If you would like a copy of this version please contact info@davaraudiobibles.org

Pengo Parja New Testament, CC-BY-SA-4.0, The Love Fellowship. Pengo Parja New Testament, CC-BY-SA-4.0, Davar Partners International, 2021.

Pengo Parja New Testament

Pengo Parja Bible by The Love Fellowship is licensed under Creative Commons Attribution-ShareAlike 4.0 License.

ଆରେରଗ ଯୀଶୁ ୱେଚ୍‌ଚାନ୍, “ଆନେଙ୍ଗ୍ ଆନାଙ୍ଗା ଅଙ୍ଗୁର୍ ମାର୍, ଆରେ ନା ଆବା ଈଶ୍ୱର ଚାଷି। ନାବେ ମାନି ଇମ୍‌ଣି କେନ୍ଦାତାକେ ପାଡ଼୍‌ ଆହ୍‌ୱିତିସ୍, ହେୱାନ୍ ହେଦାଙ୍ଗ୍‌ତିଙ୍ଗ୍ କାତ୍‌ନାନ୍। ଇମ୍‌ଣି କେନ୍ଦାତାକେ ପାଡ଼୍‌ ଆସ୍ତି ମାନାତ୍, ଆଦିକ୍ ପାଡ଼୍‌ ଆହ୍‌ନି କାଜିଙ୍ଗ୍ ହେ କେନ୍ଦାତିଙ୍ଗ୍ ଜାତୁନ୍ କିନାନ୍‌। ଆନେଙ୍ଗ୍ ମିଙ୍ଗେଙ୍ଗ୍ ଇମ୍‌ଣି ହିକ୍ଷା ହିତ୍‌ତାଙ୍ଗ୍‌ନା, ହେ ହିକ୍ଷାତାଙ୍ଗ୍ ଏପେଙ୍ଗ୍ ସପା ଆତାଦେର୍‌ନା। ନାବେ ମାନାଟ୍, ଲାଗିଙ୍ଗ୍ ଆନେଙ୍ଗ୍ ମିବେ ମାନ୍‌ଗାନାଙ୍ଗ୍। ର କେନ୍ଦା ମାର୍‌ତାକେ ମେହାଆୱାଦାଙ୍ଗ୍ ମାଚିସ୍। ହେଲେକେ ଏପେଙ୍ଗ୍ ପା ନାବେ ମାନ୍‌ୱିତିସ୍ ପାଡ଼୍‌ ଆସ୍ତେଙ୍ଗ୍ ଆଡୁଦେର୍।
