Zapoteco de Santa María Quiegolani - 2010 Edition (NT) Drama

Zapoteco de Santa María Quiegolani - 2010 Edition (NT)

Ndal mén wkaa wkakaa yra ne wak lad be; wkaa meno zegne wneluu wneluundxee yra mén ne wii yra ne wlaa Jesus axtegue ne wzelo Ne no laa men wtxëëts diizo. No ke noo wkaa wkanabdiiz wen wenendxee yra ne wlaa Ne axtegue ne wzelo Ne. Por neguin ryenen noo ne wen ykaa noo we xnëz xnëzendxee por laa de Teofil ne nak de zhannon, chen gaknanwen de diznli ne wneluu men lo de.

Chene wak Herodes rrey lyu ne la Judea, wuu te fxuz ne la Zacari ne nuu lad tebëd fxuz ne la Abías; le lzaa Zacari la Elisabet, xnëz fxuz-Aarón zëëd Elisabet. Xnëz wbán Zacari yrup lzaa Zacari nes lo Dëdyuzh no wlaa men yra ne rkyeen Ne no yra ne rnebééy Ne. Rut gundet gan pe gue por laa men. Per yëten men mëëd porke nuudet gap Elisabet mëëd no che kesentyent gol men yrup men.
Dxe ne ryal ylaa xegrup fxuz-Zacari dxiin por Dëdyuzh, wlaa men zegnak xkoxtumber men yra sefxuz men, gan txuzh yganen tee guu guux ne nzoon rree lenxeydoo Dëdyuzh. Laatee Zacari wganeno. Or ne le Zacari kaguu guux guin lenydoo, le yrandxee mén ndxin fwer kanab lo Dëdyuzh. Orguin wlalo te xangel Dëdyuzh lo Zacari; zu ne koo fkuuk ladbëë, ledne ruu guux ne nzoon rree. Ne wii Zacari angel guin, axtegue nandet men pe nlaa men, tant wdxe men. Lex re angel guin lo men:
―Zacari, ydxedet de, porke le ne rnab de che won Dëdyuzh; naaree gap Elisabet xewnaa de te mëdbee, ynesela de ne Xwa. Kesentyent sak lextoo de no szhiilen de chene gal ne, no ndal ke mén yzhiilen, porke te zhannon gak xpee de lo Dëdyuzh. Goodet zhaa bin, ni betlel nisndux goodet zhaa, no axtegue antes ne gal zhaa, che kesentyent raknonen Espíritu Sant zhaa. Laa zhaa ylaa ne kesentyent ndal men-Israel yberee lo XDëdyuzh men-Israel. No laa zhaa chidner lo Zhan ne rnebééy ne chiid. Gap zhaa xpoder Elías no le xespíritu Elías, chen ynegyakchi zhaa xdil ngwzan yra ngwzan zhiin ngwzan no chen yseed yra mén ne ntoz gon men diiz. Zenga ylaxnëz zhaa mén chen tsukas mén Zhan ne rnebééy ne chiid.
Orguin re Zacari lo angel guin:
―¿Pezee gaknan noo ne nli negwa ne na de? Si che kesentyent gol noo yrup noo xewnaa noo.
Wke angel guin, re ne:
―Noo nak Gabriel, xdxiin Dëdyuzh kalaa noo; laa Ne wxaal noo ne ynii noo lo de no ne yzëët noo dizwenree lo de. Per kom wlaleedxdet de noo, orree gyanengup de, gakdet ynii de axtegue ne ydxiin dxe ne gak neree ne na noo lo de.
Le yra mén ndxin fwer ndxinmbë́z men Zacari, rzee rzak men gan penak rruudetlel Zacari lenydoo. Chene le Zacari wruu, wakdetre nnii Zacari lo men. Orguin wyenen men ne nuu ne wlalo lo Zacari lenydoo. Noze senye rluu Zacari lo men, porke wyanengup Zacari.
Chene wzaa dxe ne zu Zacari ruydoo, sya Zacari ruxyuu Zacari. Zhich guin wakzhiin Elisabet xewnaa Zacari. Gaay mëëw axtegue wruudet men xyuu men, nuu lextoo men: “Wseleedx Dëdyuzh mëëdree lo noo chen koodetre mén xeblaan noo.”

