If you would like a copy of this version please contact info@davaraudiobibles.org

Sirmouri New Testament, CC-BY-SA-4.0, The Love Fellowship. Sirmouri New Testament Audio Bible, CC-BY-SA-4.0, Davar Partners International, The Love Fellowship, 2022.

Sirmouri New Testament

Sirmauri New Testament (सिरमौरी नौवाँ नियम), 2016 by The Love Fellowship is licensed under a Creative Commons Attribution-ShareAlike 4.0 International License.

जोबै यीशुए आपणै बारौ चैलै खै उपदैश दैय पाए, तौ सै तिनकै नोगरो दा शिक्षा औरौ प्रचार कौरणौ खै तिथैदा हौटै गौआ। यूहन्ना बपतिस्मा दाताए ज़ेलो दा मसीह कै कामौ का समाचार शोणेयो आपणै चैलै खै तैसी कैईंदै ऐजौ पूछणो खै भैजै। “का तू ही सैजा मसीह औसौ, जैसी छाड़णौ का वादा पौरमेशवरे कौरे राए थिया या आमै कोसी ओकी कै ठोल़नाए कौरु?” यीशुए जोवाब दिया कै, “जू किछै तुऐं शुणौ औरौ दैखौए, सैजौ सौबै जाएयो यूहन्ना कैई बौताए दौ। की आन्धै दैखौए औरौ लोंगड़े हांडदै फिरदै लागै रौवै, औरौ कोढ़ी ठीक हौए गौवै, औरौ जायरै शुणदै लागै रौवै, औरौ मुर्दै जियुंदी हौए गौवै, औरौ गरीबो खै सुसमाचार शुणाए जांव। औरौ धन्‍य औसौ सैजै जू मुं पांदी बिशवाश कौरणा ना छोड़ो।”

जोबै यूहन्ना बपतिस्मा दाता कै चैलै तिथैदै हौटै गौवै, तोबै यीशु यूहन्ना कै बारै मुंजी लोगौ खै बौलदा लागा, “तुऐं शुनशान जौगैह पुंडे का दैखदै हौटै रौवै थिए? का हवा लैई हिजौल़दै डैंगै खै? तोबै तुऐं का दैखदै हौटै रौवै थिए? जैणै मौंगै खोटणो बाम्बै राए थिए? ना, मौंगै खोटणो बाम्बणौ वाल़ै तौ राजमहलो दै रौंव? तौ किथुखै हौटै रौवै थिए? का कोसी पौरमेशवर कै बातौ बौताणौवाल़ै खै दैखदै हौटै रौवै थिए? हौर, हांव तुऔं खै बुलू, ऐजा सैजा औसौ जू पौरमेशवर कै बातौ बौताणौवाल़ै दा बै बौड़ा औसौ। यूहन्ना बपतिस्मा दाता सैजाई औसौ, जैसकै बारै मुंजी पवित्र शास्त्र दो लैखै राए कै,
‘दैख हांव आपणै सौंदेश दैणौवाल़ै कै तैरै औगौड़ियौ भैजु,
ताकि सै लोगौ कै बौताए सौकौ कै सै तैरै आणौ कारिए आपी खै तैयार कौरौ।’
हांव तुऔं खै साचौ बुलू, कै जू बैटमाणिशौ पौरैशै जन्मे रौवै, तिनु मुंजीदा यूहन्ना बपतिस्मा दाता दा कुणजाई बौड़ा ना आथी, पौरौ जू स्वर्ग कै राज्य दा नानड़ै शै नानड़ा औसौ सैजा तैसीदा बौड़ा औसौ। औरौ जोबै यूहन्ना बपतिस्मा दाताए प्रचार कौरणा शुरु कौरा, तैसी सौमय शै लोयो इबी तौड़ी स्वर्ग का राज्य जोर शै आगै बौड़ै रौआ, औरौ तागतवर लोग इथपांदी हमला कौरौ। पौरमेशवर कै बातौ बौताणौवाल़ै कै सौबी किताबो दो औरौ मूसा कै कानून दो यूहन्ना बपतिस्मा दाता कै आणौ तौड़ी पौरमेशवर कै राज्य कै बारै मुंजी लैखै राए। औरौ जै तुऐं मैरै बात मानणी चांव तौ मैरै बात मान पांव, जैसकै बारै मुंजी एलिय्याह पौरमेशवर कै बातौ बौताणौवाल़ै बौल़ै राए थियु, ऐजा सैजाई औसौ। जिनु कुणिए मैरै बात शुणी लोए, सै ध्यान शै शोणेया।”
“हांव ऐसी सौमय कै लोगौ कै तुलना कैशैखै कौरु? सै तिनु नानड़िया कै साए औसौ, जू बोईजारो दै बोठेयो ऐकी दूजै की चुगली कौरौ। ‘कै आमुए तुऔं कारिए खुशी कै गाणै गोऊवे, औरौ तुऐं ना नाची; औरौ आमुए शोग मौनौऊं, औरौ तुऐं छाती ना पीटी।’
जिथुखै यूहन्ना बपतिस्मा दाता बार बार उपवास कौरौ थिया, औरौ ना ही अंगूर का रस पीयों थिया, औरौ सै बौल़ौए कै तैसदै दुष्टआत्मा औसौ। पौरौ जोबै हांव आदमी का बैटा खांदा-पींदा ओऊवा, औरौ सै बौल़ौ कै, ‘दैखौ, पेटू औरौ पियक्कड़ आदमी, मामला लोणो वाल़ै औरौ पापियों का दोस्त।’ पौरौ ऐकी आदमी कै काम साबित कौरौ कै बुध्दिमान कुण औसौ।”


