The New Testament in the Gumawana language of Papua New Guinea

Buk Baibel long tokples Gumawana long Niugini

Tuwo moitamo sinave Pailato yaina goi ana kotu manuna. E sima Pailatoyana goi sivatowo Yeisu siwowoko kadi,
‘Ame Tauyana kagitebabane ima boda ivasulaigidi ame nakae: Tomota isanabodedi geya sitakisita yaina. Aiyuwoina kanove idigo kana,
“Yau tayamo.”’
E kina go Pailatoyana Yeisu ilumadade idigo kana,
‘Kom moitamo Diyuu adi Tokalibúbuna?’
‘Kom bogina kudigoyabe’, Yeisu kaena.
E kina go Pailatoyana Gagaidi be boda ilatuwokoidi idigo kana,
‘Ame korotoyana bogina adovatusiye go, agite geya ana pikwanamo.’
E bodayadi sikaugeogéona sidigo kadi,
‘Geya! Tauyana ina Yudiya madabokina goi ivaatulúkwana, e boda idumwamwainidi. Ivatowo Galili goi ima ameko goi.’
E kina go Pailatoyana idi livala inove, ilumadádana kana,
‘Manakae? Koroto ame moitamo Galili korotoina ae?’
‘U, nakae’, kidi kaedi.
Tuwo Pailato bogina iyagoi bego Yeisu ina kasa moe ina kaba lovina sinaena. Amo tutayana Erodiyana nakae Yerusalema goi ikaaiyaka, tuwo Pailato ina boda ilovinaedi kana,
‘Yeisu konave Erodi yaina goi.’
Tuwo moitamo sinave tauyana yaina goi.
E kina go Erodiyana Yeisu igite, iuyáwana gagaina. Tuta maanawena latuwona Yeisu igite unana valena bogina inove. Tuwo iilotuta bei Yeisu aba kinana tayamo iguuinuwe igite. E lumadádana goi Yeisu idoovatusi tuta maanawena go, Tauyana geya ikatumapuyeta. E kidi Tonúwala Gagaidi be Yaubada ina Katukeda ana tovatulukwanayao siitaoya Yeisu kikina siwowoko gagaina. E kina Erodiyana mana tovayaviyayao Yeisu sikaiwotete be sivaponuponuye. Nakae tolovina ana kwama dedevina sikabi, Yeisu sivalosi bego yaina goi sisakululu polapola. Ikavava, Erodi ina lovina goi sietunemnei ina Pailato yaina goi. E Erodi be Pailato amo maliyalinayana goi bogina sivasíyana. Boi mainao sivaakaleya.


E kina go Pailatoyana Tonúwala Gagaidi, Diyuu idi tomoyamoyayao be boda ikatuvagogudi sima ilatuwokoidi idigo kana,
‘Ame korotoyana bogina kome yau yaigu kotalavaite bego tomota ivasulaigidi go, konovēgu. Tauyana bogina matami goi adovatusidoko go, geya tayaamo píkwana Tauyana yaina goi ababane. Go moe yau aguta guna nuwonúwana geya, go sem Erodi nakae geya tayaamo kaga ibabane. Yeisu ietunemnei ima yaida goi. Go konovēgu. Ame Tauyana geya tayaamo goyo iguinuwe bei ámasa itoboine. Tauna bei adabiyamo namlieta ataligei yaimi goi.’
Go kidi bodayadi madabokidikova siduduwo sidigo kadi,
‘E moe Tauyana kukaumāte go, Barabasi kutaligēi manuma!’
Barabasiyana boi deri sivaisiu unana boi Yerusalema goi senao italewuwudi bego idi lovina sikapipilavedi be nakae tomota maniyedi ikaumatedi. E Pailatoyana latuwona Yeisu italigei, tuwo aiyuwoina tomota ilumadademneidi. Go kidi siiduduwo kadi,
‘Kerose goi kutupatūko! Kerose goi kutupatūko!’
Go kina Pailatoyana sivato kana,
‘Tupatúkwana? Ame Tauyana ava goyo iguinuwe bei itoboine ikámasa? Geya tayaamo píkwana Tauyana yaina goi ababane. Tauna bei adabiyamo namlieta ataligei.’
E kidi sikaugeogéona. Niyadi gagaidi goi silovina kadi,
‘Kerose goi situpatuko!’
Tauyadi sopadi imakimaki, tuwo kina Pailatoyana ilovina Yeisu ikámasa idi kawanoi nakae. E korotoyana ina kapipilova be ina kaumata pasidi deri goi ikaaiyaka go, Pailato italigei nakae sikawanoiye. Go Yeisu iyato boda nimadi goi bei idi nuwonúwana siguinuwe Tauyana yaina.


Tutayana sinavenave bei kerose goi situpatuko, enao goi koroto tayamo guma Sairini yoina Saimoni ina tánuwo goi imamaima. Imamaima go, tovayaviya siyoisi silovinae Yeisu ina kerose ikabi ikavale. Ikabi ikavale Yeisu mlina goi iiketoiya. E Yeisu inonoina go, boda gagaina sisabookuliye. Bodayadi yaidi goi vevina badabadaidi kasikasidi sitututu go, sitaiyakuwokúwala Yeisu manuna. E kina Yeisu itaoya, itugavila vevinayadi ilatuwokoidi kana,
‘Yerusalema vevinaimi, tuta simamaima bei mou gagaidi sisowóduwo, e tomota bei sidigo kadi,
“Avatauwa komi vevina neta kaagalimi o geya natumimo, ami dedevina bogina kobabane.”
Tauna taabu kotaitāiya yau manugu, go sem toinimi manumi be nakae natumiyao manudi kotāiya. Yau geya guna pikwanamo o kada, “Yau alova mamaina nakae, tauna tomota geya itoboinedita sigabu.” Komi da Yerusalema mami píkwana o tadigo kada, “Komi alova diinalidi nakae tomota bei sigabudi.” Tuwo kerose goi bei situpatukoigu go, komi bei manakaemi? Tuta amo goi bei igoyo toina, nakae tomota geya latuwodi bei mouyadi silotowo, tauna bei sivatowo koya silatuwokoidi kadi,

