လွင် ဇဝ် ယေဆူ ဒွါ ပီ ဒီ ဟူမ် ဒီ ဒူအီ ကိူန်

1ဝါယ် အန် တီ ဇဝ် ယေဆူ ဘော ဒီဘဲ အန် ဝီ ပဝ့် ရိုဝ်၊ ကာလုဝ်း အိုမ် ဒိုင် အီ စိူဝ် အိုမ် ဂါလီလေ။ (မင် အီ မိူဝ် ဒဲ့ န့ စိူဝ် အိုမ် ထီဘေရီ)။ 2န့ ယီ မိုဝ်း ဒူအီ ကိူန်၊ ဂေ ဒူပ် အန် ကူပ် ယိုဝ် ဂေ နာ မွှိုမ် အာမ် ကာဆဝ် ပဲ့ ဟဲ့ ဘူင် အန်၊ တဲး ဒူအီ ဆဝ် ဝီ ကဲန်။ 3ဇဝ် ယေဆူ ဝီ ဟုဝ့် ဒဲင် နွန်၊ ဝီ ကွယ် ရိုမ် ဒူပ် ဒီဘဲ အန်။ 4ဒေါ အန် တီ ဟဲ့ ကာတတ် ဒီ ဘူင် ဂေ ဒူအီ အာယူဒါ ဘ့လွယ် လှုဝ်း ဂေ ဇဝ်ဖြာ ဒေါ ကာလုဝ်း အန် ကာင် ဂေ။

5ဇဝ် ယေဆူ ဝီ ယွတ် ဘော ယိုဝ် ဒူအီ ကိူန် တး ဒူင် ကွယ် အန်။ အန် ဝီ တဝ်း ဒီ အာဖီလိပ်၊ “ဒီ မှဝ် အေ ပွိုန် ဒီ စိုဝ်း ခါမုန်၊ တဲး ဂေ ဒူအီ ကိူန် ပွိုန် ဒီ ဟူမ်။း” 6အန် ယီ ကာလာင် ဂြုဝ်း တီ၊ ကူပ် ဆီ ထေဝ် အန် နဝ်း အာဖီလိပ်။ ခဲင် နဝ်း အန်၊ အန် ဟဲ့ ဟွတ့် နပ် မာဆေ ပီ ဒီ ဘူင် အန်။

7အာဖီလိပ် ဝီ တဝ်း၊ “ဆေ အေ ဒီ ဘော စိုဝ်း ခါမုန် အာဒါ ရွိုန် အာ မာယဝ်း ဘူင့်၊#6:7 အာဆေ ဘူင် ဂါန် အာဒါ အူ ဆီငဲ ဟဲ့ ပွိုန် ရွိုန် အူ ဘူင့် ဆေ အေ ဒီ ဘော ဒွါ အူ ဝီ အီ စဲက် အီ စဲက် မိူဝ်၊ န့ တူ ကာလတ့် ဒွန် အီ။”

8ပန် တီ န့ မုး အာအန်ဒါရူ တွိုန်။ အန် မုး ဝါ အာပေတာရူ အီ စိူဝ် ဘော အာဆီမူန်။ အန် ဘော မုး ဒီဘဲ ဇဝ် ယေဆူ အူ ဝီ။ အန် ဝီ တဝ်း ဒီ ဂါယ်၊ 9“န့ မိုဝ်း ဂွန် အီမာယ် အူ ဝီ။ အန် မိုဝ်း ဒီ ဂူင့် ခါမုန် ဖန် ဘူင့် ဘော မာဂါ ဒီတဲတ် အာ ဒုဝ်။ ကူပ် ကိူန် ဒူအီ ယီ တူ ခုဝ် မာဆေ။ န့ တူ ဂ့လိုမ် ဒေါ မှဝ်။”

