बाह्रथो चेलनहे पठागिलक

(मत्ती १०:५-१५; मर्कू. ६:७-१३)

1तब् येशू बाह्रथो चेलनहे एक्के थेन बलैलाँ, और भूत्वनहे निकरना और सक्कु मेरके रोग और कमजोरीनहे चोख्वैना शक्ति और अधिकार ओइन्हे देलाँ। 2येशू ओइन्हे परमेश्वरके राजके प्रचार करे और बेमार मनैनहे चोख्वाई पठैलाँ। 3येशू ओइन्हे कलाँ, “तुहुरिन्के यात्रामे अपन संग कुछु ना लेहो; ना लट्ठी, ना झोला, ना रोटी, ना पैँसा, ना दुईथो झुलुवा रही। 4जोन घरेम तुहुरे जैबो वहैँ बैठ्हो, और वहैँसे विदा हुइहो। 5जहाँ मनै तुहुरिन्के स्वागत करना या तुहुरिन्के बात सुन्नासे अस्वीकार करहीँ कलेसे वहाँसे निक्रेबेर तुहुरे अपन गोरामेसे धुर फेन झरादेहो। असिक करना कलक उ नगरके मनैनहे परमेश्वर सजाय दिहीँ कना जनाइत।” 6तब् ओइने वहाँसे विदा हुइलाँ और खुशीक खबर प्रचार कर्ती और सक्कु ठाउँ बेमार मनैनहे चोख्वैती गाउँ-गाउँ गैलाँ।

हेरोदके घब्रैना

7यी सक्कु घटनक बारेमे सुनके शासक हेरोद रज्वा दोधारमे परगिल। काकरेकी यूहन्ना मुके फेनदोस्रे जित्ती होगिल बा कहिके केऊ-केऊ कहिँत। 8और केऊ कहिँत, “एलिया देखा परल बा,” और औरेजाने कहिँत, “परमेश्वरके पहिलेक अगमवक्तनमेसे एक जाने उठल बा।” 9तब् हेरोद कहल, “यूहन्नक मुन्टा मै काटे लगाइल रहुँ, पर यी के हो जेकर बारेमे मै असिन बात सुनतुँ?” तब् ऊ हुँकिन्हे भेँटा करना इच्छा करल।

येशू पाँच हजार जहनहे खवैलाँ

(मत्ती १४:१३-२१; मर्कू. ६:३०-४४; यूह. ६:५-१३)

10तब् निउतरह्यन घुमके आके अपन कर्लक सक्कु काम हुँकिन्हे बतैलाँ। ऊ ओइन्हे अपन संग लेके बेथसेदा कना गाउँमे अल्गे गैलाँ। 11पर यी पता पाके मनैनके भीड़ हुँकार पाछे लागगिलिन। ऊ ओइन्हे स्वागत करलाँ और परमेश्वरके राजके बारेमे सुनैलाँ। और जिही-जिही मजा हुइना जरुरी रहिन, ओइन्हे ऊ मजा करलाँ। 12आब उ दिन संझक हुँकार बाह्रथो चेलनके हुँकार थेन आके कलाँ, “मनैनहे फिर्ता पठादी ताकि ओइने आँजरपाँजरके बजार और गाउँमे जाँइत। और अपन खैनक लग और बैठक लग बन्दोबस्त करे सेकिँत। काकरेकी यहाँ हम्रे सुनसान ठाउँमे बती।” 13पर येशू ओइन्हे कलाँ, “तुहुरेहे यनहे खाई देऊ।” तब् ओइने कलाँ, “हमार थेन ते पाँचथो रोटी और दुईथो मच्छी किल बताँ, नै हुई कलेसे हम्रे जाके यी सक्कु मनैनके लग खाना किने परी।” 14ओइने लगभग पाँच हजार जाने सम् थारु मनै रहिँत। तब् येशू अपन चेलनहे कलाँ, “ओइन्हे पचास-पचास जहनके पहाँटमे बैठाऊ।” 15ओइने ओस्तेहेँक करलाँ और सक्कुहुनहे बैठैलाँ। 16तब् येशू उ पाँचथो रोटी और दुईथो मच्छी लेलाँ, उप्पर स्वर्ग ओहोँर हेरलाँ और परमेश्वरहे धन्यवाद देलाँ। ऊ रोटीहे खन्टैलाँ और मनैनहे बाँटक लग चेलनहे देलाँ। 17तब् सक्कु जाने जतरा मन रहिन ओत्रा सक्कु जाने खैलाँ और अघागिलाँ। जब सक्कु जाने खाना खाके सेक्लाँ, और खन्टैलक उब्रल रोटी और मच्छी चेलनके जमा करलाँ ते उ बाह्र छिट्वा रहे।