“Kosōu kōma kokautūmma!”’
Oseya 10:8

E toogoyoidi adi taiyuwo nakae sinavedi bei Yeisu taiyao sikaumatedi.
Tutayana sima asa yoina Bulubulu goi Yeisu ana kwama sivalilividi. Ikavava, kerose goi situpatuko. Ago togoyoidiyadi adi taiyuwokova nakae adi kerose goi situpatukoidi, tayamo kakataina, tayamo kekelina. E kina go Yeisuyana idigo kana,
‘Tamagu, idi guinuwa goyogoyoina ame kunuwotāo. Geya siyagoiyeta kaga siguuinuwe.’
E tovayaviyayadi Yeisu ana kwama, ana sendoro, ana gadíwana sikabidi, pápala tayamo siguinuwe bei sigite avatauwa sikabidi. Ago boda siitaoya Yeisu siyookoe. E kidi go Diyuu adi tolovinayaoyadi nakae sikaoseve sidigo kadi,
‘Bego ituli ta tomota iyavedi. Tuwo toinina iyāve, neta Tauyana moitamo , ina kinava!’
E tovayaviya nakae Tauyana sikaiwotete ame nakae: Sima bwaena yuyuyuna sitagone inim go, sidigo kadi,
‘Neta kom moitamo kidi Diyuu adi Tokalibúbuna, toinim kuyavēm!’
Ego Yeisu ana píkwana aisika paaevaina tayamo goi sigini, dabana diligaemaina goi situpatuko. Ana pikwanayana kana,
‘Ame Tauyana
Diyuu adi Tokalibúbuna.’
E kina go tokapipilova tayamo adi taiyuwo tupaatukoidi yaidi goi Yeisu itagiwoi idigo kana,
‘Manakae? Kom gea geya? Toinim kuyavēm namlieta kai nakae kuyavēma.’
E kina ituli ta toogoyoina siyana ibove idigo kana,
‘Manakae? Yaubada ina liuna geya kumatoiteyeta ae? Iyaa! Kita ada liuna taababane Tauyana ana liuna nakae! Ago liunayana kita itoboineda. Kita ida guinuwa ana katumapu bogina tababanedoko go, ame Tauyana geya tayaamo kaga goyogoyoina iguinuwe geya.’
Tuwo togoyoinayana Yeisu ilatuwoko idigo kana,
‘Yeisu, kunuwokavatēgu tutayana im tuta kuetokalibúbuna.’
Yeisu idigo kana,
‘Nakae bei aguinuwe, tauna ame alatuuwokoim kunōve: Ame bei guna dadava dedevina goi kom yau taiyao takaaiyaka.’


Bogina dine, asa madabokina ikamamaníwana go, amamaniwanayana ikaaiyaka ana kadókana lavilavi. Níyala ikamaamaníwana go, ana vabodaupa kaarekoina ikiiseyuwe. Ago Yeisu niyana gagaina goi iduduwo kana,
‘Tamagu, balomaigu nimam goi ayato!’
E moe ibobore ikavava, yawoina ikasalave. E tovayaviya adi tovakumgo igite kaga iisowóduwo, Yaubada ina togaga ana ikamooitamoe kana,
‘Moitamo. Amo korotoyana tutubeso nakae .’
Ago tutayana Yeisu ina kámasa ana toyokoyao madabokidi sigite kaga liliuna siisowóduwo, madi nuwomou goi kasikasidi situtu go, sikaluvilamna sina idi kasa. E Yeisu senao liliudi be nakae vevina boi Galili goi Yeisu sisabookuliye tupwana masigava siitaoya sigitegite kaga liliuna siisowóduwo.


Koroto tayamo yoina Iyosepa, Diyuu adi kotu ana tolovina tayamo go, koroto todedevina be tokibóbwata. Iyosepayana guma Arimateya, moe Diyuu idi kasa tayamo. Tauyana ina sowóduwo ilootutae. Moe tauyana kotu ana tolovinayao idi nuwonúwana be idi guinuwa Yeisu yaina geya ikamoitamoedita. Ame tauyana ina Pailato yaina goi ikawanoi idigo kana,
‘Manakae? Kutagona Yeisu wowona akabi avaliwoge gea geya?’
Tuwo moitamo itagona. Tuwo Iyosepayana ma senao sina kerose goi Yeisu wowona sikaisobuye go, areko sikabi, wowonayana siutube. Siutube ikavava, sinave goi sisiu siyato. Tukubuyana boi gurewa sitavi go, sinaena geya tayaamo tuta goi tokámasa siyato.
Ago moe ana katubayásina ana maliyalina go, níyala giyakainava bei isaliu, e Sabatiyana ivatowo. E vevinayadi boi Galili goi Yeisu sisabookuliye, sina Iyosepa ma senao sisabokuliyedi, e sigite manakaedi Yeisu wowona tukubuyana sinaena goi siyato. E sigite ikavava, sikaluvila idi kasa pauda mainina dedevina be pútuma dedevina sikatubayasidi Yeisu wowona manuna.
Ago Sabati goi siwaiwasi nakae Sabati ana lovina idige.

Listen to Luke 23