10ဇဝ် ယေဆူ ယီ တဝ်း၊ “တဲး ဘေ စ်ု ဒူအီ ကိူန် တုတ့် ဒဲင် ပေတ့်။” ကူပ် မိုဝ်း ကိူန် ပေတ့် ဒူင် ကွယ် ဂေ တီ၊ န့ မိုဝ်း မီ ဂေ အီမာယ် ဖန် ဟြဲန့် ဝီ၊ အီ ပွိုန် တုတ့် ဒဲင် ပေတ့် တွိုန်။ ဒဲင် တီ၊ န့ ဘော မိုဝ်း ဘော အီဘိုန့် ဂေ ဂွန်။ 11ပန် တီ ဇဝ် ယေဆူ ဒိုဝ်း ခါမုန်၊ ဝီ ကာလာင် ဂုင် ဂေဇူ ဒီ ဇဝ်ဖြာ။ ဟဲ့ ဟွတ့်၊ အန် ကာဆာင် ဒီ ဒီဘဲ အန်၊ တဲး ဂေ ဝီ ကာဆာင် ဒီ ဒူအီ ကိူန်။ ပါယ် တီ ဂေ ဘော ကာဆာင် မာဂါ တွိုန်၊ တဲး ဒွန် အီ ပွိုန် ဒိုဝ်း ခဲ့ ပီ ဆီ ဟူမ် အန်။

12ဂေ ဟဲ့ ဟွတ့် ဟူမ် ဖဲ၊ ဇဝ် ယေဆူ ဝီ စ်ု ဒီဘဲ အန် တဝ်း၊ “ဘေ ဝီ ဂဲပ် ကာဇု ကာလူယ် ဟူမ်။ ကွဲ့ တဲး န့ စှိုမ်။” 13ပါယ် တီ ဂေ ဝီ ကာဇု ကာလူယ် ဟူမ် ဂေ တီ။ န့ ကော ဝီ နုဝ့် ဂိုဝ် ဒီ အာ ကာတဲပ်။ န့ မုး ကာလူယ် အီ တး ဒီ ခါမုန် ဖန် ဘူင့် ဝါယ် ဟဲ့ ဟွတ့် ဟူမ် ဖဲ ဒွန် အီ။

14ဂေ ဒူအီ ဟဲ့ ဟွတ့် ယိုဝ် နာ မွှိုမ် အာမ် ကာဆဝ် ဇိုဝ် တီ ပဲ့ ဟဲ့ ဘူင် ဇဝ် ယေဆူ၊ ဂေ ဝီ တဝ်း၊ “ဟဲ့ မှာန်၊ ဟဲ့ မုး။ ဒူအီ တီ မုး ဒူအီ အီ ဘျာန် ဂြုဝ်း ဇဝ်ဖြာ၊ ဝီ ပီ တဝ်း ဇဝ်ဖြာ ဒီ တိုယ်။ ဒေါ တီ နီ အန် ဟဲ့ ဟွတ့် တး လူင် ဒဲင် ကာဒါယ် နီ။” 15ပန် တီ ဇဝ် ယေဆူ ကော နပ်၊ ဂေ ဆီ ခါနှာပ် အန်၊ တဲး အန် ဘဲန် ခုန်ဒီခမ် အီ အိုပ် ဂေ။ ခုဝ်၊ အန် ဝီ ဟာဝ် ဒဲင် နွန် ပေါ အူ ပ့လုဝ့်၊ တဲး အန် ကွယ် အူ ဝီ၊ ကွဲ့ တဲး အီ ဟဝ် ဒူပ် အန်။

