Recording of the Inuktitut NT without background music.

Eastern Arctic Inuktitut Bible © Canadian Bible Society, 2012, 2021. ℗ Hosanna 2023

Inuktitut - CBS (NT) Non Drama

Inuktitut - CBS (NT) Drama

ᑐᒃᓯᐊᕐᕕᒡᔪᐊᕐᖕᒥᑦ ᐊᓂᓕᕐᖕᒪᑦ, ᐃᓕᓐᓂᐊᖅᑎᖏᑕ ᐃᓚᖓᑦᑕ ᐅᖃᐅᑎᕚ, “ᑕᑯᒋᑦ, ᐊᔪᕆᖅᑐᐃᔩ, ᒪᑯᐊ ᐅᔭᕅᑦ ᓴᓇᒪᓂᖏᑦ ᐊᒃᓱᐊᓗᒃ ᑕᑯᒥᓇᖅᐳᑦ, ᐃᒡᓗᑦᓯᐊᕙᒻᒪᕆᐊᓘᓪᓗᓂᓗ!”
ᔩᓱᓯᐅᑉ ᐅᖃᐅᑎᕚ, “ᐃᒡᓗᓕᐊᕆᓯᒪᔪᑦ ᒪᒃᑯᐊ ᓴᓇᒪᑦᓯᐊᖅᑐᑦ ᑕᑯᕕᒌᑦ? ᐅᔭᕋᒃᑕᖏᑦ ᐊᑕᐅᓯᕐᓘᓐᓃᑦ ᐃᓂᒥᓃᑦᑐᖃᕈᓐᓃᕈᒫᖅᐳᑦ, ᑕᒪᕐᖕᒥᑦᓯᐊᖅ ᐅᕐᕈᑎᑕᐅᔪᒫᕐᖕᒪᑕ.”


