If you would like a copy of this version please contact info@davaraudiobibles.org

Nyakyusa-Ngonde (Malawi) Bible

BAIBULO INONGWA INUNU © Bible Society of Malawi, 2017.

Loli gasyele itolo amasiku mabili ukwisa Ikyaka kya Pasa nikya Kisyesye Ikisita Nkese. Popapo abaputi abakulumba, nabamanyandagilo balinkulonda injila ya kunkolelamo Yesu mbukomu, ukuti bangoge. Namanga batigi, “Pangayaga po pakabalilo ka kyaka, ukuti kungisakuyapo ukutapukana kwa bandu.”


Lelo bo ali nkaya ka Betania nnyumba ya Simoni uyu mbwandilo ali nimbungo ya bukoma ali pakulya, alinkwisa kumyake unkikulu, uyu ali nikipake kya mafuta amapala fiyo aga luma amasitakongania nakamo, alinkugoga ikipake alinkumonelela Yesu inyemba pantu. Loli balipo bamo aba bakalalile aka munda, balinkuti, “Fiki ukonanga bunobuno inyemba? Namanga inyemba isi syabagile ukulisigwa ukukinda pa badenari abamia batatu (300), angali babapele abalondo.” Balinkumumanila unkikulu yula.
Umwene Yesu alinkubabula alinkuti, “Amundeke unkikulu uyu, mukuntamya fiki? Buno ambombile akabombo akanunu; namanga abalondo muli nabo bwila, apa linga mwiganile, mubagile ukubabombela inunu, loli une mutikuyagananine bwila. Abombile sisyo abagile ukubomba, agupakile ngani umbili gwangu inyemba sya kusyilila. Naloli nikubabula une nikuti, mosa muno sikulumbiligwaga Inongwa Inunu nkisu kyosa, isi abombile unkikulu yuyuyu, sisakuyobigwaga ukuya sya kunkumbukilamo.”


Popapo Yuda ugwa nkisu kya Karioti, yumo mbakalongo na babili bala, alinkubuka kubaputi abakulumba ukuti ambikege Yesu mmaboko gabo. Abene bo bapilike balinkusekela, balinkwitikana nagwe ukuti bisakumpaga indalama. Alinkulonda akabalilo akanunu aka kumbikila mmaboko gabo.


Lelo pisiku ilitasi ilya Kyaka kya Kisyesye Ikisita Nkese, apa babolaga akang'osi ka Pasa, abafundigwa bake balinkundalusya Yesu balinkuti, “Kulonda ukuti tubukege poki pakukutendekekesya ifyakulya fya Pasa?” Alinkubatuma abafundigwa bake babili, alinkubabula alinkuti, “Amubukege nkaya, mwisakwaganilaga numundu uyu apimbile indeko ya misi; yo mukankongege, muno mwagile ikwingila, mo mukayobege numwenenyumba mukatigi, Mmanyisi ikuti, ‘Yili kugu inyumba yangu iya kulilamo une ifya pa Kyaka kya Pasa pamopene nabafundigwa bangu?’ Umwene isakubanangisyaga inyumba inywamu iya kwiyulu, iyi bayalisye nukuyitendekesya; mo mukatutendekekesyege.” Popapo abafundigwa balinkubuka, balinkwakufika nkaya, balinkwakusyaga bo mumo Yesu ababulile, mo balinkutendekesya ifyakulya fya Kyaka kya Pasa.
Popapo lelo namayolo Yesu alinkwisa nabo kalongo na babili bala. Lelo bo bitugele pakulya, Yesu alinkubabula alinkuti, “Naloli nikubabula une nikuti, yumo mmyinu uyu ikulya nanine, yo isakumbikaga mmaboko ga balugu.” Popapo balinkwanda ukusulumania, balinkuyoba nagwe yumoyumo balinkuti, “Kali njege yo une?” Umwene Yesu alinkubabula alinkuti, “Yumo mbakalongo na babili, uyu ikuyubikisya nanine ndwangabya. Nnyamundu yo asumwike bo mumo bansimbile mmasimbo, loli sya butolwe kumundu uyu ikumbikaga Nnyamundu mmaboko ga balugu! Kwayaga kununu ukusitakupapigwamo umundu yuyuyu.”


