Ge’ez - 2021 - BSE (NT) Non Drama

Ge’ez - 2021 - BSE (NT) Drama

ወውእተ አሚረ ኮነ ዐቢይ ምንዳቤ ወሁከት በቤተ ክርስቲያን ዘኢየሩሳሌም ወተዘርዉ ኵሎሙ ውስተ ኵሉ በሐውርተ ይሁዳ ወሰማርያ ወገሊላ ዘእንበለ ሐዋርያት ባሕቲቶሙ ዘነበሩ በኢየሩሳሌም። ወለእስጢፋኖስሰ ነሥእዎ ዕደው ጻድቃን ወቀበርዎ ወላሐውዎ ዐቢየ ላሐ። ወሳውልሰ ዓዲሁ ይትቄየም አብያተ ክርስቲያናት ወይደቢ አብያተ ሰብእ ወይስሕብ ዕደወ ወአንስተ ወይሞቅሕ። ወእለሰ ተዘርዉ አንሶሰዉ ወመሀሩ ወሰበኩ ቃለ እግዚአብሔር።

ወወረደ ፊልጶስ ሀገረ ሰማርያ ወሰበከ ሎሙ በእንተ ክርስቶስ። ወአጽምዕዎ ሕዝብ ዘይነግሮሙ ፊልጶስ ወሰምዕዎ ኅቡረ ወያነክሩ ወይሬእዩ ተኣምረ ወመንክረ ዘይገብር። ወብዙኃን አጋንንት እኩያን ይኬልሑ በዐቢይ ቃል ወይወፅኡ ወብዙኃን ፅዉሳን ወሐንካሳን የሐይዉ። ወኮነ ዐቢይ ፍሥሓ በይእቲ ሀገር።

ወሀሎ አሐዱ ብእሲ በይእቲ ሀገር ዘስሙ ሲሞን ወያስሕቶሙ ለሕዝበ ሰማርያ ዘሥራይ ብእሲሁ ወይሬሲ ርእሶ ዐቢየ። ወይትአመንዎ ንኡሶሙ ወዐቢዮሙ ወይብሉ ዝ ውእቱ ኀይለ እግዚአብሔር ዐቢይ። ወያጸምዕዎ እስመ ጕንዱይ መዋዕል እምዘአስሐቶሙ በሥራዩ። ወሶበ አምንዎ ለፊልጶስ ዘሰበከ ሎሙ በእንተ መንግሥተ እግዚአብሔር ወበስመ ኢየሱስ ክርስቶስ ዕድ ወአንስት ተጠምቁ። ወሲሞንሂ አምነ ወተጠምቀ ወነበረ ይፀመዶ ለፊልጶስ እስመ ይሬኢ ተኣምረ ወመንክረ ዘይከውን በእደዊሁ ወያነክር ወይዴመም።

ወሶበ ሰምዑ ሐዋርያት እለ ሀለዉ ኢየሩሳሌም ከመ ተወክፉ ሰብአ ሰማርያ ቃለ እግዚአብሔር ፈነዉ ኀቤሆሙ ጴጥሮስሃ ወዮሐንስሃ። ወወረዱ ወጸለዩ ላዕሌሆሙ ከመ ይንሥኡ መንፈሰ ቅዱሰ። እስመ ዓዲሁ ኢወረደ መንፈስ ቅዱስ ወኢ ዲበ አሐዱሂ እምውስቴቶሙ ዳእሙ ተጠምቁ በስሙ ለእግዚእነ ኢየሱስ ክርስቶስ። ወእምዝ ወደዩ ሐዋርያት እደዊሆሙ ላዕሌሆሙ ወነሥኡ መንፈሰ ቅዱሰ።

