Recording of the Inuktitut NT without background music.

Eastern Arctic Inuktitut Bible © Canadian Bible Society, 2012, 2021. ℗ Hosanna 2023

Inuktitut - CBS (NT) Non Drama

Inuktitut - CBS (NT) Drama

ᑕᕝᕙᓐᖓᑦ ᐊᐅᓪᓚᕋᒥ ᔫᑎᐊᑉ ᓄᓇᖓᓄᐊᖅᐳᖅ ᑰᑉ ᔪᐊᕐᑕᓂᐅᑉ ᐊᑭᐊᓃᑦᑐᒧᑦ, ᐃᓄᒐᓴᒡᔪᐊᑦ ᑕᕝᕗᖓ ᑲᑎᓕᕆᕗᑦ; ᐊᔪᕆᖅᑐᖅᐰᑦ, ᐱᐅᓯᕆᕙᒃᑕᒥᑐᑦ.
ᐹᕆᓯᑦ ᐅᐸᒃᐹᑦ ᐆᒃᑐᕈᒪᓪᓗᒍ ᐊᐱᕆᕚᑦ, “ᐱᖁᔭᑎᓐᓂ ᐊᖑᑦ ᓄᓕᐊᒥᓂᒃ ᐊᕕᑦᓯᓪᓚᕆᒍᓐᓇᖅᑎᑕᐅᕚ?”
ᑭᐅᕔᑦ, “ᖃᓄᖅ ᒨᓯᓯᐅᑉ ᐱᖁᕚᓯ?”
ᑖᒃᑯᐊ ᑭᐅᕚᑦ, “ᒨᓯᓯ ᐱᔪᓐᓇᖅᑎᑦᓯᓚᐅᖅᐳᖅ ᐊᖑᑦ ᐊᕕᑦᓯᒍᑎᓂᒃ ᑎᑎᕋᕐᓗᓂ, ᓄᓕᐊᒥᓂᒃ ᐊᕕᑦᓯᔪᓐᓇᖅᑎᑦᓯᓪᓗᓂ.”
ᔩᓱᓯᐅᑉ ᐅᖃᐅᑎᕔᑦ, “ᒨᓯᓯ ᑍᒫᒃ ᐱᖁᔭᒥᒃ ᑎᑎᕋᓚᐅᖅᐳᖅ ᐆᒻᒪᑎᓯ ᓯᑎᔪᐊᓘᓂᖓ ᐱᑦᔪᑎᒋᓪᓗᒍ. ᐱᒋᐊᕐᖕᓂᖓᓂᓪᓕ ᓱᓇᑐᐃᓐᓁᑦ ᐱᓐᖑᖅᑎᑕᐅᓕᖅᑎᓪᓗᒋᑦ, ‘ᒎᑎᐅᑉ ᐊᖑᑦ ᐊᕐᖕᓇᕐᓗ ᐱᓐᖑᖅᑎᑉᐹᒃ. ᑍᒤᒻᒪᑦ ᐊᖑᑎᐅᑉ ᐊᑖᑕᓂ ᐊᓈᓇᓂᓗ ᕿᒪᖕᓂᐊᖅᐹᒃ ᓄᓕᐊᓂ ᑲᑎᒫᖓᕈᒪᓗᒍ, ᑖᒃᑯᐊᒃᓗ ᒪᕐᕉᒃ ᑎᒥᒃᑯᑦ ᐊᑕᐅᓯᐅᓕᕐᖕᓂᐊᖅᐳᒃ.’ ᒪᕐᕉᔪᓐᓃᕐᓗᑎᒃ ᐅᕕᓂᒃᑯᑦ ᐊᑕᐅᓯᓐᖑᖅᐳᒃ. ᑕᕝᕙ ᑍᒤᒻᒪᑦ ᒎᑎᐅᑉ ᑲᑎᑎᑕᖏᒃ, ᐃᓅᑉ ᐊᕕᑎᑕᒃᓴᕆᓐᖏᓛᒃ.”
