If you have would like a copy of this version please contact info@davarpartners.org

Kulvi New Testament, CC-BY-SA-4.0, The Love Fellowship (Text) Kulvi New Testament Audio Bible, CC-BY-SA-4.0, Davar Partners International, 2022 (Audio)

Kulvi New Testament

This work is licensed under Creative Commons Attribution-ShareAlike 4.0 License.

तैबै सौ किश्ती न च़ढ़िया आपणै ग्राँ बै आऊ। होर कई लोकै एक ध्रँगा रा मरीज़ माँज़ै पैंधै यीशु हागै आंणु। यीशुऐ तिन्हरा बशाह हेरिया तेई ध्रँगै रै मरीज़ा बै बोलू, “ओ बेटैआ, हौंसला रख; तेरै पाप माफ हुऐ।” कई शास्त्रियै सोच़ू, कि “ऐ ता परमेश्वरै री निन्दा केरदा लागा सा।” यीशुऐ तिन्हरी मनै री गैल ज़ाणिया बोलू, “तुसै आपणै-आपणै मना न बुरा विचार किबै सोच़दै लागै सी? सान कि सा, ऐण्ढा बोलणा कि तेरै पाप माफ हुऐ या ऐण्ढा बोलणा कि, ‘उठ होर च़लदा फिरदा लाग।’ पर तुसै ज़ाणि लेआ कि हांऊँ मांहणु रै बेटै बै ऐसा धौरती न पापा बै माफ केरनै रा बी हक सा।” तैबै तेइयै ध्रँगै रै मरीज़ा बै बोलू, “उठ, आपणै माँज़ै बै च़क, होर आपणै घौरा बै ज़ा।” सौ उठिया आपणै घौरा बै नौठा। लोका ऐ हेरिया डौरै होर परमेश्वरै री महिमा केरदै लागै ज़ुणियै मांहणु बै ऐण्ढा केरनै रा हक धिना।

तौखै न आगै ज़ाइआ यीशुऐ मत्ती नाँ रा एक मांहणु च़ुँगी लेणै री च़ोऊकी हागै बेठादा हेरू, होर तेइबै बोलू, “मूँ पिछ़ै एज़ा।” सौ उठिया तेई पिछ़ै च़लू। ज़ैबै सौ घौरा एज़िया रोटी खाँदा बेठा ता बोहू सारै च़ुँगी लेणू आल़ै होर पापी एज़िया यीशु होर तेइरै च़ेले सैंघै रोटी खाँदै बेठै। ऐ हेरिया फरीसी लोकै तेइरै च़ेले बै बोलू, “तुसरा गुरू च़ुँगी लेणू आल़ै होर पापी सैंघै किबै खा-पीआ सा?” ऐ शुणिया यीशुऐ तिन्हां बै बोलू, “भलै चँगै मांहणु बै बैदै री ज़रूरत नी ऑथि बल्कि बीमार मांहणु बै बैदै री ज़रूरत सा। एथा रा मतलब तुसै ज़ाणि लेआ, कि हांऊँ बलिदान नी बल्कि दया चाहा सा; किबैकि हांऊँ धर्मी री तैंईंयैं नी पर पापी मांहणु री तैंईंयैं आऊ सा।”

तैबै यूहन्नै रै च़ेले तेई हागै एज़िया बोलू, “कि बजहा सा कि आसै होर फरीसी लोका किबै ब्रत रखा सी, पर तेरै च़ेले ब्रत नैंई रखदै?”
यीशुऐ तिन्हां बै बोलू, “ज़ाँ ढौई लाड़ा बराती सैंघै सा कि ते शोग केरी सका सी? पर तिन्हां ध्याड़ै ऐणा ज़ैबै लाड़ा तिन्हां न लग केरिना तेई बौगतै तिन्हां ब्रत केरना।
“नोंऊँऐं कपड़ै रा टौला पराणै झिकड़ै न कोई नी लाँदा किबैकि सौ टौला तेई झिकड़ै बै खींच़ा सा होर सौ नोंऊँआं कपड़ा च़िरिया सा। होर लोका नोंऊँआं अँगूरा रा रस पराणी खौलड़ी न नी रैखदै; किबैकि ऐण्ढा केरनै सैंघै ते खौलड़ी फुटा सी होर अँगूरा रा रस ता खौलड़ी दुहै नाश होआ सी, होर अँगूरा रा रस निकल़ा सा पर नोंऊँआं अँगूरा रा रस नोऊँई खौलड़ी न भौरा सी होर ते दुहै बच़ा सी।”