ଆନେଙ୍ଗ୍ ଅଙ୍ଗୁର୍ ମାର୍ ଆରେ ଏପେଙ୍ଗ୍ କେନ୍ଦା। ଇମ୍‌ଣାକାନ୍ ନାବେ ମାନ୍‌ଗାନାନ୍, ଆରେ ଆନେଙ୍ଗ୍ ତାବେ ମାନ୍‌ଗାନାଙ୍ଗ୍, ହେ ମାନାୟ୍ ବେସି ପାଡ଼୍‌ ଆହ୍‌ନାନ୍। ମାତର୍ ହେୱାନ୍ ନାବେ ମାନ୍‌ୱିତିସ୍ ହେୱାନ୍ ଇନାକାପା କିଦେଙ୍ଗ୍ ଆଡୁନ୍। ଇନେର୍ ଯଦି ନାବେ ମାନ୍‌ଗୁନ୍, ଲାଗିଙ୍ଗ୍ ହେୱାନିଙ୍ଗ୍ କେନ୍ଦାଲେକେ ହଣ୍‌ଜି ବାର୍ତ ତୁସିହିନାର୍। ଆରେ ହେ ତୁସିହିତି କେନ୍ଦା ୱାଚ୍‌ନାତ୍। ମାନାୟାର୍ ୱାଚ୍‌ଚି କେନ୍ଦାତିଙ୍ଗ୍ ଅଜି ନାଣିତାକେ ଦେହ୍‌ନାର୍। ହେଦାଙ୍ଗ୍ କାଡ୍‌ନାତ୍। ନାବେ ମାନାଟ୍ ଆରେ ନା ହିକ୍ଷାତିଙ୍ଗ୍ ମାନି କିୟାଟ୍। ଏପେଙ୍ଗ୍ ଯଦି ଏଲେଙ୍ଗ୍ କିନାଦେର୍, ଲାଗିଙ୍ଗ୍ ଇନାକା ଇଚା କିନାଦେର୍ ହେଦାଙ୍ଗ୍ ଏନାଟ୍ ହେଦାଙ୍ଗ୍ ଆନେଙ୍ଗ୍ ମିଙ୍ଗେଙ୍ଗ୍ ହିଦ୍‌ନାଙ୍ଗ୍। ଏପେଙ୍ଗ୍ ବେସି ପାଡ଼୍‌ ଉବ୍‌ଜାଇ କିୟାଟ୍, ଆରେ ନା ଚେଲାଇଞ୍ଜି ଚଚିୟା ଆଡ। ଇଦାଙ୍ଗ୍ କାଜିଙ୍ଗ୍ ନା ଆବା ଈଶ୍ୱର ଜୟ୍-ଜୟ୍ ପାୟା ଆନାନ୍।
ନା ଆବା ଈଶ୍ୱର ଇନେସ୍ ଲେକେ ନାଙ୍ଗେଙ୍ଗ୍ ଲାଡ୍‌କିଜି ମାନ୍‌ଞ୍ଚାନ୍, ଆନେଙ୍ଗ୍ ମିଙ୍ଗେଙ୍ଗ୍ ହେଲେକେ ଲାଡ୍ କିତ୍‌ତାଙ୍ଗ୍‌ନା। ନଙ୍ଗୟ୍ ନା ଲାଡ୍ କିଦ୍‌ନିତାକେ ତିର୍‌ଆଜି ମାନାଟ୍। ଆନେଙ୍ଗ୍ ନା ଆବା ଈଶ୍ୱର ଆଦେସ୍‌ତିଙ୍ଗ୍ ମାନିକିନାଙ୍ଗା ଆରେ ଆନେଙ୍ଗ୍ ତା ଲାଡ୍‌ତାକେ ତିର୍‌ଆଜି ମାନାଙ୍ଗା। ହେଲେକେ ଏପେଙ୍ଗ୍ ଯଦି ନା ଆଦେସ୍‌ତିଙ୍ଗ୍ ମାନିକିନାଦେର୍, ଲାଗିଙ୍ଗ୍ ଏପେଙ୍ଗ୍ ନା ଲାଡ୍‌ତାକେ ତିର୍‌ଆଜି ମାନାଦେର୍। ଆନେଙ୍ଗ୍ ମିଙ୍ଗେଙ୍ଗ୍ ଇୱିଜୁ କାତା ୱେଚ୍‌ଚାତାଙ୍ଗ୍‌ନା, ଆନେଙ୍ଗ୍ ଇନେସ୍ ଇଲେକେ ୱାରିତାକେ ମାନାଙ୍ଗା, ଏପେଙ୍ଗ୍ ପା ନା ଲେକେ ୱାରି ପାୟାଆନାଦେର୍। ଆନେଙ୍ଗ୍ ଇଚା କିନାଙ୍ଗା ମି ୱାରି ପୁରା ଆୟେତ୍।