ᐃᒡᓗᒧᐊᕋᒥᒃ ᐃᓕᓐᓂᐊᖅᑎᑦ ᔩᓱᓯᒧᑦ ᑕᒪᑐᒥᖓ ᐊᐱᖅᓲᑎᖃᓕᖅᐳᑦ. ᔩᓱᓯᐅᑉ ᐅᖃᐅᑎᕔᑦ, “ᐊᖑᑦ ᓄᓕᐊᒥᓂᒃ ᐊᕕᑦᓯᓪᓚᕆᒃᑐᖅ ᐊᓯᐊᓂᒃ ᓄᓕᐊᓂᒡᓗᓂ, ᑖᓐᓇ ᓄᓕᐊᒥᓂᒃ ᐊᓯᓐᓂᐊᖅᐳᖅ ᓄᓕᐊᕆᖄᓚᐅᑕᖓ ᐱᑦᔪᑎᒋᓪᓗᒍ. ᑍᒫᒃᑕᐅᖅ ᐊᕐᖕᓇᖅ ᐅᐃᒥᓂᒃ ᐊᕕᑦᓯᓪᓚᕆᒃᑐᖅ ᐊᓯᐊᓂᒃ ᐅᐃᓂᒡᓗᓂ, ᑖᓐᓇ ᐅᐃᒋᓚᐅᖅᑕᒥᓂᒃᑕᐅᖅ ᐊᓯᓂᐊᕆᕗᖅ.”


ᐃᓄᐃᑦ ᓄᑕᕋᑯᓗᖕᓂᒃ ᔩᓱᓯᒧᑦ ᐋᑦᓯᕗᑦ, ᐸᑎᒻᒥᔭᐅᖁᓪᓗᒋᑦ ᑖᑦᓱᒧᖓ; ᐃᓕᓐᓂᐊᖅᑎᖏᑕᓕ ᐃᓂᖅᑎᖅᐰᑦ. ᔩᓱᓯᐅᓪᓕ ᑕᒪᓐᓇ ᖃᐅᔨᒐᒥᐅᒃ, ᐊᑲᐅᒃᓴᖏᒻᒪᕆᓕᖅᐳᖅ, ᐃᓕᓐᓂᐊᖅᑎᓂ ᐅᖃᐅᑎᕔᑦ, “ᓄᑕᕋᑯᓗᐃᑦ ᐅᕙᓐᓄᑦ ᕾᓕᑦ, ᐊᒡᕕᐊᖏᓪᓗᓯᐅᒃ; ᑖᒃᑯᐊ ᒎᑎᐅᑉ ᐊᑕᓂᐅᕕᖓᓂᒃ ᐱᖃᕐᖕᒪᑕ. ᓱᓕᔪᒥᒃ ᐅᖃᐅᑎᕙᑦᓯ, ᓇᓪᓕᐊᑦ ᒎᑎᐅᑉ ᐊᑕᓂᐅᕕᖓᓂᒃ ᓄᑕᕋᑯᓗᒃᑎᑐᑦ ᐃᓚᓕᐅᖅᓯᖏᑦᑐᖅ ᑕᑉᕗᖓ ᐃᑎᕐᖕᓂᐊᓐᖏᓚᖅ.” ᓄᑕᕋᑯᓗᐃᑦ ᐃᕿᓪᓗᒋᑦ ᐸᑎᒻᒥᓪᓗᒋᓪᓗ ᓮᒻᒪᖅᑎᐰᑦ.


ᐊᐅᓪᓚᓕᖅᑎᓪᓗᒍ, ᐊᖑᒻᒥᑦ ᐅᓪᓚᒃᑐᒥᑦ ᐅᐸᒃᑕᐅᕗᖅ ᓵᖓᓄᑦ ᐹᒻᒪᒃᑎᕐᓗᓂ, ᔩᓱᓯ ᐊᐱᕆᕚ, “ᐊᔪᕆᖅᑐᐃᔩ ᐱᐅᔪᑎᑦ, ᖃᓄᖅ ᐱᓇᓱᐊᖅᑐᒃᓴᐅᕗᖔ, ᐃᓅᓯᕐᖕᒥᒃ ᓄᖑᓱᐃᑦᑐᒥᒃ ᑭᖑᕐᖑᑦᔨᖁᓪᓗᖓ?” ᔩᓱᓯᐅᑉ ᐅᖃᐅᑎᕚ, “ᓱᖕᒪᑦ ᐱᐅᓂᕋᖅᐱᖓ? ᐱᐅᔪᖃᓐᖏᓚᖅ ᒎᑎ ᑭᓯᒥ ᐱᐅᔪᑑᕗᖅ. ᐱᖁᔭᓂᒃ ᖃᐅᔨᒪᕗᑎᑦ: ‘ᐃᓄᐊᖅᑐᒃᓴᐅᓐᖏᓚᑎᑦ, ᓄᓕᐊᕆᔭᕐᖕᓂᒃ ᐅᐃᒋᔭᕐᖕᓂᒃᓘᓐᓃᑦ ᐊᓯᓐᓂᐊᖅᑐᒃᓴᐅᓐᖏᓚᑎᑦ, ᑎᒡᓕᒃᑐᒃᓴᐅᓐᖏᓚᑎᑦ, ᐸᓯᔭᒃᓴᕈᖅᑎᑦᓯᓇᓱᐊᖅᑐᒃᓴᐅᓐᖏᓚᑎᑦ ᓱᓕᖏᑦᑐᒧᑦ, ᐅᐃᕖᕐᕆᒃᓯᔪᒃᓴᐅᓐᖏᓚᑎᑦ, ᐊᑖᑕᖕᓂᒃ ᐊᓈᓇᖕᓂᒃᓗ ᐅᐱᒍᓱᑦᓯᐊᖅᑐᒃᓴᐅᕗᑎᑦ.’”
ᑖᑦᓱᒪ ᐅᖃᐅᑎᕚ, “ᐊᔪᕆᖅᑐᐃᔩ, ᑕᒪᒃᑯᐊ ᓱᕈᓯᐅᓂᓐᓂᑦ ᑍᒪᓐᖓᑦ ᒪᓕᓚᐅᖅᐸᒃᑲ.”
ᔩᓱᓯᐅᑉ ᑕᑯᓴᕐᓗᒍ ᓇᒡᓕᒋᓪᓗᓂᐅᒃ ᐅᖃᐅᑎᕚ, “ᐊᑕᐅᓯᕐᖕᒥᒃ ᓱᓕ ᐱᓐᖏᓚᑎᑦ; ᐂᓗᑎᑦ ᐱᖁᑎᖕᓂᒃ ᓂᐅᕐᕈᑎᖃᕆᐊᖅᑐᕆᑦ, ᑮᓇᐅᔭᖅᑖᑎᓪᓗ ᐊᔪᖅᓴᖅᑐᓄᑦ ᑐᓂᕐᕈᑎᒋᓗᒋᑦ, ᑕᕝᕙ ᐱᒃᓴᖃᑦᓯᐊᕐᖕᓂᐊᖅᐳᑎᑦ ᕿᓚᖕᒥ; ᐊᑏ ᕾᓕᕆᑦ, ᒪᓕᒡᓗᖓ.” ᑖᑦᓱᒪ ᑕᒪᓐᓇ ᑐᓴᕋᒥᐅᒃ ᑮᓇᕐᓕᖅᐳᖅ, ᑕᕝᕙᓐᖓᑦ ᕿᒪᕉᑎᓕᖅᐳᖅ ᕿᒃᓵᒻᒪᕆᒡᓗᓂ; ᐊᔪᖅᓴᖏᑦᑐᕐᔪᐊᖑᒐᒥ.
ᔩᓱᓯ ᕿᕕᐊᕐᓗᓂ ᐃᓕᓐᓂᐊᖅᑎᓂ ᐅᖃᐅᑎᕔᑦ, “ᐊᔪᖅᓴᖏᑦᑐᓄᑦ ᐱᔭᕐᖕᓂᖏᑦᑑᓂᐊᖅᐳᖅ ᒎᑎᐅᑉ ᐊᑕᓂᐅᕕᖓᓄᑦ ᐃᓯᕆᐊᒃᓴᖅ!”
ᐃᓕᓐᓂᐊᖅᑎᖏᑦ ᑕᒪᑐᒥᖓ ᑐᓴᕋᒥᒃ ᖁᐊᖅᓵᖅᐳᑦ. ᔩᓱᓯᐅᑉ ᐅᖃᐅᑎᕔᑦ, “ᕿᑐᕐᖓᒃᑲ, ᐃᓛᒃ ᐱᔭᕐᖕᓂᖏᑦᑑᖕᒪᑦ ᒎᑎᐅᑉ ᐊᑕᓂᐅᕕᖓᓄᑦ ᐃᓯᕆᐊᒃᓴᖅ! ᑳᒥᓕ ᐃᓯᕈᓇᕐᖕᓂᖅᓴᐅᒐᔭᖅᐳᖅ ᒥᖅᑯᑎᐅᑉ ᐃᔨᖓᒍᑦ ᐊᔪᖅᓴᖏᑦᑑᑉ ᐃᓯᕋᓱᐊᕐᖕᓂᕆᒐᔭᖅᑕᖓᓂᑦ ᒎᑎᐅᑉ ᐊᑕᓂᐅᕕᖓᓄᑦ.”
