Папулярныя біблейскія вершы з Pomulanya 21

Падзяліцца

Wali yako etu i Pue Yawe ma’i mangansawang i Sara pei mangabanang parajanji to inikaNya resi ia seore.

Pasi ananya seja tumangi nja’u ara njunju. Wali i Pue Allah mangandonge loo nu ana etu. Tempo Ia mangandonge loo nu ana etu tumangi Ia mamporayang ana etu, see naka Pomakau i mPue Allah mampokio i Hagar yako ndate yangi, Ia manganto’o, “O Hagar, ne’e masusa! Pasi ne’e meka apa i Pue Allah roomo mangandonge loo nu anamu tumangi ri ara njunju etu. Inta pei papokore ia panewa palindo rayanya apa ia taa damate yau. Kasimbalinya yako etu Aku damangansawang ia see naka wiyaanya damawali bansa bae.” Etu semo gombo i mPomakau i mPue Allah resi i Hagar.

See naka i Sara mawali mayu’u pei mampoanaka ana langkai, etu semo ana i Abraham. Tempo ana etu rapoanaka, tempo etu i Abraham ia tu’amo. Wali ana kodi etu rapoanaka kono kojo ri temponya to napakatantuka yami i mPue Allah seore.

Wali ojo karoonya moana, i Sara manganto’o, “I Pue Allah mangawaika aku kandende ndaya, see naka aku maya magele si’i-si’i saba yako kandende ndayangku etu. Pasi samparia tau to mandonge kareba mangkonong kare’e nu anangku si’i, sira seja damagele sindara-ndara pei aku.”

Pei i Pue Allah manganto’oka ia, “Ne’e masusa mampobuuka anamu pasi to papolaongimu etu. Padongeka gombo nu indo nu anamu, i Sara pei biakamo naka yako i Hagar sira dua i Ismael. Ne’e masusa, apa wiyaa to boros to Kuparajanjika korom seore, wiyaa etu damawali yako resi i Ishak semo, si’a yako i Ismael.

Pei i Ismael, ana nto papolaong etu, ia seja anamu, see naka Aku damangansawang ia see wiyaanya damawali seja bansa bae.” Etu semo gombo i mPue Allah resi i Abraham.