ଆନେଙ୍ଗ୍ ମିଙ୍ଗେଙ୍ଗ୍ ଇ ଆଦେସ୍ ହିଦ୍‌ନାଙ୍ଗା! ଇନେସ୍ ଲେକେ ଆନେଙ୍ଗ୍ ମିଙ୍ଗେଙ୍ଗ୍ ଲାଡ୍ କିତ୍‌ତାଙ୍ଗ୍‌ନା, ହେଲେକେ ଏପେଙ୍ଗ୍ ପା ଜାର୍-ଜାର୍‌ବିତ୍ରେ ଲାଡ୍ କିୟାଟ୍। ଜାର୍ ସାଙ୍ଗର୍ କାଜିଙ୍ଗ୍ ଜିବୁନ୍ ହିଜି ଲାଡ୍‌କିନି ଦର୍‌କାର୍। ହେବେତାଙ୍ଗ୍ ଆରେ ଆଦିକ୍ ଇନାକା ଆକାୟ୍। ଏପେଙ୍ଗ୍ ଆନେଙ୍ଗ୍ ୱେଚ୍‌ଚିତି ଲେକେ କାମାୟ୍ କିୟାଟ୍, ଲାଗିଙ୍ଗ୍ ଏପେଙ୍ଗ୍ ନା ସାଙ୍ଗ ଆନାଦେର୍। ଆନେଙ୍ଗ୍ ମିଙ୍ଗେଙ୍ଗ୍ ହଲିଆର୍ ଇଞ୍ଜି ୱେଚ୍‌ଚୁଙ୍ଗା। ରକାନ୍ ହଲିଆ, ତା ମାଲିକ୍ ଇନାକା କିନାନ୍, ହେୱାନ୍ ପୁନୁନ୍। ମାତର୍ ନଙ୍ଗୟ୍ ଆନେଙ୍ଗ୍ ମିଙ୍ଗେଙ୍ଗ୍ ସାଙ୍ଗ ଇଞ୍ଜି ୱେଚ୍‌ଚାନାଙ୍ଗା, ଇନେସ୍‌କି ଆନେଙ୍ଗ୍ ନା ଆବା ଈଶ୍ୱରତାଙ୍ଗ୍ ଇନାକା ୱିଜୁ ୱେଚାଙ୍ଗ୍‌ନା, ହେଦାଙ୍ଗ୍ ମିଙ୍ଗେଙ୍ଗ୍ ଶୁଣାୟ୍ କିଦ୍‌ନାଙ୍ଗା। ଏପେଙ୍ଗ୍ ନାଙ୍ଗେଙ୍ଗ୍ ବାଚି କିଦ୍‌ୱାତାଦେର୍‌ନା, ମାତର୍ ଆନେଙ୍ଗ୍ ମିଙ୍ଗେଙ୍ଗ୍ ବାଚି କିତ୍‌ତାଙ୍ଗ୍‌ନା। ଆରେ ଏପେଙ୍ଗ୍ ଇନେସ୍‌କି ପାଡ଼୍‌ ଆସ୍ତେଙ୍ଗ୍ ଆଡ୍‌ନାଦେର୍, ମି ପାଡ଼୍‌ ତିର୍‌ଆଜି ମାନ୍‌ଗାନାତ୍। ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଇନାକା ଆବା ଈଶ୍ୱରତାକେ ଏନ୍‌ନାଦେର୍, ହେୱାନ୍ ମିଙ୍ଗେଙ୍ଗ୍ ହିଦ୍‌ନାନ୍, ଇନେସ୍‌କି ଏପେଙ୍ଗ୍ ଚେଲା କାଦେର୍। ଆନେଙ୍ଗ୍ ମିଙ୍ଗେଙ୍ଗ୍ ଇୱିଜୁ ଆଦେସ୍ ହିଦ୍‌ନାଙ୍ଗା, ହେଦାଙ୍ଗ୍ କାଜିଙ୍ଗ୍ ଏପେଙ୍ଗ୍ ଜାର୍-ଜାର୍‌ବିତ୍ରେ ଲାଡ୍ କିୟାଟ୍।”

