If you have would like a copy of this version please contact info@davarpartners.org

Text: Chambeali New Testament, CC-BY-SA-4.0, The Love Fellowship. Audio: Chambeali Standard Version New Testament Audio Bible, CC-BY-SA-4.0, Davar Partners International, Bridge Connectivity Solutions, 2022

Chambeali Standard Version New Testament

Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.

इक्क रोज इय्यां होया कि विश्राम दिन यीशु ते तिन्हेरे चेल्‍ले खेत्रां रस्ते का होई करी जाया करदे थिये, अते से चेल्‍ले चलदे-चलदे कणक रे दाणेयां जो तोड़ी-तोड़ी करी खाया करदे थिये। तां फरीसियां ने तिन्हा जो जान्दे दिख्खेया अते से यीशु जो बोलणा लग्गे तुसा इदेय कम्म किजो करेया करदे हिन, जे कि परमेश्वर रे नियम रे हिसाब कने विश्राम दिन करणा ठीक नी है? यीशु ने तिन्हा जो जवाब दित्तेया, कै तुसा ने पवित्रशास्त्र बिच ए नी पढ़ेया कि जां दाऊद अते तिसेरे साथियां जो भूख्ख लग्गी तां उन्हा ने कै कित्तेया थिया? से किय्यां परमेश्वर रे तम्बू अन्दर गे अते परमेश्वर जो चढ़ाये री रोटियां जो तिनिए अते तिसेरे मित्रां ने खाया थिया, जिन्हा जो खाणे रा हक्क सिर्फ पुरोत्तां जो ही थिया अते यीशु ने तिन्हा फरीसियां जो बोल्लेया, कि मणू रा पुत्तर, जे मैं ही है विश्राम दिन रा भी प्रभु ए इक्क वरी इय्यां होया कि कुसकी होर विश्राम दिन यीशु सभास्थल अन्दर उपदेस देया करदे थिये, अते तित्ते इक्क इदेया मणू भी थिया, जिसेरा सज्जा हत्थ सुके रा थिया।

फरीसी अते शास्त्रि मणू इस भाल अन्दर बैठ्ठे रे थिये कि यीशु विश्राम दिन तिस मणू जो खरा करदे कि नी, ताकि तिन्हा जो यीशु पर इल्जाम लगाणे रा मौका मिल्ली जाओ पर यीशु तिन्हेरे मन री गल्ल जाणदे थिये इधेरे तांइ तिन्हा ने तिस सुके हत्थां वाले जो बोल्लेया, उठ अते मझाट्टे खड़ी जा अते से मणू उठेया अते मझाट्टे खड़ा होई गेया। यीशु ने तिन्हा सबणी जो, जे तित्ते बैठ्ठे रे थिये, बोल्लेया, मैं तुसा का पूच्छदा कि विश्राम दिन रे रोज्जे कुसकी रा भला करणा खरा ए, कि बुरा करणा, कुसकी री जान बचाणा खरा है, कि मरणे दैणा खरा ए? यीशु ने उन्हा सबणी पास्से दिख्खेया अते तिस मणू जो बोल्लेया, अपणा हत्थ अग्गे कर तिस मणू ने अपणा हत्थ अग्गे कित्ता अते तिसेरा हत्थ पूरी तरह कने खरा होई गेया ए दिख्खी करी, जे यीशु रे खलाफ़ थिये, से लैहरिये अते अप्पु-मिते ए बोलणा लगे कि यीशु कने कै कित्तेया जाये? फिरी इक्क रोज यीशु प्रार्थना करणे तांइ पहाड़ पर चढ़ी गे, अते सारी रात परमेश्वर का प्रार्थना करदे रे।

अगले रोज्जे भ्यागा तिन्हा ने अपणे सारे चेल्‍लेयां जो अपणे नेड़े सद्देया ते तिन्हा बिच का बारह जणेया जो चुणी लेया ते उन्हा जो प्रेरित (यीशु मसीह यीशु के धर्म प्रचारक, समाचार प्रचारक) नां दित्तेया गेया, तिन्हेरे नां ए हिन: शमौन, जिस जो यीशु पतरस भी बोलदे थिये, अते तिसेरा भ्याल अन्द्रियास, याकूब, यूहन्ना, फिलिप्पुस, बरतुल्मै, मत्ती, थोमा, हलफई रा पुत्तर याकूब, शमौन जे कि जेलोतेस नां रे समुह रा मणू थिया, याकूब रा पुत्तर यहूदा, अते यहूदा इस्करियोती, ए से चेल्ला थिया, जिनिए यीशु जो पकड़वाया थिया। जिस बेल्ले यीशु पहाड़ का उतरी करी पधरी जगाह् बिच आई करी खड़े होये तां तित्ते तिन्हेरे चेल्‍ले अते यहूदिया, यरुशलेम, सूर अते सैदा रे सहर रे समुन्द्री इलाकेयां का आए रे मते लोक्कां री बड्डी भीड़ तित्ते आई गई।