လွင် ဇဝ် ယေဆူ ဟာဝ် ဒဲင် အိုမ်

16ဘာ ဒီ အပ် ဒီဘဲ ဇဝ် ယေဆူ ဝီ လူင် ဇမ် ဒီ ခူပ် အိုမ် ဒိုင် တွိုန်။ 17ပန် တီ ဂေ ဝီ လိုပ် ခဲင် ရိုဝ်၊ တဝ်း ဒီ ပဝ့် ဟာဝ် မိူင် ကာပေနာရိုမ်။ ဒေါ အန် တီ ပြဲ ဟဲ့ အပ်။ ဇဝ် ယေဆူ ယီ ညှမ် တး ဇမ် ဒူင် ကွယ် ဂေ။ 18ဒေါ ပဝ့် ဂေ ရိုဝ် တွိုန်၊ ခုန် ဝီ တး၊ တဲး မာ အိုမ် ဝီ ဆီလွယ်။ 19ဒေါ ဟာဝ် ဂေ၊ ဂေ ဟဲ့ ဝါယ် အာဒါ အူယ် လွှက့် ဒီ အူ ကာတဲ။#6:19 ခဲင် ဘပ် ဒေါ ဂုဝ် န့ တဝ်း 30 ဆာထာဒီယာ အီ ဘဲန် မွက် အူယ် လွှက့် ဒီ အူ ကာတဲ ဒေါ အန် တီ ဂေ ဝီ ယိုဝ် ဇဝ် ယေဆူ။ အန် ဟာဝ် ဒဲင် အိုမ်၊ တး ကာတတ် ရိုဝ် ဂေ။ ဂေ ကော ယုဝ် ကာဆဝ်။ 20အန် ဝီ တဝ်း ဒီ ဂေ၊ “ကွဲ့ ယုဝ်၊ န့ မုး အုဝ်။” 21ပန် တီ ဂေ တဝ်း ဒီ စွယ် အန် လိုပ် ခဲင် ရိုဝ်။ ဒေါ အန် တီ အူ ဇေန့် ဂေ ဟဲ့ ဝီ ဇမ် ဒီ ခူပ် အိုမ် ဒိုင်၊ ဒူင် ဒီ ဝဝ့် ဂေ။

22ပါ ခဲညှာ၊ ဂေ ဒူအီ ကိူန် တွိုန်၊ ဂေ အီ ဟဲ့ ကွယ် နာ တ ဒွယ်၊ ဂေ ကော နပ် န့ ဟဲ့ မိုဝ်း မီ ရိုဝ် အူ လှာင်။ ဂေ ဝီ လှုဝ်း၊ ဇဝ် ယေဆူ တူ လိုပ် ခဲင် ရိုဝ် တီ။ အန် တူ ဒူပ် ဒီဘဲ အန်။ ဂေ ဒီဘဲ ဇဝ် ယေဆူ ယီ ဟဲ့ ဝေန့်၊ အာဝ် ဘာ့ ဇဝ် ယေဆူ။ 23ဝါယ် အန် တီ န့ မိုဝ်း ရိုဝ် အီ ဟဝ် မင် လှာင် တး မိူင် ထီဘေရီ။ ဒူင် ချ ဂေ၊ န့ ကာတတ် ဒူင် ပီ ဒွိုမ် ကာလာင် ဇဝ် ယေဆူ ဂုင် ဂေဇူ ဒီ ဇဝ်ဖြာ၊ အာတ့် ဒွါ အန် ဂေ ဟူမ် ခါမုန် တွိုန်။ 24ရိုဝ် တီ ဟဲ့ ဟွတ့် ဇမ် ဒူင် တွိုန်၊ ဂေ ဒူအီ ကိူန် တွိုန် ကော နပ်၊ ဘော ဇဝ် ယေဆူ ဘော ဒီဘဲ အန် အာဝ် ဟူ ကွယ် ကာတတ် ဒူင် ကွယ် ဂေ။ ခုဝ်၊ ဂေ ဝီ ပဝ့် ရိုဝ် တွိုန်၊ ဝီ ဟာဝ် ဇမ် မိူင် ကာပေနာရိုမ်၊ ဟာဝ် ဟြေတ့် ဇဝ် ယေဆူ။

လွင် ပီ ဒီ ဟူမ် အီ ဒွါ အာဆာက် ကာမာယ်

25ဂေ ဝီ ကာတုန့် ဇဝ် ယေဆူ ဘ့လာက် နာ နီ အိုမ် ဒိုင် အီ မုး ဒူင် ဘြိမ် တွိုန်။ ဂေ ဝီ ဒီမွှတ် အန် တဝ်း၊ “မဲ ဒါ ဆာရာ၊ ဒေါ မှဝ် မဲ တး ဇမ် ဒီ နီ။း”

