Lala NT

Ɓeta dem ɓǝn taa me ɓǝ nyor mbu tomsǝ a ɗaaso nwaado ɓa nga nkeesǝ wa. Ɓǝ nyor mbu ɓǝ kurasǝ a ee ɓa, ɓǝ wǝrsǝ mbusǝsa ma nuwa ɓosa a ntiiri wa, pa ɓǝn hoota mara sǝra wa, ɗǝm ɓǝ tomaa nkee mara Kaa ra wa. Tiyafulus yaa kwang, tomsǝ maaso wa niina ma nkweera na, nǝ sengge mbusǝsa nsaad a ntiiri tom keke nǝ nyor mbu ɓa fin fin, me ngǝ ma ɓongtǝrato mbu ɓaa fǝɗkǝ ngǝsǝ ɓa.

A fer Hiridus yǝsa a kuɓsutu Yahudiya wa, an nek mbusa ke kǝn ǝn yarsǝ me Zakariya, u yǝsa a ɓan nek mbusa a tuwa Abiya ra wa. Toonesi ǝn Alisabatu sase ɗǝm yǝ fiɗ a tuwa Haruna wa. Ɓǝ nsaad raɓ kou ɓǝ tom kaɗo yabwa a wiiyo a Kaa ni ɓǝn ɓǝ masaka Ankundi wa nsaad nga yǝ nkeesǝ a tom wa. Pa ɓǝ sem ma emba ra me Alisabatu yǝ haara ɗǝm ɓǝ nkoon nsaad.
Kakake fer Zakariya yǝn tom tinima nek mbu seera kwalari ɓa a wiiyo a Kaa ni, ɓaa tausǝ a ɗǝɗa ǝn tomsǝ a tau an nek mbusaya wa me yǝ ko a Hit Kaa Urshalima wa me ya nek mbu sera yaɓa. Pa fer nek mbusǝsa kansǝwa ɗǝm ɓan ɓǝɗ Kaa ɓa ɓǝ kau ntaandi ɓaa kǝnara.
Pa an timira Kaa ya yǝ weɗa ee usu a sani yǝ nǝɗ a kal nem seya ya a han nek mbu nsera ya ɓa. Pa Zakariya yǝ wǝrsǝ an timira Kaa ya wa kango aa paa kokto aa ma. Pa an timira Kaa ya ya nkee me, “Ngǝ kura kokto ra Zakariya. Kaa yǝ kura kǝnara ngaan, ɗǝm toonage Alisabatu kǝyǝngǝ haa auwe parara, kǝ ngaa ti ɗǝnda me Yohanna. Yǝ kǝngǝ tom mbu kuɗa pengpengra ɓa ma kwalo ɓeta dem ɓǝkǝ kwal ma haa usu, kiya tom kuɓ kwang kwangya a wii Ankundi ni. Ya fǝta wee mbraa inabi ma wa ra, hana mbu kasa ti aa taa ɓa ra. Ɓaa ka kung ma Wis Kaa wa a kuda a maasini. Ɓeta dem Isra'ila yǝ kǝɓǝsǝn kang a Ankundi Kaa ɓosa ni. Yǝkǝ ko a wiyo Ankundi ni ɗaan a Wiso ma kwangto Iliya wa, yǝkǝ kǝrtǝ senta paapamse a ko a emɓǝsani, yǝkǝ kǝrtǝ ɓeta ɓa ɓǝ kurara ɓa, ɓǝ nfaa, ɓǝ ntii ɗǝm ngaa ɓaa ɓǝn nasǝ kwangto kaa ɓa kiya wǝrkǝ ɓeta u Ankundi wa.”
Pa Zakariya yǝ taa an timira Kaa ya, “Kǝnǝ maa mini miniu mee mbu ngǝ nkeesǝ ɓa kǝ tom maa sou? Lawa nǝ nkoon ɗǝm toonane meeta ita heren.”
An timira Kaa ya kakka, “Nǝn Jibrailu ya yǝ nǝɗsǝ a wii Kaa wa ya. Kaa yǝ timinǝ me nǝ wonǝ ngǝ nkee mbu kwalari ɓa. Nga wa kǝ ngǝ tom kwaara, ngǝ nkaa ngǝ kanda me ǝn kaa mbu ɓa ka kung ɓa ra, me ngǝ yau ma mara ra u kiya kaɗ ɓongtǝrato me tǝro usu kanan wara.”
Ɗǝm ɓeta ɓǝn war fiɗo Zakariya wa ɓa senta me mbu kwa mbi yǝ kaɗsǝ dem a Hit Kaa Urshalima wau. Pa yǝ fiɗsǝ wa yǝ nkaa yǝ kan ma ɓosa ra pa ɓǝ maa me yǝ wǝr mbu weɗara ɓan a Hit Kaa Urshalima wa payǝn kan ɓǝ mara ma nema yǝ nkaa yǝ kan ma ee isi ra.
Pa fer tom tinima usu feɗsǝ wa yǝ kang ɗuuru. Ndiira usu pa toonesǝ Alisabatu yǝ too kuɗa, paya nfaa ofe wonon. Alisabatu yǝ nkee, “A feɗefeɗe me Ankundi yǝ kura nyorataara nan. Yǝ hik nǝ a ɗuura waran a ɗaaso ɓeta wa.”