ᖃᖅᑲᐅᑉ ᖄᖓᓂ ᐃᒃᓯᕙᓕᕐᖕᒪᑦ ᓇᐹᖅᑐᓕᖕᒥᒃ ᐸᐅᕐᖓᖃᖅᑐᓂ ᐅᖅᓱᒃᓴᖅᑕᓕᖕᓂᒃ ᑐᒃᓯᐊᕐᕕᒡᔪᐊᑉ ᓇᓕᓪᓗᐊᖓᓂ, ᐲᑦᑐᕉᓯᐅᑉ ᔧᒥᓯᐅᓪᓗ ᔪᐊᓇᓯᐅᓪᓗ ᐋᓐᑐᕉᓪᓗ ᐅᐸᒃᐹᑦ ᑖᒃᑯᑑᓪᓗᑎᒃ. ᐅᖃᕐᓗᑎᒃ, “ᐅᖃᐅᑎᓚᐅᖅᑎᒍᑦ, ᖃᖓ ᑕᒪᓐᓇ ᑍᒤᑦᓱᒫᖅᐸ, ᓱᓇᓂᒃ ᓇᓗᓁᒃᑯᑕᖃᕈᒫᖅᐸ ᑕᒪᑐᒪ ᓇᓪᓕᐅᑎᓂᖓ?”
ᔩᓱᓯᐅᑉ ᐅᖃᐅᑎᕔᑦ, “ᖃᐅᔨᓴᑦᓯᐊᕆᑦᓯ ᐅᐃᕖᕐᕆᔭᐅᖁᓇᓯ. ᐊᒥᓱᑦ ᐊᑎᓐᓂ ᐅᕙᖓᐅᓂᕋᕐᓗᑎᑦ ᑎᑭᑦᓱᒫᕐᖕᒪᑕ ᐅᖃᕐᓗᑎᒃ, ‘ᑖᓐᓇᐅᕗᖓ!’ ᐊᒥᓱᑦ ᐅᐃᕖᕐᕆᔪᒫᖅᐰᑦ. ᐅᓇᑕᖅᑐᓂᒃ ᑐᓵᓕᕈᑦᓯ ᐅᓇᑕᖅᑐᓪᓗ ᐅᓂᒃᑲᐅᓯᐅᓂᖏᓐᓂᒃ ᑐᓴᖅᑎᑕᐅᒍᑦᓯ, ᑲᑉᐱᐊᓱᖕᓂᐊᕋᓯ; ᑕᒪᒃᑯᐊ ᓇᓪᓕᐅᑎᔭᕆᐊᖃᕐᖕᒪᑕ, ᓯᓚᕐᔫᑉ ᓇᒡᒐᑖ ᓱᓕ ᓇᓪᓕᐅᑎᓐᖏᓚᖅ. ᐃᓅᖃᑎᒌᒡᔪᐊᑦ ᐅᓇᑕᕈᒫᖅᐳᑦ ᐃᓅᖃᑎᒌᒡᔪᐊᓄᑦ ᐊᓯᒥᖕᓄᑦ, ᐊᖓᔪᖅᑲᐅᕖᑦ ᐅᓇᑕᕈᒫᖅᐳᑦ ᐊᖓᔪᖅᑲᐅᕕᖕᓄᑦ ᐊᓯᒥᖕᓄᑦ; ᓄᓇᒥ ᓇᓂᑐᐃᓐᓇᖅ ᓴᔪᒃᐱᓪᓚᖃᑦᑕᕈᒫᖅᐳᖅ, ᑳᖕᓇᖅᑐᕐᔪᐊᖃᖃᑦᑕᕐᓗᓂᓗ; ᑕᒪᒃᑯᐊ ᑕᕝᕙ ᐃᕐᖕᓂᓱᒃᑑᑉ ᐃᒃᐱᖕᓂᐊᓕᕐᖕᓂᖓᑐᑦ ᐱᒋᐊᖅᐸᓪᓕᐊᓕᖅᑐᑦ.
“ᐃᓕᑦᓯ ᓇᖕᒥᓂᖅ ᖃᐅᔨᓴᕆᑦᓯ; ᑎᒍᔭᐅᔪᒫᖅᐳᓯ ᐃᖅᑲᖅᑐᐃᕕᖕᒧᑦ ᐱᑎᑕᐅᓗᓯ; ᐋᓐᓂᖅᓯᖅᑕᐅᔪᒫᖅᐳᓯ ᔫᑎᑦ ᐅᒃᐱᕐᖕᓂᕐᖕᒧᑦ ᑲᑎᒪᕕᖏᓐᓂ; ᐋᑕᐅᔪᒫᖅᐳᓯ ᐊᐅᓚᑦᓯᔨᓄᑦ ᐊᖓᔪᖅᑳᕐᔪᐊᓄᓪᓗ ᓇᖏᖁᓪᓗᓯ ᓵᖏᓐᓂ ᐅᕙᖓ ᐱᑦᔪᑎᒋᓗᖓ, ᓇᓗᓁᖅᓯᔪᓐᓇᖁᓪᓗᓯ ᑖᒃᑯᓄᖓ. ᐅᖃᐅᓰᑦ ᑐᓴᕈᒥᓇᖅᑐᑦ ᐅᖃᐅᓯᐅᖅᑳᕆᐊᖃᖅᐳᑦ ᐃᓅᖃᑎᒌᒡᔪᐊᓄᑦ ᑕᒤᓐᓄᑦ. ᑎᒍᔭᐅᒍᑦᓯ ᐃᖅᑲᖅᑐᐃᕕᖕᒧᓪᓗ ᐋᑕᐅᒍᑦᓯ, ᐃᓱᒪᔮᕐᖕᓂᐊᕋᓯ ᓯᕗᓂᖓᓂ ᖃᓄᖅ ᐅᖃᕆᐊᖃᕐᖕᓂᐊᕐᖕᒪᖔᑦᓯ; ᐅᖃᐅᓯᖃᕆᑦᓯᓕ ᑕᕝᕙᓂ ᓇᓪᓕᐅᑦᑐᒥ ᐅᖃᐅᓯᒃᓴᖅᑖᖅᑎᑕᐅᓂᕆᔭᑦᓯᓐᓂᒃ, ᓇᖕᒥᓂᖅ ᐅᖃᓪᓚᖏᓐᓇᑦᓯ, ᐊᓂᕐᖕᓂᕐᓕ ᐃᑦᔪᕐᖕᓁᑦᑐᖅ ᐅᖃᓪᓚᒃᐳᖅ. ᐃᓄᐃᑦ ᑎᒍᔭᐅᑎᑦᓯᔪᒫᖅᐳᑦ ᖃᑕᓐᖑᑎᒥᖕᓂᒃ ᑐᖁᑕᐅᖁᓪᓗᒋᑦ, ᐊᑖᑕᐅᔪᑦ ᑍᒤᑦᓱᒫᕆᕗᑦ ᕿᑐᕐᖓᒥᖕᓂᒃ, ᕿᑐᕐᖎᑦ ᐊᑭᕋᖅᑐᓕᕈᒫᖅᐳᑦ ᐊᖓᔪᖅᑳᒥᖕᓄᑦ ᑐᖁᑕᐅᑎᑦᓯᓗᑎᒃ. ᑕᒤᓐᓄᑦ ᐆᒥᒋᔭᐅᓕᕈᒫᖅᐳᓯ ᐅᕙᖓ ᐱᑦᔪᑎᒋᓗᖓ. ᓇᓪᓕᐊᓪᓕ ᕿᓄᐃᓵᕐᓗᓂ ᐊᓂᒍᐃᔪᖅ ᑖᓐᓇ ᐱᐅᓕᔭᐅᔪᒫᖅᐳᖅ.”


