Chuj, San Sebastian - 1999 Edition (NT) Drama

Chuj, San Sebastian - 1999 Edition (NT)

Biblia Chuj San Sebastian © Sociedades Bíblicas Unidas, 1999.

Xlajw cha, til wal jun tzo'n̈ chon̈ab', yet' jun tzo'n̈ aldea 'aj 'ix b'eyc' Jesús, yic x'ec' yalnc 'el spaxti Dios 'a scal eb' 'anma'. 'Ix yal-l wach' 'ab'x 'a eb', chajtl tz'aj eb' yoch 'a yol sc'ab' Dios. Ax eb' schecb' slajchwan̈il, ajun eb' yet'oc. 'Ay jun tzo'n̈ eb' 'ix 'ix 'aj 'elnc ewin demonio yuj Jesús, yet' jun tzo'n̈ xo eb' 'ix, b'oxnac can sc'ojl yu'uj, ajun pax eb' yet'oc. A 'a scal eb' 'ix cha, ajun María, tzcuch pax Magdalena. Atn 'a jun 'ix chi 'aj 'elnc ucwn̈ ewin demonio yuj Jesús. Ajun pax 'ix Juana yistzil Chuza, atn win tz'iln smunljel win rey Herodes. An̈jtona', ajun pax 'ix Susana, yet' nan̈l xo eb' 'ix xcolwj yet' tas 'ay 'a eb'.


Til wal 'anma xcot 'a junjn chon̈ab', 'ix syam sb'a eb' 'a Jesús. Yuj cha, xyaln jun 'ab'x tic 'a eb' 'ixtic: 'Ay jun winc x'at tzicj 'in̈at. Yic wan stzicni, 'ix tz'itj can 'at jun tzo'n̈ 'a yol b'e. Yuj cha, ton̈j xte'xi, ax no ch'ic x'ec' si'noc. 'Ay jun tzo'n̈ xo xc'ochcn 'a yib'n̈ samq'ue'en; ax yic 'ix paq'ui, yajn̈ej xtacj 'eli, yujto man̈ yaxoc jab' slumal yib'n̈ q'uen cha. 'Ay jun tzo'n̈ xo xc'ochcn 'a scal c'ultac, ax te c'ultc cha, xwach' q'uib' te', ton̈j 'ix sat 'ejm jun tzo'n̈ 'in̈t chi 'a scal te'. Palta 'ay jun tzo'n̈ x'emcn 'a 'aj caw 'ay syaxil lu'um. Ax yic 'ix q'uib' jun tzo'n̈ cha, 'ix satni. 'Ay jun tzo'n̈ xyac' sat 'a jun ciente, xchi Jesús 'a eb'.
Xlajw yaln Jesús jun tzo'n̈ cha, caw 'ip 'ix yal junx tic 'a eb' 'ixtic: A jun tzo'n̈ tzeyab' tic, nac wal si'mb'il, xchi.


Ax eb' scuywum Jesús, 'ix sc'anb'n eb' 'a 'a, tas tzyal 'el'ch jun 'ab'x cha. Yuj cha, xyaln 'a eb' 'ixtic:
A 'ayx wan sch'oxn Dios jun tzo'n̈ tas mant 'a mach 'ojtnac, sec tznachj 'el eyu'uj chajtl tzex 'aj eyoch 'a yol sc'ab'. Palta ax 'a jun tzo'n̈ xo eb' 'anma', cojn jun tzo'n̈ 'ab'x ya snachj tzwal 'a eb'. Yuj cha, wach'xam tzyil eb' junc tas, ton̈j tzcan eb' 'ixta', 'icha to may tas tzyil eb'. An̈jtona', wach'xam tzyab' eb', palta matz nachj xon 'el jac yuj eb'.


