Hyolmo - WBT (NT) Non Drama

Hyolmo - WBT (NT) Drama

लाहला फरिसी दाङ सदुकीया़ डी़दी येशूदी छेता पेहच्‍ये म़ेदी येशूसाला ओहङदी मासीन, “का़हलेॱआङ राहङ किन्‍ज्‍यो ङो़लेराङ फेप नाङग्‍यो यिहन्‍सीमाना स्‍यिहङगामलेगी ताक्‍छेन च्‍यी़ तेन नाङदोङ।” यिहॱनाङ येशूगी खुङया़ला ल़ेहन क्‍याहप नाङसीन, “ङ्यिहमा डुप्‍च्‍ये पेहकेमु ख्‍याया़ नाम ङो़ले त़ेदी ‘नाम माहर्मु काहल्‍सीन, ता़ह नाहङबारनी ङ्यिहमा या़हबु ओहङगे’ म़ेदी माएँ। येहपाराङ ङाटुराङ नाम माहर्मु दाङ ना़-जुबे डोएँमु ‘तिहरीङनी नाम क्‍याहप्‍के’ म़ेदी माएँ। दि ल़ेहमु पेहती नामला त़ेदी ङ्यिहमा काहन्‍डुमु ओहङगे! म़ेदी ङोह स्‍य़ेएँ, यिहॱनाङ दि ती़हजीला बाप ओहङज्‍ये पेहक्‍योगी ता़स्‍यीया़ ख्‍याया़ ङोह मे़हस्‍येएँ। दाङ-तिहरीङगी दि मिहया़ काहजे ङ्येहम्‍बा दाङ छ्येउ-छ्येंमुवा दु। खुङया़ ओङ छ्यिम्‍बुगी ताक्‍छेनया़ ताज्‍ये छोल्‍गे। यिहॱनाङ खुङया़गी योनाकी ताक्‍छेनया़ म़ेदी लेहमेन च्‍यिॱआङ ताक्‍छेनया़ थोङ ङ्युहङज्‍ये म़ेह।” ओ़ह तिङले येशू खुङया़ला क्‍युर ज़्‍या़दी ओ़ह ग्‍या़लेगी फेप नाङसीन।


येशूगी स्‍याहप्‍च्‍यीया़ छो-क्‍याहम्‍जोगी फार्केन देपला लेप्‍केमु खुङया़गी खुरा ख्‍योङज्‍ये टेहम्‍बा च्‍येहसीन दु। ओहले येशूगी खुङया़ला सुङ नाङसीन, “जेम्‍बु पेहतोङ, ख्‍याया़ फरिसी दाङ सदुकीया़गी खमिर यिहन्‍ज्‍यु जेम्‍दे तेहतोङ!” ओहले स्‍याहप्‍च्‍यीया़गी “ओहराङगी खुरा माहख्‍योङबा सोङबे येशूगी दि ल़ेहमु सुङ नाङग्‍यो यिहम्‍बा,” म़ेदी राहङ नाहङदुङ ताम माज्‍ये छ़ूसीन। राहङगी स्‍याहप्‍च्‍यीया़गी दि ल़ेहमु पेहती ताम म़ेदी तेहक्‍यो सेन नाङदी येशूगी खुङया़ला सुङ नाङसीन, “ख्‍याया़गी यिह-छ्य़े काहजे फेमा? ख्‍याया़गी खुरा माहख्‍योङबा म़ेदी राहङ नाहङदुङ च्‍यिबे ताम म़ेदी तेहकें? ख्‍याया़गी तोहरोङॱआङ ङोह मा़हस्‍येबा? तोङरा ङा मिहया़ला खुरा ङागी साहज्‍ये तेर्केमु ख्‍याया़गी ल्‍हा़स्‍युलया़ काहजे डा़लो तुहक्‍यो येहकें? च्‍यि ख्‍याया़गी ओ़ह टेहम्‍बा च्‍येहक्‍यो? ओहले खुरा तिहनगी मिह तोङरा ज़्‍यिला साहज्‍ये तेर्केमु ख्‍याया़गी काहजे डा़लो ती़हबा? ओ़हदीॱआङ टेहम्‍बा च्‍येहक्‍यो? काहन्‍डुमु तोहरोङॱआङ ङोह मा़हस्‍येबा! ङाहगी ख्‍याया़गी खुरागी तेहन्‍दाला ताम माक्‍यो मिहम्‍बा। ङाहगीनी ख्‍याया़ला फरिसी दाङ सदुकीया़गी खमिरले गा जेम्‍बु पेहतोङ माक्‍यो यिहम्‍बा!” ओहले का स्‍याहप्‍च्‍यीया़गी ङोह स्‍येसीन, येशूगी खुराकी खमिरलेगी जेम्‍दे तेहतोङ म़ेदी सुङ नाङग्‍यो मिहम्‍बा दुबा, यिहॱनाङ येशूगीनी फरिसी दाङ सदुकीया़गी तेर्केन्‍गी लोप्‍च्‍युङलेगी गा जेम्‍दे तेहतोङ म़ेदी सुङ नाङग्‍यो दुबा।


