If you have would like a copy of this version please contact info@davarpartners.org

Text: Dhimal New Testament, CC-BY-SA-4.0, The Love Fellowship. Audio: Dhimal New Testament Audio Bible, CC-BY-SA-4.0, Davar Partners International, The Love Fellowship, 2022

Dhimal New Testament

Dhimal New Testament, by The Love Fellowship is licensed under Creative Commons Attribution-ShareAlike 4.0 License.

येसु ताइको चात्यागेलाइहेङ आरोङ एखे निङपिकासो दोअ्हि, एमि धनि द्‍याङको एमि काम पाका खारान्जिया हिघाहि। उङको खारान्चिया ताइको गिह्रिको धन सम्पति उडाइपातेङ हि दोअ्का वाको बिरोधता द्‍याङगेलाइहेङ जेङका हिघाहि। कालाउ धनि द्‍याङ खारान्जियाहेङ काइतेङ दोअ्हि, नाङको बिसोइता का हाइ हिङदोङखा? नाअ् काङको धन हाइ पान्हा इङको को गोताङ हिसाब किताप कासेहेङ बुझाइ, एलासो नाअ् काङको खारान्जिया मान्थुन्हा।
जेलाउ खारान्जिया ताइमिङ मन मनता बिचार पाहि, एला का हाइ पालि? हाइपालिपानु काङको गिह्रि कासेहेङ जागिरसो ओल्लेपालि तोम्का हि। मिलिङता चोइतेङ चालि काङको तागत मान्थु, ह्रेतेङ चालि का लेदेरखा। एला का गिखा का हाइ पालि गोइका, जेलाउ काङको जागिर गुमाइलाउ बुङ द्‍याङगेलाइ कासेहेङ साअ्ता कायावा कालाउ कासेहेङ साघाइयाङ।
कालाउ वा गिह्रिको रिनिगेलाइ जाइ-जाइ चुम्पुका हिघाहि, झाराङहेङ एमि-एमि पातेङ काइहि, कालाउ लाङतेङ लोकाहेङ दोअ्हि, काङको गिह्रिको रिन नासेहेङ हेथे हि?
कालाउ वा दोअ्हि, एसाइ घ्याम्पा जैतुनको चुइति। कालाउ खारान्जिया वासेहेङ दोअ्हि, नाङको तमुसुक चुमा फेरितेङ भेनेङ बिलता कालाउ मार्फा योम्तेङ पाचास घ्याम्पा खिनिङ लेखे।
कालाउ न्हुसो वा भेनेङ रिनिहेङ हिअ्हि, नाङको रिन हेथे हि? वा दोअ्हि, न्हे हाजार किलो गहम। वा रिनिहेङ दोअ्हि नाङको तमसुक चुमा, कालाउ ए हाजार किलो लेखे।
इदोइ काथा थाहा निङतेङ गिह्रि उङको बेमान खारान्जियाको चतुराइको बाखिन पाहि, हाइपालिपानु वा चतुर पातेङ काम पाहि। इदोइ, सुमिङको द्‍याङगेलाइ ताइको सानाइतिगेलाइ दोफा पाका ब्यभारता धर्मि द्‍याङगेलाइ खान्तेङ हेन्जा चतुराइ हिखे। का नेलाइहेङ दोअ्खा, ताइको भाअ्सिङ सुमिङको धनहोइ ताइको सानाइतिगेलाइ बानाइसु। जेलाउ नेलाइ सिस्वाना इङको धन मोअ्तावा, कालाउ नेलाइहेङ आनान्तको साअ्ता स्‍वागत पावा।
येसु आरोङ दोअ्हि, हिदोइ बुङ द्‍याङ म्हुइका काथाता इमान्दार हिखे, कालाउ बार्का काथाता बुङ इमान्दार हिखे, जेसापा हिदोइ बुङ द्‍याङ म्हुइका काथाता बेइमान हि पानु, बार्का काथाता बुङ बेइमान हिखे। जेसापा नाअ् सुमिङको धन सामाराइलि खाङधुरि योग्य जेङलि मादोअ्न्हा पानु, एन्सा जेङनु नाअ् पाक्कै बुङ स्वर्गिय सत्ये धनको भाअ्सिङ खाङधुरि योग्य जेङलि माद्वाना। जेसापा नाअ् आरुको धन सामाराइलि खाङधुरि योग्य जेङलि मादोअ्न्हाना पानु, नासेहेङ हासु बुङ ताइको निङलि गोइका धन नासेहेङ हासु बुङ माप्यावा।
“हिदोइ बुङ चाकारिया एनोङ दोङ सोमोइता न्हेमि गिह्रिको सेवा पालि मादावा। हाइपालिपानु वा दोङ एमिहेङ प्रेम पावा, कालाउ भेनेङहेङ खाङलि माकितावा। कि त वा एमिको दोअ्का कितावा कालाउ भेनेङहेङको दोअ्का चाहि हाइ दोङ वास्ता मापावा। ओदोङ भाअ्सिङ, नेलाइ बुङ परमेस्वर कालाउ धन न्हेमिको सेवा पालि एनोङ दोङ सोमोइता पालि मादोस्वाना।”