ወሶበ ርእየ ሲሞን ከመ ኀበ ወደዩ እደዊሆሙ ሐዋርያት ይወርድ መንፈስ ቅዱስ አምጽአ ሎሙ ንዋየ። ወይቤሎሙ አብሑኒ ሊተኒ ወሀቡኒ ከመ ኀበ ወደይኩ እዴየ ይረድ መንፈስ ቅዱስ። ወይቤሎ ጴጥሮስ ወርቅከሰ ወብሩርከ ምስሌከ ለይኩንከ ለሕርትምና ይመስለከኑ ዘበወርቅ ትሣየጦ ለጸጋ እግዚአብሔር። አልብከ መክፈልት ወርስት ውስተ ዝ ነገር እስመ ኢኮነ ርቱዐ ልብከ በቅድመ እግዚአብሔር። ነስሕ ይእዜኒ እምእከይከ ወተጋነይ ለእግዚአብሔር ለእመ የኀድግ ለከ እከየ ልብከ። እስመ እሬእየከ ዘትነብር በሕምዝ መሪር ወውስተ ማእሰረ ዐመፃ ሀሎከ። ወተሰጥዎሙ ሲሞን ወይቤሎሙ ሰአሉ ሊተ አንትሙ ኀበ እግዚአብሔር ከመ ኢይብጽሐኒ ወኢምንተኒ እምዘትቤሉኒ። ወእሙንቱሰ ሶበ ነገሩ ወአስምዑ ቃለ እግዚአብሔር ተሠውጡ ኢየሩሳሌም ወመሀሩ ቃለ እግዚአብሔር ውስተ ብዙኃት አህጉረ ሰማርያ።

ወነበቦ መልአከ እግዚአብሔር ለፊልጶስ ወይቤሎ ተንሥእ ወሑር ጊዜ ቀትር ፍኖተ በድው ዘያወርድ እምኢየሩሳሌም ለጋዛ። ወተንሥአ ወሖረ ወረከበ ብእሴ እምሰብአ ኢትዮጵያ ኅጽዋ ለህንደኬ ንግሥተ ኢትዮጵያ ወመጋቢሃ ውእቱ ላዕለ ኵሉ መዛግብቲሃ ወሖረ ኢየሩሳሌም ይስግድ። ወእንዘ ይገብእ ነበረ ዲበ ሠረገላሁ ወያነብብ መጽሐፈ ኢሳይያስ ነቢይ። ወይቤሎ መንፈስ ቅዱስ ለፊልጶስ ሑር ትልዎ ለዝ ሠረገላ። ወሮጸ ፊልጶስ ወበጽሐ ወሰምዖ ያነብብ መጽሐፈ ኢሳይያስ ነቢይ ወይቤሎ ፊልጶስ ተአምርኑ እንከ ዘታነብብ። ወይቤሎ ኅጽው በአይቴ አአምር ለእመ አልቦ ዘመሀረኒ ወአስተብቍዖ ለፊልጶስ ከመ ይዕርግ ወይንበር ኅቡረ ምስሌሁ። ወነገረ መጽሐፍሰ ኀበ ያነብብ ከመዝ ይብል «መጽአ ከመ በግዕ ይጠባሕ ወከመ በግዕ ዘኢይነብብ በቅድመ ዘይቀርፆ ከማሁ ኢከሠተ አፉሁ በሕማሙ። ወተንሥአ እምኵነኔ ወእምነ ሞቅሕ ወመኑ ይነግር ልደቶ እስመ ተአተተ እምድር ሕይወቱ።» ወተመይጠ ኀበ ፊልጶስ ውእቱ ኅጽው ወይቤሎ ብቍዐኒ ወንግረኒ በእንተ መኑ ይብል ነቢይ ከመዝ በእንተ ርእሱኑ ወሚመ በእንተ ካልእ። ወከሠተ አፉሁ ፊልጶስ ወአኀዘ ይምሀሮ በእንተ ኢየሱስ ክርስቶስ ወይፈክር ሎቱ በውእቱ መጽሐፍ። ወእንዘ የሐውሩ በጽሑ ኀበ ማይ ወይቤሎ ውእቱ ኅጽው ነዋ ማይ ወመኑ ይከልአኒ ተጠምቆ። ወይቤሎ ፊልጶስ ይደልወከ ከመ ትእመን በኵሉ ልቡናከ ወአውሥአ ውእቱ ኅጽው ወይቤ አነ አአምን ከመ ኢየሱስ ክርስቶስ ውእቱ ወልዱ ለእግዚአብሔር። ወአዘዘ ያቅሙ ሠረገላሁ ወአቀሙ ወወረዱ ኅቡረ ኀበ ማይ ፊልጶስ ወውእቱ ኅጽው ወአጥመቆ። ወወፂኦሙ እማይ መንፈሰ እግዚአብሔር መሠጦ ለፊልጶስ ወኢርእዮ እንከ ውእቱ ኅጽው። ወአተወ ብሔሮ እንዘ ይትፌሣሕ። ወበጽሐ ፊልጶስ ሀገረ አዛጦን ወአንሶሰወ ወመሀረ በኵሉ አህጉር እስከ በጽሐ ቂሳርያ።

Listen to ግብረ ሐዋርያት 8