Text: © L'Alliance Biblique du Tchad 2006 Audio: ℗ 2008 Hosanna

Sar - 2008 Edition (NT)

Dan ń Jeju ɔr̄ najə̄ beē oy anī, nin̄ kə ngé ndóō yá̰a̰ yān gēé aw̄n̄ gidə wól man̄ Sedəro̰ tə́. Ndɔr̄ kógə̄ḿ i loo ngeé ń noō tə́, adə̄ ni udə kemeé kə ngé ndóō yá̰a̰ yān gēé. Judas nge kəlan jī de gə̄ tə́ ger̄ loo ní ō, tɔdɔ̄ Jeju kə ngé ndóō yá̰a̰ yān gēé kánə̄n̄ naā tū tə́ nja i ngá̰ý. Anī Judas əsō kété no ɓūtə̄ áskar gə̄ kə pajā gə̄ ń ngol gə̄ kə́ dɔ *ngé tun̄ yá̰a̰ gə̄ tə́ ō, *Parijiyḛ gə̄ ō, əlan̄də́ ní tə́. Ni-reē sedə́ kem ndɔr̄ ní tə́ kə lámba gə̄ ō, kə hor ngel̄ gə̄ ō, kə yá̰a̰ rɔ̄ɔ̄ gə̄ ō. Jeju ń ger̄ yá̰a̰ malang ń a reē kə̄ dɔn tə́ ní, ndɔ́tə̄ kə̄ ngɔr ba dəjedə́ na:
Ā ī-sāāī i náā?
Nin̄-tél ədanən̄ na:
I Jeju kə́ *Najaret.
Ni ədadə́ na:
Mā n toó.
Ba Judas nge kəlan jī de gə̄ tə́ i sedə́. Dan ń Jeju ədadə́ na i mā n toó ní anī, nin̄-də́bān̄ kə gōdə́ ba aw̄ əsōn̄. Ni dəjedə́ ɓáý to̰ na ké
a sāān̄ i náā wa.
Anī nin̄-ədan̄ na:
I Jeju kə́ *Najaret.
Jeju tél ədadə́ na:
M-ə́dásí na i mā n toó. Ré i mā n ā ī-sāāmī anī, ə́ya̰ī ngé gə̄ ń toō ādə̄ aw̄n̄.
Ni-əda beé i yā kadə̄ najə̄ ń ni-əda kété ní reē udəń gírí, əda na:
Ngé gə̄ ń Bɔbə́ḿ adə̄m̄ sedə́ ní, m̄-tḭ̄ ta kógə̄ḿ alé. Loo ń noō tə́ Simo̰ Piyer ń i kə kaskaraá ní ɔr̄ tə́gāń nge kəla yā ngol *ngé tun̄ yá̰a̰ gə̄, əga mbīn kə́ ko̰ó̰ mbat gān̄g. Nge kəla ní rīn na i Malkus. Jeju əda Piyer na:
Ī-téĺ ə́la kaskar yāí kem hɔ̄pə̄n tə́ gogə́. Yá̰á̰ kə́ kem kopoó ń Bɔbə́ḿ adə̄m̄ kadə̄ m-ā̰ȳ ní kə m-ā̰ȳ aĺ a?

Loo ń noō tə́ ɓūtə̄ áskar gə̄ kə ngoldə́ ō, pajā gə̄ yā *Jipə gə̄ ō, əhɔn̄ Jeju ba do̰ō̰nən̄ kə kəlāá. Nin̄-aw̄n̄ seneé rɔ̄ An tə́ pá tá, tɔdɔ̄ An i um Kaipə. Kaipə i ngol *ngé tun̄ yá̰a̰ gə̄ kə́ ɓāl̄ ngeé ń noō tə́. I ni n adə̄ *Jipə gə̄ kɔjə̄ ədadə́ na i só tə́ kadə̄ deē kógə̄ḿ oy tām̄ yā gotə de gə̄ tə́ ní.


