Doyayo - 1988 Edition (NT)

Doyayo New Testament © Bible Society of Cameroon, 1991.

A ɔ̧tɔge Yeesu tuu raa du da rek ɗɔɔt a mɛmbalya̧ gis dood hingoko. Yɔ saalzanɔ gbɔɔl zaa hi mɔks gi dɔŋdi, gii be kar ɗɔ̀ɔ̀t a lɛmb za du. Dood saal wɔ hi ɗɔ̀ɔ̀t a mɛmbalya̧ di be. Dɔksihi hin kittɔnɔ hi ya̧a̧daaniki raahi
a doo za tuu an gi dɔ̧ɔ̧ dɔ̧ɔ̧to a gi bak du. Yɔ gi dɔ̧ɔ̧t bɔ dɔ̧ɔ̧k a gi bak du, dɔ̧ɔ̧t wɔ zaadɛya̧ hi mɛɛl hi fɔ gbɔnɔya̧ bɔ: nɔɔs hi zaa hi sɛ̧ɛ̧. Dɔ̧ɔ̧t wɔ zaadɛya̧ hi mɛɛl a betwaat lɛl du, a lɛlyɔ hɛbt tɔ̄ɔ̄ ge gɛ. Anyɔ hɛbt ɗɔb lɛlɔ ge gɛ, dɔ̧ɔ̧t wɔ hi pir nɔɔktɔnɔ, ɔ̧tyɔ haa, dɔ̧ɔ̧t wɔ hi pir nɛko yɛ̧ɛ̧sya̧ gi naab gɛ, ɔ̧t haahi hi kootɔ.
Dɔ̧ɔ̧t wɔ zaadɛya̧ hi mɛɛl a tɛ̧ɛ̧ kobsyaadɛ tees du. Tɛ̧ɛ̧ kobsya wɔ hi hɔɔ hi gbáá hindɔ̧ɔ̧t wɔ hi pirɔ. Dɔ̧ɔ̧t wɔ zaadɛya̧ hi mɛɛl a hɛbt rɔb lɛl du hi tuus gaato. Zaadɛ hi tuus gaatya̧ yɔ̧ɔ̧ nɔɔnɛ, zaa dumbili nɔɔngbunu, zaabe dumbili taarɛ. An za̧a̧nyɔ gin tɔn an gi kɛmɔ gi kɛmɔ!
Yeesu walɛsɛrɛ ɔ̧ɔ̧ wɔ hi sɔɔz gi dɔŋdi hi warige
a nɔ mɔ gis dood hindɔk hi ya̧a̧daanik nɔ?
Gii ta̧a̧hi
a nɛya nɛ dag gbɔnɔ an nɛ mɛɛ hinyɔ yaat nɛ a Bɛt wáát du, hii be, hí dāg gbɔnɔ anbɔ gɛ. Yɔ anbɔ, za̧a̧nyɔ gin hinza, hi gaag zaa ha gi daarlɛlɛ; za̧a̧nyɔ taan nɛ hinza gɛ be, gi gin nɛ fɛŋ be hi loo fɛŋwaa bɔ da gin nɛ hɛw. Hinɔ gii be gis dood hindɔk hi ya̧a̧daaniki anyɔ hi seeko wɛɛ hi gbɛn gɛ, wɛɛ hi lako hi taa kɛŋko.
Hinyɔ Bɛtya̧a̧kɛŋkya bɔ Esaya raa tursihi anyɔ lɛ: a Bɛt raa a nɛ gbor lako, wɛɛ nɛ kɛ̄ŋ gɛ, nɛ seeko, wɛɛ nɛ́ gbɛn gɛ. Ya̧a̧nɛ dood wɛrɛ kpoosya̧ ɓaaɓa. Hi zug tɔnya̧ be, hi ims lɔlya̧ be, an bɔ yɔ̧lya̧ gi gbɛn hinɛ, an bɔ tɔnya̧ gi lag hinɛ, an bɔ mɔkilya̧ gi mɛɛ hinɛ, an bɔhi zɛmr kpoosya̧ hi zaa beege an be za̧a̧sihi.