ᐊᖏᔪᕐᔪᐊᒥᒃ ᖁᐊᖅᓵᒻᒪᕆᒃᐳᑦ, ᐅᖃᐅᑎᓪᓗᒍ, “ᑭᓇᓕ ᑕᕝᕙ ᐱᐅᓕᔭᐅᔪᓐᓇᕐᖕᓂᐊᖅᐸ?”
ᔩᓱᓯᐅᑉ ᑕᑯᓴᕐᓗᒋᑦ ᐅᖃᐅᑎᕔᑦ, “ᑕᒪᓐᓇ ᐃᓄᖕᓄᑦ ᐊᔪᕐᖕᓇᖅᐳᖅ, ᒎᑎᒧᓪᓕ ᐊᔪᕐᖕᓇᓐᖏᓚᖅ; ᓱᓇᓕᒫᑦ ᒎᑎᒧᑦ ᐊᔪᕐᖕᓇᖏᒻᒪᑕ.”
ᐲᑦᑐᕉᓯ ᐅᖃᖅᐳᖅ, “ᑕᑯᒋᑦ, ᓱᓇᑐᐃᓐᓇᕗᑦ ᑕᒪᕐᖕᒥᒃ ᕿᒪᓚᐅᖅᐸᕗᑦ ᐃᓕᓐᓂᒃ ᒪᓕᓕᕐᓗᑕ.”
ᔩᓱᓯ ᐅᖃᖅᐳᖅ, “ᓱᓕᔪᒥᒃ ᐅᖃᐅᑎᕙᑦᓯ, ᓇᓪᓕᐊᑦ ᐃᒡᓗᒥᓂᒃ ᕿᒤᔪᖅ, ᐅᕝᕙᓗ ᖃᑕᓐᖑᑎᒥᓂᒃ, ᐅᕝᕙᓗ ᓇᔭᒥᓂᒃ, ᐊᓈᓇᒥᓂᒃ ᐊᑖᑕᒥᓂᒡᓘᓐᓃᑦ, ᕿᑐᕐᖓᒥᓂᒡᓘᓐᓃᑦ, ᓄᓇᒥᓂᒡᓘᓐᓃᑦ, ᐅᕙᖓ ᐱᓪᓗᖓ ᐅᖃᐅᓰᓪᓗ ᑐᓴᕈᒥᓇᖅᑐᑦ ᐱᑦᔪᑎᒋᓗᒋᑦ, ᑖᓐᓇ ᐊᖏᓂᖅᓴᓂᒃ ᐱᒃᑲᓐᓂᕐᖕᓂᐊᖅᐳᖅ ᑕᒫᓂ ᐃᓅᑎᓪᓗᒍ 100ᐃᖅᑐᓪᓗᐊᖅᑐᓂᒃ, ᐃᒡᓗᓂᒃ, ᖃᑕᓐᖑᑎᓂᒡᓗ, ᓇᔭᖕᓂᒡᓗ, ᐊᓈᓇᓂᒡᓗ, ᕿᑐᕐᖓᓂᒡᓗ, ᓄᓇᓂᒡᓗ, ᐊᑭᕋᖅᑐᖅᑕᐅᓂᕐᖕᒥᒡᓗ ᐱᖃᓯᐅᑦᔨᓗᓂ, ᐱᔪᒫᖅᑐᒥᓗ ᐃᓅᓯᕐᖕᒥᒃ ᓄᖑᓱᐃᑦᑐᒥᒃ ᐱᔪᒫᖅᐳᖅ. ᐅᓄᖅᑐᑦ ᓯᕗᓪᓖᑦ ᑭᖑᓪᓕᐅᔪᒫᖅᐳᑦ, ᑭᖑᓪᓖᓪᓗ ᓯᕗᓪᓕᐅᔪᒫᕐᓗᑎᒃ.”


