If you have would like a copy of this version please contact info@davarpartners.org

Text: Chambeali New Testament, CC-BY-SA-4.0, The Love Fellowship. Audio: Chambeali Standard Version New Testament Audio Bible, CC-BY-SA-4.0, Davar Partners International, Bridge Connectivity Solutions, 2022

Chambeali Standard Version New Testament

Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.

“जां से मणू ए बोल्लेया करदे थिये, तां पुरोत्त ते मन्दिर रे सरदार ते सदूकी मणू तिन्हेरे पीच्छे पेई गे।” से अधिकारी मणू बड़े गुस्से होए किजोकी चेल्‍ले लोक्कां जो मरे रे लोक्कां बिच का जिन्दा करणा जिय्यां तिन्हा ने यीशु जो फिरी जिन्दा कित्तेया थिया। तिन्हा ने प्रेरितां जो पकड़ी करी अगले दिन तिकर हवालात बिच रख्खेया किजोकी सँझ होई गेरे थी। पर बसेख रे सुनणे वालेयां बिच का मते जणेया ने यीशु पर विश्वास कित्ता, ते तिन्हेरी गिनती लगभग पांज्ज हजार आदमियां तिकर होई गई। किजोकी अगले दिन सरदार, बुजुर्ग ते शास्त्रि मणू यरुशलेम बिच कठिये। ते प्रधान पुरोत्त हन्ना ते कैफा ते यूहन्ना ते सिकदंर ते बाकि जिन्ने भी बड्डे पुरोत्त रे ‍खानदान रे थिये, सारे यरुशलेम सहर बिच कठ्ठी गे से तिन्हा जो बिच मझाटे खड़ेरी करी पूच्छणा लग्गे कि तुसा ने ए कम्म कुस ताकत ते कुस हक कने कित्तेया। तां पतरस ने पवित्रात्मा बिच भरी करी तिन्हेरे जो बोल्लेया, ओ लोक्कां रे सरदारों ते बुजुर्ग लोक, इस कमजोर मणू कने जे भलाई कित्ती गे री है, जे अज्ज असा कने तिसेरे बारे बिच पुछ-ताछ कित्ती जादीं, कि से किय्यां ठीक होया। तां तुसा सारे इस्राएली लोक्कां ने जाणी लैणा कि जिस नासरत कस्बे रे मसीह यीशु जो, तुसा ने सुली पर चढ़ाया थिया, ते जिस जो परमेश्वर ने मरे रे लोक्कां बिच का जिन्दा कित्ता, तिन्हेरे जरिए ए मणू तुसा रे सामणे ठीक-ठाक खड़ित्ते रा है। मसीह यीशु से ही बट्टा है जिस जो तुसा राजमिस्त्रियां ने बेकार समजेया, ते से कुणे रे सिरे रा बट्टा बणी गेया। यीशु जो छड्डी करी कुसकी दूए रे जरिए छुटकारा नी, किजोकी आसमान रे थल्ले मणूआं बिच यीशु छड्डी करी होर कोई दुआ नां नी दित्तेया गेया, जिसेरे जरिए असी छुटकारा पाई सके। जां तिन्हा ने पतरस ते यूहन्ना री हिम्मत दिख्खी ते ए दिख्खेया कि ए अनपढ़ ते आम मणू हिन तां हैरान होए फिरी तिन्हेरे जो पछाणेया कि ए यीशु कने रे हिन। तिस मणू जो जे ठीक होया थिया, पतरस ते यूहन्ना कने खड़ित्ते रा दिख्खी करी से तिन्हेरे खिलाफ किच्‍छ भी नी बोल्ली सके। पर इन्हा जो सभा का बाहर जाणे रा हुकम देई करी से अप्पु बिच गल्ल-बात करणा लगे। असी इन्हा लोक्कां कने कै करण? किजोकी यरुशलेम सहर बिच रैह्णे वाले सारे लोक्कां जो पता है, कि इन्हेरे जरिए इक्क मसहूर चमत्कार दखाया गे रा है ते असी इसेरा इन्कार नी करी सकदे। पर इधेरे तांइ कि ए गल्ल लोक्कां बिच होर जादा फैली ना जाए असी तिन्हेरे जो धमकादें कि से इस नां कने फिरी कुसकी कने गल्ल ना करण। तां तिन्हा जो अन्दर सद्देया ते चितौणी देई करी तिन्हेरे जो ए हुकम दित्ता कि यीशु रे नां कने ना किच्‍छ बोलणा ते सखाणा पर पतरस ते यूहन्ना ने तिन्हा जो जवाब दित्ता, तुसा अप्पु ही इंसाफ करो, कै ए परमेश्वर रे सामणे खरा है कि असी परमेश्वर का जादा तुसा री गल्ल मनण किजोकी ए तां असा का होई नी सकदा कि जे किच्‍छ असा ने दिख्खेया ते सुणे रा ओ से ना बोलण तां तिन्हा ने तिन्हेरे जो होर धमकाइ करी छड्डी दित्ता, किजोकी लोक्कां री वजह कने तिन्हेरे जो सजा दैणे रा कोई मोक्कां नी मिल्लेया, इधेरे तांइ जे गल्ल होए री थी तिसेरी वजह कने सारे मणू परमेश्वर री बड़ाई करेया करदे थिये। से मणू, जिस जो ठीक करणे रा चमत्कार कित्तेया गेया थिया से चाली साल का जादा उमर वाला आदमी थिया।