फारिसिगेलाइ इदोइ गोताङ काथा हिङतेङ येसुहेङ खुजालाइहि, हाइपालिपानु इम्बालाइ झाराङ धनहेङ प्रेम पाघाखे। येसु फारिसिगेलाइहेङ दोअ्हि, नेलाइ द्‍याङगेलाइको आगाता भालादमिको धर्मि तिङपालि खाङसुखेना। नेलाइको ह्रदयता हाइ हि परमेस्वर गिखे जेदोङ काथा द्‍याङको भाअ्सिङ महत्व पुर्न हि, कालाउ परमेस्वरको भाअ्सिङ एकदम सिकाका जेनावा।
जेलाउ थेकापा बप्तिस्ता पिका युहान्‍ना मालोहि, इङको बेला मोसाको व्यवस्था कालाउ परमेस्वरको बक्तागेलाइको सिक्स्याहोइ नेलाइहेङ आगुवाइ पाघाखे। कालाउ एला परमेस्वरको सासनको खुसिको बानाल प्राचार जेङदोङखे, कालाउ झाराङ द्‍याङगेलाइ लिता हानिलि उत्सुकता हि। आकास कालाउ प्रिथिबि माअ्तेङ हानिलि द्वावा कालाउ परमेस्वरको व्यवस्थाको एनोङ बुङ काथा युतेङ मान्हावा।
जेसापा हिदोइ बुङ द्‍याङ ताइको बे दोफा खाति पोखे कालाउ भेनेङ बेजान दोफा बिहु पाखे पानु वा बुङ कासिबिरि पाखे। कालाउ हिदोइ बुङ द्‍याङ खाति पोन्हाका बेबालहेङ बिहुपाहे पानु वा बुङ कासिबिरि दोङ पाखे।

येसु आरोङ एनोङ निङपिकासो दोअ्हि, एमि धनि द्‍याङ हिघाहि, वा हेन्जाङ जाङका धाबागेलाइ लागाइघाखे। वा दिनाङ-दिनाङ झाराङ खान्तेङ रेम-रेम्का चाघाखे। कालाउ इन्ता लाजरस मिङ पाका गरिब द्‍याङ हिघाहि। वासेहेङ द्‍याङगेलाइ चुमातेङ, एमि धनि द्‍याङको फिनुको भेरपा ताअ्पिघाखे। वाको जिउभरि पेचारा-पेचाराहोइ भरिका हिघाहि। उङको धनि द्‍याङ चालाउ थाइगिल्का टुक्रा-टुक्रि चाअ्लि निनाङकाबे दोअ्तेङ वा खाङतेङ हिघाहि। कालाउ खियागेलाइ लोतेङ वाको पेचारागेलाइ देघाखे।
आले सोमोइ न्हुसो लाजरस सिहि, कालाउ स्वर्गदुतगेलाइ वासेहेङ चुम्पुतेङ केलाइको पुर्खा आब्राहामको भेरपा हिलिको भाअ्सिङ ताअ्पिहि। कालाउ उङको धनि द्‍याङ बुङ सिहि कालाउ वासेहेङ बुङ लिहि। वा नरकता हानिहि, कालाउ वासेहेङ मेनाङ कस्ट जेङहि। ओदोङ बेला वा पुरिङ म्हाल्तेङ ह्रुता खाङहि लाजरसहेङ आब्राहामको भेरपा योम्तेङ हिका तिङहि। वा ह्रिकाइतेङ दोअ्हि, “हे आबा! आब्राहाम, का ह्रुता दाया पा। लाजरसहेङ दिङगिल्पि कालाउकि वाको आङगुलिको ए थोपा चि काङको देतोङता ह्वापितेङ जुउराका बानाइ प्याको। हाइपालिपानु इदोइ दाल-दालाइका मेता का कस्ट निङतेङ हिघा।”
कालाउ आब्राहाम वासेहेङ दोअ्हि, ओइ चान, फोम पाअ्‌ लाम्फा नाअ् हेसा जिबन बितिपातेङ हिघाखेना? नाङको दोफा रेम-रेम्का हेन्जा आनेमानेगेलाइ हिघाहि, कालाउ लाजरस दोफा गोताङ मारेम्का-मारेम्का आमेनेगेलाइ खिनिङ हिघाहि, एला वा इता सुखता सान्तिता हि, कालाउ नाअ् चाहि कस्ट निङतेङ हिना। या गोताङ काथागेलाइ बाहेक, नेलाइ कालाउ केलाइको माझाता बुङ एनोङ बार्का वाङखाराका घारा हि। इतासो हासु बुङ नेलाइ हिका थामेता हानिलि मादोखे कालाउ इन्तासो बुङ इसो लोलि हासु बुङ मादोअ्खे।
उङको धनि द्‍याङ दोअ्हि, एन्सा पानु का बिन्ति पाखा, कि हे आबा आब्राहाम लाजरसहेङ काङको आबाको साअ्ता दिङगिल्पि। हाइपालिपानु काङको नामि ओनेगेलाइ हि, जेसापा लाजरस ओबालाइहेङ चेताउनि पिनु इम्बालाइ इदोइ कस्टमय थामेता मालावा।
कालाउ आब्राहाम दोअ्हि, इम्बालाइहेङ चेताउनि पिलिको भाअ्सिङ मोसाको व्यवस्था कालाउ परमेस्वरको बक्तागेलाइको लेखेका किताप हि, इम्बालाइहेङ इङकोसोङ हिङतेङ इङको को पालन केम्लि गोइखे।
कालाउ धनि द्‍याङ दोअ्हि, माको आबा आब्राहाम, कालाउ हासु बुङ सिका द्‍याङ आरोङ सिन्हुतेङ इम्बालाइकोता हानितेङ चेताउनि पिनु इम्बालाइता-ताइको पाप पालि लाअ्तावा।
“आरोङ आब्राहाम दोअ्हि, ‘माको, जेसापा नाङको ओनेगेलाइ मोसाको कालाउ परमेस्वरको बक्तागेलाइको आग्या माकिकालाइ सिका द्‍याङ सिन्हुतेङ ल्होतेङ लोलाउ बुङ इम्बालाइ खाङधुरि मापावा।’”

Слухаць लुका 16