Medumba  - 1993 - BSCAM (NT) Drama

Yésu tsiaṅ tse ntshob bàa gham, mfà neta mba ngù' netô njoṅ ywètkebwô fa bo, mba neyate ngokèt; ntum yub ndù bo nèn ntshob nufen Nsi, mbèn nke njate ngokèt. Yésu tshob bo ndù: Kà bin lo' sàm ju num katte, ke kôg, ke bàm, ke bàn, ke nkàb lo; a ke' bwô ta' mèn lo' nzwe bàa. Ngelaṅ bin tsho mba ntùm zit ndà lo là, bin tswe bwe tà nkum ngelaṅ ze bin nèn nà. Ben tse bo gha nelo' zin nà, bin tum ntùm ngô yube, mbé'te mbab num nku mine; a nsi be ju nekwé nta num bo. Ghazi'te nu i nèn, nzin ntùm ngôngô, nke nsoṅ nkùn mebwô, mbèn nke njate ngokèt njoṅ dù' fa.


Là mfen Hèrodé ju' njoṅ nu fa ts'a tshùa là, ke bèn ndèn ju z'a bwô a kwate là, nummbe tsemo' benntùn lo ke ntshob ndù: Yohané bam num vù. Tsemo' bèn ntshob ndù: Elia ṅwage, tsemo' bèn ntshob ndù: Mo' mèn netèt ghatshob ntshob Nsi tse mbwe bèn mbam num vù. Là Hèrodé tshob ndù: Me lo ghù bo keb tu Yohané. A kua' we ze me tshwèt nju' bo ntshob tshen nu li num i à? Ndùlala a nke ndiag neyen i.


Ngelaṅ ghantum bèn njam nà, bo soṅ Yésu njoṅ tshu fa tse bo ghù là. A lo' yub bo à bo tum nèn nze mbaṅ ngô ze lén se be Bètsaida là. Là bwoṅ benntùn be lèn dù' z'a be là, ntam njam i. A lo' yub kua' mebwô, ntshob nu bo mfà num nufen Nsi, mbèn njate ben tse bo na' nkô a yate yub là.
Njù be to' nesène, tse ntshob bàa gham kù'te nse' mbaṅ i, ntshob yi ndù: Lé'te bwoṅ benntùn ndù bo nèn ntùm ngô mba ntùm ntaṅla' mi a ghebte là, nzi bwe, mbèn njen ju ze bo jù là. Be b'a num kônkwa nsen ni. Là Yésu tshob bo ndù: A bin bèn fà ju ze bo jù là bo. Bo tshob yi ndù: Bag ghù nda' ntu' bàn ntàn bo ngontse ndô bàa. A be ndùlala mba bag a' nèn yag tu njun jujù kà nkém yen njoṅ benntùn ni fa yi. Benntùn lo be bwe nguan ntsha' tàn, Yésu tshob ghazi'te nu i ndù: Bin ghù bo tswe nsi nka, ta' nka ke ngù ben ṅam ntàn. Bo ju' ntshu, ngù njoṅ yub fa tswe nsi. Yésu lo' ntu' bàn ntàn mba ngontse ndô bàa, mbù' miag mi mfe kamànyam, nde'te Nsi, mbe'te, mbèn mfà ghazi'te nu i ndù bo ghabte bwoṅ benntùn. Njoṅ yub fa jù njwèle. Bo lo' mbe'te mi mi a tù' là nkag ntshob bàa gham.