ᔨᕉᓴᓕᒻᒧᑦ ᐊᖅᑯᑎᖓᒍᑦ ᐱᓱᓕᕆᕗᑦ, ᔩᓱᓯ ᐃᓕᓐᓂᐊᖅᑎᑦ ᓯᕗᓂᖓᓐᓃᑉᐳᖅ; ᐃᓕᓐᓂᐊᖅᑎᑦ ᖁᐊᖅᓵᖅᓯᒪᕗᑦ, ᐃᓄᐃᑦ ᐃᓕᓐᓂᐊᖅᑎᖏᑕ ᑭᖑᓂᖓᓂ ᒪᓕᒃᑐᑦ ᑲᑉᐱᐊᓱᓕᕐᓗᑎᒃ. ᐃᓕᓐᓂᐊᖅᑎᓂ 12 ᐊᖅᑯᒻᒥᑦ ᓴᓂᕐᕙᒃᑎᓪᓗᒋᑦ, ᐅᖃᐅᑎᕔᑦ ᖃᓄᐃᓕᐅᕐᕕᐅᓛᕐᖕᓂᕐᖕᒥᓂᒃ. ᐅᖃᐅᑎᓪᓗᒋᑦ, “ᑕᑯᒋᑦ, ᑕᑉᐸᐅᖓ ᔨᕉᓴᓕᒻᒧᑦ ᐂᓕᖅᐳᒍᑦ; ᐃᓅᑉ ᐃᕐᖕᓂᖓ ᑐᓂᔭᐅᔪᒫᖅᐳᖅ ᑐᓂᕐᕈᓯᖅᑎᑦᓯᔩᑦ ᐊᖓᔪᖅᑳᖏᓐᓄᑦ, ᐱᖁᔭᓂᒡᓗ ᐃᓕᓮᔨᓄᑦ, ᑖᒃᑯᐊ ᑐᖁᑕᒃᓴᓐᖑᖅᑎᑦᓱᒫᖅᐹᑦ, ᔫᑎᐅᖏᑦᑐᓄᑦ ᑐᓂᓗᒍ; ᑖᒃᑯᐊ ᒥᑕᐅᑎᒋᔪᒫᖅᐹᑦ, ᑎᕝᕗᓗᒡᓗᒍ, ᑏᒐᖅᑐᕐᓗᒍ, ᑐᖁᓪᓗᒍᓗ; ᐅᓪᓗᐃᓪᓕ ᐱᖓᔪᐊᓐᓂ ᒪᑭᓛᖅᐳᖅ.”


ᑕᕝᕙ ᔧᒥᓯᐅᑉ ᔪᐊᓇᓯᐅᓪᓗ ᓯᐱᑎᐅᑉ ᐃᕐᖕᓂᖏᒃᑕ ᔩᓱᓯ ᐅᐸᒃᐹᒃ, ᐅᖃᐅᑎᓪᓗᒍ, “ᐊᔪᕆᖅᑐᐃᔩ, ᐃᓕᖕᓄᑦ ᐱᑎᑕᐅᔪᒪᕗᒍᒃ ᓱᓇᑐᐃᓐᓇᕐᖕᒥᒃ ᕿᓄᐊᕆᔭᑦᑎᓐᓂᒃ.”
ᔩᓱᓯᐅᑉ ᐅᖃᐅᑎᕚᒃ, “ᓱᒥᒃ ᐅᕙᓐᓄᑦ ᐱᓂᐊᕐᕕᐅᔪᒪᒐᑦᓯᒃ?”
ᑖᒃᑯᐊᒃ ᐅᖃᐅᑎᕚ, “ᐃᓕᖕᓄᑦ ᐃᒃᓯᕙᔪᓐᓇᖅᑎᑕᐅᓛᕈᒪᕗᒍᒃ, ᐂᑉᐹ ᑕᓕᖅᐱᖕᓂ ᐂᑉᐹᓗ ᓴᐅᒥᖕᓂ, ᐊᑕᓂᐅᕕᖕᓂ ᓂᖅᑐᕐᖕᓇᖅᑐᕐᔪᐊᒥ.”