पत्रुसके स्वीकार

(मत्ती १६:१३-१९; मर्कू. ८:२७-२९)

18एकचो येशू एक्केली प्राथना करतिहिँत, चेलनके हुँकार संग रहिँत और येशू ओइन्हे पुँछ्लाँ, “मनै मोरिक बारेम का कथाँ कि मै के हुइतुँ?” 19ओइने कलाँ, “कौनो मनै यी सोँच्थाँ कि अप्नि यूहन्ना हुइती, जे मनैनहे डुब्कि देहत। कौनो मनै सोँच्थाँ कि अप्नि परमेश्वरके अगमवक्ता एलिया हुइती। कौनो मनै अप्निहे सोँच्थाँ कि परमेश्वरके दोसुर भविष्यवक्तामेसे पहिलेक कौनो एक जाने फेनदोस्रे उठल बताँ।” 20ऊ ओइन्हे कलाँ, “पर तुहुरे का कथो? मै के हुइतुँ?” तब् पत्रुस जवाफ देहल, “परमेश्वरके ओहोँरसे पठागिलक ख्रीष्ट!” 21तब् येशू ओइन्हे आज्ञा देलाँ, और संगे चेतावनी फेन देलाँ कि यी बात ओइने किहु ना कहिँत।

येशूक अपन मृत्युक भविष्यवाणी

22तब् येशू कलाँ, “मै, मनैयक छावाहे गजब दु:ख उठाई परी। और मै यहूदी दलके नेतन, यहूदी मुख्य पुजारीन और यहूदी कानुनके गुरुनसे बहिष्कृत होजिम, मुवाजिम और तेसर दिन मुअलमेसे जित्ती होके उठ्जिम।”

येशूक पाछे लग्नाके मतलब

23तब् ऊ सक्कु जहनहे कलाँ, “यदि तुहुरे मोरिक संग आई चहथो कलेसे, तुहुरिन्हे अपनहे अप्निहीँ अस्वीकार करे परी। तुहुरिन्हे मोरिक लग रोट्दिन दुःख सहे परी। यहाँसम कि मुअक लग फेन तयार हुई परी। तब् तुहुरे मोरिक चेला बनक लग मोरिक संग आई सेक्बो। 24काकरेकी जे अपन ज्यान बँचाई, उ उहिहे गुमादारी, और अपन ज्यान मोरिक लग गुमुइया उहिहे बँचाली। 25काकरेकी यदि कौनो मनैया संसारके सक्कु चिज भेटाके धनी बन्जाई। पर ऊ परमेश्वरके संग सदाकालके जीवनके मौका गुमा देहल कलेसे उहिहे का फाइदा हुइहिस? कुछु फेन नै। 26यदि तुहुरे महिन्हे प्रभु मन्नासे अस्वीकार करबो और मोरिक शिक्षा यकर लग पालन नै करबो। काकरेकी तुहुरिन्हे डर बा कि यी जबानक पापी और व्यभिचारी मनै तुहुरिन्के मजाक उरैहीँ। तब् मै, मनैयक छावा फेन तुहुरिन्हे अस्वीकार करम कि तुहुरे मोरिक चेला हुइतो। जब मै अपन महिमा, बाबा परमेश्वरके महिमा और पवित्र स्वर्गदूतनके महिमक संग अइम। 27पर जात्तिके, मै तुहुरिन्हे कहतुँ, तुहुरिन्मेसे बहुत्ते जाने जेने यहाँ ठरह्याइल बताँ। ओइने परमेश्वरके राजहे अपन मुनासे आघे शक्तिक संग आइत देख्हीँ।”

येशूक रुप बद्लना

(मत्ती १७:१-८; मर्कू. ९:२-८)