26ဇဝ် ယေဆူ ဝီ တဝ်း ဒီ ဂေ၊ “အုဝ် တဝ်း အာခ်ု ဒီ ဘေ။ ဘေ တူ ဟြေတ့် အုဝ် ကူပ် ယိုဝ် ဘေ နာ မွှိုမ် အာမ် ကာဆဝ် အီ တဲး ဘေ နပ် ပီ မုး အုဝ်။ ဘေ ဟြေတ့် အုဝ် ကူပ် ဟူမ် ဘေ ခါမုန် ပီ ဒွါ အုဝ် ဒီ ဘေ၊ တဲး ဘေ ကော ဖဲ။ 27ကွဲ့ တဲး ဘေ ဟြေတ့် ပီ ဒီ ဟူမ် အီ နပ် ဒီ လိုဝ်။ တဲး ဘေ ဟြေတ့် ပီ ဒီ ဟူမ် အီ တူ နပ် ဒီ လိုဝ်၊ တဲး န့ ကော ဇမ် အာခြာဝ် ဒီ ကွယ် ရိုမ် ဘေ ဒူပ် ဇဝ်ဖြာ ဆေဆေ။ ပီ ဒီ ဟူမ် ဇိုဝ် တီ၊ အုဝ် အီ ဟဲ့ ဘဲန် ဂွန် ဒူအီ ဒီ ဒွါ ဒီ ဘေ။ လွင် ဒူအီ ဝီ တီ ဇဝ်ဖြာ အီ မုး ဂုန့် အေ၊ အန် ဟဲ့ ဟွတ့် တဝ်း၊ ‘အုဝ် အိုင် အန်။’”

28ပန် တီ ဂေ ဝီ ဒီမွှတ် အန် တဝ်း၊ “မာဆေ ပီ လုဝ် ဘူင် ယေ၊ တဲး ဇဝ်ဖြာ အိုင်။း”

29ဇဝ် ယေဆူ ဝီ တဝ်း၊ “ပီ လုဝ် ဘူင် ဘေ၊ န့ မုး မီ အူ မျုဝ်။ ဘေ လုဝ် ညှိုမ် ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဘေ။”

30ဂေ ဝီ တဝ်း၊ “ဆေ န့ ပါယ် တီ၊ မာဆေ ပီ ဒီ ဘူင် မဲ၊ တဲး ယေ နပ် လွင် မဲ၊ တဲး ယေ ပွိုန် ဒီ ညှိုမ်။း 31န့ မုး ဂုန့် ဒင် အေ၊ ဂေ ဟဲ့ ဟူမ် ခါမုန် မာနာ ခဲင် ပြဲ ကာဟဝ်း။ န့ ပီ ပီ ဒဲမ် အုန် ခဲင် ဘပ် ဇဝ်ဖြာ။ န့ တဝ်း၊ ‘အန် ဟဲ့ တဲး ဂေ ဟူမ် ခါမုန် အီ လေး ဂါင်ဟြာဝ်။’”

32ပန် တီ ဇဝ် ယေဆူ ဝီ တဝ်း ဒီ ဂေ၊ “အုဝ် တဝ်း အာခ်ု ဒီ ဘေ၊ န့ တူ မုး ဒါ အာမုဝ်ဆဲ အီ ဟဲ့ ဒွါ ဘေ ဟူမ် ခါမုန် တီ၊ အီ တး လူင် ဂါင်ဟြာဝ်။ န့ မုး ဂုန့် အုဝ်။ အန် အီ တဲး ဘေ ဟူမ် ခါမုန် အီ မုး ခါမုန် အာခါခ်ု။ 33ဒူအီ အီ ဟဲ့ တး လူင် ဂါင်ဟြာဝ်၊ အန် ပီ ခါမုန် တီ။ န့ မုး အန်၊ အီ ဒွါ အာဆာက် ကာမာယ် ဒီ ဂေ ဒူအီ ဒဲင် ကာဒါယ်။”

34ဂေ ဝီ တဝ်း၊ “ဆာရာ၊ တဲး မဲ ဒွါ ခါမုန် ဇိုဝ် တီ ဒီ ယေ ဆေဆေ။”