ᔩᓱᓯᐅᑉ ᐅᖃᐅᑎᕚᒃ, “ᕿᓄᐊᕆᔭᑦᓯᖕᓂᒃ ᖃᐅᔨᒪᓐᖏᓚᓯᒃ. ᐃᒥᐅᑎᒥᒃ ᐃᒥᕐᖕᓂᐊᖅᑕᓐᓂᒃ ᐃᒥᕈᓐᓇᕋᓗᐊᖅᐱᓰᒃ? ᐅᕝᕙᓗ ᐹᑉᑎᑕᐅᑦᔪᑎᒋᓂᐊᖅᑕᓐᓄᑦ ᐹᑉᑎᑕᐅᔪᓐᓇᕋᓗᐊᖅᐱᓰᒃ?”
ᑖᒃᑯᐊᒃ ᑭᐅᕙ, “ᑍᒫᒃ ᐱᔪᓐᓇᖅᐳᒍᒃ.”
ᐅᖃᐅᑎᕚᒃ, “ᐃᒥᐅᑎᒥᒃ ᐃᒥᕆᐊᖃᖅᑕᓐᓂᒃ ᐃᒥᕐᖕᓂᐊᕋᓗᐊᖅᐳᓯᒃ; ᐹᑉᑎᑕᐅᑦᔪᑎᒋᓂᐊᖅᑕᓐᓄᓪᓗ ᐹᑉᑎᑕᐅᔪᓐᓇᕐᖕᓂᐊᕋᓗᐊᖅᐳᓯᒃ; ᑭᓯᐊᓂᓕ ᑕᓕᖅᐱᓐᓂ ᓴᐅᒥᓐᓂᓘᓐᓃᑦ ᐃᒃᓯᕙᔪᒃᓴᓂᒃ ᐋᖅᑮᔪᓐᓇᓐᖏᓚᖓ, ᐊᑐᐃᓐᓇᕈᖅᑕᐅᓯᒪᔪᓪᓕ ᑭᓯᒥ ᑕᕝᕙᓂ ᐃᒃᓯᕙᔪᒫᕐᖕᒪᑕ.”
ᐃᓕᓐᓂᐊᖅᑎᑦ ᖁᓕᑦ ᑕᒪᑐᒥᖓ ᑐᓴᕋᒥᒃ, ᔧᒥᓯᒥᒃ ᔪᐊᓇᓯᒥᒡᓗ ᐊᑲᐅᒃᓴᕈᓐᓃᖅᐳᑦ. ᔩᓱᓯᐅᑉ ᐃᒻᒥᓄᑦ ᕾᖁᓪᓗᒋᑦ ᐅᖃᐅᑎᕔᑦ, “ᖃᐅᔨᒪᕗᓯ ᐊᖓᔪᖅᑳᖑᔪᑦ ᔫᑎᐅᖏᑦᑐᓂ ᐃᓄᖁᑎᒥᖕᓄᑦ ᐱᔪᓐᓇᕐᖕᓂᖃᕐᖕᒪᑕ, ᐊᖓᔪᖅᑳᖏᑦ ᐱᔪᓐᓇᕐᖕᓂᕐᔪᐊᖃᕐᓗᑎᒃ ᐃᓄᖁᑎᒥᓄᑦ. ᑖᒃᑯᐊᑎᑐᑦ ᐊᑯᓐᓇᑦᓯᓐᓂ ᐱᓂᐊᕐᖕᓂᖃᖅᑐᒃᓴᐅᓐᖏᓚᓯ; ᓇᓪᓕᓯ ᐊᖓᔪᖅᑳᖑᔪᒪᔪᖅ ᑖᓐᓇ ᐃᓕᑦᓯᓐᓂᒃ ᐱᔨᑦᓯᖅᑐᒃᓴᐅᕗᖅ, ᓇᓪᓕᓯ ᐊᑯᓐᓇᑦᓯᓐᓂ ᓯᕗᓪᓕᖅᐸᐅᔪᒪᔪᖅ ᑖᓐᓇ ᑕᒤᓐᓄᑦ ᐱᔨᑲᑖᕆᔭᐅᔪᒃᓴᐅᕗᖅ. ᐊᒡᓛᑦ ᐃᓅᑉ ᐃᕐᖕᓂᖓ ᑎᑭᓯᒪᖏᒻᒪᑦ ᐱᔨᑦᓯᖅᑕᐅᔭᖅᑐᕐᓗᓂ ᐱᔨᑦᓯᕆᐊᖅᑐᖅᐳᕐᓕ, ᐃᓅᓯᕐᖕᒥᓂᒡᓗ ᑐᓂᓯᓪᓗᓂ ᐊᒥᓱᑦ ᐊᑭᓖᑦᔪᑦᔭᐅᑦᔪᑎᒃᓴᖏᓐᓄᑦ.”