'Oj wal 'ayex, tas tzyal 'el'ch jun 'ab'x xwal tic. A jun tzo'n̈ 'in̈t cha, tzyal 'el'chi, atn spaxti Dios. A jun tzo'n̈ 'in̈t 'ix tz'itj can 'at 'a yol b'e, tzyal 'el'chi, 'ay eb' 'anma tz'ab'n spaxti Dios, palta tzc'och win diablo 'a eb'. Tz'at yi'nc 'el win spaxti Dios 'a snab'en eb', sec wach' matz ya'ch eb' sc'ojl 'a 'a, matz colchj eb' yu'uj. Ax jun tzo'n̈ 'in̈t xc'ochcn 'a yib'n̈ samq'ue'en, tzyal 'el'chi 'ay eb' 'anma tz'ab'n spaxti Dios, caw tzaljc'ojlal tzchaj eb'. Palta may ste'nal eb', jab' wal tiempo tzya'ch eb' 'a sc'ojol, yujto a yic tzjaw junc prowal 'a yib'n̈ eb', yajn̈ej tz'elx can eb' muc'uc. Ax jun tzo'n̈ xo 'in̈t xc'ochcn 'a scal c'ultac, tzyal 'el'chi 'ay eb' 'anma tz'ab'n spaxti Dios. Palta ax yic tzb'ey tiempo, til wal tas tzna eb': tzna eb' ricoal, tznan pax eb' yuj yic sniwnal. Yuj wal jun tzo'n̈ cha, tzjuw 'el eb'. Lajn tz'aj eb' 'icha 'ixm trigo may xon jac sjolm tzyac'a. Palta ax jun tzo'n̈ 'in̈t x'emcn 'a 'aj 'ay syaxil lu'um, tzyal 'el'chi, 'ay eb' 'anma caw wach' tzyutj yab'n spaxti Dios 'a smasnil sc'ojol. Caw tzya'ch eb' 'a sc'ojl si'mb'il. Te'n tzyutj eb' snab'en, yuj cha, lajn eb' 'icha 'ixm trigo may xon tz'aj sjuwi, wach' tz'aj sc'anb' sjolom.


A yic tzca'nec 'och qui cantil, matz qui n̈ojc q'ue junc chen 'a yib'an̈, matz ca'c pax 'och 'a yaln̈ ch'at. Palta a 'a yib'n̈ junc tas cha'an̈, ata tzcac' q'ue'i, sec wach' sacq'uinl tz'aj 'ejm yoc 'a eb' tz'och quet'ec 'a yol n̈a cha. Jantcn̈ej tas c'ultac yaj ticnec, 'oj checljoc 'eli, yet' jantcn̈ej tas c'ub'b'il 'el ticnec, 'oj 'ajxoc 'ojcaxc 'eli.
Yuj cha, caw tzeya'ch e chicn 'a tas tzwala. Yujto a eb' tznib'j tznachj 'el yu'uj, 'oj wach' 'ajxoc nachjc 'el yuj eb'. Ax eb' matz nib'j tznachj 'el jun tzo'n̈ tic yu'uj, a jab' tas 'ijn tznachj 'el yuj eb', 'oj wach' 'ijxoc 'ec' 'a eb', xchi Jesús.


Ax snun Jesús yet' eb' yu'tac, 'ix c'och eb' 'a 'aj 'ayq'ui. Palta ma'ix stac' yoch eb' 'a 'aj 'ayc' cha, yujto til wal 'anma sin̈n̈i yajchi. Yuj cha, 'ay jun 'ix aln 'ixtc 'a 'a:
—'Ix jaw a nun yet' eco o'tac 'a sti', tolab' tznib'j eb' tzach sc'umej, xchi 'a 'a.
Palta 'ix yaln 'ixtc 'a eb' 'ayc' yet' cha:
—Tzann̈j mach tz'ab'n spaxti Dios, toto tzyiclej, atn wal eb' chi 'icha in nun, 'icha wu'tac yaji, xchi 'a eb'.


A 'a jun 'el, 'ix 'och Jesús 'a yol barco yet' eb' scuywum, 'ix yaln 'a eb' 'ixtic:
—Coyc 'a sc'axpil 'ec' a', xchi 'a eb'.
Yuj cha, x'at eb'. Ax yic wan sb'ey eb' 'ix way Jesús. Palta jun 'ipn̈ej wal cha, 'ix jaw jun 'ic' caw ow. 'Ix yutz'n chan̈ a', x'och chel-loc a 'a yojl te', 'ijn wal xcaw 'at te 'a yich a'. Yuj cha, spitzn 'el eb' swayn̈ Jesús, 'ix yaln eb' 'ixtc 'a 'a:
—¡Mamin, ach qui Cuymal on̈, 'ilto! ¡Wal qui 'atc 'a yich a tic! xchi eb'.
'Ix q'ue wan Jesús, stenn 'och wan jun 'ic' chi yet' a mar. 'Ix 'och wa'an, caw sictac x'aj smasnil. Xlajw cha, xyaln 'a eb' scuywum chi 'ixtic:
—¿Tas yuj matz eya'ch wal e c'ojl 'a Dios? xchi 'a eb'.
Palta ton̈j 'ix caw sat sc'ojl eb' yuj si'mb'il, 'ix laj yal-lanc eb' 'ixtic:
—¿Tas laj wal yaj jun winc tic? 'In tztac' ya'n mandar 'ic' yet' a mar, tzyiclni pax 'a 'a, xchi eb'.


