If you would like a copy of this version please contact info@davaraudiobibles.org

Pengo Parja New Testament, CC-BY-SA-4.0, The Love Fellowship. Pengo Parja New Testament, CC-BY-SA-4.0, Davar Partners International, 2021.

Pengo Parja New Testament

Pengo Parja Bible by The Love Fellowship is licensed under Creative Commons Attribution-ShareAlike 4.0 License.

ଶାଉଲ ନଙ୍ଗୟ୍ ପା ଯୀଶୁ ଚେଲାହିରିଙ୍ଗ୍ ମାର୍ନେ ଅସ୍ତାନାଙ୍ଗ୍ ଇଞ୍ଜି ପାଣ୍ଡ୍ରୁକିଜି ମାଚାନ୍। ଆରେ ହେୱାନ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍‌ଦି ପୁଜାରି ଲାଗାୟ୍ ହାଚାନ୍। ଆରେ ଦମେସକ ସହର୍‌ତାକେ ମାନି ପାର୍ତାନା ଇଲ୍‌ନି ନେତାର୍ ଲାଗାୟ୍ ଚିଟି ଲେକିକିଦେଙ୍ଗ୍ ୱେଚ୍‌ଚାନ୍। ଇନେସ୍‌କି ହେୱାନ୍ ହେବେ ହାଲ୍‌ଜି ଯିଶୁତାକେ ପାର୍ତିକିନି ଆଣ୍ଡ୍ରା କି କଗ୍‍ଲେକାଙ୍ଗ୍ ଗାଚ୍‌ଚି ଯିରୁଶାଲାମ ସହର୍‌ତାକେ ତାସି ୱାଦେଙ୍ଗ୍ ଆଡ୍‌ନାନ୍।
ଏଚେପାଦ୍ନା ଶାଉଲ ଆରେ ତା ହାଙ୍ଗ୍‌ଦାକାର୍ ଦମେସକ ସହର୍ ଲାଗାୟ୍ ଆତିହିଙ୍ଗ୍, ହେଦାପ୍ରେ ସରଗ୍‌ତାଙ୍ଗ୍ ର ଅଜଡ଼୍ ତା ଚାରିବେଣ୍‌ତାଙ୍ଗ୍ ଆତାତ୍। ହେବେତାଙ୍ଗ୍ ହେୱାନ୍ ମେଦ୍‌ନିତାକେ ଗୁର୍‌ତାନ୍। ହେୱାନ୍ ଈଶ୍ୱର ୱେଚ୍‌ଚି ବେଣ୍ ୱେଚାନ୍, “ଏ ଶାଉଲ, ଏ ଶାଉଲ ଇନା କିଦେଙ୍ଗ୍ ନାଙ୍ଗେଙ୍ଗ୍ ଦୁକ୍‌କଷ୍ଟ ହିଦ୍‌ନାୟା?”
ଶାଉଲ ୱେନ୍‌ବାତାନ୍, “ଏନେଙ୍ଗ୍ ଇନେର୍ ମାପୃ?”