A be num mo' lé'njù Yésu nke nde'te Nsi tù' i, ghazi'te nu i tse'te mbaṅ i: A bètte yub ndù: Bwoṅ benntùn num nke ntshob ndù me b'a we? Bo bùnte ntshob ndù: Yohané nganyu' benntùn ntse, tsemo' tshob ndù Elia, tsemo' bèn ntshob ndù: Mo' mèn netèt ghatshob ntshob Nsi tse mbwe bèn mbam num vù.
A tshob bo ndù: Là bin num ntshob zin ndù me b'a we? Pétro bùnte ntshob ndù: O b'a Kristô z'a fe Nsi là. Yésu tshobte yube, ntshob ndù kà bo soṅ yen nu là sàm mèn mba ntshù'. Ntshob ndù: A bwô ndù Mén mèn yen nge' yàme, ghakwé mbwe, ghale'te Nsi tse ndùbndùb mba ghalèn ṅwa'ni Nsi ghua' i, nzwi i; a be mbatte lé'njù tat, a lo num vù.
A lo ke ntshob njoṅ benntùn fa ndù: A be ze mèn kô nezin num yàm manze là, a gha tu wul i, nket ze fanta'tù njoṅ lé'njù fa, mbèn ntam njam àm. Nummbe mèn z'a kô nelem yôg se là, mb'a neghua' i, là mèn z'a ghua' yôg se num tu àm nà, mba yen mèn nà ke nelem yôg se. Nummbe a be ze mèn ghù njoṅ ngô njù li fa, njôg mbagte tu wul i, mbi yôg se là, mb'a' ywimt'é ke? Nummbe mèn z'a nsi ko tuswe num àm mba num ntshob màm nà, mba mba Mén mèn nsi ko ze tuswe num i ngelaṅ z'a nsi se' ntùm nkuni mi mba mi Tà mba mi ba Angél nelàn nà. Me tshob bin kua' nenùn ndù: Tsemo' benntùn netèt tse bo be nsen ni là ke nsi kwù tà nkum ngelaṅ bo yen nufen Nsi là.


Yen tshô li lo be tôg nguan lé'njù fome, Yésu lo' Pétro, Yohané mba Yakobo, nko' nèn num mbat num nele'te Nsi. Ngelaṅ a ke nde'te Nsi là, se i kaṅ, nzwe tse kaṅ, nke ṅwa' neṅwa'ni. Tshù, Yésu nke ntshobte boa ben bàa; tshen nà na' mb'a Mosé bo Elia; tse bo na' ṅwag ntùm nekuni, nke ntshob nu mfà num nu nenèn z'a nsi bumte num Yésu mà Yérusalém nà. Mo' miaglo kebwô tshùb Pétro boa shun tse, là ngelaṅ bo lo num miaglo là, bo yen nkuni Yésu mba benntùn bàa tse bo à bo be là. Ngelaṅ tshen ben ni ke mfagte boa Yésu là, Pétro tshob yi ndù: Tà, a lo mbwô ndù be ghô nsen ni; be kut ntàb tat, mo' be yu, mo' be ze Mosé, mo' bèn mbe ze Elia. A ke lèn ju z'a tshwèt ntshob là.
Mb'a ke ntshob tshen nu là là, mo' ndot se' ndam yub mbume. Ghazi'te nu Yésu bwôg neshu ngelaṅ tshen ben nà ke ntsho ntùm ndot là; ntùm ndot nze mèn tshob ndù: Yen mèn ni b'a Mén àm ze me tsho' i là, bin ke nju' i. Ngelaṅ yen nze là ke nke' ntshob là, Yésu tù' b'a tù' i. Ghazi'te nu i mi ntswe, ke soṅ sàm mèn ntùm tshen lé'njù là, sàm nu netèt tshu tse bo yen nà.


Njù be làne, bo swe' num mbat là, mo' mà bwoṅ benntùn se' mbwe i. Tshù, mo' mèn netèt bwoṅ benntùn kua' neta ntshob ndù: Ngatswite, me le't'o, bù' miag mu ndôte mén àm, nummbe a b'a nda' mén ntshù' ze me ghù là. Mo' ywèt num ntshùb i, a kua' neta, ywèt là nyi't'é, ma' i nsi, ngù nendù nke ntum ntshu i, mbe't'é kà njôg ntum num i. Me lo nde'te mba ghazi'te nu o ndù bo ta' i, là bo ke ku'ni. Yésu bùnte ntshob ndù: Zwiaṅ ba ke ghù bamntù mba ben neṅu'te, me nsi tswe bag à bin, fènte zin tà kum ngelaṅ ndùke? Lo' mén o nse' yi nsen ni. Ngelaṅ a ke nkù'te mbaṅ Yésu là, ywètkebwô nyi't'é neta, ma' i nsi num tsha'a. Yésu tshobte ywètkebwô, mbèn njate mén nà, mfà i tàab.