28यी बातके लगभग आठ दिन पाछे पत्रुस, यूहन्ना और याकूबहे अपन संग लैजाके प्राथना करक लग ऊ पहाड़मे चहुँरलाँ। 29जब ऊ प्राथना करतिहिँत, तब हुँकार मुहारके रुप बदलगिलिन, और हुँकार लुग्गा बिज्ली चम्कल हस चहकार होगिलिन। 30और हुँकिन्से दुईथो मनै बात बत्वाइतिहिँत, ओइने मोशा और एलिया रहिँत। 31ओइने महिमित रुपमे देखा परके येशूक मृत्युक बारेमे बात बत्वाइतिहिँत। यी बात येशूहे यरुशलेम शहरमे पूरा करे परना रहिन। 32आब पत्रुस और ओकर संग रहुइयन निदे लेके लट्ठ परल रहिँत। पर जग्लाँ ते ओइने येशूक महिमा और हुँकार संग ठरह्याइल उ दुईथो मनैनहे देख्लाँ। 33तब् उ दुईथो मनै हुँकार थेनसे विदा होके जाइबेर पत्रुस येशूहे कहल, “गुरुजी, हम्रिहिन यहैँ बैठ्ना मजा ठहरल। हम्रे तीनथो बैठ्ना तम्बू बनाई, एकथो अप्निक लग, एकथो मोशक लग और एकथो एलियक लग।” अपन बोल्लक बातके उहिहे ख्याले नै रहिस। 34ऊ यी बात बत्वैती-बत्वैती एकथो बद्री आके ओइन्हे छोप देहल। और जब ओइने बद्रीमे पैँठतिहिँत, तब ओइने डरागिलाँ। 35तब् बद्रीमेसे असिक एकथो आवाज निक्रल, “यी मोरिक छावा हो, जिहिहे मै छानल बतुँ। यकर बात सुनो।” 36यी आवाज रुकके सेकल ते येशू वहाँ एक्केली होगिलाँ। ओइने चुपचाप रलाँ, और ओइने अपन देखल बात उ दिन किहु नै कलाँ।

भूत्वा लागल लौँदा

(मत्ती १७:१४-१८; मर्कू. ९:१४-२७)

37दोसुर दिन जब येशू और उ चेलनके पहाड़मेसे उतरलाँ, तब एकथो बरवार भीड़ येशूहे भेँटा करे आइल। 38भीड़मेसे एकथो मनैया जोरसे चिल्लाके कहल, “गुरुजी, मै अप्निसे बिन्ती करतुँ, मोरिक छावकमे दया-दृष्टि करदी। काकरेकी उ मोरिक एक्केथो छावा हो। 39हेरी, एकथो भूत्वा उहिहे पक्रत, और उ एकफाले चिल्लाइत और उहिहे ऐँठाइत, तब ऊ फेँज्कुर निकारे दँतजाइत। और उहिहे चिँथचाथ पारके बरबत्ति छोरत। 40मै अप्निक चेलनसे लगातार बिन्ती कर्नु, पर ओइने उ भूत्वाहे निकारे नै सेक्लाँ।” 41तब् येशू जवाफ देलाँ, “ए अविश्वासी और हठी पुस्ता, मै कबसम तुहुरिन्के संग रहम, और तुहुरिन्हे कबसम सहुँ? तोहाँर छावाहे यहाँ नानो।” 42पर ऊ अइति-अइति भूत्वा उहिहे पटक देहल, और ऐँठे लागल। पर येशू उ भूत्वाहे हप्कैलाँ, और उ लौँदाहे चोख्वाके ओकर बाबाहे दैदेलाँ।

अपन मृत्युक बारेम फेनदोस्रे बत्वैलक

43परमेश्वरके महानता देख्के सक्कु जहनहे अचम्म लग्लिन। येशूक कर्लक सक्कु कामसे सक्कु जहनहे अचम्म परल देख्के, येशू अपन चेलनहे कलाँ, 44“यी बात तुहुरिन्के कानमे पलिरहे, काकरेकी मै, मनैयक छावा मनैनके हाँथेम पक्राऊ परे लागल बतुँ।” 45पर ओइने यी बात बुझे नै सेक्लाँ। काकरेकी यी ओइने ना बुझिँत कहिके ओइन्से नुकाके धारगिल रहे। ओइने यी बारेमे हुँकिन्से पुँछ्ना डराइँत।

भारी के हो?

