If you have would like a copy of this version please contact info@davaraudiobibles.org

Text: Halbi New Testament, CC-BY-SA-4.0, The Love Fellowship. Audio: Halbi New Testament Audio Biible, CC-BY-SA-4.0, Davar Partners International, The Love Fellowship, 2023

Halbi New Testament

Halbi Bible by The Love Fellowship is licensed under Creative Commons Attribution-ShareAlike 4.0 License.

फेर सब्त चो दिने हुन बेड़ामन बाटले होऊन भाती जाते रलो, आउर हुनचो चेलामन खेड़ टुटाऊन-टुटाऊन भाती आउर हाथमन ले लगडून-लगडून भाती खाते जाते रवत। तेबे फरीसीमन ले कितलो बोलुक मुरयाला, “तुमी हुन काम केंव करेसास जोन सब्त चो दिने करतोर ठीक नुआय?” ईशु हुनमन के जबाप दिलो, “काय तुमी ऐ नी पड़लासास कि दाऊद, जिदलदाय हुन आउर हुनचो संगवारी भूके रवत तेबे काय करलो? हुन कसन माहापुरू चो घरे गेलो, आउर भेट चो रोटीमन धरून खादलो, जोनमन के खातोर याजकमन के छांडुन आउर कोकीई ठीक नुआय, आउर आपलो संगवारीमन के बले दिलो?” आउर हुन हुनमन ले बल्लो, “माने चो बेटा सब्त चो दिन चो बले परबु आय।”

असन होली कि कोनी आउर सब्त चो दिने हुन आराधना घर ने जाऊन भाती उपदेश सांगुक मुरयालो; आउर हुता गोटक माने रलो जेचो उजा हाथ सुकुन रये। शास्तरीमन आउर फरीसी हुनचो उपरे दोष लगातोर दाँव पावतोर ताक ने रवत कि दकोत हुन सब्त चो दिने चेंगा करू आय कि नाई। मान्तर हुन हुनमन चो बिचार जानते रये; ऐईकाजे हुन सुकलो हाथ बिता माने ले बल्लो, “उठ, मंजी ने उबा हो।” हुन उठून उबा होलो। ईशु हुनमन ले बल्लो, “मय तुमचो ले ऐ पचारें सें कि सब्त चो दिने काय ठीक आय, अच्छा करतोर नाहले खराप करतोर; जीव के बचातोर नाहले नाश करतोर?” तेबे हुन चारो बाटे हुन सपाय के दकुन भाती हुन माने ले बल्लो, “आपलो हाथ लमाव।” हुन असने ची करलो, आउर हुनचो हाथ फेर चेंगा होली। मान्तर हुनमन होस ले बाहरे होऊन भाती आपस ने बहस करूक मुरयाला कि आमी ईशु चो संगे काय करवां?

हुन दिनमन ने हुन पहाड़ी उपरे पारथना करूक गेलो, आउर माहापुरू ले पारथना करतो ने गुलाय राती बितालो। जिदलदाय दिन होली तेबे हुन आपलो चेलामन के हाग देऊन भाती हुनमन चो थानले बारा झान के चुनलो, आउर हुनमन के पठालोबिता बल्लो; आउर हुनमन ऐ आत: शिमोन जेचो नाव हुन पतरस बले संगालो, आउर हुनचो भाई अन्द्रियास, आउर याकूब, आउर यूहन्ना, आउर फिलिप्पुस, आउर बरतुल्मय, आउर मत्ती, आउर थोमा, आउर हलफई चो बेटा याकूब, आउर शिमोन जोन जेलोतेस बलाया जाऊ आय, आउर याकूब चो बेटा यहूदा, आउर यहूदा इस्करियोती जोन हुनचो धरातो बिता बनलो।