ହେୱାନ୍ ୱେଚ୍‌ଚାନ୍, “ଇନେରିଙ୍ଗ୍ ଏପେଙ୍ଗ୍ ଦୁକ୍‌କଷ୍ଟ କିନାଦେରା, ଆନେଙ୍ଗ୍ ହେ ଯୀଶୁ।” ମାତର୍ ଏନେଙ୍ଗ୍ ନିଙ୍ଗା, ଆରେ ସହର୍‌ତାକେ ହାଲା, ଆନେଙ୍ଗ୍ ଇନାକା କିଦେଙ୍ଗ୍ ଇଚା କିନାଙ୍ଗା ଏନେଙ୍ଗ୍ ହେବେ ହାଚିସ୍ ନିଙ୍ଗେଙ୍ଗ୍ ୱେଚ୍‌ଚାନାଙ୍ଗ୍।
ଇମ୍‌ଣି ମାନାୟାର୍ ତା ହୁଦାଙ୍ଗ୍ ହାଲ୍‌ଜି ମାଚାର୍, ହେୱାର୍ ହେ ବେଣ୍ ୱେନ୍‌ଞ୍ଜି ଇନେରିଙ୍ଗ୍ ପା ହୁଡ଼୍‌ୱାଦାଙ୍ଗ୍ କାବାଆଜି ନିଲ୍‌ତାର୍। ଆରେ ଶାଉଲ ମେଦ୍‌ନିତାକେ ଗୁର୍‌ଜି ମାଚାକାନ୍ ନିଙ୍ଗ୍‌ତି ପାଚେ ହୁଡ଼୍‌ତାନ୍, ମାତର୍ ଇନାକାପା ହୁଡ଼୍‌ଦେଙ୍ଗ୍ ଆଡ୍‌ୱାତାନ୍। ଲାଗିଙ୍ଗ୍ ହେୱାର୍ ତା କେଇ ଆସ୍ତି ହେୱାନିଙ୍ଗ୍ ଦମେସକ ସହର୍‌ତାକେ ଅସାହାଚାର୍। ଆରେ ହେୱାନ୍ ତିନ୍‌ଦିନ୍ ପାତେକ୍ ହୁଡ଼୍‌ଦେଙ୍ଗ୍ ଆଡ୍‌ୱାତାନ୍। ଆରେ ହେୱାନ୍ ଇନାକାପା ତିନ୍‌ୱାତାନ୍ କି ଉଣ୍‌ୱାତାନ୍।
ଦମେସକ ସହର୍‌ତାକେ ହନନିୟ ତର୍‍ଦାକାନ୍ ରକାନ୍ ଚେଲା ମାଚାନ୍। ହେୱାନିଙ୍ଗ୍ ମାପୃ କେଚ୍‌କଣ୍‌ତାକେ ଚଞ୍ଜିଆଆଜି ୱେଚ୍‌ଚାନ୍, “ଏ ହନନିୟ।”
ହେୱାନ୍ ୱେଚ୍‌ଚାନ୍, ଆଁ ମାପୃ, ୱେଚ୍‌ଚା।
ହେବେତାଙ୍ଗ୍ ମାପୃ ହେୱାନିଙ୍ଗ୍ ୱେଚ୍‌ଚାନ୍, “ନିଙ୍ଗା, ସଳଖ ତର୍‌ଦି ହାଜ୍‌ଦିଙ୍ଗ୍ ହାଲ୍‌ଜି ଯିହୁଦା ଇଞ୍ଜ ହାଲା। ହେବେ ଏନେଙ୍ଗ୍ ହାଲ୍‌ଜି ତାର୍ଷ ସହର୍‌ତାଙ୍ଗ୍ ୱାଜିମାଚି ଶାଉଲ ତର୍‍ଦାକାନ୍ ରକାନ୍ ମାନାୟ୍‌ତିଙ୍ଗ୍ ଡେକା। ନଙ୍ଗୟ୍ ହେୱାନ୍ ପାର୍ତାନା କିନାନା। ଆନେଙ୍ଗ୍ ହେୱାନିଙ୍ଗ୍ କେଚ୍‌କଣ୍‌ତାକେ ଚଞ୍ଜି ଆତାଙ୍ଗ୍‌ନା ଯେ, ହନନିୟ ତର୍‌ଦି ମାନାୟ୍‌ନି ଲାଗାୟ୍ ୱାନାନ୍, ଆରେ ଏନେଙ୍ଗ୍ ଇନେସ୍ ଆରେରଗ ହୁଡ଼୍‌ଦେଙ୍ଗ୍ ଆଡ୍‌ନାଇ ହେଦାଙ୍ଗ୍ କାଜିଙ୍ଗ୍ ହେୱାନ୍ ୱାଜି ନି ଜପି କେଇ ଇଟ୍‌ନାନ୍।”