यीशु तिन्हां सैंघै इन्हां गैला केरदा लागा ती, कि एकी मुखियै एज़िया तेइबै प्रणाम केरू होर बोलू, “मेरी बेटी ऐबै मूँई सा; पर तू एज़िया तेसा पैंधै आपणा हौथ रख, ता तेसा ज़िन्दै होंणा।” यीशु उठिया आपणै च़ेले सैंघै तेई पिछ़ै नौठा। होर शुणा, एकी बेटड़ियै ज़ुणिबै बारा बौर्षा न लोहू बैंहणै री बीमारी ती तेसै पिछ़ै न एज़िया यीशु रै कुरतू रा पल्ला छ़ुँगू। किबैकि सौ आपणै मना न ऐ सोच़ा ती, “अगर हांऊँ यीशु रै झिकड़ै बै भी छ़ुँगनू ता मूँ ठीक होंणा।”
यीशुऐ मुड़िया सौ हेरी होर बोलू, “बेटी हौंसला रख तेरै बशाहै तू ठीक केरी होर सौ बेटड़ी तेसा घड़ियै ठीक हुई।”
ज़ैबै यीशु तेई अधिकारी रै घौरा न पुजू होर हुल्लड़ मचाणू आल़ै लोका बै बोलू, “औखै न हटा, ऐ शोहरी मूँईदी नी ऑथि, पर सोंदी लागी सा।” तैबै ते लोका तेइरा मज़ाक उड़ांदै लागै। पर ज़ैबै भीड़ तौखै न बाहरै खोली ता यीशुऐ भीतरै ज़ाइआ शोहरी रा हौथ ढौकू होर सौ ज़िन्दी हुई। ऐसा घटनै री चर्चा सारै देशा न फैली।

ज़ैबै यीशु तौखै न आगै नौठै ता दुई कांणै तेई पिछ़ै पुकारदै-पुकारदै च़लै, कि “ओ राज़ा दाऊदै री औलाद, आसा पैंधै दया केर।” ज़ैबै सौ घौरा पुजू, ता ते कांणै तेई हागै आऐ, होर यीशुऐ तिन्हां बै बोलू, “तुसाबै बशाह सा कि हांऊँ तुसाबै ठीक केरी सका सा?” तिन्हैं तेइबै बोलू, “हाँ प्रभु।” तैबै तेइयै तिन्हरी औछ़ी बै छ़ुँगिआ बोलू, “ज़ैण्ढा तुसरा बशाह सा तैण्ढा तुसरी तैंईंयैं लोड़ी हुआ।” होर ते एकदम हेरदै लागै होर यीशुऐ तिन्हां बै बोलू, साबधान रौहा, “तुसै एसा गैला कौसी बै हेरीत् दैसदै कि मैं तुसरी तैंईंयैं कि केरू।” पर तिन्हैं ऐ गैल ज़ाइआ सारै देशा न फैलाई।

ज़ैबै यीशु होर तेइरै च़ेले बाहरै ज़ाँदै लागै ती ता लोकै एक गूंगा मांहणु तौखै आंणु। तेइबै बुरी आत्मा फ़सी ती। ज़ैबै यीशुऐ तेईन सौ बुरी आत्मा खोली ता सौ गूंगा मांहणु ढुणिदा लागा होर लोका हैरान होईया बोलदै लागै, “इस्राएला न ऐण्ढा पैहलै नी हुआ।” पर फरीसी लोकै बोलू, “ऐ ता बुरी आत्मा रै प्रधानै री मज़ती सैंघै बुरी आत्मा खोला सा।”

यीशु होर तेइरै च़ेले गलील ज़िलै रै कई शहर होर ग्राँ न ज़ाइआ तिन्हरी आराधनालय न उपदेश देआ ती, होर परमेश्वरै रै राज्य री खुशी रै समादा रा प्रचार केरदा होर लोकै री हर किस्मै री बीमारी ता कमज़ोरी बै दूर केरदा रौहू। ज़ैबै तेइयै भीड़ा धिरै हेरू ता तेइबै लोका पैंधै दया आई किबैकि ते फ़ुआला बगैर भटकीदी भेड़ा सांही ज़ुणिरा कोई फुआल नैंई ती। तैबै यीशुऐ आपणै च़ेले बै बोलू, “फ़सल ता पौकी सा पर मज़दूर थोड़ै सी। ऐबै तुसै छेतै रै मालका हागै अर्ज़ा केरा कि सौ आपणी फ़सल काटणै री तैंईंयैं मज़दूर भेज़ला।”

Listen to मत्ती 9