तेबे हुन हुनमन चो संगे उतरून भाती समान जगा ने उबा होलो, आउर हुनचो चेलामन चो बड़े भीड़, आउर सपाय यहूदिया, यरूशलेम, आउर सूर आउर सयदा चो समुन्द चो कटा ले खुबे लोग, जोन हुनचो सुनतो काजे आउर आपलो बेमारमन ले चेंगा होतो काजे हुनचो लगे ऐऊ रला, हुता रवत। आउर अशुद्ध आत्मामन ले असकट होलो लोग बले अच्छा कराय जाते रवत। सपाय हुनके छिंवतोर मन करते रवत, कसनबल्लोने हुनचो ले सामरत निकरून भाती सपाय के चेंगा करते रली।

तेबे हुन आपलो चेलामन चो बाटे दकुन भाती बल्लो,
“धन्य आहास तुमी जोन सीदा आहास,
कसनबल्लोने माहापुरू चो राज तुमचो आय।”
“धन्य आहास तुमी जोन ऐबे भूके आसास,
कसनबल्लोने संतुष्ट कराय जाआ से।”
“धन्य आहास तुमी जोन ऐबे गागु आहास,
कसनबल्लोने हांसा से।”
“धन्य आहास तुमी जिदलदाय माने चो बेटा चो
लागुन लोग तुमचो ले बईर कर दे,
आउर तुमके निकराऊन देदे, आउर तुमचो निन्दा कर दे,
आउर तुमचो नाव खराप जानुन भाती काटून देदे।”
“हुन दिने खुबे हरिक होऊन भाती डगाहा, कसनबल्लोने दका, तुमचो काजे सरग ने बड़े करलो फल आसे; हुनमन चो बुआ-दादीमन अगम गिआनीमन चो संगे बले असने ची करते रवत।”

“मान्तर हाय तुमचो उपरे जोन सवकार आहास,
कसनबल्लोने तुमी आपलो शान्ति पाऊन चुकलास।”
“हाय तुमचो उपरे जोन ऐबे संतुष्ट आसास,
कसनबल्लोने भूके हुआ से।”
“हाय तुमचो उपरे जोन ऐबे हांसेसास,
कसनबल्लोने दुख करा से आउर गागा से।”
“हाय तुमचो उपरे जिदलदाय सपाय माने तुमके अच्छा बलोत,
कसनबल्लोने हुनमन चो बुआ-दादीमन फंदी अगम गिआनी चो संगे बले असने ची करा करते रवत।”

“मान्तर मय तुमी सुनातो बितामन ले बलें सें कि आपलो बयरीमन ले मया संगाहा; जोन तुमचो ले बईर करोत, हुनमन चो भला करा। जोन तुमके सराप दे ओत, हुनमन के आशीष दिआस; जोन तुमचो अपमान करोत, हुनमन चो काजे पारथना करा। जोन तुचो गोटक गाल ने थापड़ मारो हुनचो बाटे दुसर के बले फेरून देस; आउर जोन तुचो अन्गोची के झिको, हुनके कुड़ता धरतोर ने बले नी ठेबाव। जोन कोनी तुचो ले मांगो, हुनके देस; आउर जोन तुचो तीज झिकुन धरो, हुनचो ले नी मांग। जसन तुमी मन करसास कि लोग तुमचो संगे करोत, तुमी बले हुनमन संगे असने ची करा।
“अगर तुमी आपलो मया संगातो बितामन चो संगे मया संगाहा, तेबे तुमचो काय बड़ाई? कसनबल्लोने पापी बले आपलो मया संगातो बितामन चो संगे मया संगाऊ आत। अगर तुमी आपलो भलाई करतो बितामन ची संगे भलाई करू आस, तेबे तुमचो काय बड़ाई? कसनबल्लोने पापी बले असने ची करू आत। अगर तुमी हुनमन के उदार दिआ से जोनमन ले फेर पावतोर आशा संगाऊ आहास, तेबे तुमचो काय बड़ाई? कसनबल्लोने पापी पापीमन के उदार देऊ आत कि उतली ची फेर पाओत। मान्तर आपलो शतरूमन ले मया संगावा, आउर भलाई करा, आउर फेर पावतोर आशा नी संगाऊन भाती उदार दिआस; आउर तुमचो काजे बड़े फल होये दे, आउर तुमी परमपरधान चो पिलामन ठेबा से, कसनबल्लोने हुन हुनमन उपरे जोन धन्यबाद नी करोत आउर खरापमन उपरे बले किरपालु आसोत। जसन तुमचो बुआ दयावन्त आय, असने ची तुमी बले दयावन्त बना।

