If you would like a copy of this version please contact info@davaraudiobibles.org

Lahuali New Testament, CC-BY-SA-4.0, The Love Fellowship. Lahuali New Testament Audio Bible, CC-BY-SA-4.0, Davar Partners International, The Love Fellowship, 2022.

Lahuali New Testament

Lahuali Bible (लाहौली) by The Love Fellowship is licensed under Creative Commons Attribution-ShareAlike 4.0 License.

“हे न्वारे ए सेंहणा रे, गिऊ रेड्रुंई, अंऊ गेह घेंङौ बचावो थल्जी दुह मीहतु तुईज़ी कुट्रातग अंऊ गिऊ टोईच़ी दोष लगाएच़ातोर।”
दोरे दि रेड्रा कि दू दोतंङ साते यहुदी मीहतु भाषा रिंङ कुट्रा: चुपे शुहचे इलिर। दंङ दोई कुई:
गेह ता यहुदी शुगाह, गिऊ जन्म किलिकिया प्रदेशो तरसुस शहरंङ शुहचे शुह; पर दि शहरा रिंङ गमलीएल गुरूओ कोंज़ो कछंङ बंङज़ा शिक्षा ग्रहण लहरिग, दंङ बाह मेमेतु कानून ला रूठे रंङ सिखेक्सा इलिग; दंङ गेह परमेश्वरो थल्जी झांह ठ्रोह जोशिला तोईगा, छना केरे भत्तेर हेंतेग तोतोंई। गेह गंङमी ए मेच़िमी तिंङ छ़ुहचे, दंङ जेला रिंङ केहच़ी, मसीह दलाबि देर तचेक तंग लहरिगा, कि दोतिंङ सच़ी लेह केईगा। दि गप्पो गवाह यहुदी महापुरोहित ए महा सभा ओ भत्ते सेंहणा रे कि दोतु बिचंङ च़ि गेह यहुदी न्वा तु थल्जी डाक रेंज़ा गेह दमिश्क नगरो हखा इबि लेहकी तोईग, ताकि अंऊ दोर्तिंङ मसीह मीहरे तोतोर दोतिंङ सज़ा रंड्रीमी थल्जी छ़ुहचे यरूशलेम शहरो हखा हपोग।