येशू कैसरिया फिलिप्‍पीगी दे-खामला लेप नाङसीन। ओ़हला येशूगी राहङगी स्‍याहप्‍च्‍यीया़ला टी़ह नाङसीन, “मिहया़गी मिहगी स़ेबुला सु यिहम्‍बा म़ेदी माउ दुबा?” स्‍याहप्‍च्‍यीया़गी मासीन, “लाहला मिहया़गी राहङला बप्‍तिस्‍मा तेर्केन्‍गी यूहन्‍ना यिहन म़ेदी माउ दु, लाहला मिहया़गी एलिया यिहम्‍बा म़ेदी माउ दु, ओहले लाहला मिहया़गीदी यर्मिया लुहङतेम्‍बा क्‍यिनी लेहमेन सुज्‍यी लुहङतेम्‍बा यिहन्‍डो म़ेदी माउ दु।”
येशूगी सुङ नाङसीन, “ओहले ख्‍याया़गीदी ङाहला सु यिहम्‍बा म़ेदी माएँ ले?” सिमोन-पत्रुसगी ल़ेहन क्‍याहप्‍सीन, “राहङ सोम्‍बो किन्‍ज्‍योगी स़ेबु थार्पा नाङगेन्‍गी मास्‍यीका क्‍याहल्‍बु यिहम्‍बा।” येशूगी सुङ नाङसीन, “ए योनाकी पुह सिमोन, ख्‍ये काहजे सोनाम-साक्‍पु! दि केच्‍या ख्‍येगी स्‍या दाङ ठा़ लाहमले पेहती माक्‍यो मिहम्‍बा, दिनी स्‍यिहङगामला ज़्‍य़ू नाङगेन्‍गी ङाहगी किन्‍ज्‍यो याहपगीॱराङ ख्‍येला क्‍यी़ह ज्‍योर च्‍य़ू नाङग्‍यो यिहम्‍बा। ता़ह ङाह ख्‍येला माएँ, ख्‍ये पत्रुस यिहम्‍बा। ङाह राहङगी छेन्‍छोक दि तोह-पा़रा थो़ला ज़ोएँ ओहले ङ्याल्‍वागी कोहया़गी ओ़ह थो़ला क्‍याहल ख़ूज्‍ये म़ेह। स्‍यिहङगामकी क्‍याहल्‍सी खा फ़ेगेन्‍गी दिमीया़ ङाह ख्‍येगी लाहक्‍पाला तेर्कें। ख्‍येगी दि जाम्‍बुलीङला च्‍यि ताहम्‍ग्‍ये, ओ़ह स्‍यिहङगामलाॱआङ ताहम्‍ज्‍ये येह ओहले ख्‍येगी दि जाम्‍बुलीङला च्‍यि खा फ़ेगे, ओ़ह स्‍यिहङगामलाॱआङ खा फ़ेज्‍ये येह।” ओ़ह तिङले येशूगी, “ङाह थार्पा तेर्केन्‍गी मास्‍यीका यिहम्‍बा माएँ ताम सुलाॱआङ माहस्‍ये” म़ेदी स्‍याहप्‍च्‍यीया़ला का नाङसीन।