Lelo bo bali pakulya, Yesu alinkwega ikisyesye, alinkwiputa, alinkukimenyania, alinkubapa abafundigwa bake alinkuti, “Ega, iki go gu mbili gwangu.” Alinkwega ikinwelo, alinkugwa ulupi, alinkubapa, bosa balinkunwelamo. Ali nkubabula alinkuti, “Ili lyo ilopa lyangu ilya lwitikano. Ili likubonekelaga ba bingi. Naloli nikubabula une nikuti, ndisakwandisyamo ukunwa ifya museke sya mafilu, ukwisakufika pisiku ili nisakunwaga ifipya mbutwa bwa Kyala.” Bo bimbile ulwimbo balinkusokaukubuka ku Kyamba kya Misyunguti.


Popapo Yesu alinkubabula abafundigwa bake alinkuti, “Mwesa musumwike pakwileya kumyangu, mwisakundeka nimwene namanga lisimbigwe ilya kuti, ‘Nisakunkoma untimi, po ing'osi sisakubalanilaga.’ Loli bo nsyukile, nisakubalongolelengapo ukubuka nkisu kya Galilai.” Umwene Peteri alinkuyoba nagwe alinkuti, “Napa linga bosa bikukukana loli une ngabagila.” Yesu alinkumbula alinkuti, “Naloli nikukubula une nikuti, ikilo kikiki, bo ningongobe yikali ukubilikila kabili, kwisakukana kumyangu katatu.” Umwene Peteri alinkukindililapo ukuyoba alinkuti, “Nalinga natigi mfwege nanugwe, pope ndisakukukana ugwe.” Bosa nabanine balinkuyoba bo lilili.
Popapo balinkwakufika pabuyo ubu batigi Getisemani; Yesu alinkubabula abafundigwa bake alinkuti, “Amutugale papapa tasi ngipute.” Alinkubega ba Peteri na Yakobu na Yohani, alinkubuka nabo. Popapo alinkwanda ukutenguka nukulalamuka indumbula, alinkubabula alinkuti, “Umoyo gwangu gusulumenie ubusulumanie bwa bufwe; amuyege papapa, muyege maso.” Bo akindilepo nkyeni panandi, alinkwitaga pasi, alinkwiputa ukuti linga sitikaga, akabalilo aka kankindaga, alinkuyoba alinkuti, “Abba, Tata, syosa mbepe itolo kumyako; ulikikisyaga ikinwelo iki kumyangu; bomma ubwigane bwangu, loli ubwako.” Alinkwisa, alinkubaga bagonile utulo; alinkuyoba na Peteri alinkuti, “Gwe Simoni, ugonile utulo? Utoligwe ukuya maso pakabalilo kamokene? Amuyege maso mwiputege, ukuti mungingilaga ndugelo; imbepo sya nkati syo sitike, loli umbili go monywa.” Popapo alinkubuka kangi, alinkwakwiputa gago. Bo isile kangi alinkwaga bagonile utulo, namanga amaso gabo gali masito nutulo; balinkusita nukumanya ilya kumwamula. Alinkwakwisa kangi ulwa butatu, alinkubabula alinkuti, “Mukali mugonile utulo? — Simalike. Akabalilo kisile; buno Nnyamundu ikuya pakubikigwaga mmaboko ga batulanongwa. Amusumukege tubuke; keta uyu ikumbikaga mmaboko ga balugu ali pipi.”