Chene wluzh xuup mëëw, wxaal Dëdyuzh angel-Gabriel te gyëz ne la Nazaret ne nak lo lyu ne la Galilea; wa ne lo te nzeb-benak ne la Mli. Che nuu nzeb ne ytsëlnya nzeb yrup nzeb te mgyeey ne la Xeb ne zëëd xnëz rrey-David. Zegne wdee angel guin ledne nuu nzeb, re ne lo nzeb:
―¡Payuz, Mli! Dëdyuzh wlanon de; laa Ne raknonen de; laa Ne wneleey de delo lo yrandxee wnaa.
Per chene wii nzeb angel guin, wzee wzak nzeb por diiz guin, nuu lextoo nzeb pe rnaleg diizree. Lex re angel guin lo nzeb:
―Mli, ydxedet de, porke laa Dëdyuzh raknonen de. Orrenaa gakzhiin de; gap de te mëdbee, ynesela de ne JESUS. Kesentyent gaknon ne; XPee Dëdyuzhnzoon ynii mén ne; laa Dëdyuzhnzoon ylaa ne rrey zeg wak David ne nak xpenkwlal ne rrey, chen laalel ne ynebééy lo yrandxee men-Israel, no nunk gyaldet ynebééy ne.
Lex re nzeb lo angel guin:
―¿Pezee gak negwa ne na de, si ni te mgyeey gardet tsuno noo?
Wke angel re angel:
―Por Espíritu Sant gako; chiid xpoder Dëdyuzhnzoon ysakblaa we led de; por neguin mëdsant gwa ne gap de, XPee Dëdyuzhnzoon ynii mén ne. No Elisabet xparyent de gap te mëdbee mase che gol men, men ne nan mén ne nuudet gap mëëd, per naaree wzaa xuup mëëw nakzhiin men. Porke por Dëdyuzh yët ne gakdet gan gak.
Lex re nzeb:
―Dëdyuzh rnebééy lo noo; ylaa Ne noo zegne na de.
Wluzhse re nzeb diizree, syague angel guin.

Zhichegue wako, zague nzeb te gyëz ne nak nes gyeey lo lyu ne la Judea; ne wdxiin nzeb, wdee nzeb lenxyuu Zacari, wgabtyuzh nzeb Elisabet. Chene won Elisabet diztyuzh guin, watxegya mëëd lextoo Elisabet, no kesentyent waknonen Espíritu Sant men. Orguin ndípse wnii men, re men lo nzeb:
―Dëdyuzh wneleey de delo lo yrandxee wnaa, no wneleey Ne mëëd gwa ne zuneey de. ¿Txu nak noo ne zëëd xnaa Men ne rnebééy zëdwii men lo noo? Porke zegne won noo xdiztyuzh de, watxegya xpëëd noo lextoo noo por gyelgwzhiil. Nzoon de ne wlaleedx de ne na Dëdyuzh lo de, porke zako.
Lex re nzeb:
Ydeblextoo noo rzaknon noo Dëdyuzh,
no rzhiilen lextoo noo ne wselaa Ne noo lo dol.
Porke wkalo Ne noo, mase rut nakdet noo, noze te mén ne rlaa xdxiin Ne nak noo.
Desde orree yrandxee mén ne nuu naaree, nigle mén ne gyed tsuur, ynii men noo men nzoon.
Porke nzoon yra ne wlaa Dëdyuzhnzoon noo;
sant nak la Ne.
Syemper rles lextoo Ne yrandxee mén ne rlaa ne rkyeen Ne.
Ndal ne wlaa Ne kon xpoder Ne;
wluzh Ne ne rlebleedx yra mén ne nugya lextoo.
Wgyitxee Ne poder lo mén ne zob rnebééy,
le mén ne rut nakdet wlagya Ne.
Wseleedx Ne gyelenzaak lo mén ne yët ne gu,
le menrik wsan Ne nonchee zenga.
Nunk wnitleedxdet Ne ne gun Ne xyudar yra men-Israel ne nak xpén Ne,
syemper wles lextoo Ne men,
zegne re Ne lo yra xpenkwlal be,
lo Abraham no le lo yra men ne zëëd xnëz men.
Nga wkaa nzeb ruxyuu Elisabet zeg tson mëëw, zhich guin wberee ke nzeb ruxyuu nzeb.