35ဝါယ် အန် တီ ဇဝ် ယေဆူ တဝ်း၊ “န့ မုး အုဝ်။ အုဝ် ပီ ခါမုန် တီ၊ အီ တဲး ဘေ ပွိုန် အာဆာက် ကာမာယ်။ အာဆေ ညှိုမ် အုဝ်၊ န့ ပီ၊ အန် ဟဲ့ ဖဲ၊ အာဝ် ဟူ ကာပြာန့် ပီ ဒီ ဟူမ် ပီ ဒီ ဒျီင် ဒေါ မှဝ်။ 36အုဝ် ယီ ဟဲ့ ဟွတ့် တဝ်း၊ ဘေ ဟဲ့ ယိုဝ် အုဝ်၊ ဘေ ယီ တူ ညှိုမ်။ 37ဂုန့် အုဝ် ဒီ တဲး ဒူအီ တး ဒီ အုဝ်။ ဂေ ဒူအီ ဇိုဝ် တီ၊ ဂေ ဒီ ဘော ညှိုမ် အုဝ်။ အာဆေ ယီ ညှိုမ် အုဝ်၊ န့ ပီ အန် တး ကွယ် ကာတတ် အုဝ်။ အုဝ် တူ ဘ့လေး တူ ဝဲန် အန် ဒေါ မှဝ်။ 38အုဝ် မိူဝ် တူ လေး ဂါင်ဟြာဝ် လူင် တး ဒီ နီ၊ တဲး အုဝ် ဘူင် ပီ အိုင် အုဝ်။ အုဝ် ဟဲ့ တး ဒီ နီ၊ တဲး အုဝ် ဘူင် ခဲ့ ပီ အိုင် အန် ဇဝ် အီ တိုယ် အုဝ် တး ဒီ နီ။ 39န့ ယီ မုး ဒူအီ ပီ ဒွါ ဇဝ်ဖြာ ဒီ အုဝ်၊ ဇဝ်ဖြာ အီ တိုယ် အုဝ် တး ဒီ နီ၊ အန် ဆီ ချွတ် ဂေ ဒွန် အီ၊ ကွဲ့ တဲး အာဆေ ဟြာယ်၊ တဲး အုဝ် တဲး ဒွန် အီ ဝီ ယိတ့် ဝီ အိမ် ဒေါ ဇမ် ဆီငဲ ကာဒဲ့။ 40ခုဝ်၊ အီ လဝ့် နဝ်း ဇဝ်ဖြာ၊ န့ ပါယ် နီ။ အာဆေ ကာဒွါ့ ကာဖာ လွင် ဂွန် ဇဝ်ဖြာ၊ အာဆေ ဘော ညှိုမ် အန် ခဲင် နဝ်း၊ ဇဝ်ဖြာ ဒီ တဲး ဒွန် အီ ဇိုဝ် တီ ကွယ် ရိုမ် ဒူပ် အန် ဆေဆေ။ ဟီ ဇမ် ဆီငဲ ကာဒဲ့၊ အုဝ် ဒီ တဲး ဒူအီ ဇိုဝ် တီ ဝီ ယိတ့် ဝီ အိမ်။”

41ဂေ ဒါ တာင် ယူဒါ ယီ လာယ် ကာလာင် လွင် တူ အိုင် ဂေ ဂြုဝ်း အန် တီ၊ ကူပ် တဝ်း အန်၊ “အုဝ် ပီ ခါမုန် အီ တး ခဲင် ဂါင်ဟြာဝ်။” 42ဂေ တဝ်း၊ “ဒူအီ တီ စိူဝ် အာယေဆူ။ အေ နပ် ဘော ဂုန့် မာ အန်။ အန် မုး ဂွန် အာယုဝ်ဆဲပ်။ မှဝ် န့ ပါယ် ပီ တဝ်း အန်၊ ‘အုဝ် ဟဲ့ လေး ခဲင် ဂါင်ဟြာဝ်၊ လူင် တး ဒီ နီ။း’”