“दोष नी लगाआ, तेबे तुमचो उपरे बले दोष नी लगा दे। दोषी नी ठेबाआ, तेबे तुमी बले दोषी नी ठेबा से। छमा करा, तेबे तुमके बले छमा कर दे। दिआ से, तेबे तुमके बले देदे। लोग पुरा नाप चेपाऊन-चेपाऊन भाती आउर हलाऊन-हलाऊन भाती आउर उचरा-उचरी तुमचो कोरा ने रिका दे, कसनबल्लोने जोन नाप ले तुमी नापु आहास, हुनची ले तुमचो काजे बले नापाय जाये दे।”
फेर हुन हुनमन ले गोटक कहनी बल्लो: “काय काना, काना के बाट सांगुक सके? काय दुनो खोदरा ने नी घसर दे? चेला आपलो गुरू ले बड़े नुआय, मान्तर जोन कोनी सिद्ध होये दे, हुन आपलो गुरू चो असन होये दे। तुय आपलो भाई चो आँईक चो कचरा के केंव दक सीस, आउर आपली ची आँईक चो चिपड़ा तुके नी जान पड़े? जिदलदाय तुय आपलो ची आँईक चो चिपड़ा नी दकिस, तेबे आपलो भाई ले कसन बोलुक सकीस, ‘हे भाई; डण्डिक थेब तुचो आँईक ले कचरा के निकराऊन देयें दें’? हे कपटी, पयले आपलो आँईक ले चिपड़ा निकराव, तेबे जोन कचरा तुचो भाई चो आँईक ने आसे, हुनके अच्छा ले दकुन भाती निकराऊक सकसे।

“कोनी अच्छा रूक निआय जोन खराप फर फरो, आउर ना तो कोनी खराप रूक आसे जोन अच्छा फर फरो। सपाय कोनी रूक आपलो फर ले चिताया जाऊ आय; कसनबल्लोने लोग बुटामन ले अंजीर नी टुटा ओत आउर ना बुटा बोर ले अंगुर। अच्छा माने आपलो मन चो अच्छा भण्डार ले अच्छा गोठमन निकराऊ आय, आउर खराप माने आपलो मन चो खराप भण्डार ले खराप गोठमन निकराऊ आय; कसनबल्लोने जोन मन ने भरली से हुनी हुनमन चो मुंह ने ऐऊ आय।

“जिदलदाय तुमी मोचो गोठ नी मानास तेबे केंव मोके ‘हे परबु, हे परबु,’ बोलु आहास? जोन कोनी मोचो लगे ऐऊ आय आउर मोचो गोठमन सुनुन भाती हुनमन के मानु आय, मय तुमके सांगे से कि हुन काचो असन आय? हुन-हुन माने चो असन आय, जोन घर बनातो समया भुईं गड़ीयां खोडुन भाती पकना उपरे पाया दिलो, आउर जिदलदाय पुर ईली तेबे धार हुन घर थाने लगली मान्तर हुनके हलाक नी सकली; कसनबल्लोने हुन जमखम बनु रली। मान्तर जोन सुनुन भाती नी माने हुन-हुन माने चो समान आय, जोन माटी उपरे बिन पाया चो घर बनालो, जिदलदाय हुनचो उपरे धार लगली तेबे हुन तुरते घसरुन पड़ली आउर घसरुन भाती हुनचो सत्यानाश होऊन गेली।”

Listen to लूका 6