A ofe mindike ya Kaa yǝ timi an timira Kaa ya Jibrailu Nazarat a put Galili wa, yǝ koo a autoone ke ni u ɓaa waasǝsǝ me kaa nsaa wa eɗ kaya ǝn yarsǝ me Yusufu ya tuwa Dauda wa. Ɗenda autoone kara ǝn Maryamu. An timira Kaa ya yǝ koo a sani yaa nkee me, “Nkwaata ngase Kaa yǝ tigǝ nem isin! Kaa yǝ ke ma ngiinga.”
Pa Maryamu yǝ kurasǝ tooma ira wa maa senda ira aa nii yaa senta me wa ndǝ kamǝra tooma mbi wau. Pa an timira Kaa ya, yaa nkee me, “Maryamu, kǝ kura kokto ra, ngǝ taa ti neme wa a Kaa nin. Nwa kǝ ngǝ too kuɗa, ngǝ haa auwe parara, kǝ ngaa ti ɗǝnda me Yeso. Yǝ kǝ kaɗ wiine kwangya ɗǝm ɓaa kaa yarme Au Kaa ɓoti ya. Ankundi Kaa kiya na han kaɗ kuɓsutu papsi Dauda wa. Yǝ kǝ tom kuɓsutu tanda Yakubu ra feɗo semra, kuɓsutu usu ɗǝm a feɗɗa.”
Maryamu yǝ taa an timira Kaa ya, “Pa kǝ tomtomniu si nanǝ ma parara rau?”
An timira Kaa ya yaa kak yǝ nkee me, “Wis Kaa wa kǝ ham a ngani, kwangto Kaa Ɓoti wa ɗǝm kǝyǝ ngǝ liki. Pa ya sem ma tenatenato raya kiya haa aa yarme Au Kaa ya. Hana Alisabatu eɗ ɗange kiya taa auwe a nkooto usu hana yǝ haara siso nawa yǝma kuɗa ofe mindike. Mbu Kaa ya nkaa yǝ tomra ɓa semra.”
Maryamu ya kakka, “Ya waano nǝn hoora Ankundi ra, a lee a kaɗ maaso nga ngǝ nkeesǝwa.” Pa an timira Kaa ya ya faɗ ya lee.

A fersiso Maryamu yǝ haɗ me yǝ koo a urko a ɗaaso ɗungate put ɓaa Yahudiya ɓa, payǝ kana a ɗuur Zakariya wa ya too Alisabatu. Pa Alisabatu yǝ kurasǝ tooma Maryamu ra wa, auwe yǝ nyaa a kuɗa sani. Pa Alisabatu yǝ kung ma Wis Kaa wa. Yǝ nik kwaro kwang ya nkee me, “Saltǝra a ɗaaso toonawa ɗǝm saltǝra a au kǝnga haa ya! Tomtomni maasou, nǝ taasǝ yauma a maa Ankundi yaane ya yǝ wosǝ a naniu? Ni kurasǝ tomanga wa au a kuɗa a nani ya yǝ nyaa me ndǝ kuɗa pengpengra. Saltǝra ǝn sase yayǝsǝ ma ɓongtǝrato ya me mbu Ankundi nkeesǝ ɓa kǝ kungu!”