ᐱᓱᓕᕐᖕᒥᒐᒥᒃ ᔨᕆᑰᒧᑦ ᑎᑭᑉᐳᑦ; ᑕᕝᕙᓐᖓᑦ ᐊᐅᓪᓚᓕᕐᖕᒪᑕ ᐃᓄᒋᐊᒃᑐᕐᔪᐊᑦ ᐃᓚᒋᓪᓗᒋᑦ, ᑕᐅᑐᖏᑦᑐᖅ ᐊᖅᑯᑎᐅᑉ ᓴᓂᐊᓂ ᐃᒃᓯᕙᕗᖅ ᑮᓇᐅᔭᒥᒃ ᕿᓄᔨ, ᐹᕐᑎᒥᐅᓯᒥᒃ ᐊᑎᓕᒃ, ᑎᒥᐅᓯᐅᑉ ᐃᕐᖕᓂᖓ. ᑖᓐᓇ ᑐᓴᕋᒥ ᔩᓱᓯ ᓈᓴᕇᑎᒥᐅᒥᒃ ᐊᖅᑯᓵᓕᖅᑐᒥᒃ, ᕾᒐᓛᓕᖅᐳᖅ ᐅᖃᕐᓗᓂ, “ᔩᓱᓰ! ᑍᕕᑎᐅᑉ ᐃᕐᖕᓂᖓ, ᓂᑲᒋᓐᖓ!”
ᐅᓄᖅᑐᓄᑦ ᐃᓂᖅᑎᖅᑕᐅᕗᖅ, ᓂᐱᖃᖁᓇᒍ; ᑖᓐᓇᓕ ᕾᒐᓛᕆᐊᒃᑲᓐᓂᑐᐃᓐᓇᖅᐳᖅ ᓂᐱᖅᑯᖅᑐᒋᐊᒃᑲᓐᓂᕐᓗᓂ, “ᑍᕕᑎᐅᑉ ᐃᕐᖕᓂᖓ, ᓂᑲᒋᓐᖓ!”
ᔩᓱᓯ ᓄᖅᑲᕐᓗᓂ ᐅᖃᖅᐳᖅ, “ᕾᖁᔭᐅᓚᐅᕐᓕ.”
ᑕᕝᕙ ᑕᐅᑐᖏᑦᑐᖅ ᕾᖁᓕᖅᐹᑦ ᐅᖃᐅᑎᓪᓗᒍ, “ᖁᕕᐊᓱᓕᕆᑦ; ᓂᑯᕕᓪᓗᑎᑦ, ᑖᑦᓱᒪ ᕾᖁᓕᕐᖕᒪᑎᑦ.”
ᐅᓕᒡᔪᐊᓂ ᐃᒋᓪᓗᒍ ᓂᑯᕕᑲᐅᖅᑐᖅᐳᖅ ᔩᓱᓯᒧᐊᕐᓗᓂ.
ᔩᓱᓯᐅᑉ ᐅᖃᐅᑎᕚ, “ᐅᕙᓐᓅᑦ ᖃᓄᐃᓕᐅᕐᕕᐅᔪᒪᕖᑦ?”
ᑕᐅᑐᖏᑦᑑᑉ ᐅᖃᐅᑎᕚ, “ᐊᔪᕆᖅᑐᐃᔩ, ᑕᐅᑐᓕᑲᓐᓂᕈᒪᕗᖓ.”
ᔩᓱᓯᐅᑉ ᐅᖃᐅᑎᕚ, “ᐊᐅᓚᓕᕆᑦ, ᐅᒃᐱᕐᖕᓂᕕᑦ ᐋᖅᑭᒃᐹᑎᑦ.” ᑕᕝᕔᓐᓇᕐᓗ ᑕᑯᔪᓐᓇᖅᓯᕗᖅ ᒪᓕᓕᕐᓗᒍᓗ.

Listen to ᒫᑯᓯᐅᑉ ᐊᒡᓚᖏᑦ 10