Yɛrɛ nɛnɛ nɛ gin hato, lɔl nɛ gi gbɛnik hinɛ, wɛɛ tɔn nɛ gi kɛŋk hinɛ. Yɔ anbɔ, hat gi a nɛɛge! Be gisin raak rɔbo: Bɛtya̧a̧kɛŋkya kittɔnɔ hi dood riitɛ zaadɛ kittɔnɔ hi ɓɛɛ an hi gbɛn hinyɔ nɛ gbɛnko, wɛɛ hi gbɛn gɛ; an hi kɛm hinyɔ nɛ kɛŋko wɛɛ hi kɛŋ gɛ.
Yeesu a ɓaan tɔn nɛ nɛ kɛm ya̧a̧daanik bɔ hinɔ a bakbalkya zulha. Dood wɔ hi lak hi book Bɛt wáát dɔgl hi kɛm hinɔ gɛ hi riitin an gbɔnɔya̧ yɔ dɔ̧ɔ̧t kpɔm ge: Saydanu gɔ zaa wɔɔd Bɛt dɔgl yɔ lugiy a hi kpoos du renɔ. Dood zaadɛ hi riitin an betwaat lɛlyɔ dɔ̧ɔ̧t kpɔm ge: doodya̧ hii gɔ kɛm Bɛt dɔgl bɔ hi ta̧a̧g hi kpoos du nɔɔktɔnɔ hi hato. Wɛɛ hi ɔ̄ɔ̄ Bɛt dɔgl bɔ yaa yɛ̧ɛ̧sɔ hi kpoos du gɛ, hi ɗɔbs dɔgl bɔ am kaasi, ya̧a̧rhant gɔ bɛɛsihi tuuruko hi zɛksil a Bɛt dɔgl bɔ dɔŋgɔ hi ɔɔ ɗɔbsugɔ nɔɔktɔnɔ.
Dood zaadɛ hi riitin hi hɛbt yɔ dag dɔ̧ɔ̧t a tɛ̧ɛ̧ kobsya tees du: dood wɔrɔ lab hii gɔ kɛm Bɛt dɔglɔ hi kpoos du, rɔɔs maatilɔ hi hinyɔ gɔ hi zɛksin zulya̧ a waal du hi zaa hi yɛ̧g Bɛt dɔgl bɔ hi kpoos du, Bɛt dɔgl bɔ wɛɛ wōō hinza ma gɛ. Dood zaadɛ hi dag dɔ̧ɔ̧t a hɛbt rɔb lɛl du: dood wɔrɔ lab hii gɔ lag Bɛt dɔglɔ hi kɛm hi kpoos du hi ɗɔbsɔ; hii gɔ hum ɗɔbsil huml yɔ̧ɔ̧lɔ nɔɔnɛ, zaa dumbili nɔɔngbunu, zaabe dumbili taarɛ.
Yeesu wɛɛ fɔksihi ya̧a̧daanik za dɔgl anyɔ lɛ:
a hinyɔ riitin hi Bɛt wáátɔ dɔgl gɛrɛ: za̧a̧n za re dɔ̧ɔ̧ hindɔ̧ɔ̧t rɔb a gi bak du, yɔ dood hi yok a yɛms du, za̧a̧n za yɔ gig lɔlhɛ̧ɛ̧nuko loo kagi kam da lug a bak bɔ za̧a̧n bɔ lug nɛ tot rɔb gedu wɛɛ wɛɛ gi lɛlɛ. Yɔ tot rɔbɛ wɔ hi pirɔ hí hɔɔ hí wɛɛ hi hibɔ hí kɛ̧ɛ̧ lɔlɛ, kag wɔ hi mid be. Woosya wɔ hi rek hi gbɛnɔ hi zaa hi war bakzulya bɔ a ɗɛntyɔ, nɛ mɔ lug nɛ ma tot rɔbɛ a mɔ bak du mi, nɛ kag wɔ hi fu̧u̧ ay be?
