This translation of the Shwe Palaung Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association.

Shwe Palaung

 This translation of the Shwe Palaung Bible is © 2024 by DMS-Dhamma Mate Swe Association. It may not be reproduced in whole or in part in any form or by any means without the prior written permission of DMS-Dhamma Mate Swe Association. 

မိူဝ်ႈဆငည်းဆဒါင်းအူဆငည်း စဝ်ဖြားယေရှု ကာည်း တပဲ့တော်အ်ုန်ကဲ ခ္လေါႈဟာဝ်းပလိုင်းမာရ်အူဒီ တပဲ့အ်ုန်ကဲ စီပ်ုတ်ငှေါ ဒါတည်းကဲပ္လေါန်ကာ့်အ်ုန်ဟောမ်။ ခိင်ဒီန် ဖာရိရှဲ မံင်ခ္လစီဒါႈတစဝ်ဖြား “ဆေဘာည်းပဲစီရေဲန် ပ်ုန်အာဝ်ဘိူန်းတရေဲန် ဆငည်းဆဒါင်းနီန်?” စဝ်ဖြားစီဒါႈ “ပဲအာဝ်တိူမ်ဒီရ်ႈ? ဆေဟောခံမ်းဒါဝိဒ်ရေဲန် ခိင်အာတ်အ်ုန် ကာည်း အီတောပ်ရဘံန်းအ်ုန်ကဲ တဟောမ်။ အ်ုန်လီပ်ခေဲင်ဟောဖြား အာဝ်ႎံ န်းလိူည်အ်ုန် ဒဲႈဘိုးတကဲအီတောပ်ရဘံန်းအ်ုန်ကဲဒီန်ဟောမ် ပ်ုန်ကာပ်အူန်းအီး ကနာည်ပုရောဟေက်ကဲ” ႎါည်းစဝ်ဖြားဟောည်ႇဒါႈဘည်ဒီန် စီဆီုပ်ဒါႈထဲင်ဘိုး “ကဝ်အီမိုႈကောန်တိုအီး အောနီန် မိုႈအဆျှီန်ဆငည်းဆဒါင်းယာ့်။” မိူဝ်ႈတိုအီးအူအီး ကတူႈတည်းယံမ်းကဒါႇလံပ်တံမ် ခိင်စဝ်ဖြားယေရှုဟောတြား ခေဲင်ကျောင်ဖြား ဆငည်းဆဒါင်းဟံရ်။ ဖာရိရှဲ ကာည်း ဆြာဆမားကျာမ်းမံင်ခ္လကဲဒိူန် ဂီုည်နှံက်လာ်ရဲ့တိူရ်ႈကဒံတ် ကနာည်နံင်ဘိူန်းစွဲတြား ဆာ်အ်ုန်ဆနံမ်းဒဲႈ အူအီးအူကဝ် ဆငည်းဆဒါင်းနီန်။ စဝ်ဖြားယေရှုနံပ်အူန်းကတီးကရီး ဆေမိုႈပ်ုန်တဂေန်းအူန်းဂဲ စဝ်ဖြားယေရှုစီဒါႈတကဝ်အီကတူႈတည်းယံမ်းအူကဒါႇဒီန် “ယိူဝ်ႇဇံင်းပွံတ် ရအာည်ႇတိုအီးဂီုန်း” အ်ုန်မာ်ယိူဝ်ႇဇံင်းပွံတ်ဒေ။ ဟောည်ႇဒီန် စဝ်ဖြားယေရှုစီဒါႈ “အောနံင်ဆမွံတ်ဆဲ့ပဲအူနဲ။ ဆငည်းဆဒါင်းဘည်နီန် အယ်လိုရေဲန် ခံင်ကျ၊ အယ်လိုရေဲန်ခံင်အာဝ်ကျ? ဆာ်အာဝ်မိုႈ အယ်လိုကဇောည်ဒဲႈအဆာက်အီး? အယ်လိုပျံမ်းယံမ်းအဆာက်အီး? စဝ်ဖြားယေရှုဟည်တိူရ်ႈ” ကပါ်ႇကပံန်တိုအီးအရာပ်ဒီန် အ်ုန်စီဒါႈတ ကဝ်အီကတူႈတည်းယံမ်းအူကဒါႇနီန် “ဆီုဝ်လေႈပွံတ် တည်းမည်းဒီန်” အ်ုန်မာ်ဆီုဝ်လေႈ တည်းအ်ုန်ဟည်နှေရ်ပွံတ် တည်းပကတိ။ ခိင်ဒီန် ဖာရိရှဲဂဲ ကာည်း ဆြာအီနံပ်ဆမားကျာမ်းကဲ ဟည်ဒေါဆ ဟည်လည်ကမိုန်ဘိုး ဘည်မှောနံင်ဘာည်းတစဝ်ဖြားယေရှု။ အူဆငည်း စဝ်ဖြားယေရှုဟာဝ်းရောတ်ပနောအူလှေ အ်ုန်စီမှာန်းဆုတိူဝ်ႈကနေဲႈ တစဝ်ဖြားပါ်ဆိူမ်။ ဘိူဝ်ဘြည်ဟောည်ႇႎါရ်ႈ အ်ုန်စီတောႇကစု တပဲ့အ်ုန်ကဲတအ်ုန် ရံရ်ႈလေႈကဲအူကိူရ်လေႈအာရ်အီး ဒဲႈကဲပဲန် သာဝက။ ရှိမုင် ကာည်း အန္ဒြေ၊ ယာကုက်၊ ယောဟာန်၊ ဖိလိပ္ပု၊ ဗာသောလမဲ ကဲနီန်မိုႈဇီုဝ် ပ်ုန်ဒဲႈစဝ်ဖြား အ်ုန်အီမိုႈ ပေတရု မဿဲ၊ သောမ၊ ယာကုက် ကဝ်အီမိုႈကောန်၊ အာလဖဲကဲနီန် မိုႈပေတရု ဇီုဝ်ပ်ုန်ဒဲႈစဝ်ဖြား ရှိမုင်၊ ယုဒအီမိုႈကောန်ယာကုက်၊ ကဲအီမိုႈဇီုဝ်ပ်ုန်ဒဲႈစဝ်ဖြား တိုအီးရံက်ခြိူဝ်း ယုဒရှကာရုက်ကဲမိုႈ အီနံင်လှိုန်ဆေတ်စာ တေဲင်စဝ်ဖြား။ ဟောည်ႇဒီန် စဝ်ဖြားယေရှု ကာည်း သာဝကကဲ စီလေႈဒါႇတေဲင်ဂေါင်ဒီန် လေႈဇံင်းပအရာပ်က္လံင်း။ တောပ်ပည်တပဲ့အ်ုန်ကဲ ကူန်ရဝ်မာဂါင်ကဲအီဂေါည်ခေါပ်ပြာကဒါႇ ကီုင်းဇိဒုန် ကာည်း တုရု၊ ကီုင်းဂျေရုဆလင်၊ ကပီုန်ယုဒ ကဲနီန်မာ် ရောတ်ကစုဒိုႇ။ ကဲဒေဲႈရောတ် ကနာည်နံင်တငါဝ်း တြားဟောစဝ်ဖြား ကာည်း ကနာည်နံင်ဟြာည်ကမာ်ႈ ရောဂါဆဲဝ်ဂဲ။ ကဲအီကတူႈ တိုအာဝ်ကျအာဝ်နကဲနီန် လီပ်မာ် ဟည်ႎီရ်ဘာည်းဒိုႇ ပကတိ။ ဂေါႇမိုႈတဂိုးတော် လေႈတစဝ်ဖြားယေရှု ဘယ်ဒေပ်ုန်ဟြာည် ရောဂါဆဲဝ်အီး စီပဲန်ကဲ ရီန်းဒေဘိူန်းစီႇတိုစဝ်ဖြား။ ဟောည်ႇဒီန် စဝ်ဖြားယေရှုကတော်ငါည် တပဲ့တော်အ်ုန်ကဲ စဝ်ဖြားစီဒါႈတကဲ “ကဇေန်နီန် ပဲအီဖ္လါန်းကဲဒီန် မိူဝ်ႈခည်းမံင်ဂလာ။ ဂေါႇမိုႈ ဆာဆနာတော်စဝ်ဖြား အ်ုန်မိုႈကနာည်ပဲဟာ့်။ တိုအီးကဲအီအာတ်ဟောမ်အာတ်ဒါကဲဒိူန်မာ် မိူဝ်ႈခည်းမံင်ဂလာ။ ပဲနံင်ရောတ်ဒီ ဖည်းဟောမ်ဖည်းဒါ။ ကဲအီယာမ်းကဲဒိူန်မာ် မိူဝ်ႈခည်းမံင်ဂလာ။ ပဲနံင်ကတူႈ ကညာႈယာ့်။ ဂေါႇကောန်တိုအီးစဝ်ဖြား အီဘိူည်ကအီရ်ႈပဲမာ်လ၊ အီးဘိူည်လီုင်ႎီုန်ပဲမာ်လ၊ ပဲဘိူည်ကတူႈအီးလီလာနဒါႈ တပဲမာ်လ မိူဝ်ႈခည်းမံင်ဂလာ။ ဆာပဲန်ဘည်ဒီန်မာ် ကာ၊ ပျောခိုည်းပဲဒါ။ ဂေါႇမိုႈ ဆုလာပ်ပ်ုန်နံင်ဘိူန်းပဲတ ဆျှိုည်မျို့တော်နီန် အ်ုန်ဒါင်းခည်း။ ဂေါႇမိုႈ အာရိယာတိုအီးမှိူမ်ကဲမာ် ရေဲန်ဒေဲႈလိူည်ဘည်နီန် တကူန်တာမာယာအယ်ကဲ။” “မိုႈလိူည် ပဲအီခြုမ်ကဲဒီန်၊ ဘည်ဘိူန်းတဂေါည်ကံပ်စေ့စုင်နီန် မိူဝ်ႈခည်းအမံင်ဂလာ။ ကဲအီဟောမ်ဖည်း ဂေါည်ပျောကဲနီန် မိူဝ်ႈခည်းအမံင်ဂလာ။ ဂေါႇမိုႈနံင်ဆမာကတူႈအာတ် ကီန်းဒည်း။ ကဲအီအေဝ်းကညာႈ ကဇေန်နီန် မိူဝ်ႈခည်းအမံင်ဂလာ။ ဂေါႇမိုႈနံင်ဆမာကတူႈ နောႈကီန်း အိုမ်ငါည်တက္လူႈဇောႈ။ ဆာ်တိုအီးကဲ ဂီုည်တိူဝ်ႈကနေဲႈတေဲင်ပဲနီန် မိူဝ်ႈခည်းအမံင်ဂလာ။ ဂေါႇဆေမိုႈ ခည်မိုႈကူန်မာတာယာအယ်ကဲမာ် ကဲဂီုည်ဒံင်ဒေ တိူဝ်ႈကနေဲႈလိူည် အရိယာတိုအီးကျနဂဲ။” စဝ်ဖြားယေရှုစီဒါႈ “အောနံင်က္လာင်းတပဲ အီတငါဝ်းကဇေန်နီန်။ လိုအူန်းမေတ္တာ တရာန်ဆူ။ ရေဲန်ဒဲႈအကျိုးမှိူမ် တကဲအီကအီရ်ႈအယ်။ မှာန်းဆုဒဲႈကဲအီကီန်အယ် ဘိူန်းအကျိုးမံင်ဂလာ တစဝ်ဖြား။ မှာန်းဆုဒဲႈတကဲ အီလီလာနဘာည်းတမည်း။ ဆာ်အူအီးအူကဝ် ကထာႇငါည်မည်း ဒဲႈအ်ုန်ကထာႇထဲင်ဘိုး အူကဒါႇ။ အူအီးအူကဝ် ဆာ်မှာန်းဆဒေါတမည်း ဒဲႈထဲင်ဘိုး ဆဒေါခေဲင်မည်းတအ်ုန်။ ကဲအီမှာန်း အူမျိုးအူလှေတမည်း ပါ်ဒိုႇဒိုည်ႇ ဒဲႈတိုန်းဒိုႇတကဲ။ အူအီးအူကဝ် ဆာ်တိူဝ်ႈအူန်းဂြူမည်း မည်ႎီရ်မှာန်းဘိုးတကဲ။ ပုင်ရံင်ကြောႈက္လာင်းအယ်တအီး