अपेहल गेह यात्रा लहज़ा दमिश्क नगरो कछंङ पिचे इलिग, दंङ झांह शुई कि निरो लगभग अचानक इच्च़ा मोह्ड़े छंङी सर्गंङ च़ि गिऊ फेरे च़मकेकी इलि।
दंङ गेह धरतीऊ टोईच़ी दह्चे इलिगा: दंङ गेह दि सग रेड्रीगा, हे शाऊल, हे शाऊल, केई गिह्बी छिले दुख रंड्री लेह्की तोतोन?
गेह जुबाब रेंईगा, हे प्रभु, कांह अरि शुनाह, गेह नासरत नगरो यीशु शुगाह, अतिंङ केई दुख रंड्री लेह्की तोतोन।
दंङ गिऊ साथी ज़ि छंङी ता खंणीर, पर अंऊ दोई गिऊ हखा कुट्री लेहकी तोहई दोच़ी इच्च़ा सग रेड्रीर, पर दोरे समझेक्सी मरतिर कि दुह सग ए गिऊ हखा छि कुई।
दंङ गेह कुईगा, हे प्रभु गेह छि लोहग? प्रभु ज़ि गिऊ हखा कुई, खड़े अच़ा दमिश्को हखा इला, दंङ अंऊ ला धिर कांह लहज़िमी थल्जी ठहरासी तोह दोर्तिंङ कनिङ भत्ते कम्बोतो।
अपेहल दुह छंङीऊ चमक ओ वजाहज़ि गिह्बी छल्ले माह तंङसिरी, दंङ गिऊ साथी ज़ि गिऊ गुह्ट्र च़ुमज़ा ञेंरे दमिश्क नगरंङ अतिगा।
दोथर हनन्याह मिंदंङ भक्त मीह अंऊ हेंदु यहुदी कानूनो रूठे रंङ भाषे लहज़ाते, गिऊ कछंङ अति,
दंङ गिऊ कछंङ खड़े शुहचे गिऊ हखा कुई, हे न्वा शाऊल, यह्च़ा खंड्री लेह्तु। दू ए मुक्का गिऊ टिरा अलसा इलि दंङ गेह दोबि खंईगा दुह गिऊ कछंङ ए खड़े तोहई।
दोहपल दोई कुई, ञेंहतु बाह-मेमेतु परमेश्वरे कनिंङ दिऊ थल्जी ठहराएसी ततो कि केई दोऊ हिटी बि ञेंई, दंङ दू धर्मी, मसीह बि खंणु, दंङ दोऊ सग रेड्रुं।
छना कुचे कह दोऊ तरफे भत्ते मीहतु तुईज़ी दू गप्पातु गवाह शोन, अंऊ केई खांहषी ए रेहशी तातन।
हेंतेग छिल्ले झाड़ा लहज़ातन? अहच़ु, बपतिस्मा लेहप्तु, दंङ दोऊ मिन लेहपच़ा केनोह पापो माफी ओ थल्जी, माफी पेट्रु।
“थोड़े ध्याड़ो थल गेह यरूशलेमंङ शहर यह्च़ा अतिगा। इच्च़ा ध्याड़ा अपेहल गेह यहुदी मंदिरंङ प्रार्थना लहज़ी लेह्की तोईगा, दंङ गेह इच्च़ा दर्शन खंणीगा।
गेह यीशु दर्शन खंणीगा अच़ि गिऊ हखा कुट्री लेहती, युरनाह लोह दंङ यरूशलेम शहरंङ च़ि युरनाह अच़ा इला; छना कुचे अंऊ मीहरे देर्तिंङ तोतोर, गिऊ पाहठी कांह गवाही माह मनेक्पोर।
गेह कुईग, ‘हे प्रभु, दोतिंङ ता पता तोह, कि गेह कांह टोहकठे बिशवास लहज़ा तिंङ जेलंङ केट्रा दंङ ठहरि-ठहरि यहुदी सभो घरबारंङ तेंङज़ि लहज़ातेग। दिऊ थल्जी गिह्बी समझ माह अति कि यरूशलेम शहरारिंङ यहुदी मीहरे गिऊ टोईच़ी भरोसा छिला माह लोहर। दंङ दोच़ी दि ला ञेंओर कि अपेहल कांह गवाह स्तिफनुस ओ शुहई बहाची लेहकी तोईर दोहपल ला गेह दोर्तिंङ खड़े तोईग, दंङ दि गप्पा रंङ सहमत तोईग, दंङ दोऊ हत्यारातु खमज़ेतु रखवाली लहज़ी लेहकी तोईग।’
दंङ प्रभु ज़ि गिऊ हखा कुई, अच़ा इला, छना कुचे गेह कनिंङ ऊईजाति मीहतु कछंङ ओईतार-ओईतार च़रपोग।”
देर तचेक ता मीहज़ी पोलुसो गप्पा ध्यान रंङ साते रेड्रातेर; पर दोहथर जोरे हाऊष रेंईर, “दोबि सचे च़रतुंई; दोऊ श्रींङी बंङज़ी ठीक माह।”
अपेहल दोरे हाऊष रंड्री लेहतिर, “दोबि सच़ी च़रतिन!” दोच़ी एनोह धकतेखी खमज़ेर छङें च़रतिर दंङ सर्गो हखा धुह्‌ड़ करची लेहतिर दिरंङ पता लेहपाते कि दोतिंङ महस रोहष तोह।
“दिबी बेड़ाओ हखा रेंज़ा शिलांई; दंङ कोड़े लगाएच़ा पूछताच लंहि, कि गेह ञेंई च़रपोग कि मीहरे छि वहज़ा च़ि दोऊ खिलाप हाऊषेक्पी लेहकी तोतोर।”
अपेहल दोच़ी दू कोड़ा लगाएच़िमी थल्जी छ़ुह्च़ी लेहतिर ता पोलुसे दू सुबेदार रंङ साते अंऊ दोऊ कछंङ खड़े तोहई रुहक्ती, “छि दि ठीक शुह आ, कि केरे इच्च़ा रोमी मीहबी, दंङ दू ला छल्ले दोष साबित शुहबी मेह दोबि कोड़े लगाएच़ी ठीक शुह आ?”
सुबेदारे ए दि रेड्रा सेनिकातु सरदारो कछंङ इलजे कुई, “केई दि छि लहज़ातन? दि ता रोमी मीह शुह।”
दोहथर सेनिकातु सरदारे पोलुसो कछंङ अंज़े कुई, “गिह्बी कंड्रु, छि कांह रोमी शुनाह आ?” दोई जुबाब रेंई, “वोई।”
दोहथर सेनिकातु सरदारे कुई, “गेह रोमी नगरो शुहबिमी थल्जी महस ढबाह रांहषी शुगाह।” पोलुसे कुई, “गेह ता जन्म बेहच़ी रोमी शुगाह।”
दंङ अंऊ मीहरे पोलुसा बि कोड़ार लगाएच़ातेर, दोथर दोरे ध्वांए दोऊ दोरच़ी थलका शुहचे इलिर; दंङ रोमी सेनिकातु सरदारे ला दिह ञेंई कि दि रोमी शुह, दंङ दोई दोबि छ़ुह्च़ी ततो, दू बेवा इलि।

ऊईरग दोरे रूठे रंङ ञेंच़िमी थल्जी कि यहुदी दोऊ टोईच़ी छिले दोष लगाएच़ातोर, झांह लेह दोऊ षंङणी युप्शे च़रतिर; दंङ यहुदी मोह्ड़े पुरोहित रे ए भत्ते यहुदी सभा बि ठ्रोहका शुहबिमी हुकुम रेंई, दंङ पोलुस बि हंजे दोतु तुईज़ी खड़े लेह च़रतिर।

Listen to प्रेरित 22