ए सब यीशु री उपदेस सुनणे तांइ अते अपणी-अपणी बमारियाँ का खरा होणे तांइ आये रे थिये यीशु ने तित्ते बड़े मणूआं बिच का दुष्टात्मा जो कड्डेया। सब मणू तिन्हा जो छुणा चाह्‍ंदे थिये किजोकी तिन्हेरे बिच का ताकत निकली करी मणूआं जो खरा करदी थी। तां यीशु अपणे चेल्‍लेयां पास्से दिख्खी करी बोलणा लग्गे, तुसा धन्न हिन, जे मन रे ठीक हिन, किजोकी परमेश्वर इदेय ही मणूआं पर राज करदे।

धन्न हिन तुसां, जे अब्बे भूख्खे हिन, किजोकी तुसा रजाये जाणे धन्न हिन तुसां, जे अब्बे रोन्दे हिन, किजोकी इदेया बेल्ला भी आणा जां तुसा हसणा। धन्न हिन तुसां, जे मणू रे पुत्तर, जे मैं ही है री वजह कने मणू तुसा का नफरत करगे, अते इस समाज का निकाली दिंगे, तुसा री बुराई करण अते तुसा जो बुरा बणाई करी तुसा रा नां बरादरी का कटी दिंगे तिस रोज तुसा खुसी मनायो, किजोकी स्वर्ग बिच तुसा तांइ बड्डा ईनाम है, किजोकी तुसा कने इय्यां करणे वाले मणूआं रे बब्ब-दाद्दे भी, भविष्यद्वक्ता कन्ने इय्यां ही करदे थिये पर लाणत है तिन्हा मणूआं पर, जे अज्ज बड़े अमीर हिन, किजोकी तिन्हा ने अपणा सुख-चैन भोग्गि लेया। लाणत है तिन्हा मणूआं पर जे अब्बे रज्जे रे हिन, किजोकी तिन्हेरा भूख्खे रैह्णे रा बेल्ला भी आणा। लाणत है तिन्हा मणूआं पर जे अज्ज हसदे हिन, किजोकी इदेया बेल्ला भी आणा जां तिन्हा ने रोणा अते दुखी होणा। लाणत है तुसा पर जां सब मणू तुसा री बड़ी तरीफां करण, किजोकी तिन्हेरे बब्ब-दाद्दे भी झूठे-भविष्यद्वक्ता री इय्यां ही बड़ाई करदे थिये। पर मैं तुसा सबणी सुनणे वालेयां जो बोलदा, कि तुसा अपणे दुश्मणा कने भी प्यार कने रेया करो जे तुसा कने नफरत करदे, तिन्हेरा भला करो।