ଆରେରଗ ଯୀଶୁ ୱେଚ୍‌ଚାନ୍, “ମିଙ୍ଗେଙ୍ଗ୍ ଯଦି ପୁର୍ତି ନିକାର୍ ଗିଣ୍ କିନାର୍, ଲାଗିଙ୍ଗ୍ ମାନ୍ତ ଇଟାଟ୍, ମିଙ୍ଗେଙ୍ଗ୍ ଗିଣ୍ କିୱି ଆଗେ ପୁର୍ତି ନାଙ୍ଗେଙ୍ଗ୍ ଗିଣ୍ କିତ୍‌ତାର୍। ଏପେଙ୍ଗ୍ ଯଦି ପୁର୍ତି ନିକାଦେର୍ ଆତାଦେର୍‌ମା, ଲାଗିଙ୍ଗ୍ ଦୁନିଆ ମିଙ୍ଗେଙ୍ଗ୍ ଜାର୍ ଲକାଙ୍ଗ୍ ଲେକେ ଲାଡ୍ କିତ୍‌ତାତ୍‌ମା। ଇନେସ୍‌କି ଆନେଙ୍ଗ୍ ମିଙ୍ଗେଙ୍ଗ୍ ବାଚି କିତ୍‌ତାଙ୍ଗ୍‌ନା, ମାତର୍ ଏପେଙ୍ଗ୍ ଇ ପୁର୍ତିନି ମାନାୟ୍ ଆକାଇ। ହେଦାଙ୍ଗ୍ କାଜିଙ୍ଗ୍ ପୁର୍ତି ମିଙ୍ଗେଙ୍ଗ୍ ଗିଣ୍ କିଦ୍‌ନାତ୍।
ଆନେଙ୍ଗ୍ ମିଙ୍ଗେଙ୍ଗ୍ ଇନାକା ୱେଚ୍‌ଚି ମାନ୍‌ଞ୍ଚାଙ୍ଗ୍ ହେଦାଙ୍ଗ୍ ମାନ୍ତ ଇଟାଟ୍। ରକାନ୍ ହଲିଆ ତା ମାଲିକ୍‌ତାଙ୍ଗ୍ ଗାଜା ଆକାୟ୍। ମାନାୟାର୍ ଯଦି ନାଙ୍ଗେଙ୍ଗ୍ ନିନ୍ଦା କିଦ୍‌ନାର୍, ଲାଗିଙ୍ଗ୍ ହେୱାର୍ ମିଙ୍ଗେଙ୍ଗ୍ ପା ନିନ୍ଦା କିଦ୍‌ନାର୍। ଆରେ ଇନେର୍ ନା ହିକ୍ଷାତିଙ୍ଗ୍ ମାନିକିନାର୍, ଲାଗିଙ୍ଗ୍ ହେୱାର୍ ମି ହିକ୍ଷାତିଙ୍ଗ୍ ପା ମାନି କିଦ୍‌ନାର୍।
ମାନାୟାର୍ ନା କାଜିଙ୍ଗ୍ ମିଙ୍ଗେଙ୍ଗ୍ ହେଲେକେ ବାଉରା ଆଦ୍‌ନାର୍। ଇନେସ୍‌କି ହେୱାର୍ ନାଙ୍ଗେଙ୍ଗ୍ ପକ୍ତିତି ଆବା ଈଶ୍ୱରତିଙ୍ଗ୍ ପୁନୁର୍। ଆନେଙ୍ଗ୍ ଯଦି ୱାୱାତାଙ୍ଗ୍‌ମା, ଆରେ ଇ ପୁର୍ତିନି ମାନାୟାରିଙ୍ଗ୍ ୱେଚ୍‌ୱାତାଙ୍ଗ୍‌ମା, ଲାଗିଙ୍ଗ୍ ହେୱାର୍ ପାପ୍‌ତାକେ ଦସି ଆୱାତାର୍‌ମା। ମାତର୍ ଆନେଙ୍ଗ୍ ନଙ୍ଗୟ୍ ହେୱାରିଙ୍ଗ୍ ୱେଚ୍‌ଚାଙ୍ଗ୍‌ନା। ମାତର୍ ନଙ୍ଗୟ୍ ନା କିତି କାମାୟ୍ ୱିଜୁ ହୁଡ଼୍‌ତାର୍‌ନା, ଆରେ ନାଙ୍ଗେଙ୍ଗ୍ ଆରେ ନା ଆବା ଈଶ୍ୱରତିଙ୍ଗ୍ ଗିଣ୍ କିତାର୍‌ନା।
ନାଙ୍ଗେଙ୍ଗ୍ ଗିଣ୍ ଆଦ୍‌ନାକାର୍ ନା ଆବା ଈଶ୍ୱରତିଙ୍ଗ୍ ପା ଗିଣ୍ କିନାର୍।
ଆନେଙ୍ଗ୍ ଇମ୍‌ଣି ଚାନିଆଆନି କାମାୟ୍ ହେ ମାନାୟାର୍ ବିତ୍ରେ କିତାଙ୍ଗ୍‌ନା, ହେଦାଙ୍ଗ୍ ଇମ୍‌ଣାକାନ୍ ପା ଇନାୱେଡ଼ାଙ୍ଗ୍ କିୱାତାନ୍‌ନା। ଆନେଙ୍ଗ୍ ଯଦି ହେ କାମାୟ୍ କିୱାତାଙ୍ଗ୍‌ମା, ଲାଗିଙ୍ଗ୍ ହେୱାର୍ ପାପ୍ କାଜିଙ୍ଗ୍ ଦସି ଆୱାତାର୍‌ମା। ମାତର୍ ହେୱାର୍ ନା ଚାନିଆଆନି କାମାୟ୍ କିତାକା ହୁଡ଼୍‌ତାର୍‌ନା। ହେୱାର୍ ନାଙ୍ଗେଙ୍ଗ୍ ଆରେ ନା ଆବା ଈଶ୍ୱରତିଙ୍ଗ୍ ଗିଣ୍ କିନାରା। ଇୱିଜୁ ଗଟାଆନି କାଜିଙ୍ଗ୍ ହେୱାର୍ ମୋଶା ଲେକିକିତି ନିୟମ୍‌ନି ସାସ୍ତର୍‌ତାକେ ଲେକା ମାନାତ୍ ହେଦାଙ୍ଗ୍ ସତ୍ ଆତାତ୍। ‘ହେୱାର୍ ନାଙ୍ଗେଙ୍ଗ୍ ବିନାଶୁନେ ଗିଣ୍ କିତ୍‌ତାର୍।’
ଆନେଙ୍ଗ୍ ନା ଆବା ଈଶ୍ୱରତାକେଣ୍ଡାଙ୍ଗ୍ ମି ଲାଗାୟ୍ ହେ ସାଇଜ କିଦ୍‌ନାକାନିଙ୍ଗ୍ ପକ୍ତାନାଙ୍ଗ୍। ହେ ସାଇଜ କିଦ୍‌ନାକାନ୍ ଈଶ୍ୱରଆତ୍ମା ମାନ୍‌ଗାନାନ୍। ହେୱାନ୍ ଆବା ଈଶ୍ୱରତାଙ୍ଗ୍ ୱାନାନ୍। ହେପାଦ୍ନା ହେୱାନ୍ ନା ବିଷୟରେ ୱିଜୁ ସତ୍ କାତା ୱେଚ୍‌ଚାନାନ୍। ଏପେଙ୍ଗ୍ ନା ବିଷୟରେ ମାନାୟାରିଙ୍ଗ୍ ୱେଚ୍‌ନାଦେର୍, ଇନେସ୍‌କି ପାର୍ତୁମ୍‌ତାଙ୍ଗ୍ ନା ହୁଦାଙ୍ଗ୍ ମାନାଦେରା।”

Listen to ଯୋହନ 15