Njoṅ benntùn fa tshàm, mfà num ze neghu' Nsi. Mba njoṅ benntùn fa ke nyàmte njoṅ tshu fa Yésu ke ngù là, a tshob ghazi'te nu i ndù: Mba bin nà, bin ju' men ntshob li kua' mebwô, njab ntù bin: Bo nsi fà Mén mèn mum mbu benntùn. Là bo ke ju' men ntshob là; men ntshob là lem ndù kà bo tshùb; bo bwôg nebètt'é nu mfà num men ntshob là.


Bo to' nesoṅte netèt bo nelèn mèn z'a be mèn ndùb netèt bo là. Là Yésu lèn nkwatenu mi a be ntù bo là, ndo' metsit ménfi, nte mbaṅ i, ntshob bo ndù: Mèn z'a nsi lo' yen metsit ménfi li num lén sàm nà, mba ng'é lo' à me. Mèn z'a nsi lo' àm nà, mb'a ke ndo' à mèn z'a na' ntum àm nà. Metsit mèn z'a be netèt njoṅ zin fa là bèn mbe mèn ndùb.
Yohané bùnte ntshob ndù: Tà, bag lo yen mo' mèn, a nke nta' ba ywètkebwô num lén su; bag tshèl i, nummbe bag à bo ke bèn mbe njam o. Yésu tshob yi ndù: Kà bin tshèl i, nummbe mèn z'a ke' b'a ngakeban zin nà b'a zin mèn.

Mba ngelaṅ neko' nèn kamànyam ke ngebte Yésu là, tu wul i yen ndù a bwô a nèn Yérusalém. A tum ghantum mbwe i, bo tam manze, nzin ntsho ntùm mo' ngô ba Samaria num nenabte dù' nezi bwe. Là ba Samaria ke kô nelo' Yésu, nummbe a lo ke nèn à nze Yérusalém. Ghazi'te nu Yésu, Yakobo mba Yohané be yen ndùlala, ntshob ndù: Tshùaben, o bam ndù bag tshob mbwôg swe' mfe kamànyam, nkù yub ké? Là, a kaṅ wul i njam ntshobte yube, ntshob ndù: Bin ke' lèn lèn ywèt ts'a tshwèt ntshagte zin nà. Nummbe Mén mèn lo se'e, ke b'a ndù a ghù ntù benntùn bi, là ndù a yôg yube. Bo bèn nèn ntùm mo' ngô ghua.


Ngelaṅ bo be num manze là, mo' mèn tshob Yésu ndù: M'a' ke mbwe o ntùm njoṅ dù' fa ts'o nsi ke nèn nà. Yésu tshob yi ndù: Ba mbàbndun ghù ntô mube, bon nsaṅ bèn ngù nkàn tshobe, là Mén mèn ke' ghù dù' neyab tu i bwe mfite.
Yésu tshob mo' ndù: Tam njam àm. Yen ni tshob ndù: Bam me ndù me bwôgmbwe nèn ntshoṅ tàa. A tshob yi ndù: Faṅ fe ben tshoṅ tshob fe ben; là tu wul o, nèn ntshob yu à nufen Nsi.
Mo' mèn bèn ntshob ze yi ndù: M'a tam njam o, Tshùaben, bam me nèn ndé'te ben tse bo be ndà àm nà. Là Yésu tshob yi ndù: Mèn z'a yab bu i num nkebsofa', mbèn ndôte mànjam nà ke' ku'ni ntùm nufen Nsi.

Listen to Lukas 9