ओ़ह ती़हजी यिहन्‍ज्‍यु येशूगी राहङगी स्‍याहप्‍च्‍यीया़ला राहङगी खुर कोहकेन्‍गी तेहन्‍दाला थेका सिरेराङ सुङ नाङज्‍ये छ़ूसीन। येशूगी सुङ नाङसीन, “ङाहगी यरूशलेमला काहल्‍दी एल्‍डरया़, पूजाहारी छ्यिम्‍बुया़ दाङ छ्य़े-ठिमकी लोबेनया़लेगी तुहक्‍पु खुर कोहच्‍ये येह, ओहले तिङले स्‍यि कोहच्‍ये येह, यिहॱनाङ स्‍याहक्‍पु सुमलादी ङाह येहपाराङ स्‍यिक्‍योलेगी सोम्‍बो लाहङज्‍ये येह।”
दि थे़दी पत्रुसगी येशूला ग्‍या़ च्‍यी़ला ख्‍येर्ती मासीन, “किन्‍ज्‍योगी दि ल़ेहमु डो च्‍य़ू माहनाङच्‍यु। चो़वो छ्येवा! दि ल़ेहमुनी राहङला नाहमॱआङ माहयोहङज्‍यु।” येशूगी पत्रुस ङो़ले लो़हदी सुङ नाङसीन, “ए ती़ह गो-छ्येवा, ङाहगी दिनले थेन्‍दी सोङ। ख्‍ये ङाहगी लाहमला नार्तो क्‍याहप्‍केन तोह ज़्‍या़ज्‍ये छोल्‍गे! ख्‍येगी दि साम्‍लु किन्‍ज्‍योलेगी मिहम्‍बा, यिहॱनाङ मिह ङो़लेगी ओहङग्‍यो यिहम्‍बा।”


ओ़ह तिङले येशूगी राहङगी स्‍याहप्‍च्‍यीया़ला सुङ नाङसीन, “त़ेदोङ, का़हन्‍दीॱआङ ङाहगी स्‍याहप्‍च्‍यी डोज्‍ये सेम क्‍य़ेना खोगी राहङलाराङ टेहम्‍बा च्‍य़ेह कोहएँ ओहले राहङगी क्‍याहङस्‍यीङ खुर्ती ङाहला ताहदा क्‍याहप्‍च्‍यु। च्‍यिबेमाना राहङगी ज़ुबु सी़ज्‍ये छोल्‍गेन्‍दीगी ओ़ह तोर च्‍य़ूज्‍ये येह। यिहॱनाङ राहङगी ज़ुबु ङाहगी तेहन्‍दाला तोर च्‍य़ूगेन्‍दीगी ओ़ह ज्‍योर्च्‍ये येह। मिहगी जाम्‍बुलीङ थाम्‍ज्‍यी राहङ लाहक्‍पाला लेहन्‍दीॱआङ राहङगी मिहलीदी तोर च्‍यू़सीमानानी च्‍यि खेप्‍साङ ओहङज्‍ये ले? खोगी तोर च्‍युक्‍योगी मिहली येहपाराङ च्‍यि से़हगी लो़ तेर ख़ूज्‍ये ले? च्‍यिबेमाना मिहगी स़ेबु राहङगी याहपकी ज़िज्‍यिद नोम्‍दे स्‍यिहङगामकी स्‍याहप्‍च्‍यीया़ ङ्याम्‍बु फेप्‍नाङगेमु मिह थाम्‍ज्‍यीलाराङ राहङ-राहङगी पेहक्‍यो ल़ेहला ते़बे च्‍याहगा नाङज्‍ये येह। तेहम्‍बाराङ ङाह ख्‍याया़ला माएँ, मिहगी स़ेबु राहङगी क्‍याहल्‍सीला फेप्‍क्‍यो माहथोङ थु देला ङ्यिहन्‍गेया़ नाहङला काहजेनी स्‍यिज्‍येॱआङ म़ेह।”

Listen to मत्ती 16