43ဇဝ် ယေဆူ ဝီ တဝ်း၊ “စူ လာယ် ကာလာင် လွင် ပီ တူ အိုင် ဘေ။ 44ဆေ ဇဝ်ဖြာ တူ တဲး ဒူအီ တး ညှိုမ် အုဝ်၊ အာဝ် မိုဝ်း အာဆေ ပွိုန် ဒီ တး ညှိုမ် အုဝ်။ ဆေ ဟီ ဇမ် ဆီငဲ ကာဒဲ့၊ အုဝ် ဒီ တဲး ဒူအီ ညှိုမ် အုဝ် ဝီ ယိတ့် ဝီ အိမ်။ 45ဒူအီ အီ ဘျာန် ဂြုဝ်း ဇဝ်ဖြာ အူ ဝီ ဟဲ့ ဒဲမ် အုန် ခဲင် ဘပ် ဇဝ်ဖြာ ပါယ် နီ၊ ‘ဇဝ်ဖြာ ဒီ မာနုဝ် ဒွန် အီ။’ ခုဝ်၊ ဒွန် အီ အီ ထူမ် ဂြုဝ်း ဇဝ်ဖြာ၊ အီ ဟေန် ဒီ ဇဝ်ဖြာ၊ အန် ဒီ တး ညှိုမ် ဘော အုဝ်။ 46အာဝ် မိုဝ်း အာဆေ အီ ဟဲ့ ဒွိုမ် ယိုဝ် ဇဝ်ဖြာ။ န့ ယီ မုး အုဝ်၊ အီ ဟဲ့ လေး ဒူင် ကွယ် အန်၊ အုဝ် ဟဲ့ ယိုဝ် ဂုန့် အုဝ်။ 47အုဝ် တဝ်း အာခ်ု ဒီ ဘေ၊ အာဆေ ညှိုမ် အုဝ်၊ အန် ပွိုန် ဒီ ကွယ် ရိုမ် ဒူပ် ဇဝ်ဖြာ ဆေဆေ။ 48အုဝ် ပီ ခါမုန် အီ ဒွါ အာဆာက် ကာမာယ် ဒီ အီ။ 49ဂုန့် ဒင် ဘေ၊ ဂေ ဟဲ့ ဟူမ် ခါမုန် မာနာ၊ ဒေါ ကွယ် ဂေ ခဲင် ပြဲ ကာဟဝ်း။ ဂေ ယီ ဟဲ့ ဟွတ့် ယမ်။ 50ဒေါ တီ နီ ဘေ ယီ မိုဝ်း ခါမုန် ပီ ဒွါ ဇဝ်ဖြာ ဒီ ဘေ အီ တး ခဲင် ဂါင်ဟြာဝ် လူင် ဒူင် ကွယ် ဘေ။ ဒွန် အီ ဟဲ့ ပွိုန် ဟူမ် ခါမုန် တီ အီ တူ တဲး အန် ယမ်။ 51န့ မုး အုဝ်၊ အုဝ် ပီ ခါမုန် တီ ပီ ဒွါ ဇဝ်ဖြာ ဒီ ဘေ အီ တး ခဲင် ဂါင်ဟြာဝ်။ အာဆေ ဟူမ် ခါမုန် ဇိုဝ် တီ၊ အန် ဒီ ဘော ကွယ် ရိုမ် ဒူပ် ဇဝ်ဖြာ ဆေဆေ။ ခါမုန် ပီ ဒွါ အုဝ် ဒီ ဘေ၊ န့ မုး ဒုဝ် ဘူင့် အုဝ်။ အုဝ် ဒွါ ဒုဝ် ဘူင့် အုဝ်၊ တဲး ဂေ ဒူအီ ဒွန် အီ အီ ကွယ် ဒဲင် ကာဒါယ် ပွိုန် အာဆာက် ကာမာယ်။”

52ဇဝ် ယေဆူ ဟဲ့ ဟွတ့် ကာလာင် ဂြုဝ်း တီ၊ ဂေ ဒါ တာင် ယူဒါ ဝီ စုး ဒီ လာယ် ကာထဲန့် တဝ်း၊ “မှဝ် အန် ဒီ ပါယ် ဒီ ဒွါ ဒုဝ် ဘူင့် အန်၊ တဲး အေ ဟူမ်။း”

53ဇဝ် ယေဆူ ဝီ တဝ်း၊ “အုဝ် တဝ်း အာခ်ု ဒီ ဘေ၊ ဆေ ဘေ တူ ဟူမ် ယင် အုဝ် အီ ဟဲ့ ဘဲန် ဂွန် ဒူအီ၊ ဆေ ဘေ မိူဝ် တူ ဒျီင် နှာမ် အုဝ်၊ ဘေ တူ မိုဝ်း အာဆာက် ကာမာယ်။ ဘေ ပီ ဒူအီ ယမ်။