“ᑕᑯᓕᕈᑦᓯ ᑕᑯᒥᓁᑦᑐᕐᔪᐊᕐᖕᒥᒃ ᓇᑉᐸᖅᑕᐅᔪᒥᒃ ᑕᒫᓂ ᐃᓂᒃᓴᕆᓐᖏᑕᖓᓂ (ᐊᑐᐊᖅᓯᔫᑉ ᑐᑭᓯᓕᐅᒃ ᖃᓄᖅ ᑐᑭᖃᕐᖕᒪᖔᑦ), ᑕᕝᕙ ᔫᑎᐊᒦᑦᑐᑦ ᕿᒫᔭᕆᐊᖃᓕᕈᒫᖅᐳᑦ ᖃᖅᑲᓄᑦ. ᐃᒡᓘᑉ ᖄᖓᓃᑦᑐᖅ ᐃᒡᓗᒥᓄᑦ ᐊᖅᑲᕆᐊᖃᕈᒫᓐᖏᓚᖅ, ᓱᓇᑐᐃᓐᓇᕐᖕᒥᒃ ᓇᒃᓴᕈᒪᔭᒥᓂᒃ ᐂᒃᖠᕋᓱᒡᓗᓂ. ᐱᕈᖅᓰᕕᖕᒦᑦᑐᖅ ᐂᒃᖠᕆᐊᖃᕈᒫᓐᖏᓚᖅ ᐅᓕᒡᔪᐊᒥᓂᒃ. ᑲᑉᐱᐊᓇᖅᑐᐊᓘᔪᒫᖅᐳᖅ ᐊᕐᖕᓇᓄᑦ ᓄᑕᕋᒃᓴᖃᖅᑐᓄᑦ ᕿᑐᕐᖓᓛᓕᖕᓄᓪᓗ! ᑐᒃᓯᐊᕆᑦᓯ ᕿᒫᕕᒃᓴᓯ ᐅᑭᐅᒥ ᓇᓪᓕᐅᑎᖁᓇᒍ. ᐅᓪᓗᐃᑦ ᑖᒃᑯᐊ ᑲᑉᐱᐊᓇᖅᑐᑦ ᓇᓕᖃᕈᒫᖏᒻᒪᑕ ᓯᓚᕐᔪᐊᑉ ᐱᒋᐊᕐᖕᓂᖓᓂᑦ ᒎᑎᐅᑉ ᐱᓐᖑᖅᑎᑦᓯᓚᐅᕐᖕᓂᖓᓂᑦ ᒫᓐᓇᒧᑦ ᑎᑭᓪᓗᒍ, ᑭᖑᓂᖓᒍᑦ ᑍᒫᒃ ᑲᑉᐱᐊᓇᖅᑎᒋᔪᒥᒃ ᐱᑕᖃᕈᒫᓐᖏᓚᖅ. ᐊᑕᓂᐅᑉ ᐅᓪᓗᐃᑦ ᓁᒡᓕᒋᐊᕐᖕᓂᐊᖏᑉᐸᒋᑦ, ᐃᓄᓕᒫᑦ ᐱᐅᓕᔭᐅᔪᖃᕋᔭᓐᖏᓚᑦ; ᓂᕈᐊᖅᓯᒪᔭᓂᓕ ᐱᑦᔪᑎᒋᓪᓗᒋᑦ, ᐅᓪᓗᐃᑦ ᑖᒃᑯᐊ ᓁᒡᓕᒋᐊᖅᓯᒪᕔᑦ.
“ᓇᓪᓕᐊᓐᓄᑦ ᐅᖃᐅᑦᔭᐅᒍᕕᑦ, ‘ᑕᑯᒋᑦ, ᐅᓇ ᑕᕝᕙ ᙭ᔅᑑᓯ!’ ᐅᕝᕙᓗ, ‘ᑕᑯᒋᑦ, ᙭ᔅᑑᓯ ᑍᑲ!’ ᐅᒃᐱᕆᓂᐊᕋᓯᒋᒃ. ᙭ᔅᑑᓯᐅᓂᕋᖅᑐᑦ ᓱᓕᖏᑦᑐᑦ, ᓇᓚᐅᑦᑍᔫᓂᕋᖅᑐᓪᓗ ᓱᓕᖏᑦᑐᑦ ᓴᖅᑭᕈᒫᕐᖕᒪᑕ ᓇᓗᓁᒃᑯᑕᕐᖕᓂᒃ ᓴᖅᑭᑎᑦᓯᔪᒫᖅᐳᑦ ᑲᒪᓇᖅᑐᓕᓂᕐᖕᓂᒡᓗ, ᑕᒻᒪᖅᑎᑦᓯᓗᑎᒃ, ᐊᒡᓛᑦ ᓂᕈᐊᖅᑕᐅᓯᒪᔪᑦ ᐊᔪᕐᖕᓇᓐᖏᑉᐸᑕ ᑕᒻᒪᖅᑎᓐᓇᓱᐊᕐᓗᒋᑦ. ᖃᐅᔨᓴᑦᓯᐊᕆᑦᓯ; ᑕᒪᒃᑯᓂᖓ ᑕᒤᓐᓂᒃ ᐅᖃᐅᑎᕙᑦᓯ ᓱᓕ ᑕᒪᒃᑯᐊ ᓇᓪᓕᐅᑎᖅᑳᖅᑎᓐᓇᒋᑦ.”