ဒဲႈအ်ုန်နှေရ်ပ်ုန်ဆိင်ဒဲႈအယ်တအီးကြောႈက္လာင်းတအယ်။ ဆာ်အယ်အုင်ရံက်လိူည် တကဝ်အီအူန်းမေတ္တာ တေဲင်အယ် ထာန်မှောစဝ်ဖြားနံင်တိူဝ်ႈကနေဲႈတမည်း။ တိုအီးကဲအီမိူဝ်ႈအီုင်ဂ္လံတ်ကဲနီန် ဆာ်အယ်အူန်းမေတ္တာတေဲင်ကဲ ကဲနံင်ႎီရ်အုင်ရံက်အေ့အယ်။ ဆာ်မည်းႎီရ်ကျလိူည် တေဲင်အီအူန်းမေတ္တာတမည်း မည်ဒါ့်မောင်ယာ့် ဆုလာပ်တစဝ်ဖြား။ မိုႈလိူည်အီမိူဝ်ႈအီုင်ဂ္လံတ်ကဲ နံင်ဘယ်ရေဲန်။ ဆာ်ပဲထာင်ဘိုးနံင်ႎီရ်ဘိူန်း တတိုအီးပ်ုန်ရံမ်ဒဲႈပဲ ပဲထာင်လာ့် စဝ်ဖြားနံင် တိူဝ်ႈကနေဲႈပဲ။ မိုႈလိူည်အီမိူဝ်ႈအီုင်ဂ္လံတ်ကဲနီန် လည်အာန်းဘိုးလာ်ႎီရ်ဘိူန်း ထာန်ပ်ုန်လည်ရံမ်။ ပဲလိုအူန်းမေတ္တာတရာန်ဆူ လိုရေဲန်ဒဲႈအကျိုးတကဲ။ ဆြားဒဲႈ မည်အူန်းပ်ုန်အာန်း ကနာည်နံင်ႎီရ်ဘိူန်း။ ဂေါႇမိုႈစဝ်ဖြားအူန်းမေတ္တာ တကဲအီအာဝ်နံပ်ကေးစူး ကာည်း တိုအီးဟာည်းကဲနီန် ဆာ်မိုႈပဲရေဲန်ဒဲႈ ပဲနံင်ဘိူန်းကေးစူးအကျိုးဒါင်း ကာည်း ဘိူန်းပဲန်ကောန်ႎါးစဝ်ဖြားမျြံတ်။ ဂေါႇမိုႈကူန်ပဲစဝ်ဖြားနီန် မိူဝ်ႈနိုက်မေတ္တာကရုဏာ ပဲမာ်လိုမိူဝ်ႈနိုက်မေတ္တာကရုဏာဘာည်းအ်ုန်ယာ့်။” “ဆဲႈဒီန် မည်ဟာဝ်းချှာင်အီး၊ ဆာ်ဘာည်းနီန် ပဲမာ်နံင်အာဝ်ကတူႈမ ပ်ုန်ချှာင်စဝ်ဖြား။ မည်ဟာဝ်းဟြာင်းအီုင်ဂ္လံတ်တအီး၊ ဆာ်မိုႈဘည်ဒီန် ပဲမာ်နံင်အာဝ်ကတူႈမ အီုင်ဂ္လံတ်ပ်ုန်ဟြာင်းစဝ်ဖြား။ ပ္လိုတ်ခွါင်းဒဲႈ တအီး၊ ဆာ်ရေဲန်ဘည်ဒီန် စဝ်ဖြားစီနံင် ပ္လိုတ်ခွင်းဒဲႈတအယ်။ ဒဲႈတိုန်းတအီး။ ပဲမာ်နံင်ကတူႈအီး ဒဲႈတိုန်းတပဲ မှယ်ဒိုရ်ပ်ုန်ဒဲႈတိုန်းပဲ။ စဝ်ဖြားနံင်ႎီရ်ဒဲႈတိုန်းဘိုး တောပ်ဘည်ထာန်ဒဲႈတိုန်းပဲတအီး။” “ဟောည်ႇဒီန် စဝ်ဖြားဒဲႈပုင်တဲႇ အူလှေတကဲ တိုအီးငါည်အံပ်အူအီး အ်ုန်နံင်ဘယ်လာ့်ဒေအွံရ် တိုအီးငါည်အံပ်အီဟံရ်။ အာဝ်မိုႈ ဂါရ်နံင်ဇောႈလိူည်ခေဲင်ဘီုင်။ အာဝ်မိူဝ်ႈမ တပဲ့နံပ်လှိူဝ်းဆြာ။ မိုႈလိူည် ဆာ်ဆြာအ်ုန် ပနောဒဲႈကတီးကရီး အ်ုန်နံင်ဆမားနှေရ်ဒေဲႈအူန်း ဆြာအ်ုန်။ ခေဲင်ငါည်မည်း မည်းစီအာဝ်ယိူဝ်းမ ညှိူဝ်ဂေါည်ထာန်က္လိုန်းဟေ၊ ဆေဘာည်းမည်းစီယိူဝ်း ညှိူဝ်ဒဲႇဒဲႇခေဲင်ငါည်ဂေါမည်း။ မည်းကံပ်ညှံမ်ဘြဲဆား ညှံမ်ကဘ္လာင်းလိူည် ပ်ုန်လူည်ႇမည်း ‘ဂေါ၊ ဒဲႈအောဘြဲဆား ပ်ုန်လူည်ႇမည်း အီဒဲႇဒဲႇဒီန်’ ဆာ်မည်းဒါႈဒီန် အ်ုန်ကလူည်ႇယာ့်။ ဆာ်မည်းရေဲန်ဘည်ဒီန် မည်းနံင်ပဲန်တိုအီး ဒံင်ဒေရေဲန်ပဲန် တိုအီးကျ။ ဘြဲဆားဆဲ့ ပ်ုန်ကလူည်ႇမည်းရအာည်ႇ။ဆာ်ဟောည်ႇ မည်းစီနံင်ဘယ်လာ်ကဇောည် ဘြဲဆားဒဲႈ ပ်ုန်ကလူည်ႇဂေါမည်း အီဒဲႇဒဲႇကဲဒီန်။” “တံင်ဟေကျ ဘည်ပ္လေးအ်ုန်တပ္လေကျ၊ တံင်ဟေဆာ်အာဝ်ကျမာ် အာဝ်ဆမာဘယ်ဒေ ပ္လေးပ္လေကျ။ တိူရ်ႈအယ်ဒါပ္လေ ဘယ်အေ့က္လာင်း ဘည်မိုႈတံင်။ ဘည်အာဝ်ဘိူန်းပဲႈ ပ္လေကဒိုတ်တတံင်ဟေပအောႇ ပ္လေကဘီမာ် အာဝ်ဘိူန်းမပဲႈခေဲင်တံန်။ တိုအီးကျကဲနီန် ခေဲင်ပ္လေဖိူမ်ကဲ ဆမားရိူဝ်ႈနှဲလိူည်ခံင်ကျ။ တိုအီးအာဝ်ကျကဲနီန်မာ် ခေဲင်ပ္လေဖိူမ်ကဲ ဆမာရိူဝ်ႈနှဲလိူည် ခံင်အာဝ်ကျ။ ကြောႈက္လာင်းအီလေႈခေဲင်မိုည်ႇပဲဒီန် မိုႈပ်ုန်ရိူဝ်ႈနှဲ အီတိူရ်ႈနောႈဖိူမ်ပဲ။” “ပဲစီအာဝ်တငါဝ်းလိူည်ကြောႈအော ဆေဘာည်းပဲစီတောႇအောဇီုဝ် ‘အဆျှီန်၊’ ‘အဆျှီန်။’ ကဲအီရောတ်ဒေဲႈတငါဝ်း တောပ်ဒါဘည်တြားတော်အောကဲနီန် အောနံင်က္လာင်းနှဲပဲနံပ် အဆေကဲနှေရ်။ ကဲနှေရ်အီကိူဝ်ႈလှေဲမ်လှေဲမ် ကတဝ် ရေဲန်ဂါင်တေဲင်ကတာည်းမာဝ်း။ ခိင်လှူပ်အိုမ် ဂေါႇမိုႈကဲရေဲန်အူန်း ကတီးကရီး နံင်အာဝ်မိူဝ်ႈမ ယယူႈယယည်း အ်ုန်နံင်မံင်ရီတ်ခည်းခည်း။ မိုႈလိူည် ကဲအီတငါဝ်းဖါ်ႈ တြားတော်အော စီအာဝ်တောပ်ဒါကဲဒိူန် နံင်နှေရ်လိူည် အီအာဝ်ဟံပ်ဒါ ရခါမ်နှာခြူမ်ရေဲန်ဂါင်။ ဆာ်ကတူႈကငျား အိုမ်ဒါင်းလှူပ် နံင်တက္လာႈဇောႈ လူလေဲဝ်ဟာဝ်းပွံတ် အူစာ်န်းယာ့်။”

Слухаць Luke 6