓe. O metaniɗi wolde go'o ɗi mburtii. O yamɗitini fuu ɓe njamɗaa. 17Non waɗii ngam ɗum hebbina ko Allah wi'i daga honduko Annabi Icaaya, wiiki, “O ittii nyawuuji meeɗen, o yamɗitinii'en.”#Ica 53.4.
Wi'ooɓe Tokkay Yeesu
(Luka 9.57‑62)
18Nde Yeesu yi'i yimɓe ɗuɗɓe e piliimo, o wi'i tokkuɓemo, “En kuulu fongo mbeela.” 19Sey goɗɗo moodibbo Attawra wari to maako, wi'imo, “Moodibbo, mi tokkete to njahataa fuu.”
20Yeesu wi'imo, “Dilaaji e ngoodi gayɗe, colli e ngoodi caɓɓe, ammaa Ɓii Neɗɗo walaa to fukkotoo.”
21Goɗɗo nder tokkuɓemo wi'imo, “Moodibbo, al mi yaha mi uwoya nyaako am taw.”
22Ammaa Yeesu wi'imo, “Tokkam, alu mayɓe uwa mayɓe mu''en.”
Yeesu Darnii Iyeende
(Markus 4.35‑41; Luka 8.22‑25)
23Yeesu natti komiwal, tokkuɓemo maa tokkimo. 24Sey hendu cembindu ummoyii dow mbeela ngan, geelooɗi ndiyam puɗɗi piiki komiwal ngal, ndiyam natti nder maagal haa naaki ngal ɓadii heewa ndiyam, ammaa Yeesu e nder maagal e ɗaanii. 25Sey tokkuɓemo ɓaddii pindinimo, ɓe mbi'i, “Moodibbo, hisnu'en! En kalkay!”
26Sey o wi'iɓe, “Ngam ɗume kultorɗon, onon kooliiɓeyam seɗɗa?” Sey o ummii, o haɓani hendu ndun e geelooɗi ndiyam ɗin. Sey koo ɗume de''iti.
27Koo moye hayɗini wi'i, “O'o ɗum iri moye neɗɗo, haa keni e geelooɗi ndiyam e ngaɗa ko o wi'i?”
Yeesu Yamɗitinii Gooduɓe Ginni
(Markus 5.1‑20; Luka 8.26‑39)
28Nde Yeesu yottii fongo mbeela nder leydi Gaarasinko'en, sey woɓɓe worɓe ɗiɗo taɓɓiimo, gooduɓe ginni jooɗotooɓe to genaale. Ɓe ngartii ko hulnii naa' seɗɗa haa maa walaa baawayɗo tokkira laawol ngol ɗon! 29Ɗon e ɗon ɓe ngulli, e ɓe mbi'a, “Ko wannumaa e amin, Ɓiɗɗo Allah? A warii ngam torraamin ko carel#8.29: Waato Nyalnde Jaango. waɗa?”
30Haade ɗon e woodi ornde aladeeji ɗuɗɗi e dura. 31Ginni ɗin torii Yeesu, mbi'i, “Taa riiwiimin, alumin min nattoya ornde aladeeji ɗin nii.”
32Sey o wi'iɗi, “Ndillee!” Sey ɗi mburtii, ɗi nattoyi aladeeji ɗin. Sey ornde nden fuu nyaari jippoyii daga dow ƴolde nden, yani nder mbeela, ndiyam nyaamiɗi.
33Woynaaɓe aladeeji ɗin ndoggi njahi nder gariiri mbi'oyi koo ɗume ko waɗi. Ɗonmaa ɓe mbi'i ko heɓi gooduɓe ginni ɗin. 34Sey yimɓe gariiri ndin ɗuɗɓe mburtoyii taɓɓii Yeesu. Nde ɓe ngi'imo, ɓe toriimo o alanaɓe leydi maɓɓe.
Цяпер абрана:
Maatiyu 8: fuv
Пазнака
Падзяліцца
Капіяваць
Хочаце, каб вашыя адзнакі былі захаваны на ўсіх вашых прыладах? Зарэгіструйцеся або ўвайдзіце
© 2010, Bible League. All rights reserved.