Lelo bo Yesu akali ikuyoba, nakalinga itolo alinkwisa Yuda, yumo mbakalongo nababili, ali nikilundilo kya bandu aba bakolile inyubo ningili; bafumile kubaputi abakulumba, na kubamanyandagilo, na kubakulumba. Uyu ambikaga mmaboko gabo, abapele ikimanyilo atile, “Uyu linga mwagile nikumfipa bo yo yuyo; mukankolege fiyo mubukege nagwe.”
Lelo bo Yuda afikile, nakalinga alinkumbopela Yesu alinkuti, “Rabi!” Popapo alinkumfipa. Abene lelo balinkwenda nukunkola. Yumo muli aba balyimile papo alinkukwaba ulubo lwake, alinkunsenga untumwa gwa mputi unkulumba, alinkumwangula imbulukutu. Popapo Yesu alinkubabula alinkuti, “Muliti mwisile nkulikola inyambuta, apa mutwele inyubo ningili bo mukwisa kukungola une? Bwila nayaga nanumwe Nnyumba ya Kyala apa namanyisyaga, mulinkusita ukungola loli fikuti sisege isi sisimbigwe mmasimbo.” Popapo abafundigwa bosa balinkundeka balinkwenda nukubopa.
Lelo undumyana yumo uyu alibigile ikilundo ikyelu kyene yo ankongaga Yesu, balinkugela ukunkola, umwene loli alinkuguleka umwenda, alinkubopa unsitakufwala nakamo.


Popapo balinkuntwala Yesu kumputi unkulumba kuko babungene bosa abaputi abakulumba, nabandu abakulumba mba-Yuda, nabamanyandagilo. Umwene Peteri alinkukonga pabutalipo, ukwakufika ndupaso lwa mputi unkulumba; alinkutugasania nababombi pakota umoto. Popapo abaputi abakulumba nabandukomano bosa balinkuntobesya Yesu ukuti bangoge, loli ubuketi bwabo bulinkusita nukwitikana; namanga bingi banjobaga ubuketi bwa butungulu, loli ubuketi bwabo bulinkusita nukwitikana. Bamo balinkwima, balinkunjobela ubuketi bwa butungulu balinkuti: “Uswe twalimpilike bo ikuti, ‘Mbagile ukupangula Inyumba ya Kyala iyi yabombigwe namaboko, kangi bo gakindile amasiku matatu nende nukuyenga iyingi isitakubombigwa namaboko.’ ” Pope ubuketi bwabo bulinkusita nukwitikana. Popapo alinkusumuka umputi unkulumba, alinkwima pakati, alinkundalusya Yesu alinkuti, “Utikwamula nasimo muli isi bikukohela ugwe?” Umwene alinkuya mye itolo, alinkusita nukwamula nalimo. Umputi unkulumba alinkundalusya kangi alinkuti, “Ngimba ugwe gwe Kristi uMwana gwa Mwenelutufyo?” Yesu alinkwamula alinkuti, “E, yo une, kangi mwisakumbonaga Nnyamundu bo atugele kukiboko ikililo kya Mwenemaka, ikwisa mmabingu ga kumwanya.” Popapo umputi unkulumba alinkulepulania imyenda gyake alinkuyoba alinkuti, “Tukubulonda bwaki ubuketi ubungi? Mugapilike amahelu; bule mukuti fiki umwe?” Popapo balinkulonga bosa ilya kuti afwege. Popapo bamo balinkwanda ukunswela amata, balinkunkinga kumaso nukumbulika nifibuli, balinkuyoba balinkuti, “Oko, sololaga lelo!” Nababombi bope balinkunkoma namapi.


Umwene Peteri bo ali pasi ndupaso, popapo alinkwisa yumo undindwana mbabombi ba mputi unkulumba; alinkumbona Peteri bo ikota umoto, alinkundusamila alinkuyoba alinkuti, “Nanugwe gwali pamopene na Yesu unNazareti.”
Umwene alinkukana alinkuti, “Ngammanya, kangi ndikusyangania isi kuyoba.” Alinkusoka panja pakifigo; po ingongobe yilinkubilikila. Undindwanayula bo ambwene, alinkwanda ukuyoba kangi kuli aba balimile papo alinkuti, “Uyu mwinabo.” Umwene Peteri alinkukana kangi. Bo pakindilepo panandi, aba balimile papo balinkuyoba kangi na Peteri balinkuti, “Naloli bo banino balabala, kabuno uli nGalilai.” Popapo alinkwanda ukwiguna nukulapa alinkuti, “Ngammanya umundu uyu mukunjoba.” Nakalinga ingongobe yilinkubilikila ulwa bubili. Popapo Peteri alinkulikumbuka ilisyu ili Yesu alimbulile atile, “Bo ingongobe yikali nukubilikila kabili, kwisakungana une katatu.” Bo inogwine, alinkulila fiyo.

Listen to Marko 14