Lacid Bible © Bible Society of Myanmar, 2009. Recording of Lacid New Testament ℗ 2017 Hosanna

Lacid - BSM Version (NT) Non Drama

Lacid - BSM Version (NT) Drama

Lacid Bible © Bible Society of Myanmar, 2009.

khainjung agyi moo"' gi Stephain ri he: yooboo foin: da" dang: gi gyeing" nyang: deung la"» ga: myed: yu" da.
Houg: lang" Stephain gi mang: nhung" yi we" - nheig boo mo, we"- tam" gyo: yu" ge'. Ngoonu" da" nya: phoug" Abraham, gi Haran voo, moo ayhe: nyid shi" ri Mesopotemia mung" moo nyid shi" mo phung" yoeb, bo thang da" Mangsoo gi nya: jang" moo thu' shug lho: Mangsoo tid zigi re" da" ikoin deungkhu: byu yi yo' re" da" moug: myed yoosoo" ri to" pyam' kho' wigi nang ri ngoo toin" shid' wa da" mung" khyoo: yhe: loo" we' - ga: tid to.
Houg: yoomo Abraham gi nya: mungdain ri too" kho' lho: Haran voo gung moo yhe: nyid. Abraham da" nya: phoo shid: thang: ri Mangsoo gi akhid" ngoonu" nyid nyid da- he: mung" khyoo: Abraham ri zug pyoung" nyhed: kaid' bye.
Hau: da" ayo, mo wigi mangsoo gi Abraham ri hau: mungdain mo da" moug: myed ri nya: soidgain khyo" lo, dashi" lang" abyid: nghoid da. Nghoid loug we' hau: da" mungdain ri nyang: yo' nya: myed: nya: zoo: yiri byid: wa ga- Mangsoo gi dang: theung too" bye- Mangsoo gi he: dang: theung byid: da" uri Abraham gi zoo: dayug we' ayoo" shi". Mangsoo tid zigi Abraham ri re" myed: re" zoo: yi gi tungbau meing: moo yhe: nyid wigi join' bue" lo" ziyo' zain loem: myed: shoo: dayam, dayoo: shen" yhen zi shau" boem wa nghoid.
Nghoid loug we' -nyangnu" ri join, koid' nhang: zo: nyid da" byumyu" yi da" atho' moo-ngoo dang: phyed' byid: wa. Hau: thang: ri nyangnu" gi hau: mungdain mo thu lo" lho: he: joyoo moo ngoori goeb, pid' lo boem wa nghoid- ga: tid kyo. Hau: thang: ri Mangsoo gi dang: theung to da" asoo" so" to" khyo" shooyid' thang: yham" da" khyoo: Abraham ri byid: bye: yoomo Abraham gi Isag ri khu: thang: ri shed nyid" ein: nyid" moo Isag ri shooyid' thang: yham" da" moo" ri koid byid: bye. Isag gi nya: zoo: Yaku ri Yaku gi ngoonu" myeing fu" da" phoug" phoo yi nghoid da- nya: zoo: yi daxe: eig yug ri shooyid thang: yham" da" khyoo: ri koid byid: bye. Yaku da" nya: zooyi gi nyangnu" da" nhung" zoo: Yoseb, ri myid nau: boem yoomo Egutu meing: khyoo: join, koid nhang: wa shid mo Yoseb ri ung" byid: pyam' boem ago". Nghoid loug we' Mangsoo gi nyang: yo' dage" nghoid nyid yoomo nyang: ri yau: khe" jamjau dangain" jang" mo loid loo" nhang: bye. Mangsoo gi Yoseb ri Egu tu khokham" da" shid khoin" moo yu" jhed' yu" kang: da" nyid yab, khyoo: nyheing byid: ziyo' - lasi, phajhi" byid: wigi Egutu khokham" gi Yoseb ri Mungdain goin" da" atho' moo we' khokham" khoo" dangain" jang" moo we' - Vhoeb, khang" nhang: too" bye. Houg: lang" Egutu mungdain yo' khanan mung" goin" jang" moo phang" khoug zeing gyo" lo wigi yau: khe" jamjau shau" nyid boem bye. Ngoonu" da" nya: phoug" pho. we' - zoo: noem thang byug yoomo zoo: noem ayo" sho: boem loo: nghoid ago".
Yaku gi Egutu mung" moo- shoovoo: shooloem, jo, ga: ziri shaug" gyoo: lang- nyang: gi ngoonu" da" phoug" phoo yi nghoid da- nya: zoo: yiri xang: shed" lheing: Egutu mung" khyoo: nhang: kaid' bye. Eig lheing: ein: lheing: rigi Yoseb, gi nya: mang: biri- nyang: hang nghoid da" khyoo: ri tid kyoo" bye. Houg: lang" Egutu khokham" phoo gi Yoseb da" yhoem: byu yi khyoo: ri se' lo" da.
