Emberá-Chamí 2021 WBT; Non-Drama (NT)

Emberá-Chamí 2021 WBT; Drama (NT)

Mau maad̶akare Pentecostés bari panabadau ewari basii. Maud̶e joma chi Jesusd̶e ijãa nuree araa ãbua duanasid̶au. Maka panuud̶e jĩwaaruu ũrisid̶au bajãad̶ebena mimichia pũatu uruu kĩra. Chi ded̶e jomaurãba mau jĩwa ũrisid̶au. Maabae ãchi ʉ̃rʉ aoko kub̶uu kẽrame kĩra uruu unusid̶au. Mau ãchi ab̶aab̶aa ʉ̃rʉ b̶eesii. Maud̶e Dachi Akõre Jaurid̶eeba paneed̶aped̶a bed̶ea didiwaraa berrea bara b̶eesid̶au, Dachi Akõre Jauriba berreabiad̶a kĩra.
Pentecostés ewarid̶eeba judiorã druachad̶ebena chi Dachi Akõre kʉ̃ria nuree Jerusalend̶e duanasid̶au. Mau jĩwa ũrisid̶aud̶e ichiad̶e wãsid̶au. Maud̶e ũrisid̶au chi Jesusd̶e ijãabadaurãba ãchi berreabadaucha berrea panuu. Maud̶eeba kuitaa kʉ̃risiad̶aabasii. Maka kauwawẽa panuud̶e naka jarasid̶au: «¿Cha berrea panuu joma Galilead̶ebenawãeka? ¿Saka dachiba ara dachi berread̶e berrea panuu ũri panuma? Dachi tãed̶e Partiad̶ebena, Mediad̶ebena, Elamd̶ebena, Mesopotamiad̶ebena, Judead̶ebena, Capadociad̶ebena, Pontod̶ebena, Asiad̶ebena, Frigiad̶ebena, Panfiliad̶ebena, Egiptod̶ebena, Libia druad̶e Cirene puuru kaitad̶ebena maud̶e Romad̶ebena nama panuu. Dachi chi judiorã maud̶e chi griegorã judiorã kĩra panabadaurã nama panuu. Maud̶e ẽbẽrarã Creta islad̶ebena maud̶e Arabiad̶ebena nama panuu. ¡Jomaurãba ara dachi bed̶ead̶e chi Dachi Akõreba biꞌia waud̶a ʉ̃rʉbena berrea panuu ũri panuu!»
Maud̶eeba jomaurãba kuitaa kʉ̃risiad̶aabasiid̶eeba naka jara duaneesid̶au: «¿Nau kãare jara kʉ̃ria b̶uma?»
Maud̶e chi nureerãba atua jara duanasid̶au:
—Ãchi ituaba biu panuu.