Xlajw cha, xc'och eb' 'a sc'axpil 'ec' sti a', 'a yol yic Gerasa. A jun cha, a 'a stojlal Galilea 'a sc'axpil 'ec' a cha, ata 'ay. Yic 'ix 'el'ch Jesús 'a sti a', 'ix jaw jun win 'aj chon̈b' chi 'a 'a. Caw 'ayx tiempo 'ochnc jun tzo'n̈ demonio 'a winac, yuj cha, may xon jac spichl win tzya'chi. Toxn matz nib'j xon win tz'aj 'a yol junc n̈a, an̈j 'a 'aj mucn eb' chamnac, an̈jta 'ayc' winac. Yic xyiln win Jesús, 'ix 'em cumn win 'a yojltac. Ax Jesús xaln 'a win demonio cha to tz'el 'a winac. Yuj cha, caw xq'ue yaw win yaln 'ixtc 'a 'a:
—¡Ach Jesús, Yunnal ach Dios yel xo niwn yel'chi! ¿tas aln ec 'ayin? ¡Tzin tew 'ayach, man̈ in extoc! xchi win 'a 'a.
Til wal 'ejm tzyamchj win 'anma chi yuj win demonio cha, yuj cha, tzcob' jalx can 'ejm win yet' q'uen cadena yuj eb' 'anma', tz'och 'a yoc yet' 'a sc'ab'. 'Ixta tzyutj eb' sec matz mil sb'a winac. Palta ton̈j n̈i'chj 'at jun tzo'n̈ cadena chi yuj winac, yuj win demonio cha tzoyb'x 'at win 'a cusltac lu'um. 'Ix sc'anb'n Jesús 'ixtc 'a winac:
—¿Tas a b'i? xchi 'a winac.
—Legión in b'i, xchi winac.
'Ixta xyutj win yalni, yujto caw niwn ewin demonio chi 'aych 'a winac. Ax ewin demonio cha, 'ix tew 'och ewin 'a Jesús, to matz 'ajx 'at ewin 'a lum xab' olan. Ax 'a spa'nil q'ue jun witz 'aj 'ayc' eb' cha, 'ay nan̈l no chitm wan swa ta'. Yuj cha, 'ix tew 'och ewin demonio chi 'a Jesús, to tz'ajx can 'at ewin 'a e no chitm cha. Ax Jesús, xchan sc'ojl yochcn ewin demonio chi 'a e no'. Yuj cha, x'el ewin demonio chi 'a win b'i'an, ax 'a e no chitm chi x'at 'ochx can ewinac. Yuj cha, x'at e no 'a sat pac'an, 'ix c'och e no 'a yojl a mar. Axta xjic'w cham e no smasnil.
Ax eb' yilmal e no cha, xyiln eb' tas x'aj e no'. Yuj cha, caw xiw chan̈ eb', 'ix 'at eb' laj yal-l yab'xil jun chi 'a scal chon̈ab', yet' 'a najat. Yuj cha, x'at laj yilnc eb' 'anma', tas jun chi 'ix uj cha. Ax yic xjaw eb' 'a 'aj 'ayc' Jesús cha, 'ix yiln eb', to a win 'aj 'elnc ewin demonio cha, wocn 'ec' ta'. 'Ayx 'och spichul, caw wach'x sc'ojol. Yuj cha, xcaw xiw eb'. Ax eb' x'iln jun tzo'n̈ tas 'ix sb'o Jesús cha, a eb' xaln 'a jun tzo'n̈ xo eb' tzat jawi, chajtl x'aj sb'ox sc'ojl win 'aj x'el ewin demonio cha. Ax eb' 'anma smasnil 'a yol yic Gerasa cha, 'ix tew 'och eb' 'a Jesús, sec tz'el 'a yol slugar eb', yujto caw tzxiw eb' yu'uj, yuj cha, x'ochx 'a yol barco yic tzpaxi. Ax win 'aj 'elnc ewin demonio cha, 'ix tew 'och cob' win 'a Jesús, yujto tznib'j win tz'at yet'oc. Palta ma'ix chax 'at win yu'uj. 'Ix yaln 'a winac, to tzcan win 'a jun lugar cha.
—Paxn̈ 'a atut, tzal-li jantcn̈ej tas 'ix b'o 'aych yuj Dios, xchi 'a winac.
Yuj cha, x'at winac, c'uxn spucl win 'a jun chon̈b' cha, tastc 'ix sb'o Jesús 'a winac.