Houg: yoomo Yoseb gi nya: phoo Yaku ri yhoem: byu nyhed xe: wim: yug goin" su- Egutu mung" khyoo: zug byoung: ri" wa shid mo, dang: pyeung: kaid bye.
Houg: lang" Yaku gi Egutu mung" moo yhe: byoung: nyid wigi Hau: mung" moo nyang: yo' nya: zooyi dangain" gi shid: pyam' bye. Nyang: nu" da" manggung joem rigi Shekhem: khyoo: dang lo" lho: Hamoora nya: zoo: yi mo Abraham ngei byid: lho: qei, yu to" da- loeb, boug moo lo" myhoeb, ago".
Mangsoo gi Abraham ri byid: to" da" dang: theing: khoin" joeb byeung" loo wa bidnyid ju" lo ri Egutu mung" moo nyid da" ngoonu" da" byumyu" yi gi gyi" sho' nyang: nyid myo: lo boem ago". Lo" thang rigi yoseb ri ase' da" khokham" dayug gi Egutu mung" moo khokham" koid nyid bye. Hau: da" khokham" phoo gi ngoonu" da" phoug" phyid" yi ri phajhi" khyau" lho: wigi nyangnu" ri shen" yhen nyid. Nyang: nu" da" zoonu" yi ri shid: loo" wa shid mo yhoem: tung: goung shoid khyoo: ayoid ayu" yhe: she: pyam' too" nhang. Hau: ayo, moo gye" young" da" zoonu" Moshe gi khu: loo bye. Nyang: ri yhoem: moo lham" moo" soem" khyab, za: khu: nyid lho: Moshe gi nya: yhoem: mo nghi: zain' khyoo: she: pyam' zi shau" lang" khokham" myiyi: nu" gi nyang: ri koid: yu lho: nya: zoo: khyo" khu: gyi: bye. Hau: lho: Moshe gi Egutu byu yi da" phajhi" dangain" ri jhau" yu wigi nhoid khoin" thui: yo' lo, moo" boo su: bue" loo bye. Moshe da" apyaid' myed: xi: zain' nghoid lang" gi nyang: gi nya: mang nhung" Israela byumyu" yi, yau: khe" jamjau nyid yoo- yhe: yu" wa shid mo myed phyed' ci: bye.
Nyang: gi Israela byumyu" dayug ri Egutu byu dayug wigi shen" yhen nyid lang" ziri yhe: myang: wigi Egutu byu ri yhe: said pyam lho: latoo: phug byid: ziyo' nya: byu ri goem loem yu bye. Nyangnu" Israela byumyu" yi loid byoin loo" wa da" khyoo: moo Mangsoo gi nyang: ri ci: wa nghoid- ga: da" khyoo: ri nya: byumyu" yi se' gyoo: goo wa ga- Moshe gi myed jho: nyid. Nghoid loug we' hau: khyoo ri nya: byumyu" yi gi ase' gyoo: nghoid ago".
Hau: thang: nyid rigi Israela byumyu" eig yug myeing" myoo: go" nyid lang" ziri Moshe yhe: myang wigi nya: eig yug ri mo, byo, kang" lho: tam gyo: yu" ge'. re" eig yug gi Israela mang: nhung" nyang: cang" danghoid ri cenoem wim wigi houg: su" se' byo, go" nyid lha: ga: yhe: tid.
Nghoid loug we' nya: byen cang" phoo ri byo, goo" vhukung: lhung: su: gi Moshe ri doin: shu" pyam' lho: ngoonu" da" atho' moo vhoeb khang" wa su: yo' tarha" agyi nang ri hang" koid nhang: to" lha". Nang gi Egutu byu dayug ri anyinab, we' said' pyam' yhang: ti" ngoori we' nang said' pyam nau la".- ga: Moshe ri myed.
Moshe gi he: dang: ri shaug" gyoo: lang" nyang: gi Egutu mung" mo phang: thu lo" lho: Midian mung" moo lo" phang: nyid. Nyang: gi hau: mung" moo yug gi zoo: eig yug lo" yo".
Zain' ved myed: xi: zain' lid lo" thang: ri Sina boem mo dain" pyoid' yoo, moo myi: nge" nyid da" mhain" pung moo moug: lagyoo: dayug gi Moshe ri re" yab, shug da. Moshe gi hau: ziri myang wigi mau" lo" byug lho: voin: tang: yu" wa ga: - mhain" pung nam, moo yu: yhe: lo. Nghoid loug we' nyang: gi Aseung: da" thui: ri shau" gyo: zigi Ngoo, gi nanu" phoug" phyid" yi da" Mangsoo- Abraham da" Mangsoo- Isag da" Mangsoo Yaku da" Mangsoo nghoid- ga: da" thui: ri yhe: shaug" gyoo: yoomo Moshe gi gyoug nain" ziyo' avoem" yu" loo.