“ᐅᓪᓗᐃᑦ ᑖᒃᑯᐊ ᑲᑉᐱᐊᓇᖅᑐᑦ ᑭᖑᕐᖓᑦᑎᒍᑦ, ᓯᕿᓂᖅ ᑖᖅᓯᔪᒫᖅᐳᖅ, ᑕᖅᑭᕐᓗ ᖃᐅᒪᔪᓐᓃᕈᒫᖅᐳᖅ, ᐅᓪᓗᕆᐊᓪᓗ ᕿᓚᖕᒥᑦ ᑲᑕᒐᕈᒫᖅᐳᑦ, ᕿᓚᖕᒥ ᐱᔪᓐᓇᕐᖕᓃᑦ ᐊᐅᓚᑎᑕᐅᔪᒫᖅᐳᑦ. ᑕᕝᕙ ᐃᓅᑉ ᐃᕐᖕᓂᖓ ᑕᑯᔪᒫᖅᐹᑦ ᓄᕗᔭᑎᒍᑦ ᐊᖅᑲᖅᑐᖅ ᐱᔪᓐᓇᕐᖕᓂᕐᔪᐊᖃᕐᓗᓂ ᓂᖅᑐᕐᖕᓇᕐᖕᓂᕐᔪᐊᖃᕐᓗᓂᓗ. ᑖᑦᓱᒪ ᐂᖏᓖᑦ ᑎᓕᔪᒫᖅᐰᑦ, ᑲᑎᖅᓱᐃᖁᓪᓗᒋᑦ ᓂᕈᐊᖅᓯᒪᔭᖏᓐᓂᒃ ᓄᓇᕐᔪᐊᑉ ᐊᓄᕌᕐᕕᒋᕙᒃᑕᖏᓐᓂᑦ ᓯᑕᒪᓂᑦ, ᓄᓇᕐᔪᐊᑉ ᐃᓱᐊᓂᑦ ᕿᓚᐅᑉ ᐃᓱᐊᓄᑦ.”


“ᓇᐹᖅᑑᑉ ᐱᒋᓕᖕᓂᒃ ᐸᐅᕐᖓᓕᐅᑉ ᐊᔪᕆᖅᑐᕐᓕᓯ ᐃᓕᓐᓂᐊᕈᑎᒃᓴᑦᓯᓐᓂᒃ: ᐊᕙᓚᖓᔪᖏᑦ ᐆᒻᒪᕈᑦᓯᐊᕌᖓᒥᒃ ᐱᕈᕐᕕᐅᓕᖅᐸᒃᐳᑦ ᐅᖃᐅᔭᖃᓕᕐᓗᑎᒡᓗ, ᑕᕝᕙ ᖃᐅᔨᕙᒃᐳᓯ ᐊᐅᔭᐅᔭᕆᐊᒃᖠᓕᕐᖕᒪᑦ. ᑍᒫᒃᑕᐅᖅ, ᑕᒪᒃᑯᐊ ᐅᖃᐅᓯᕆᔭᒃᑲ ᑕᑯᓕᕈᑦᓯᒋᒃ ᐱᕙᓪᓕᐊᓕᖅᑐᑦ, ᑕᕝᕙ ᖃᐅᔨᒪᓂᐊᖅᐳᓯ ᖃᓂᑦᑑᓕᕐᖕᒪᑦ ᐃᓯᖅᑕᕐᕕᖕᒦᓕᕐᓗᓂᓗ. ᓱᓕᔪᒥᒃ ᐅᖃᐅᑎᕙᑦᓯ, ᒫᓐᓇ ᐃᓅᔪᑦ ᓄᖑᓚᐅᖅᑳᖅᑎᓐᓇᒋᑦ ᑕᒪᒃᑯᐊ ᑕᒪᕐᖕᒥᒃ ᓇᓪᓕᐅᑎᔪᒫᖅᐳᑦ. ᕿᓚᒡᓗ ᓄᓇᓗ ᓄᖑᔪᒫᖅᐴᒃ, ᐅᖃᐅᓯᒃᑲᓕ ᓄᖑᔪᒫᓐᖏᓚᑦ.”