Gii ta̧a̧hi a za̧a̧n bɔ gib lɔlhɛ̧ɛ̧nik gii re gi lug kag wɔrɔ. Woosya wɔ hi wɛɛ hi warige a nɛ ha̧a̧mɔ an wi re wi dur kag wɔrɔ ya? Gii ta̧a̧ a ewwee! An nɛ rek nɛ dur kag wɔ, yɔ nɛ dur tot rɔbɛ dur du hɛw. Ɔɔnɛhi hi ram hi tot rɔbɛ wɔ lɛlgbun sɛw gi tuur a totɓɛs du. Totɓɛs gɔ gi rii, be raa totɓɛrkya wɔ hi re hi dur kag wɔ hii doosi hi wɔb lɛlgbun sud an hi kpɔɔhi laa du. Kuudu hi kam tot rɔbɛ wɔ hi tɔ̧ɔ̧hi bil du.
Yeesu wɛɛ fɔksihi ya̧a̧daanik za ɓɛ anyɔ lɛ,
a Bɛt wáátɔ riitin hi sitahi lɛŋks yɔ doo za gɔ loo gi lug a bak du giya. Sitahi lɛŋks bɔ dɛɛb daar hinza lɛŋks wɛ sɛw, gɔ pirɔ daar tɛ̧ɛ̧ dɛɛt wɛ sɛw. Gɔ tɔɔ nɔɔs hi zaa hi nɛbt zɛk gedu hi waa.
Yeesu wɛɛ dɔksihi ya̧a̧daanik za lɛ
a Bɛt wáátɔ riitin an hɛ̧ɛ̧t yɔ nis za loo gi goo a goonis du dɔɔ taarɛ gi ya̧a̧g hi zumɛ an gi ɗuksige.
Yeesu bons saal wɔ hin wɔrɔ sɛw hi ya̧a̧daanikyɔ; gɔ ɔ̄sihi hinza book hi ya̧a̧daanik gɛ. Yeesu gi woonik hin hi ya̧a̧daanik bɔ anbɔ an hinyɔ Bɛtya̧a̧kɛŋkya bɔ dɔg nɛ gi wooyyɔ a Bɛt raa
a be boosihi hin hi ya̧a̧daanikyɔ, be dɔg hinyɔ yaat nɛ gi yɛɛl a waalkiŋk-ɔ̧ti.
Yɔ Yeesu yaa dood saal wɔ hi rekɔ gii wɛɛ gul raa du, walɛsɛrɛ ɔ̧ɔ̧ wɔ hi sɔɔ gi dɔŋdi hi warige,
a wadsiwi ya̧a̧daanik bɔ a kag wɔ bak du hi muulɛ wi kɛmɔ.
Yeesu goo
a za̧a̧nyɔ gi dɔ̧ɔ̧k dɔ̧ɔ̧t rɔbo, gɛ Za̧a̧n Waa bɔ. Bak bɔ be, gɛ waal du. Lɛŋks rɔbɛ wɔ be, gɛ dood wɔ gɔ hi tal a Bɛt wáát du. Kag wɔ be, gɛ dood wɔ hi gi doo bɔbtin bɔ ɔnɛ. Za̧a̧n lɔlhɛ̧ɛ̧nikya bɔ lug kag be, gɛ loorɛha̧a̧lɛ; totɓɛs be, gɛ waalda̧a̧ki. Totɓɛsya wɔ be, gɛ Bɛt walɛsɛrɛ wɔ be.
Kag durk bɔ yaakɔ laa du, waalda̧a̧k gi gi anbɔ. Za̧a̧n Waa bɔ gi yaa walɛsɛrɛ ɔ̧ɔ̧ hi ha̧sil dood wɔ hi yaak nayza hinha̧a̧l du hi wɔ hi wook hinha̧a̧lɛ, hi gbalihi laazɛŋk du, hi gbuu kaalɛ, hi gboo nuŋgya̧ gedu. Gɔ gi anbɔ dood riitɛ wɔ be, hí gáa an ɔ̧ti a Baaya̧ Bɛt wáát du. An za̧a̧nyɔ gin tɔnɛ gi kɛmɔ!