Aseing: gi nyang: ri re" da" khyid: baid' khyoid pyam' we' khasu" wim ga: ri Nang yab, jo, da" joyoo gi gyeungshang: da" myed jang: nghoid nyid ga: tid. Nga" byumyu" yi gi Egu tu mung" moo dayam, dayoo:- yau: khe" jamjau shau" zo: nyid ziri ngoo myang bye. Ngoo gi nyangnu" da" nookyeing" thui: ri shaug" gyoo: bye: yoomo nyangnu" ri khyoid yu wa ein: ngoo ju" re" zi nghoid. Akhid" nyang: nang ri ngoo Egutu mung" khyoo: nhang: kaid' wa ga: tid.
Moshe gi Israela byumyu" yi wigi ngeug pyam zi shau" da" byu dayug nghoid. Nang ri ngoonu" tho' moo vhoeb khang" wa ziyo' tarha" agyi koid wa zi hang" wigi nyheung to" lha: ga: khyo" wigi ngeug pyam ago". Moshe gi Israela byumyu" yi ri vhoeb khang" wa ziyo' nyangnu" ri khyoid yu wa shid' re" myi: nge" nyid da" mhain" pung moo yab, shug da" moug: lagyoo: da" lo, wigi Mangsoo nhang: kaid' su: nghoid nyid.
Nyang: gi Egutu Mung" moo we' - gyid thoem" ni moo we' - dain" pyoid yoo moo zain, loem: myed: xi: mau" pho" alhoo: again yo' mau" pho" moozoo" joem ri zei: shug lho: Israela byumyu" yi ri Egutu mung" mo shu" thu loo bye.
Mangsoo gi ngoori nhang: kaid ziyo' dakhyoo" ti" Lapi: dayug ri nanu" jhang khyoo: nhang: kaid byid: wa nghoid. Nyang: gi nanu" byumyu" mo nghoid wa ga: tid su: gi Moshe nyang nghoid bye. Nyang: gi dain" pyoid yoo moo Israela byumyu" yi yo' dage- shoin" nyid lho: houg: moo ngoonu" phoug" phyid" yi yo' dage" Sina boem tho' moo nang yo' dang: tid go" da" moug: lagyoo: yo' dage" nyid loo su: nyang: nghoid bye. Ngoonu" ri lhid" kaid' da" kangso' dei nyid da" Mangso jang" mo mungdang: we' yo" kham: yu su: nghoid.
Nghoid loug we' - ngoonu" da" phoug" phyid" yi gi nya: dang: ri zheung: ngeug pyam' boem bye. Nyang: nu" gi Moshe ri ngeug pyam lho: Egutu mung" khyoo: doem tau" loo" nau myid bo ago".
Hau: lho: nyangnu" gi Arun ri ngoonu" ri shu" vhu" shi: wa da" phara" soolhoo joem ri ngoonu" ri koid: byid: we' - ngoonu" ri Egutu mung" mo shu" thu lo da" - Moshe ga: su: gi cidoid' byug bye: ziri - ngoonu" ase' boem loo- ga: tid ago". Hougsu" wigi nyangnu" nujung soolhoo: daloem: ri koid shab, to" lho: wigi hau: nujung lhoo: ri xoin" to' byid: ziyo' - nyangnu" koid to" da" phara" ri coung" nghei byid: da" pui" zeing koid boem ago".
Houg: yoomo, lapi: yi da" jhoem: pug moo
Israela mung" byu yi we"- dain" pyoid yoo moo myed: xi: zain,
goin" nanu" gougnyhoug xoin" ngei" byid: da" khyoo: gi
ngoori ngei" byid: zi anghoid go" da-
Nanu" nyang: goeb, pid' wa ga- koid to" da" phara" soolhoo:
nghoid da- Moleg phara" - nanu" da" rephain: ga: kyi: phara"-
soolhoo: ri nanu" loem khau: lo boem ago". Houg: yoomo ngoo gi
nanu" ri Babelon mung" lid' sho' myheug shu" loo" nhang:
pyam' wa-ga: tid to" ziyo' dakhyoo" ti" Mangsoo gi nyangnu"
jang" mo myonhoo: lheung: lo" lho: moug: khung: mo kyi:
joem ri goeb, ped' nyid boem wa shid mo nyangnu" ri she: pyam' to" abye:.