54အာဆေ ယီ ဟူမ် ယင် အုဝ် ဘော ဒျီင် နှာမ် အုဝ်၊ အန် ဟဲ့ ပွိုန် အာဆာက် ကာမာယ် အီ ကွယ် ဆေဆေ။ ဟီ ဇမ် ဆီငဲ ကာဒဲ့၊ အုဝ် ဒီ တဲး ဒူအီ တီ ဝီ ယိတ့် ဝီ အိမ်။ 55ခုဝ်၊ ယင် အုဝ်၊ န့ ပီ ပီ ဒီ ဟူမ် အီ မှာန် အာခါခ်ု။ ဘော နှာမ် အုဝ် ပီ ပီ ဒီ ဒျီင် အီ မှာန် အာခါခ်ု။ 56အာဆေ ဟူမ် ယင် အုဝ် ဘော ဒျီင် နှာမ် အုဝ်၊ အန် ဒီ ကွယ် ကာဒိုက် ကာဒဝ့် ဒီ အုဝ် ဆေဆေ။ ဘော အုဝ် ဒီ ကွယ် ကာဒိုက် ကာဒဝ့် ဒီ အန် ဆေဆေ။ 57ဂုန့် အုဝ်၊ အီ နပ် ဒီ ဒွါ အာဆာက် ဒီ အီ၊ အန် ဟဲ့ တိုယ် အုဝ် တး ဒူင် ကွယ် ဘေ။ ပါယ် တီ အုဝ် မိုဝ်း အာဆာက် ကူပ် ဂုန့် အုဝ်။ ပါယ် တီ ဘော ဒူအီ ဒွန် အီ အီ ဟူမ် အုဝ်၊ အန် ဒီ မိုဝ်း အာဆာက် ကာမာယ် ကူပ် အုဝ်။ 58အာတီ မုး ခါမုန် အီ တး ခဲင် ဂါင်ဟြာဝ်။ ဂုန့် ဒင် ဘေ၊ ဂေ ဟဲ့ ဒွိုမ် ဟူမ် ခါမုန် မာနာ။ ဂေ ယီ ဟဲ့ ဟွတ့် ယမ်။ အာဆေ ယီ ဟူမ် ခါမုန် ဇိုဝ် တီ၊ အန် ဒီ ကွယ် ရိုမ် ဒူပ် ဇဝ်ဖြာ ဆေဆေ။” 59ဇဝ် ယေဆူ ကာလာင် ဂြုဝ်း တီ ဒေါ ကွယ် အန် ခဲင် ဇူင် ဂေ ဒူအီ အာယူဒါ ခဲင် မိူင် ကာပေနာရိုမ်။

လွင် ဒူအီ တူ အိုင် ဂြုဝ်း ဇဝ် ယေဆူ

60ဂေ ဒီဘဲ ဇဝ် ယေဆူ၊ ဒေါ ထူမ် ဂေ ဂြုဝ်း တီ၊ ဂေ ကိူန် ဝီ တဝ်း၊ “ပီ မာနုဝ် အန် တီ ဟဲ့ ညှာပ်၊ အာဝ် မွှိုမ် ညှိုမ်။ အာဝ် ဘော ကူပ် မိုဝ်း ဒူအီ အီ ပဲ ဒီ ဒူပ်။”

61ဇဝ် ယေဆူ ဘော နပ် လွင် တူ အိုင် ဂေ ဒီဘဲ အန် လွင် အန် တီ။ အန် ဝီ တဝ်း၊ “ဘေ ထာင် ဂြုဝ်း တီ ဟဲ့ ဘ့လိူင်။ 62ဆေ ဘေ ယိုဝ် ပန် ဒီ ဟုဝ့် အုဝ် အီ ဟဲ့ ဘဲန် ဂွန် ဒူအီ ဝေန့် ဒူင် ကွယ် ဘြိမ် အန်၊ နဝ်း ဘေ ဒီ ဝဲ ဘ့လိူင်။