Pa Maryamu yaa nkee me,
“Hurtu nwaano too ɗǝnda Ankundi ra
ɗǝm huurtu nwaano ǝn kwal ma Kaa au Kon Nkweera yaane,
me yǝ ɗimma
nase hoora ira hana nǝsǝ hoora ira
Waso nǝ mbukake ra. Nii nga waso kaata kaata ɓeta nsaad a put ntaadiwa ɓǝkǝ nǝ yar mee an saltǝra ya,
me Ya Kwang ya tomnǝ mbu kwang kwang ɓan,
ɗǝnda ira me yaa kwang Ɓoti ya.
Kaata kaata, mayamayato usu ǝn koo a ɗuura ɓaa ɓǝn kurasǝ kokto usu ɓa.
Yǝ tom mbu kwang kwang ɓa ma kwakwato nema isa wa,
yǝ nwee ɓa ɓǝn tomsǝ ɗuura ɓora ɓa me nsaad ɓaa ɓǝn heusǝ a senta ɓota ɓa.
Yǝ ham kuɓsa a kuɓsutu ɓoso,
pa yǝn too ɓa ɓǝsǝ sem mbuka ra ɓa.
Yǝ nkwee ɓa ma ɗoora ɓa mbu kwalari ɓa
pa yǝn tung ɓa ma kǝna ɓa nema sal.
Yǝ kwasi hoora ira Isra'ila,
ya dimma maya mayato usu
yǝ tomsǝ Ibrahim wa ma sirta ɓǝsa pakarese wa,
nga yǝ nkeesǝ paapamse yaande wa!”
Maryamu ɓǝ kaɗ ma Alisabatu ofe taatǝn paya kang ɗuuru.

Pa tǝrma haa usu kungsǝ wa pa Alisabatu yǝ haa auwe parara. Pa ɓanda nsaatǝra ɓǝsa ma haato usu ɓǝ kurasǝ me Ankundi yǝ kura nyorataara iran nwa, pa ɓaa kwasi huur kuɗa wa.
A tǝrma kurkurun ma ɓaa saa wo me aa firi, ɓǝn taa me ɓǝkaa ti ɗǝnda papisi ra Zakariya, pa maasi ya nkee me, “Awo! Kaa yar me Yohanna.”
Pa ɓa nkee me, “Yake semma ɗǝnda sǝra a haato waaso ra.”
Pa ɓǝ taa papisi ma nema me yǝ nkee ɗǝnda kaa yar au sisi ra. Ya taa mbu nyora, pa ya nyor, “Ɗǝnda ira me Yohanna.” Ɓeta nsaad ɓǝ tom mbu nhiinyanhiinya ɓa. Nok kǝnso ee isi a wili, yǝ tii kanmǝra yǝn nyoo Kaa. Ɓanda nsaatǝra nsaad ɓǝ kung ma kokto a ɗaaso dungate put Yahudiya wa, ɓaa kanmǝra mbusǝsa ra nsaad. Nsaad ɓa kurasǝ mbu sa wa, ɓǝ ta me, “Au ya kiya kaɗ eɗ mbiu?” Me kwangto Ankundi wa, ke ma sase.

Papisi Zakariya yǝ kungsǝ ma Wis Kaa wa, paya nawanto:
“Əndǝ nyoo Ankundi, Kaa Isra'ila,
ya me yǝ wo woya hik ɓet ɓǝsa,
yǝ ndǝ a tuwa hoora ira Dauda wa, yǝn kon nkweera ra me ndaase.
Nga yǝ nkeesǝ lau ɓan nawanto ɓisa tangtang wa.
Kon nkweera wa a ɓataker ɓǝnda
ni a nema ɓa nsaad ɓǝ mbisisi ndǝ ɓa
me a weɗa nyorataara pap ɓǝnda
a ɗǝm ɗimma ɗekɗek to waa wa,
yǝ waa yǝ kwee ma paade Ibrahim,
yǝ kǝndǝ kon ɗuura a nema ɓaatakera ɓǝnda ni,
me nda tom tinima ima kokto semra
nda kaɗ yaɓ nda tom tinima kaa tǝ Kaa ma a tǝro nwaando nsaad.

“Ngase ɗǝm auwane, ɓaa kǝ ngǝ yar me an nawanto Kaa Ɓoti ya,
me kǝ ngǝ ko a wiyo a Ankundi ni ngaa wǝrkǝ ɗǝɗa ira,
kǝ ngǝ na ɓet ɓǝsa maa konkweera wa ma
lau kon faata a tenatenato ɓoso wa,
lau yauta Kaa ta wa, weɗweɗɗo usu kǝ ham a dani nga wosa ǝn nweesǝ a liuta wa,
kiya wo a dani a Kaa ni
a dani ɓaa ɓǝn kaɗsǝ a ham tebteb kuu
woɗa ɓa, weɗweɗɗo wa kǝ wed me ǝndǝ
weɗa ɗǝɗa naupa ra.”
Pa au kaya yǝ mbraa yǝ tom kwakwa a huurtu ya kaɗ a sanglo ndub fer yǝ fiɗsǝ a talte a ɓaa Isra'ila ni ɓa wa.

Listen to Luka 1