Ngoonu" da" phoug" phyid" yi gi nyangnu" yo' dage" za: dain" pyoid yoo moo Mangsoo bo da" khyoo: sag si: zoem" ri koid boem bye. Mangsoo gi Moshe ri: koid we' ga: tid da" alhoo: yo' dakhyoo" ti" hau: zoem" ri koid boem bye. Hau: thang: ri nyangnu" da" phoug" phyid" yi jang" mo Hau: da" zoem" ri xo' kham: yu boem ago". Nyang: nu" da" phoug" phyid" yi gi Mangsoo wigi khaid sain" pyam' da" byumyu" yi khanan mung" khyoo: Yoshu yo' dage" vang lo" boem uri hau: zoem" ri we' vu, vang lo" boem ago". Hau: da" zoem" gi David da" apyaid' moo ju" sho' hau: mungdain moo dajo, jo. David khokham" gi Mangso shid khoin" moo myonhoo: yo" wigi Yaku da" Mangsoo nyid nyid wa shid re" joyoo koid wa shid mo akhang" mho' nyid, Nghoid loug we' Mangso shid re" yhoem: koid su: gi Sholumon danghoid nyid. Nghoid loug we' myhang: thang da" Mangsoo gi byu yi da" lo, yo' koid to" da" yhoem: khoug: moo nyid wa zi anghoid.
Hau: da" khyoo: ri lapi: phoo tid to" zigi moug: khung: moug: di gi nya: da" zhung: tang nghoid.
myidjang: gi nya: da' khyid: theing goo, nghoid- nang gi Nga" shid mo, khate" da" yhoem: yo" koid byid: wa lha". Nga" shid mo nyid wa joyoo kha: khyi, moo nghoid lha". Hau: gu: dangain" ri ngoo, nyang: phain" to" zi anghoid la"» ga: wigi Aseing: tid nyid. Stephain gi xo' lho: doem tid zigi nanu" gi nheigloem: gye" thain: nyid ago- nanu" da" nheigloem: ung: khoug: moo gi Mangsoo ri ase' boem nghoid go. Nanu" gi nanu" nya: da" phoug" phyid" yi yhang: ti" Mangso mungdang: ri ashug" gyo: da" nujed' mo, nghoid boem ago". Gyeungshang: da" Venyi ri khanham we' ngeug pyam mo, nghoid nyid boem ago". Nanu" da" phoug" phyid" yi wi gi ashen" yhen, yu" da" lapi: ga: zi kha: yug nyid yu go" Nyang: nu" gi Mangso da" deingmain" su: ju" ri" wa ga: da" khyoo: ri tid fu" kyo" da" Mangso lagyoo: yi ri we' said' pyam boem abye: go. Akhid" nanu" gi hau: yug ri ab, byid: pyam' lho: said' pyam' boem abye: go. Nanu" gi lagyoo: yi da" nhoid' khoin" thui: khyo" - Mangso tarha" ri shau" kham: yu mo, nghoid ago". nghoid loug we' nanu" gi hau: ziri aphau" cang boem nghoid ago- ga: tid.

Yuda tarha" yab, do' phung: mo bang: gi hau: da" dang: ri shaug" gyoo: lang" nyangnu" da" nheigloem: gi phoid' phoid' ga: zhu: ri" sho' nheig gyo: yo: boem wigi Stephain ei: zei, yang: ngaid' ci: sho' nheig yo: nyid abye: go.
Nghoid loug we' Stephain gi gyeungshang: da" Venyi byeung" jo, yoomo moug: khung: khyoo: tu: yu" kaid' ri Mangso phung" yoeb, yo' yesu gi Mangso lo, yo shoid moo yab, jo, ziri myang kaid. Houg: lang" Stephain gi yu" ge' - moug: khung: gi bang" lo" wigi byu da" nya: zoo: gi Mangso da" lo, yo shoid moo yab, jo, ziri ngoo myang kaid' bye- ga: tid. Houg: yoomo nyang: nu gi zeug yoid wigi nyangnu" da" nukhyab' moo lo, nyhau" thau" jhed' ci: lho: dangain" mo, dalheing: dam, Stephain jhang khyoo: gei, yhe: lo" ago".
Hau: lho: nyang: ri vooyam, shoid khyoo: zheung: doin: goin' thu' lo" wigi lug go' yo' du" ago". Sagsi: yi gi nyangnu" da" adang byisheing: joem ri sholu ga: da" zoolu: pho, khyid: yang: moo khyoid' boem, to" lho: zung" nhang: ago".
Nyang: nu" gi Stepain ri houg: su" lug go' wigi du" go" nyid da" uri stephain gi Aseing" we" Aseing: we" - nga" Venyi ri kham: yu byid: we' ga: Aseing: ri mho' yoid nyid.
Nyang: gi poid' thug thoung lho: Aseing: we" - nyangnu" da" yooboo ri axoem" too" byid: o" ga: nyho: kaid' - he: dang: bain tid lang" Stephain gi kang: gyo" loo" bye.

Listen to ACTS 7