63န့ မုး နဝ်း ဖွိုမ် ဇဝ်ဖြာ အီ ဒွါ အာဆာက် ဒီ ဒူအီ။ ဆေ န့ မုး ဒူအီ၊ အာဝ် ပွိုန် ဘူင် ဇိုဝ် တီ။ ဂြုဝ်း ပဲ့ ဟဲ့ ကာလာင် အုဝ် ဒီ ဘေ ယီ မိုဝ်း ပွုန် ပီ ဒွါ နဝ်း ဖွိုမ် ဇဝ်ဖြာ။ ခုဝ်၊ န့ မိူဝ် ဒီ ဒွါ အာဆာက် ကာမာယ် ဒီ ဘေ။ 64ကာတဲ ဘေ၊ ယီ မိုဝ်း ဒူအီ မင် အီ အီ တူ ညှိုမ် ဂြုဝ်း အုဝ်။” ဇဝ် ယေဆူ ကာလာင် ပါယ် တီ၊ ခုဝ်၊ အန် ဟဲ့ နပ် အူ ဆိန့် ဒေါ ဂုဝ် အာဆေ တူ ညှိုမ် အန်။ အန် မိူဝ် ဟဲ့ နပ် ဒီ အာတ့် အာဆေ ဒီ အာပ် အန် ဒီ ရန်ဆူ အန်။ 65အန် ဝီ ကာလာင် ဒီ ဂေ၊ “ကူပ် နပ် အုဝ် လွင် ဒူအီ အီ တူ ညှိုမ် အုဝ်၊ အုဝ် ဟဲ့ ဒွိုမ် ကာလာင် ဒီ ဘေ၊ န့ တူ မိုဝ်း အာဆေ အီ ပွိုန် ဒီ တး ညှိုမ် အုဝ်၊ ဆေ ဂုန့် အုဝ် တူ စွယ် တဲး အန် တး။”

66အူ ဆိန့် ဒေါ ကာလာင် ဇဝ် ယေဆူ ဂြုဝ်း ဇိုဝ် တီ၊ ဂေ ဒီဘဲ အန်၊ ဂေ ကိူန် ဝီ ဝေန့်၊ အာဝ် ဟူ ဒူပ် အန်။

67ဇဝ် ယေဆူ ဝီ ဒီမွှတ် ဒီဘဲ အန် ဂိုဝ် ဒီ အာ ဝီ တွိုန်၊ အန် တဝ်း၊ “မာဆေ ပီ ဒီ ဘူင် ဘေ။း ဘော ဘေ ဆီ ဝေန့် ပီ ဂေ။း”

68အာဆီမူန်၊ အီ စိူဝ် ဘော အာပေတာရူ၊ အန် ဝီ တဝ်း၊ “မဲ ဇဝ်၊ ဆေ ယေ ဝေန့်၊ ယေ ဒီ ဝီ ဝဝ့် နာ မှဝ်။း န့ မုး မဲ၊ ဂြုဝ်း ပီ ကာလာင် မဲ၊ န့ တဲး ယေ မိုဝ်း အာဆာက် ကာမာယ် အီ ကွယ် ဆေဆေ။” 69ယေ ညှိုမ် ဘော နပ် ဆီချာ၊ မဲ မုး ဒူအီ ပီ ရဝ်း ပီ တိုယ် ဇဝ်ဖြာ တဲး အန် ချွတ် ဒူအီ။ မဲ မုး အီ ဘွတ် ပီ တိုယ် ဇဝ်ဖြာ။

70ဇဝ် ယေဆူ ဝီ တဝ်း၊ “အုဝ် ဟဲ့ ဟွတ့် ရဝ်း ဘေ ဂိုဝ် ဒီ အာ ဝီ။ ကာတဲ ဘေ န့ ယီ မိုဝ်း အူ ဝီ ပီ အိုပ် ကာနမ် ဟာယ်။”

71ဂြုဝ်း တီ အန် ကာလာင် လွင် အာယူဒတ် အီ မုး ဂွန် အာဆီမူန်၊ အီ စိူဝ် ဘော အာဆာခါရီအူတ်၊ အီ ဒီ အာပ် ဇဝ် ယေဆူ ဒီ ရန်ဆူ အန်၊ အီ ဘာ့ ခဲင် ဖိုင် ဂိုဝ် ဒီ အာ ဝီ တွိုန်။

Listen to ယဟ 6