Xlajw cha, 'ix meltzj pax Jesús 'a junx sc'axpil 'ec' sti. Yic 'ix c'ochx 'a junx sc'axpil a cha, caw tzaljc'ojlal schaj eb' 'anma smasnil, yujto caw tan̈b'il xon sc'ochx yuj eb'. Ata 'ay jun win Jairo sb'i, syajlil jun capiya. 'Ix jaw win 'a Jesús, 'ix 'em cumn win 'a yojltac. Xtew 'och win 'a 'a, to tz'at yet' win 'a yatut. Yujto a jun c'otn̈ yisl winac, caw tzchami, caw jab'xoj pitzan. 'Aym slajchwilc ab'il sq'uinl jun yisl cha.
Ax yic x'at Jesús yet' winac, til wal 'anma x'at pax yet'oc. Caw witz'n s'at b'uyb'noc eb' yet'oc. A 'a scal eb' 'anma cha, 'ay jun 'ix 'ix, 'ayx slajchwil ab'il caw tzcham yuj a a tz'el 'a 'a. Jantcn̈ej tas 'ay 'a 'ix, c'uxn schon̈l 'ix yuj eb' 'a'm remel, palta ma'ix b'ox xon jac sc'ojl 'ix yuj eb'. Yuj cha, xjaw 'ix 'a spatquil Jesús. Stzayn 'och 'ix sc'ab' 'a sti spichl Jesús, yajn̈j wal cha, x'och wan a yel 'a 'ix. Ax Jesús, 'ix sc'anb'n 'ixtc 'a eb' 'anma cha:
—¿Mach jun stzaych sc'ab' 'ayin? xchi.
Palta xyaln eb' smasnil, to may eb' stzaych sc'ab' 'a 'a. Ax Pedro yet' jun tzo'n̈ eb' yit cuywumal, 'ix yaln eb' 'ixtc 'a 'a:
—Ach qui Cuymal, caw sin̈n̈i ajcn 'a scal eb' 'anma', yic tzon̈ b'eyi. Til wal eb' tzlaj stench sb'a 'ayach, tzlajw cha, tza c'anb'ni: ¿Mach stzaych sc'ab' 'ayin? xa chi, xchi eb' 'a 'a.
Palta xyaln Jesús 'ixtic:
—'Ay jun mach 'ix 'ec' stzaych sc'ab' 'ayin, wojtac to 'ix b'ox sc'ojl yuj in poder, xchi.
Ax 'ix 'ix cha, xyilni to man̈xtzac stac' sc'ub'n 'el sb'a 'a scal eb' 'anma cha. Yuj cha, caw x'ib'x chan̈ 'ix yuj xiwlal. 'Ix jaw 'ix 'a Jesús, 'ix 'em cumn 'ix 'a yojltac. 'Ix yaln 'ix 'a sat eb' 'anma chi smasnil, tas yuj 'ix tzaych 'ix sc'ab' 'a 'a. 'Ix yaln 'ix chajtl x'aj sb'ox sc'ojl yu'uj. Yuj cha, xyaln 'ixtc 'a 'ix:
—Ach 'ix, tic tzb'ox can a c'ojl wu'uj, yujto xa'ch a c'ojl 'ayin. Yuj cha paxn̈ 'a tzaljc'ojlal, xchi 'a 'ix.
Yic wanto yaln Jesús, 'ay jun win xcot 'a yatut win Jairo cha, 'ix wul yalnc 'ixtc 'a winac:
—A jun esl cha, tox 'ix chami. Nab'a xoj tz'at yixtc sb'a qui Cuymalec tic 'at yila', xchi win 'a winac.
Palta yic 'ix yab'n Jesús jun cha, 'ix yaln 'ixtc 'a winac:
—Man̈ a na', cojn wal to tza'ch a c'ojl 'a Dios, ax sb'ox sc'ojl 'ix esl cha, xchi 'a winac.
Yic 'ix c'och eb' 'a yatut winac, ma'ix schaj 'och Jesús eb' 'anma yet'oc, cojn Pedro, Jacobo, yet' Juan 'ix schaj 'och yet' smam snun 'ix cha. Toxn̈ej tzsomlji eb' 'anma chi yoc' yuj 'ix, palta xyaln 'a eb' 'ixtic:
—Man̈ ex 'oc'oc, man̈ chamncoc 'ix 'unn tic, ton̈j waync 'ix, xchi.
Palta ton̈j stzetzj eb', yujto yojc xon eb' to chamnc xo 'ix. Xlajw cha, 'ix 'och yamn Jesús 'a sc'ab' 'ix, caw 'ip 'ix yal 'ixtic:
—Ach cob's 'unin, q'uen̈ wa'an, xchi.
Yajn̈j cha, 'ix pitzw pax 'ix yu'uj, 'ix q'ue wan 'ix. Yuj cha, xyaln Jesús to tz'ajx wa 'ix. Ax smam snun 'ix, caw 'ix sat sc'ojl eb' yilni. Palta 'ix yaln Jesús 'a eb', to may junc mach 'aj tzyal-l eb', tas 'ix 'aj spitzw pax 'ix.

Listen to Lc 8