से छुटिकरी अपणे साथियां का आए, ते जे किच्‍छ बड्डे पुरोत्तां ते बुजुर्ग लोक्कां ने तिन्हा जो बोल्ले रा थिया, तिन्हा जो सूणाई दित्ता ए सुणी करी तिन्हा ने इक्क मन होई करी बड्डी अवाज बिच परमेश्वर जो बोल्लेया, ओ स्वामी, तुसा से ही हिन जिन्हा ने आसमान ते जमीन ते समुन्द्र ते जे किच्‍छ तिस बिच है बणाया तुसा पवित्रात्मा रे जरिए अपणे सेवक असा रे पुरखे, दाऊद रे मुँह का बोल्लेया, गैर यहूदियां रे लोक्कां ने हल्ला किजो मचाया ते देस-देस रे लोक्कां ने बेकार री गल्लां किजो सोची। प्रभु ते तिन्हेरे अभिषिक्त रे खिलाफ दुनिया रे राज्जे खड़ी पे, ते हाकिम कठ्ठी गे किजोकी तुसा रे सेवक यीशु रे खलाफ, जिन्हेरा तुसा ने अभिषेक कित्तेया, हेरोदेस ते पुन्तियुस पिलातुस भी गैर यहूदियां ते इस्राएली लोक्कां कने इस सहर बिच कठ्ठे होए कि जे किच्‍छ तुसा री ताकत ते सोच रे हिसाब कने ठैहरे, से ही करणे रा फैसला कित्ता। अवे ओ प्रभु, तिन्हेरी धमकियां जो सुणो, ते अपणे सेवकां जो ए वरदान देयो कि तुसा रा वचन बड़ी हिम्मत कने सुनाण, जिस बेल्ले ठीक करणे तांइ तुसा अपणा हत्थ बधाओ कि चिन्ह-चमत्कार ते अनौखे कम्म तुसा रे पवित्र सेवक यीशु रे नां कने कित्ते जाण। जां से प्रार्थना करी बैठे, तां से जगाह् जित्ते से कठित्ते रे थिये, हिली गेया ते से सारे पवित्रात्मा बिच भरी गे, ते परमेश्वर रा वचन हिम्मत कने सुणादे रेय।

भरोसे करणे वालेयां री मडंली इक्क मन रे थिये, इत्ते तिकर कोई भी अपणी जायदाद जो अपणा नी बोलदा थिया, पर सारा किच्‍छ आपस रा थिया प्रेरित बड़ी ताकत कने प्रभु यीशु रे फिरी जिन्दे होई जाणे री गवाई दिदें रे ते तिन्हा सारेयां पर परमेश्वर रा बड़ा अनुग्रह थी। तिन्हा बिच कोई भी गरीब नी थिया किजोकी जिन्हा का जमीन या घर थिये से तिन्हेरे जो बेचि-बेच्ची करी बिके री चीजां रा पैसा लेई करी आदें ते प्रेरितां जो सौंपी दिदें थिये, ते जदेई जिसेरी जरुरत हुंदी थी तिसेरे हिसाब कने हर इक्क जो बंड्डी देया करदे थिये। यूसुफ नां रा इक्क साइप्रस रा लेवी गोत्र रा मणू थिया जिसेरा नां प्रेरितां ने बरनबास (मतलब कि सांती रा पुत्तर) रख्खे रा थिया तिसेरी किच्‍छ जमीन थी, जिस जो तिसने बेच्चेया ते दाम रे पैसे लाई करी प्रेरितां जो सौंपी दित्तेया ताकि से लोक्कां बिच तिन्हेरी जरुरत रे हिसाब कने बंड्डी सकण।

Listen to प्रेरितां रे कम्म 4