Chene wdxiin dxe ne le xpëëd Elisabet wal, wap Elisabet te mëdbee. No chene waknan yra mén ne nuu guex ruxyuu Elisabet no le yra xparyent Elisabet ne wles lextoo Dëdyuzh Elisabet, kesentyent wzhiilen men; wa men gyelgabtyuzh lo Elisabet. Ne wluzh mëëd guin xun gbiz, waneey men ne wuu ne beey ne ruu men-Israel, lex wlaan mén nnesela mén ne Zacari zegne la ke xuz ne. Per re xnaa ne:
―Seladet ne zegwa, Xwa sela ne.
Lex re men:
―¿Penak sela ne Xwa, si ni te xparyent de ladet Xwa?
Lex wnabdiiz men lo xuz ne kon senye, chen gaknan men pezee rlaan xuz ne sela ne. Orguin wnab xuz ne tebla tabel, lex wkaa men lo tabel guin: “Xwa sela ne.” Wzee wzak yrandxee mén guin. Orgueguin wberee wnii Zacari ste, lex wzelo men wdee men dexkyizhtee lo Dëdyuzh. Yrandxee mén ne nuu guex ruxyuu men wzee wzak, no yrandxee gyëz ne nak nes gyeey lo lyu ne la Judea ruu mén diiz neguin ne wak. Yra mén ne wono, nuu we lextoo men, lex re men:
―¿Txu gakleg mëëd gwa?
Porke nlipee ne Dëdyuzh raknonen ne.

Kesentyent waknonen Espíritu Sant Zacari xuz mëëd guin; wzëët men yra diiz ne wguu Dëdyuzh lextoo men, re men:
Dexkyizhtee Dëdyuzh ne rnebééy lo men-Israel,
porke zëdselaa Ne be yra be ne nak be xpén Ne.
Lad men ne zëëd xnëz David ne nak xpén Ne,
wseleedx Ne te mén ne rap poder ne yselaa be.
Zegne re Ne axtegue chekwlal ne wzëët yra men ne nak xprofet Ne,
ne selaa Ne be lo yra mén ne rlayaa lo be no le lo mén ne rlaandet kwii be,
no ne sles lextoo Ne yra xpenkwlal be,
no ne nitleedxdet Ne ne che re Ne ne ylaa Ne.
Laa we nga re Ne lo Abraham xpenkwlal be:
ne selaa Ne be lo yra mén ne rlaandet kwii be,
chen betre ydxedet be ylaa be xdxiin Ne,
no xnëz gak be lo Ne, wen ybán be ydeblo ne ybán be.
Le laa de zhiin, xprofet Dëdyuzhnzoon ynii mén de,
porke laa de saner ylaxnëz xnëz Men ne rnebééy,
chen ylaa de ne gaknan xpén Ne pezee yláá men lo dol,
chen gak perdon xdol men.
Por ne kesentyent ryaan XDëdyuzh be be no por ne rles lextoo Ne be,
neguin wxaal Ne XPee Ne gak bnii por laa be,
chen yzenii Ne lo mén ne nuu lo nkeb, men ne che nuu por guet
no chen yneluu Ne be gakndxi be.
Le mëëd guin zayaknzhoo no zayakfwert xespíritu ne; denbidx wuu ne axtegue ne wdxiin dxe ne wzelo wzëët ne xdiiz Dëdyuzh lo men-Israel.

Listen to LUCAS 1