ମାତର୍ ହନନିୟ ୱେଚ୍‌ଚାନ୍, “ମାପୃ, ନିବେ ପାର୍ତି କିଜି ଯିରୁଶାଲାମ ସହର୍‌ତାକେ ମାନି ମାନାୟାରିଙ୍ଗ୍ ବେସି ଦୁକ୍‌କଷ୍ଟ ହିତାନ୍‌ନା। ଆରେ ଇ ବାହାତାକେ ଏଚେଜାଣ୍ ମାନାୟାର୍ ନିବେ ପାର୍ତି କିନାକାରିଙ୍ଗ୍, ହେୱାନ୍ ଗାଚ୍‌ଚି ଯିରୁଶାଲାମ୍ ସହର୍‌ତାକେ ଅଦେଙ୍ଗ୍ ଈଶ୍ୱର ହେବାକିନି ପ୍ରଦାନ୍ ମୁଡ଼୍‌ଦି ପୁଜାରିର୍‌ତାଙ୍ଗ୍ ଆଦେସ୍ ପାୟାଆତାନ୍‌ନା, ଇଞ୍ଜି ଆନେଙ୍ଗ୍ କେତେକ୍ ହେନି ମାନାୟାର୍‌ତାକେ ଇୱାନ୍ ବିଷୟରେ ୱେଚାଙ୍ଗ୍‌ନା।”
ମାତର୍ ମାପୃ ୱେଚ୍‌ଚାନ୍, “ଏନେଙ୍ଗ୍ ହାଲା। ଇନେସ୍‌କି ଆନେଙ୍ଗ୍ ହେୱାନିଙ୍ଗ୍ ନା ହେବା କିଦେଙ୍ଗ୍ ବାଚି କିତ୍‌ତାଙ୍ଗ୍‌ନା। ହେୱାନ୍ ବିନ୍‌ଜାତିନି ମାନାୟାର୍ ମୁମ୍‌ଦ, ରାଜାର୍ ମୁମ୍‌ଦ, ଆରେ ଇସ୍ରାଏଲ ଜାତିର୍ ମୁମ୍‌ଦ, ନା ବିଷୟରେ ଶୁଣାୟ୍ କିନାନ୍। ଆରେ ନା ବିଷୟରେ ହେୱାନ୍ ମାନାୟାରିଙ୍ଗ୍ ୱେଚ୍‌ନିହିଙ୍ଗ୍ ଏଚେକ୍ ଦୁକ୍‌କଷ୍ଟ ପାୟା ଆନାନ୍, ହେ ବିଷୟରେ ଆନେଙ୍ଗ୍ ହେୱାନିଙ୍ଗ୍ ୱେଚ୍‌ନାଙ୍ଗ୍।”
ହେବେତାଙ୍ଗ୍ ହନନିୟ ଶାଉଲ ଇଞ୍ଜ ହାଚାନ୍। ହେୱାନ୍ ଶାଉଲ ଜପି କେଇ ଇଡ଼୍‌ଜି ୱେଚ୍‌ଚାନ୍, “ଏ ଶାଉଲ ଟଣ୍ଡେନ୍, ଏନେଙ୍ଗ୍ ଇନେସ୍ ଆରେରଗ ହୁଡ଼୍‌ଦେଙ୍ଗ୍ ଆଡ୍‌ନାଇ ଆରେ ପବିତ୍ର ଆତ୍ମାତାଙ୍ଗ୍ ପୁରା ଆନାୟ୍। ହେଦାଙ୍ଗ୍ କାଜିଙ୍ଗ୍ ଯୀଶୁ ମାପୃ ଇନେରିଙ୍ଗ୍ ଏନେଙ୍ଗ୍ ୱାନିହିଙ୍ଗ୍ ହାଜ୍‌ଦ ହୁଡ଼୍‌ତାୟ୍ ହେୱାନ୍ ନାଙ୍ଗେଙ୍ଗ୍ ନି ଲାଗାୟ୍ ପକ୍ତାତାନ୍‌ନା।” ହେଦାପ୍ରେ ଶାଉଲ କାଣ୍‌କୁତାଙ୍ଗ୍ ମିନ୍ ପକ୍‌ଡ଼ି ଲେକେ ର ଜିନିଷ୍ ଆର୍‍ତାତ୍ ଇଞ୍ଜି ବାବିକିତାନ୍, ଆରେ ହେୱାନ୍ କାଣ୍‌କୁ ହୁଡ଼୍‌ତାନ୍। ତାପାଚେ ହେୱାନ୍ ନିଙ୍ଗ୍‌ଞ୍ଜି ଡୁବନ୍ ଅତାନ୍। ଆରେ ହେୱାନ୍ ଇଚ୍‍କେ କାଦି ତିନ୍‌ଞ୍ଜି ଶାକ୍ତି ଆତାନ୍। ଆରେ ହେୱାନ୍ ଦମେସକ ସହର୍‌ତାକେ ମାନି ଚେଲାହିର୍ ହୁଦାଙ୍ଗ୍ କେତେକ୍ ଦିନ୍ ମାଚାନ୍।

ଶାଉଲ ଦମେସକ ସହର୍‌ତାକେ ମାନିହିଙ୍ଗ୍ ନେ ପାର୍ତାନା ଇଲ୍‌କୁକାଙ୍ଗ୍ ହାଲ୍‌ଜି ଯୀଶୁ ନେ ଈଶ୍ୱର ମେହି ଇଞ୍ଜି ଶୁଣାୟ୍ କିଦେଙ୍ଗ୍ ଲାଗାତାନ୍।
ଆରେ ଇନେର୍ ତା କାତା ୱେଚାର୍, ହେୱାର୍ ୱିଜାକାର୍ ଚାନିଆ ଆଜି ୱେଚ୍‌ଚେଙ୍ଗ୍ ଲାଗାତାର୍, “ଇୱାନ୍‌ତ ହେ ମାନାୟ୍, ଇନେର୍ ଯୀଶୁତାକେ ପାର୍ତିକିଜି ଯିରୁଶାଲାମ ସହର୍‌ତାକେ ମାନି ମାନାୟାରିଙ୍ଗ୍ ବେସି ଦୁକ୍‌କଷ୍ଟ ହିଜିମାଚାନ୍। ଆରେ ଇବେ ପାର୍ତି କିନାକାରିଙ୍ଗ୍ ପା ଗାଚ୍‌ଚି ଈଶ୍ୱର ହେବାକିନି ପ୍ରଦାନ୍ ମୁଡ଼୍‌ଦି ପୁଜାରିତାକେ ଅଦେଙ୍ଗ୍ ୱାଜିମାଚାନ୍।”
ମାତର୍ ଈଶ୍ୱର ଶାଉଲତିଙ୍ଗ୍ ବେସି ଶାକ୍ତି ହିତାନ୍। ଯୀଶୁ ନେ ଖ୍ରୀଷ୍ଟ ଇଞ୍ଜି ପାର୍ମାଣ୍ କିଜି ଶୁଣାୟ୍ କିଜି ମାଚାନ୍। ଇଦାଙ୍ଗ୍ କାଜିଙ୍ଗ୍ ଦମେସକ ସହର୍‌ତାକେ ମାନି ଯିହୁଦି ମାନାୟାର୍ ଇନାକା ୱେଚ୍‌ଚେଙ୍ଗ୍ ଆଡ୍‌ୱାଦାଙ୍ଗ୍ ମାଚାର୍।
ଶାଉଲ ଦମେସକ ସହର୍‌ତାକେ କେତେକ୍ ଦିନ୍ ମାଚି ପାଚେ, ଯିହୁଦିର୍ ମେହାଆଜି ହେୱାନିଙ୍ଗ୍ ମାର୍ନେ ଅସ୍ତେଙ୍ଗ୍ ଉପାୟ୍ କିତାର୍। ମାତର୍ ହେୱାର୍ ଉପାୟ୍ କିତାକା ଶାଉଲ ପୁଚାନ୍। ଆରେ ହେ ଯିହୁଦିର୍ ଇନେସ୍ ହେୱାନିଙ୍ଗ୍ ମାର୍ନେ ଅହ୍‌ନି କାଜିଙ୍ଗ୍, ୱେଡ଼ା ନାଣା ସହର୍‌ନି ଗେଟ୍‌କୁକାଙ୍ଗ୍ କାତାର୍। ମାତର୍ ତା ଚେଲାହିର୍ ମିକାଲିଙ୍ଗ୍ ହେୱାନିଙ୍ଗ୍ ଅଜି ର ଟପାତାକେ ମେତ୍‌ତାର୍, ଆରେ ଟପାତାକେ ଡରି ଗାଚ୍‌ଚି ବାଉଣ୍ଡେରି ନିପଣ୍ କିଜି ତାରେନ୍ ଜୁତ୍‍ତାର୍। ଆରେ ଶାଉଲ ଦମେସକ ସହର୍‌ତାଙ୍ଗ୍ ହାଚାନ୍।

ତାପାଚେ ଶାଉଲ ଯିରୁଶାଲାମ ସହର୍‌ତାକେ ହାଲ୍‌ଜି ଚେଲାହିର୍ ହୁଦାଙ୍ଗ୍ ମେହାଆଦେଙ୍ଗ୍ ଉପାୟ୍ କିଜି ମାଚାନ୍। ମାତର୍ ହେୱାନ୍ ରକାନ୍ ଚେଲାହି ଇଞ୍ଜି ପାର୍ତି କିୱାଦାଙ୍ଗ୍ ୱିଜାକାର୍ ହେୱାନିଙ୍ଗ୍ ପଣ୍ଡ୍ରାଆଜି ମାଚାର୍। ମାତର୍ ବାଚିକିତି ଚେଲାହିର୍ ଲାଗାୟ୍ ବର୍ଣ୍ଣବା ତର୍‍ଦାକାନ୍ ରକାନ୍ ମାନାୟ୍ ଶାଉଲତିଙ୍ଗ୍ ତାସିୱାତାନ୍। ଦମେସକ ସହର୍‌ତାକେ ହାନି ହାଜ୍‌ଦ ଶାଉଲ ଯୀଶୁ ମାପୃଙ୍ଗ୍ ହୁଡ଼୍‌ତି ବିଷୟ ହେୱାରିଙ୍ଗ୍ ୱେଚ୍‌ଚାନ୍। ଆରେ ଶାଉଲ ଦମେସକ ସହର୍‌ତାକେ ଯୀଶୁ ବିଷୟରେ ଶାସ୍ ହୁଦାଙ୍ଗ୍ ଶୁଣାୟ୍ କିତି ବିଷୟ ପା ହେୱାନ୍ ହେୱାରିଙ୍ଗ୍ ୱେଚ୍‌ଚାନ୍। ଆରେ ଶାଉଲ ବାଚିକିତି ଚେଲାହିର୍ ହୁଦାଙ୍ଗ୍ ମାଚାନ୍। ଆରେ ଯୀଶୁ ମାପୃ ବିଷୟରେ ହେୱାନ୍ ଶାସ୍ ହୁଦାଙ୍ଗ୍ ଯିରୁଶାଲାମ ସହର୍‌ନି ୱିଜୁ ନିପଣ୍ ଶୁଣାୟ୍ କିଦେଙ୍ଗ୍ ଲାଗାତାନ୍। ହେୱାନ୍ ଗ୍ରୀକ୍ ବାଷା କିନି ଯିହୁଦି ଜାତିନି ମାନାୟାରିଙ୍ଗ୍ ପା ଯୀଶୁ ବିଷୟରେ ୱେଚ୍‌ଚାନ୍, ଆରେ ହେୱାନ୍ ହେୱାର୍ ହୁଦାଙ୍ଗ୍ ଜୁକ୍ତି କିଜି ମାଚାନ୍। ମାତର୍ ହେୱାର୍ ହେୱାନିଙ୍ଗ୍ ମାର୍ନେ ଅସ୍ତେଙ୍ଗ୍ ଉପାୟ୍ କିଦେଙ୍ଗ୍ ଲାଗାତାର୍। ହେଦାଙ୍ଗ୍ କାଜିଙ୍ଗ୍ ତା ହାଙ୍ଗ୍‌ଦି ଟଣ୍ଡାହିର୍ ଇଦାଙ୍ଗ୍ ପୁନ୍‌ଞ୍ଜି ହେୱାନିଙ୍ଗ୍ କାଇସରିଆ ସହର୍‌ତାକେ ଅତାର୍। ଆରେ ହେୱାନ୍ କାଜିଙ୍ଗ୍ ତାର୍ଷ ସହର୍‌ତାକେ ହାଞ୍ଜେଙ୍ଗ୍ ଜଗାଡ଼୍ କିଜି ପକ୍ତାର୍।
