If you have would like a copy of this version please contact info@davaraudiobibles.org

Inner Seraji New Testament, CC-BY-SA-4.0, The Love Fellowship (Text). Inner Seraji New Testament Audio Bible, CC-BY-SA-4.0, Davar Partners International, The Love Fellowship, 2022 (Audio).

Inner Seraji New Testament

Inner Seraji 2017 BI (NT) NonDrama

Inner Seraji 2017 BI (NT) Drama

Inner Seraji (ईनर सराजी) Bible by The Love Fellowship is licensed under Creative Commons Attribution-ShareAlike 4.0 License.

सच्ची दाखा री डाल़ी हाऊँ साहा, होर मेरअ बापू किसान साहा। जोह डाली महा में साहा होर नांई फलदी, तेसा सह काटा; होर जोह फला, तेसा सह छांटा कि होर फलए। तमे तअ तेऊ बचना रे कारण जोह मांई तमाबे बोलू, शुद्ध हो। तमे महा में बणी रहा, होर हाऊं तमामें। हरी डाली दाखलता में बणी ना रहे तेबा नांई फल़ी सकती, तेहडे ही तमे भी अगर महा में बणी नांई रहले तेबा तमे फल़ी नांई सकते। हाऊं दाखलता साहा तमे डाली साहा। जोह महा में बणी रहन्दा होर हाऊं तेता में, बहू फल़ फलाऊंदा, किबेकी महा का अलग होई करे तमे किछे नांई करी सकते। अगर कोई महा में बणी ना रहे, तेबा तेऊ डाली रे बराबर शोटी दिंदा, होर शुका; होर लोका त्या बटोरी करे आगि में ज़ाला, होर सह जला। अगर तमे महा में बणी रहले मेरअ वचन तमामें बणी रहे, तेबा जोह चाहा मांगा होर सह तमाबे हूँणा। मेरे बापू री महिमा ऐसी हुँदा कि तमे बहू जैह फलाआ, तेबा ही तमे मेरे चेले हूँणे। हेरा बापू मांई संघे प्रेम डाहू, तेडा ही मांई तमे संघे डाहु; मेरे प्रेमा में बणी रहा। अगर तमे मेरी आज्ञा मानले, तेबा मेरे प्रेमा में बणी रहंणे; हेरा कि मांई आपणे बापू री आज्ञा मनी, होर तेऊरे प्रेमा में बणी रहंदा। मांई या गला ऐतकी तणी बोली, कि मेरी खुशी तमामें बणी रहे, होर थारी खुशी पूरी होए।
मेरी आज्ञा यह साहा, कि हेरा माँई तमे संघे प्रेम डाहु, तेहडा तमे भी एकु दूजे संघे डाहा। ऐताका बडा प्रेम कासी रा नांई आँधा कि कोई आपणे दोस्ता बे आपणे प्राण दे। जोह आज्ञा हाऊं तमाबे दिंदा, अगर तेसा मने तेबा तमे मेरे मित्र साहा। ऐबरा का तमाबे नोकर नांई बोलणा, किबेकी नोकर ज़ाणदा कि तेऊरअ मालका कैह करा; पर मांई तमाबे मित्र बोलू, किबेकि मांई जोह आपणे बापू का गला शूणी, त्या सभे तमाबे खोजी। तमे हाऊं नांई चुनु पर मांई तमे चुनिदे होर तमे नियुक्त करीदे कि तमे नाहीं करे फल़ आंणा होर थारअ फल़ बणी रहे, कि तमे मेरे ना का बापू का माँगले, सह तमाबे दे। त्याह गला री आज्ञा तमा बे ऐतकी तणी दिंदा कि तमे एकु दूजे संघे प्रेम डाहा।

अगर संसार तमा संघे बइर डाहंदा, तेबा तमे जाणा कि तेऊ तमा का पहिले मांई संघे बइर डाहु। अगर तमे संसारा रे हुंदे, तेबा संसारा तमा संघे प्रेम डाहंदअ; पर ऐतकी तणी कि तमे संसारा रे नांई, पर माँई तमे संसारा मेज़ा का चुनी दे आसा, ऐतकी तणी संसार तमे संघे बइर डाहंदा। जोह गला मांई तमाबे बोली, नोकर आपणे मालका का बढ़अ नाँई हुँदअ, तेऊ याद डाहा। अगर त्याहे हाऊं सताऊ, तेबा तमे भी सताऊणे; अगर त्याहा मेरी गल मनी, तेबा थारी भी मनणी। पर यह सब कुछ मेरे ना री बजा का तमे संघे करणा, किबेकी त्याह मेरे भेज़णे आले नांई ज़ाणदे। अगर हाऊं ईंधअ होर त्याह संघे गला करदअ, तेबा त्याह पापी हुंदे; पर ऐबा त्या-त्यारे पापा बे किछे बहाना नाँई आंधा। जोह मांई संघे बइर डाहंदा, सह मेरे बापू संघे भी बइर डाहंदा। अगर हाऊं त्यामें काम नांई करदअ जोह होरी कोही करी, तेबा त्याह पापी हुंदे; पर ऐबा ता त्याह हाऊं होर मेरअ बापू दुहे हेरी होर दुही संघे बइर करू। यह ऐतकी तणी होऊ कि बचन पूरा हो, जोह त्यारी व्यवस्था में लिखूदा, त्या हा मांई संघे थोगे बइर करू। पर जेबा सह साहायक ईलअ, जासु हाऊं बापू री तरफा का तमा सेटा भेज़लअ, मतलब सचाई री आत्मा जोह बापू री तरफा का निखला, तेबा तेऊ मेरी गुआही दींणी; होर तमे भी मेरे गुआही साहा किबेकी तमे मांई संघे पहिले का साहा।

Listen to यूहन्ना 15