जे मणू तुसा जो धिक्कार देंन, तिन्हा जो तुसा आशीष देया करो, जे तुसा री बुराई करदे, तिन्हेरे तांइ प्रार्थना करेया करो जे तुसा री खाड्डी रे इक्क पास्से चन्ड्ड मारो, तां तिसेरे अग्गे दूजी खाड्डी भी करी देयो ते जे कोई तुसा का तुसा रा सोल खुस्सि लेयो, तिसजो अपणी कमीज भी लैणा देयो जे कोई तुसा का किच्‍छ भी मन्गे तिसजो देयो, अते जिनिए तुसा री कोई चीज लित्ते री ए तां उस का मंगो मत जिय्यां तुसा चाह्‍ंदे कि मणू तुसा रे कने करो, तिय्यां ही तुसा भी तिन्हा कने करो जे तुसा अपणे प्यार करणे वालेयां कन्ने ही प्यार कने रैह्न्गे तां इस अन्दर कुण देई बड्डी गल्ल ए? किजोकी पापी मणू भी तां इय्यां ही करदे जे तुसा अपणे भला करणे वालेयां कन्ने ही भलाई करगे, तां इस अन्दर कुण देई बड्डी गल्ल है? किजोकी पापी मणू भी तां इय्यां ही करदे तुसा कुसकी जो उधार देई करी तिसका लैणे री आस रखदे तां इस बिच तुसा री कै बड़याई? किजोकी पापी मणू भी तां इय्यां ही चाएदे कि जितणा दित्तेया, तितणा ही वापस हटी आओ। पर तुसा अपणे दुश्मणा कने भी प्यार करो, अते भलाई करो, ते जे कुसकी जो उधार दित्ते रा हो, तां फिरी दुबारा वापस लैणे री भाल मत करो, इय्यां करगे तां परमेश्वर रे पास्से का तुसा जो स्वर्ग बिच इक्क बड्डा ईनाम मिलणा, ते तुसा परमप्रधान परमेश्वर री सन्तान होई जाणा, किजोकी परमेश्वर तां इतणे दयालू हिन कि से तिन्हा मणूआं पर भी अपणी कृपा दृष्टि बणाई रखदे जे परमेश्वर रा शुकर नी करदे अते बुरे हिन। जिय्यां तुसा रा स्वर्ग अन्दर वाला पिता परमेश्वर रहमदिल है, तिय्यां ही तुसा भी रहमदिल बणो। कुसकी पर इल्जाम मत लाओ, ताकि हिसाब-किताब रे बेल्ले तुसा पर भी इल्जाम नी लगाये जाये दूज्जेयां जो कसुरवार मत समझो, ताकि तुसा भी कसुरवार नी समजे जाओ पर, दूज्जेयां जो माफ करी देया करो, तां तुसा जो भी माफ कित्ता जाणा।
दूज्जेयां जो देया करो, तां तुसा जो भी दित्तेया जाणा, मणूआं ने पूरा नाप्पी करी अते जिक्की-जिक्की करी ते हिलाई-हिलाई करी अते उछलदा-उछलदा तुसा री खोख्खा बिच पाणां, किजोकी जिस नाप कने तुसा नापदे, तिस्सी नाप कने तुसा तांइ भी नाप्पेया जाणा फिरी यीशु ने तिन्हा जो इक्क उदारण दित्तेया, कै इक्क अह्न्ना दुजे अन्ने जो रस्ता दस्सी सकदा? जे दस्गा तां कै तिन्हा दोनां ने गत्ता बिच नी पैणा? चेल्ला अपणे गुरु का बड्ड़ा नी होई सकदा पर हाँ, जे सब किच्‍छ सिख्खी लिन्दा, सेह्ई अपणे गुरु सांई होई सकदा “तुसी किजो अपणे भाई री छोटी जदेई गलती जो दिख्खेया करदे हिन, जां तुसा री अपणी जिन्दगी बिच बड्डी गलतियां हिन।” जां तेरी अपणी जिन्दगी बिच बड्डी गलतियां हिन, तां तुसा किय्यां अपणे भाई जो बोल्ली सकदे कि अपणी गलतियां जो सुधार? ओ ढोंगी, पैल्ले तू अपणी बड्डी गलतियां जो सुधार, फिरी तू ठीक तरिक्के कने अपणे भाई री गलतियां जो सुधारी सकणा। किजोकी कोई भी खरा बूट्टा नी जिस बिच बुरे फल्ल लगदे हो, अते ना कोई बुरा बूट्टा ए जिस बिच खरा फल्ल लगदा हो।

हर इक्क बूट्टा अपणे फलां रे जरिए ही पछियाणेया जान्दा किजोकी मणू कन्डे वाली झिल्लां का अंजीर अते ना ही ते झड़बेरी का अंगूर खून्डदे खरा मणू अपणे ठीक मन का ठीक गल्लां ही कडदा, ते बुरा मणू अपणे बुरे मन का बुरी गल्लां ही कडदा किजोकी जिन्हा गल्लां कने तिसेरा मन भरितेरा हुन्दा, तिन्हा ही गल्लां जो मुँह पर लियान्दा फिरी यीशु ने बोल्लेया, तुसा मेरे जो ओ प्रभु जी, ओ प्रभु जी, किजो बोलदे रैह्‍न्दे, जदकी तुसा मेरी गल्लां जो मनणे तांइ तैयार नी हिन?

हर इक्क जे मेरे का आई करी मेरी गल्लां जो सुणी करी तिन्हा पर चलदा, मैं तुसा जो दसदा कि से मणू कुसेरे सांई ए से तिस मणू सांई ए, जिनिए अपणा घर डूग्गी नीय्यां खणी करी पक्के पत्थरां पर पाया अते जां हड़ आया ते तिसेरा पाणी तिस घरां कने बज्या, तां से घर जो हिलाई भी नी सकेया किजोकी से बड़ा पक्का बणे रा थिया पर जे मणू मेरी गल्लां जो सुणी करी तिन्हा पर नी चलदा, से तिस मणू सांई ए, जिनिए घर री नीं बणाये बगैर ही जमीन पर घर पाया अते जां हड़ आया अते तिसेरा पाणी घर कने टकराये, अते से ढेई पेया ते पूरी तरह कने बर्बाद होई गेया।

Listen to लूका 6