ଲାଗିଙ୍ଗ୍ ଯିହୁଦା ଜିଲ୍ଲା, ଗାଲିଲୀ ଜିଲ୍ଲା ଆରେ ଶମିରଣିୟ ଜିଲ୍ଲାତାକେ ମାନି ମଣ୍ଡ୍‌ଲିନି ମାନାୟାର୍ ଶାନ୍ତିଆଜି ବାହାକିତାର୍। ଇନେସ୍‌କି ହେୱାରିଙ୍ଗ୍ ଇନେର୍ ପା ଦୁକ୍‌କଷ୍ଟ ହିୱାଦାଙ୍ଗ୍ ମାଚାର୍। ଆରେ ପବିତ୍ର ଆତ୍ମା ହେୱାରିଙ୍ଗ୍ ସାଇଜ ଆରେ ଶାସ୍ ହିଜିମାଚାତ୍‌, ଆରେ ବେସି ମାନାୟାର୍ ଯୀଶୁତାକେ ପାର୍ତି କିଦେଙ୍ଗ୍ ଲାଗାତାର୍।

ପିତର ଇୱିଜୁ ଜିଲ୍ଲାତାକେ ବୁଲା ଆଉ-ଆଉ ଲୁଦ ସହର୍‌ତାକେ ମାନି ପାର୍ତି କିନାକାର୍ ଲାଗାୟ୍ ଇକାତାନ୍। ହେବେ ହେୱାନ୍ ଏନିୟ ତର୍‍ଦାକାନ୍ ରକାନ୍ ମାନାୟ୍‌ତିଙ୍ଗ୍ ଗିଟାଆତାନ୍। ହେୱାନ୍ ଆଟ୍ ବାର୍ହୁ ପାତେକ୍ ହିର୍କଲ୍ ରଗ୍ ଆହିଆଜି ହୁନ୍‌ଞ୍ଜି ମାଚାନ୍। ପିତର ହେୱାନିଙ୍ଗ୍ ୱେଚ୍‌ଚାନ୍, “ଏନିୟ, ଯୀଶୁ ଖ୍ରୀଷ୍ଟ ନିଙ୍ଗେଙ୍ଗ୍ ହାର୍ କିଦ୍‌ନାନା, ନିଙ୍ଗା, ନି ପାସ୍ତାକା ସଜାଇ କିୟା।” ହେଦାପ୍ରେ ହେୱାନ୍ ନିଙ୍ଗ୍‌ତାନ୍। ଆରେ ଲୁଦ ଆରେ ଶାରଣ ସହର୍‌ତାକେ ବାହାକିନି ୱିଜୁ ମାନାୟାର୍ ହେୱାନ୍ ହାର୍‌ଆତାକା ହୁଡ଼୍‌ଜି, ଆରେ ହେୱାର୍ ଯୀଶୁ ମାପୃତାକେ ପାର୍ତି କିତାର୍।
ଯାପା ସହର୍‌ତାକେ ଟାବିଥା ତର୍‍ଦାକାନ୍ ରକାନ୍ ଚେଲାହି ମାଚାନ୍। ତା ତର୍‌ ଗ୍ରୀକ୍ ବାଷାତାଙ୍ଗ୍ ଦର୍କା ଇଞ୍ଜି ୱେଚ୍‌ଚି ମାଚାର୍, ଇଦାଙ୍ଗ୍‌ନି ଅର୍ତ ଚିତ୍ରାକଟ୍ରା। ହେୱାନ୍ ରକାନ୍ ହାର୍ଦି କାମାୟ୍ କିନାକାନ୍ ମାଚାନ୍, ଆରେ ମାନାୟାରିଙ୍ଗ୍ ଦାନ୍ ହିଜିମାଚାନ୍। ପିତର ଲୁଦ ସହର୍‌ତାକେ ମାନିହିଙ୍ଗ୍, ହେୱାନ୍ ରଗ୍ ଆଜି ହାଃତାନ୍। ହେୱାର୍ ହେ ହାଃତାକାନିଙ୍ଗ୍ ଏଜୁଙ୍ଗ୍ ଇତ୍‌ପିସ୍ ର ଜପ୍‌ଣି ପାଉଜ୍‌ତାକେ ହୁଚ୍‌ପାତାର୍। ପିତର ଲୁଦ ସହର୍‌ତାକେ ମାନାନ୍ ଇଞ୍ଜି ଚେଲାହିର୍ ପୁଚାର୍, ଇ କାତା ୱେଚ୍‌ଚି ରିକାରିଙ୍ଗ୍ ପକ୍ତାର୍, “ମା ଲାଗାୟ୍ ୱାଦେଙ୍ଗ୍ ଡେରି କିମାଟ୍।” ଲୁଦ ସହର୍ ଯାପା ସହର୍ ଲାଗାୟ୍ ମାଚାତ୍।
ଲାଗିଙ୍ଗ୍ ପିତର ନିଙ୍ଗ୍‌ଞ୍ଜି ହେୱାର୍ ହୁଦାଙ୍ଗ୍ ହାଚାନ୍। ହେୱାନ୍ ୱାତି ଦାପ୍ରେ ହେୱାର୍ ହେୱାନିଙ୍ଗ୍ ହେ ମାଡ଼ା ଇଡ଼୍‌ତି ଜପ୍‌ଣି ପାଉଜ୍‍ତ ଅସାହାଚାର୍, ଆରେ ହେବେ ରାଣ୍ଡି କଗ୍‍ଲେକ୍ ୱିଜେକିକ୍ ପିତର ଚାରିବେଣ୍‌ତାଙ୍ଗ୍ ଆଜି ଆଡ଼୍‌ବିତିକ୍। ଦର୍କା ହେୱେକ୍ ହୁଦାଙ୍ଗ୍ ମାନିହିଙ୍ଗ୍ ଇମ୍‌ଣିୱିଜୁ ହେନ୍ଦ୍ରାପାଟା ସିଲାଇ କିଜି ମାଚିକ୍, ହେ ୱିଜୁ ଚଚ୍‌ଚିକ୍।
ମାତର୍ ପିତର ୱିଜାକାରିଙ୍ଗ୍ ବାର୍ତ ହପ୍‌ଚି ମେଣ୍ଢାକୁନ୍ଦିକିଜି ପାର୍ତାନା କିତାନ୍। ଆରେ ହେୱାନ୍ ହାଃତିମାଡ଼ା ନିପଣ୍ ବୁଲାଆଜି ୱେଚ୍‌ଚାନ୍, “ଟାବିଥା, ନିଙ୍ଗା” ହେବେତାଙ୍ଗ୍ ହେ ହାଃତି କଗ୍‌ଲେ କାଣ୍‌କୁ ଜେତାତ୍‌, ଆରେ ପିତରତିଙ୍ଗ୍ ହୁଡ଼୍‌ଜି ନିଙ୍ଗ୍‌ଞ୍ଜି କୁଚ୍‌ଚାତ୍‌। ପିତର କେଇ ଆସ୍ତି ହେଦେଲିଙ୍ଗ୍ ନିକ୍ତାନ୍, ଆରେ ପାର୍ତି କିନାକାରିଙ୍ଗ୍ ଆରେ ରାଣ୍ଡି କଗ୍‍ଲେକାଙ୍ଗ୍ କୁକ୍‌ଚି ଜିବୁନ୍ କିଜି ଚଚ୍‌ଚାନ୍।
ଇବେଣ୍ ଯାପା ସହର୍‌ନି ୱିଜୁ ମାନାୟାର୍ ପୁଚାର୍। ଆରେ ବେସିହେନି ମାନାୟାର୍ ଯୀଶୁ ମାପୃତାକେ ପାର୍ତି କିତାର୍। ପିତର କେତେକ୍ ଦିନ୍ ଯାପା ସହର୍‌ନି ଶିମୋନ ତର୍‍ଦାକାନ୍ ଇଞ୍ଜ ମାଚାନ୍। ହେୱାନ୍ ରକାନ୍ ତଲ୍ କାମାୟ୍ କିନାକାନ୍ ମାଚାନ୍।

Listen to ବାଚିକିତି ଚେଲାହିର୍ କାତା 9