(मत्ती १८:१-५; मर्कू. ९:३३-४०)

46वहे समयमे ओइन्मेसे भारी के हो कना बारेमे आपसमे बहस चले लग्लिन। 47पर येशू ओइन्के मनके विचार जानके एकथो लौँदाहे लेके अपन थेन धारलेलाँ। 48और ओइन्हे कलाँ, “जे मोरिक नाउँमे यी लौँदाहे स्वीकार करत, उ महिन्हे स्वीकार करत। और जे महिन्हे स्वीकार करत, उ महिन्हे पठुइयाहे स्वीकार करत। काकरेकी तुहुरे सक्कुजहनमेसे जे सक्कुहुनसे छुटी बा, वहे भारी रहत।”

जे हमार विरोधमे नै हो उ हमार ओहोँर बा

49तब् यूहन्ना कहल, “गुरुजी, एक जहनहे हम्रे अप्निक नाउँमे भूत्वनहे निकारत देख्ली, और हम्रे उहिहे मनाही करदेली। काकरेकी उ हमार संग अप्निक अनुशरण नै करत।” 50पर येशू ओइन्हे कलाँ, “उहिहे मनाही ना करो। काकरेकी जे तोहाँर विरोधमे नै हो, उ तोहाँर पक्षमे रहत।”

सामरीनसे विरोध

51येशूक स्वर्ग जैना दिन लग्गे आइतिहिन, तब् ऊ यरुशलेम शहर ओहोँर जैना विचार करलाँ। 52तब् येशू हुलाकीनहे आघे पठैलाँ। ओइने गैलाँ और हुँकार लग सक्कु चिज तयार पारक लग सामरीनके एकथो गाउँमे गैलाँ। 53पर यरुशलेम ओहोँर जैना हुँकार बल्गर विचार पता पाके ओइने हुँकिन्हे स्वागत नै करलाँ। 54तब् यी देख्के येशूक चेलनके याकूब और यूहन्ना हुँकिन्हे कलाँ, “प्रभुजी, का अप्नि चहथी कि स्वर्गमेसे आगी बरसके यनहे भसम पारदेहे कहिके हम्रे आज्ञा करी?” 55पर घुमके येशू ओइन्हे हप्कैलाँ, और कलाँ, “तुहुरे नै जन्थो कि तुहुरे कसिन आत्मक हुइतो। 56काकरेकी मै मनैयक छावा मनैनके प्राणहे नाश करक लग नै आइल हुइतुँ, पर बँचाई आइल बतुँ।” तब् येशू और हुँकार चेलनके औरे गाउँ ओहोँर चलगिलाँ।

विश्वासीनके चुकैना मूल्य

(मत्ती ८:१९-२२)

57येशू और हुँकार चेलनके डगरमे जाइबेर, एकथो मनैया हुँकिन्हे कहल, “हे प्रभु, अप्नि जेहोँर जैबी, मै अप्निक पाछे लागम।” 58तब् येशू उहिहे कलाँ, “गिदारिनके रना दोँदर और आकाशके चिरैँचुरुंगीनके रहक लग ठाँट रथिन। पर मै, मनैयक छावक लग ते एकथो अपन घर फेन नै हो, जहाँ मै सुते सेकुँ।” 59येशू दोसुरहे कलाँ, “मोरिक पाछे लागो।” पर ऊ कहल, “पहिले महिन्हे घरे फिर्ता जाईदेऊ। जब मोरिक बाबा मुई, तब मै उहिहे दफ्नैम और आके मै अप्निक चेला बनम।” 60येशू उहिहे कलाँ, “जोन मनै मुअल मनैनके हस बताँ, ओइनेहेँ अपन मनैनके मुना असरा हेरिँत। पर तुँ जाके परमेश्वरके राजके खुशीक खबर प्रचार करो।” 61औरे फेन कहल, “प्रभु, मै अप्निक पाछे लागम, पर आघे अपन घरेम रहुइयन्से महिन्हे विदा लेहे देऊ।” 62पर येशू उहिहे कलाँ, “अपन हाँथ हरमे धारके पाछे हेरुइया केऊ फेन परमेश्वरके राजके योग्यक नै हुई।”

Listen to लूका 9