Simo̰ Piyer nin̄ kə nge ndóō yá̰á̰ kə́ rang unən̄ gō Jeju. Nge ndóō yá̰a̰ ngeé ń toō ní i de kə́ ngol *ngé tun̄ yá̰a̰ gə̄ gerə̄n, adə̄ ni udə kə Jejuú kem ndogə̄ yā ngol *ngé tun̄ yá̰a̰ gə̄ tə́, ba Piyer ra ndágá ta ndogə̄ tə́. Anī nge ndóō yá̰á̰ kə́ rang ń ngol *ngé tun̄ yá̰a̰ gə̄ gerə̄n ní, teē ndágá ɔr̄ najə̄ kə dəyá̰ kə́ nge ngɔ̄m̄ ta róbə adə̄ Piyer udə. Nge kəla kə́ dəyá̰ kə́ nge ngɔ̄m̄ ta róbə́ ní dəje Piyer na:
Ḭ̄ i nge ndóō yá̰a̰ yā deē ń toō ō aĺ a?
Anī Piyer əda na:
Mā i nge ndóō yá̰a̰ yān alé.
Ngé kəla gə̄ kə pajā gə̄ rāān̄ hor tām̄ kūl̄ tə́, ba ran̄ ta tə́ a ndíbə̄n̄. Piyer ra a ndíbə̄ sedə́ ō.


Ngol *ngé tun̄ yá̰a̰ gə̄ dəje Jeju najə̄ kə́ dɔ ngé ndóō yá̰a̰ yān gə̄ tə́ ō, yá̰á̰ ndóō yān tə́ ō. Anī Jeju tél ədan na:
M-ə́da de gə̄ najə̄ i wáńg. Mā m̄-ndóō de gə̄ yá̰á̰ ngándáńg i kem kújə́ kán̄ naā gə̄ tə́ ō, kem *kújə yā Kɔ́ɔ̄ɓē ń *Jipə gə̄ malang a kánə̄n̄ naā tū tə́ ní ō, m-ɔ̄r̄ najə̄ kógə̄ḿ loo mundə̄ tə́ aĺ ō. Ba ī-dəjem̄ mā najə̄ i tām̄ rí tə́? Najə̄ ń m-ɔ̄r̄ ní ī-dəje ngé gə̄ ń oōn̄ ní.Tɔdɔ̄ yá̰á̰ ń m-ɔ̄r̄ sedə́ ní nin̄-gerə̄n̄ majə.
Pajā kógə̄ḿ ń ra noó ní ənda mbɔ́r Jeju dɔ najə̄ ní tə́ ba ədan na:
Ā ī-tél ā ə́da ngol *ngé tun̄ yá̰a̰ gə̄ najə̄ i tītə̄ ń noō a?
Jeju tél ədan na:
Ré najə̄ ń m-ɔ̄r̄ ní i gōtə́ aĺ anī, ɔ́jə́ yá̰á̰ kə́ gō tə́ aĺ ń m-ə́dá ní. Ba ré najə̄ ń m-ɔ̄r̄ ní majanī, ə́ndam̄ i tām̄ rí tə́?
Loo ń noō tə́ An əla seneé kə jīn kə́ do̰ō̰ gēé beē rɔ̄ Kaipə ngol *ngé tun̄ yá̰a̰ gə̄ tə́.


Simo̰ Piyer ra a ndíbə̄ hor. Anī ədanən̄ na:
Ḭ̄ i nge ndóō yá̰a̰ yān ō aĺ a?
Ni nējə̄ kɔ̄ɔ́ əda na:
Mā i nge ndóō yá̰a̰ yān alé.
Nge kəla kógə̄ḿ kə́ dan ngé kəla gə̄ yā ngol *ngé tun̄ yá̰a̰ gə̄ tə́ ń i nge deē ń Piyer əga mbīn gān̄g ní, əda Piyer na:
M-á̰a̰ī kem ndɔrɔ́ seneé aĺ a?
Piyer nējə̄ ɓáý to̰, anī kə̄ ta jī tə́ noō kə́ra kə̄njá nōō.