तोबै सै तिनु नोगरो खै लोगौ खै ताड़दा लागा, जिनुमुंजी तैणै बैजाए चौमत्कार कै काम कौरे राए थिए, जिथुखै तिनुऐ आपणै पापौ खै ना छोड़े रैई थी। “हाय, खुराजीन शहर औरौ बैतसैदा शहर कै लोगौ जू चौमत्कार कै काम तुऔं दै कौरे राए, जै सै सूर औरौ सैदा शहर दै कौरे जांदै, तौ तिथै कै लोग कोबे कै टाट लोपेटै दैंदै, औरौ आपी पांदी खैऊड़ छिड़कै दैंदै, ऐजौ दिखाणौ कारिए कै सै आपणै पापौ शै फिरै गौवै। पौरौ हांव तुऔं खै बुलू, जू सौजा पौरमेशवर सूर औरौ सैदा शहर कै लोगौ कै दैला, पौरौ न्याय कै दूसै सैजी सौजा तिंदै बै जादा हौंदी जू सै तुऔं कै दैन्‍दा।
औरौ ओए रै कफरनहूम नगर कै लोगौ, का तू स्वर्ग तौड़ी ऊंचा हौंदा? तू तौ पताल़ो तौड़ी तौल़का जांदा, जू चौमत्कार कै काम तौंदै कौरे राए, जै सै सदोम शहर दै कौरदै तौ सै ऐलो तौड़ी बौणैयौंदे रौंदौ। पौरौ हांव तुऔं खै बुलू, जू सौजा पौरमेशवर सदोम शहर कै लोगौ कै दैन्दा, न्याय कै दूसै सैजै सौजा तिंदैदी बै जादा हौंदी जू सै तुऔं खै दैन्‍दा।”


तौलोंई यीशुए बौल़ौ, “ओए रै पिता, स्वर्ग औरौ धोरती कै प्रभु, हांव तैरा धन्यवाद कौरु, कै तुऐं इनु बातौ खै ज्ञानी लोगौ औरौ सौमझदारो कैईंदी छिपायो राखै रैई, औरौ नानड़िया पांदी प्रगट कौरी। हौर बै, ओए रै पिता पौरमेशवर जिथुखै ताखै ऐजौ आछौ लागौ।”
“मैरै पिता पौरमेशवरे मुखै सौबै ठुँ दैय राए, औरौ पिता कै बिना कुणिए बै बैटै कै ना जाणौ, औरौ ना ही कुणिए पिता खै जाणौ सिरफ बैटा ही जाणौ। औरौ जिनु लोगौ कै बैटा चुणो सैजैई लोग पिता खै जाणलै।”
“ओए रै सौबै मैहनत कौरणौवाल़ै औरौ बोझ शै दोबैयौंदे लोगौ, मैरै धोरे आंव, हांव तुऔं खै विशांव दैंदा। मैरै जोवांऐ आपी पांदी टैपै पांव; औरौ मुं कैईंदु शिखौ; जिथुखै हांव नम्र औरौ मन दा दीन औसौ: औरौ तुऐं आपणै मन दा विशांव पांदै। जू हांव चोऊं कै तुऐं कौरौ, सैजौ कौरणौ चैईथु ना आथी।”

Listen to मत्ती 11