Maud̶e Pedro waabena 11 baara jiraduped̶a jĩwa jarasii:
«Machi chi judiorã maud̶e joma Jerusalend̶e nureerãba nau kuitásturu; mʉʉba jaraaruu kauwa ũrísturu. Machiba kʉ̃risia panuu dai ituaba biu panuu maamina makawãe. ¡Wabid̶a daped̶e b̶uu! Maumaarã chi daiba maka berrea panuu ʉ̃rʉbena Dachi Akõre baita berreabarii Joelba naka b̶ʉsii:
“Dachi Akõreba naka jara b̶uu:
Kaad̶ebena ewarid̶e mʉ Jauri joma ẽbẽrarãmaa deai.
Maka machi warrarã maud̶e machi kaurã mʉʉba jarabi b̶uu kĩra berread̶ai.
Mʉʉba kũudrãarã daumaa ne unubiai. Maud̶e chõrarã bid̶a kamokaraad̶e maka unubiai.
Mau ewarid̶e mʉ Jauri chi mʉ baita bari trajabadaurãmaa deai, mukĩrarãmaa maud̶e wẽrarãmaa. Maud̶e ãchiba mʉʉba jarabiaruu kĩra berread̶ai.
Mau ewarid̶e ẽbẽrarãba ne poyaa waud̶akau bajãad̶e unubiai. Maud̶e iujãad̶e unubiakuai.
Oa, aoko maud̶e nari unubiai.
Dachi Mechiuba nebʉra kastikai ewari neei naed̶e ʉmada kii. Maud̶e jed̶ako oa bai. Mau ewari chi mechiu mia pera bai.
Maamina chi Dachi Mechiumaa chi chuburia id̶iiduu joma karibai”.
»Machi Israeld̶ebenarã, nau bed̶ea ũrísturu: Dachi Akõreba Jesús Nazaretd̶ebenamaa ẽbẽrarãba ne poyaa waud̶akau mechiu machi tãed̶e waubisii. Maka wau b̶uud̶eeba Jesusba kuitaabiasii Dachi Akõre ichi ome b̶uu. Mau machiba biꞌia kuitaa panuu. Dachi Akõreba naed̶e kʉ̃risia b̶uad̶a kĩra ab̶aumaa Jesús machi juad̶e ida b̶ubisii. Maabae machiba ẽbẽrarã kachiruarãmaa cruzd̶e jirab̶u beabiasid̶au. Dachi Akõreba kuitaa b̶uasii mau joma makai b̶uu. Jesús ãrea kakua puaba biusii. Maamina Dachi Akõreba ichi chokae jiradubisiid̶eeba waya biubai; chokae biukaraa nibai.
»Davidba ichi ʉ̃rʉbena naka jarasii:
“Mʉʉba unusii Dachi Mechiu ewaricha mʉ ome b̶uu.
Ichi mʉ jua biare b̶uud̶eeba wapeawẽa b̶uu.
Maud̶eeba mʉ sõ kĩrajʉʉ b̶uu; mʉ ãrea kĩrajʉʉ kari b̶uu.
Mʉʉba kuitaa b̶uu biurumina mʉ jirukaraayuwãe nibai.
Mʉʉba kuitaa b̶uu bichiba mʉ biud̶arã panabadaud̶e nub̶uubai.
Mʉ, chi bichi baita bari trajabarii jipa nii ida b̶eraabiibai.
Bichiba mʉʉmaa chi dachi chokae b̶uabibarii o unubisii, maud̶e bichi mʉ ome b̶uud̶eeba mʉ ãrea kĩrajʉʉbii”.
»Mʉ ãbarã judiorã, mʉʉba arakʉd̶e jaraaruu: dachi nabẽraed̶ebena David biusiid̶e mau jau b̶usid̶au. Chi jau b̶ubadau dachiba wabid̶a unubadau. Maamina David Dachi Akõre baita berreabarii basii. Maud̶eeba kuitaa b̶uasii Dachi Akõreba biawãrad̶eeba jarasii chi ichid̶ebena neeruu ab̶a ichi bari israeld̶ebenarã rey b̶ui. Makai kuitaa b̶uasiid̶eeba ichiba berreasii Dachi Akõreba Dachi Karibabarii deai jarad̶a chokae jiradui ʉ̃rʉbena. Ichiba jarasii Dachi Akõreba mau chi biud̶arã panabadaud̶e nub̶uubai maud̶e ichi chi kakua b̶eraabiibai.
»Davidba jarad̶a kĩra Dachi Akõreba Jesús biu b̶uad̶a chokae jiradubisii. Joma daiba mau unusid̶au. Dachi Bajãad̶ebena Akõreba ichi jua biare Jesús chi mechiu b̶usii. Maabae ichi Jauri deai jarad̶a Jesusmaa deasii ichid̶irãmaa deamera. Jesusba mau Jauri biawãra daimaa deasii. Machiba unu panuu maud̶e ũri panuu ichi Jauriba maka waubi b̶uu. David bajãad̶aa wãabasii, Jesús wãd̶a kĩra. Maumaarã ichiba naka jarasii:
“Dachi Mechiuba mʉ Mechiumaa jarasii:
Mʉ jua biare akʉ b̶eese,
ab̶a bichi kĩramaarã mʉʉba joma bichi juad̶e b̶uuruud̶aa”.
»Maud̶eeba joma israeld̶ebenarã, biawãra kuitásturu: Jesús, chi machiba cruzd̶e jirab̶ubiped̶aad̶a, Dachi Akõreba mau chi jomaurã Mechiu maud̶e Dachi Karibabarii deai jarad̶a b̶usii».
Mau ũrisid̶aud̶e joma ãchi sõd̶e ãrea kʉ̃risia baraa duaneesid̶au. Maud̶eeba ãchiba Pedromaa maud̶e chi waabenarã Jesusba bʉid̶arãmaa id̶isid̶au:
—Ãbarã, ¿kãare waud̶ai panuma?
Maud̶e Pedroba panausii:
—Kachirua ida b̶ud̶aped̶a Dachi Akõremaa nésturu. Jesucristo trʉ̃d̶eeba boro eásturu. Maud̶e machiba kachirua wauped̶aad̶a Dachi Akõreba perdonaped̶a ichi Jauri machimaa deai. Dachi Akõre chi Mechiuba ichi Jauri deai jarad̶a machi baita b̶uu, machi warrarã baita b̶uu maud̶e ẽbẽrarã kaitawẽ nureerã baita b̶uu. Joma chi Dachi Akõre Mechiuba iukua b̶uu ẽbẽrarã baita b̶uu.
Pedro ãrea berreasii ãchiba ijãad̶amera. Naka jara b̶uasii:
—¡Dachi Mechiuba chi id̶ibaebena ẽbẽrarã kachirua waubadaud̶ebena ãyaa wã́sturu!
Ãrea ẽbẽrarãba ichi bed̶ea ijãad̶aped̶a boro easid̶au. Mau ewarid̶e chi Jesusd̶e ijãaped̶aad̶a 3.000 panasid̶au.
Chi Jesusba bʉid̶arãba jaradea panuu ãchiba ãrea ũribachid̶au. Ãbua biꞌia duanabachid̶au. Pan b̶ʉad̶aped̶a, kobachid̶au. Maud̶e Dachi Akõremaa ʉtaa id̶i panabachid̶au.

Chi Jesusba bʉid̶arãba ẽbẽrarãba ne poyaa waud̶akau ãrea waubachid̶au. Maud̶eeba jomaurãba Dachi Akõre ãrea wapeasid̶au. Joma chi Jesusd̶e ijãa nuree ãbua biꞌia duanabachid̶au. Chi nureerãba ãchi drua maud̶e ne kaebea nedobʉid̶aped̶a chi nejarr barauwãe nureerãmaa ãchi nejarra deabachid̶au. Maka chi ãchiba uru panuuba chiya aid̶abachid̶au. Ewaricha Dachi Akõre de mechiud̶aa araa ãbua imibachid̶au maud̶e ãbarã decha kĩrajʉʉd̶eeba ãbua kobachid̶au. Ãchiba Dachi Akõremaa biꞌia berreabachid̶au. Maud̶e waabenarãba ãchi biꞌia unubachid̶au. Maud̶e Dachi Mechiuba ewaricha ẽbẽrarã karibabachii. Maka Dachi Akõreba ãchi ãrea bawaabiasii.

Listen to Hechos 2