Ḭḭn̄ kə Jeju ɓē Kaipə aw̄n̄ seneé kem kújə ndi nge ko̰o̰ ɓē tə́. Loo i dəloí ɓatə. Nin̄ kɔ́ gə̄ udən̄ kem kújə ndi nge ko̰o̰ ɓē tə́ alé, na sōgə́ majaĺ tákə̄də́ kadə̄ ɔgə̄də́ kəsa yá̰a̰ nāā *Pákə. I tām̄ najə̄ ń toō tə́ n Pilatə nge ko̰o̰ ɓē aw̄ əngedə́ ndágá ní. Ni dəjedə́ na:
Deē ń toō rāā i rí á ī-sekə́niī ní?
Nin̄-tél ədanən̄ na:
Ré ni-rāā yá̰á̰ kə́ majaĺ aĺ anī, j-a jə-reē seneé rɔ̄í tə́ a?
Loo ń noō tə́ Pilatə ədadə́ na:
Sḭḭ̄ kɔ́ gə̄ ī-taāin̄, ba ī-gāngī sarya dɔn tə́ kə́ gō *ndū najə̄ yāsí.
*Jipə gə̄ ədanən̄ na:
Adə̄n̄jí ta róbə tɔ̄l̄ deē alé.
I tītə̄ ń noō n najə̄ ń Jeju əda ɔjəń loo koy ń a rāā yā koy ní a udəń gírí ní. Pilatə tél udə gogə́ kem kújə ndi nge ko̰o̰ ɓē tə́. Ni ɓāŕ Jeju ba dəjen na ké ni i mban̄g yā *Jipə gə̄ wa.
Anī Jeju tél ədan na:
I īkɔ́ n ə́da, aké i de kə́ rang gə̄ n ədaīn̄ dɔḿ tə́ ḿ?
Pilatə tél ədan na:
Mā i *Jipə a? I nápar deē yāí gə̄ ō, i ngol gə̄ kə́ dɔ *ngé tun̄ yá̰a̰ gə̄ tə́ ō n əlanī kem jīḿ tə́ ní, ḭ̄ ī-rāā i rí?
Jeju tél ədan na:
Ko̰o̰ ɓē yāḿ i dɔ nang ń toō tə́ alé. Ré ko̰o̰ ɓē yāḿ i dɔ nang ń toō tə́ anī, deē yāḿ gə̄ a rɔ̄ɔ̄n̄ dɔḿ tə́, yā kadə̄ əlamə̄n̄ jī *Jipə gə̄ tə́ alé. Ba ngɔlaā ń toō ko̰o̰ ɓē yāḿ i dɔ nang tə́ laā alé.
Loo ń noō tə́ Pilatə ədan na:
Adə̄ ḭ̄ i mban̄g a?
Jeju tél ədan na:
Īkɔ́ ə́da kadə̄ mā i mban̄g. Ojəmə̄n̄ ō, m̄-reē dɔ nang tə́ ō, i yā kɔr̄ najə̄ yā najə̄ kə́ rɔ̄kum. Deē ń i yā najə̄ kə́ rɔ̄kum ní, a oō yá̰á̰ ń m-ə́dá ní. Pilatə dəjen na ké najə̄ kə́ rɔ̄kum i rí wa.


Dan ń ni-əda najə̄ ń noō oy anī, teē aw̄ rɔ̄ *Jipə gə̄ tə́ ndágá ɓáý to̰, ba ədadə́ na:
Mā m-ə́nge najə̄ kə́ yā kadə̄ deē gāngəń sarya dɔn tə́ alé. Banī tītə̄ ń yá̰á̰ gír kaa yāsí i kadə̄ m-ɔ̄r̄ deē kógə̄ḿ dəngáyá m-ādə̄sí tām̄ yā nāā Pákə tə́ ní, ī-ndigiī kadə̄ m-ɔ̄r̄ mban̄g yā *Jipə gə̄ m-ādə̄sí a?
Loo ń noō tə́ nin̄-unən̄ ndūdə́ kə̄ dɔɔ́ ngá̰ý ədan̄ na:
Ni alé, ba i Barabas tá!
Tá Barabas ní kété i de kə́ nge gān̄g róbə.

Listen to Najə̄ kə́ Majə yā Jeju ń Ja̰a̰ ndang ní 18