Bɛt wáátɔ riitin an rɔɔs yɔ hi yaat a bak za du. Za̧a̧nza gi zol gi yaatige. Hin harig gbɔɔltɔnɔ an gi re gi zebr hinyɔ gin nɛ sɛw gi dag tusɔ gi zaa gi zemn bak bɔ. Bɛt wáátɔ dɔglɔ riitin hi wɔdriŋnikya yɔ gi ɓɛɛk root an gi zebɔ. Yɔ gbɛn root za tusɔ gi an gi dag hinza ha gbɔɔltɔnɔ, ɗun rek zebr hinyɔ gin nɛ sɛw, wɛɛ zaa zeb root bɔ hi wɔdɔ wɔ tusɔ dagzɔ.
Bɛt wáátɔ dɔglɔ riitin hɛw an zagr yɔ doo za gɔ gbal a mɛmbal gbɔɔl du gi tunz dut dɔ̧ɔ̧t yɔ gi sɛw. Zagr bɔ hi̧i̧sɔ, dutwa̧a̧kya wɔ hi diz a mɛmbalya̧ di hi ɗɔɔt hi ha̧sil dut wɔ a zagr bɔ gedu. Hi yaa dut rɔbɛ wɔ dɛl du, hi wɛɛ hi bisil dut ha̧a̧l wɔ mɛmbal du. Hinɔ gi gi anbɔ a waalda̧a̧ki: Bɛt walɛsɛrɛ wɔ hi zaa hi ha̧sil dood ha̧a̧l wɔ a dood rɔbɛ wɔ hi tees du. Hi loo dood ha̧a̧l wɔrɔ hi yaahi a laazɛŋk du. Hi gbuu kaalɛ hi wɛɛ hi gboo nuŋgya̧ gedu.
Yeesu war walɛsɛrɛ ɔ̧ɔ̧ wɔ
a nɛ kɛm hin wɛrɛ sɛw ya?
Hi ta̧a̧
a hɔɔ, wi kɛ̧ɛ̧mɔ!
Wɛɛ raahi gɔ,
a yɔ anbɔ, Bɛtmaak-dɔkya yɔ hi gogsig Bɛt wáátɔ dɔgl gi fɔk sɛw riitin an za̧a̧n za rɔɔszulya yɔ gi tuusig hin seg hi hin wɔm a rɔɔsɔ bɔ gedu.
Yɔ Yeesu da̧a̧s ya̧a̧daanik wɔrɔ bookɔ ɗund hɔdi, rek a waal bɔ da tɔɔz nɛ gedu. Wɛɛ da yɛls dood hingok a mɔksillukya̧ bɔ gedu. Yɔ hingokɔ bɔ kɔms dood wɔ hi gi di sɛw gɛrsɛ hi watinu
a hinmɛɛk wɛrɛ hi tɛŋk bɔ an gi woo gɛrs wɛrɛ hi gisig fu̧u̧zig ay?
Yusufu tɛ̧ɛ̧hɛɛkya bɔ waawal gii yɔ gɛ ya? Nɛ nɔɔtɔ gii Mariyama ma mi? Yakuba hi Yusufu hi Simɔŋ hi Yahuda hi taa yɛ̧ɛ̧dɛ ɔ̧ɔ̧ ya?
Nɛ siŋdɛ ɔ̧ɔ̧ sɛw hi waak wɛ teesdu dihɛ ma mi? Zɛm tɛŋk bɔ ay nɔ?
Hin wɔrɔ hi dɔkt lab gii aanihi Yeesu ɗɔbsugo. Hɔnɛ Yeesu wɛɛ dɔgɔ
a hi ta̧a̧k Bɛtya̧a̧kɛŋkya a lɛlza sɛw, wɛɛ gi waal du, a doodɔ hi teesdu hi gig lɔlhɛ̧ɛ̧nuko.
Yeesu wōō gɛrs kit hɔ gɛ, anyɔ hi tā̧a̧g ɗɔbsig gɛ.

Listen to MATA 13