“ᐅᓪᓗᑉ ᑕᒪᑐᒪ ᓇᓪᓕᐅᓐᓂᖓ ᐃᑲᕐᕋᕐᓘᓐᓃᑦ ᓇᓪᓕᐊᓐᓄᑦ ᖃᐅᔨᒪᔭᐅᓐᖏᓚᖅ, ᐂᖏᓖᑦ ᐊᒡᓛᑦ ᕿᓚᖕᒦᑦᑐᑦ, ᐃᕐᖕᓂᐅᓪᓘᓐᓃᑦ ᖃᐅᔨᒪᖏᓐᓂᕚ, ᐊᑖᑕᐅᑉ ᑭᓯᒥ ᖃᐅᔨᒪᕚ. ᖃᐅᔨᒪᓇᓱᐊᑦᓯᐊᕆᑦᓯ, ᖃᐅᔨᓴᑦᓯᐊᕐᓗᓯ; ᖃᖓ ᓇᓪᓕᐅᑎᔪᒫᕐᖕᒪᖔ ᖃᐅᔨᒪᖕᒋᓐᓇᑦᓯᐅᒃ. ᐊᖑᑎᑐᑦ ᐊᐅᓪᓚᖅᑐᑐᑦ ᑍᒤᑦᓱᒫᖅᐳᖅ, ᐊᖏᕐᕋᒥᓂᒃ ᕿᒤᓕᕋᒥ ᐱᔨᒥᓂᒃ ᑲᒪᔨᐅᑎᑦᓯᔪᑐᑦ, ᑖᒃᑯᐊ ᐊᑐᓂᑦ ᐱᓇᓱᐊᕆᐊᖃᖅᑕᖏᓐᓂᒃ ᐅᖃᐅᑎᑦᓯᐊᖅᐰᑦ, ᐅᒃᑯᐊᒥᒃ ᖃᐅᔨᓴᖅᑎᐅᓂᐊᖅᑐᖅ ᖃᐅᔨᓴᑦᓯᐊᖁᕚ. ᑍᒤᒻᒪᑦ ᖃᐅᔨᓴᑦᓯᐊᕆᑦᓯ, ᐃᒡᓘᑉ ᐊᖓᔪᖅᑳᖓᑕ ᑎᑭᕝᕕᒋᓂᐊᖅᑕᖓ ᖃᐅᔨᒪᖏᓐᓇᑦᓯᐅᒃ, ᐅᓐᓄᒃᑯᑦ ᑎᑭᑐᐃᓐᓇᕆᐊᖃᕐᖕᒪᑦ, ᐅᕝᕙᓗ ᐅᓐᓄᐊᓪᓗᐊᒃᑯᑦ ᑎᑭᑐᐃᓐᓇᕆᐊᖃᕐᓗᓂ, ᐅᕝᕙᓗ ᖃᐅᒻᒪᓕᖅᑎᓪᓗᒍ ᐊᖑᑎᕕᐊᑉ ᓂᓪᓕᕐᕕᖓᓂ, ᐅᕝᕙᓗ ᐅᓪᓛᓐᖑᖅᑎᓪᓗᒍ. ᑕᕝᕔᓐᓇᖅ ᑎᑭᑲᓪᓚᒃᐸᑦ ᓯᓂᒃᑎᓪᓗᓯ ᑎᑭᑕᐅᖁᓇᓯ. ᐃᓕᑦᓯᓐᓄᑦ ᐅᖃᐅᓯᕆᔭᕋ ᑕᒤᓐᓄᑦ ᐅᖃᖅᐸᕋ: ᐃᖅᑯᒪᑦᑎᐊᕆᑦᓯ.”

Listen to ᒫᑯᓯᐅᑉ ᐊᒡᓚᖏᑦ 13