Bible Text in Txitxopi© SociedadeBíblica de Moçambique, 1999 Audio recording of the Bible Text ℗ Hosanna, 2018

Txitxopi - 1999 MOZ (NT) Drama

A Bíblia em Txitxopi © Bible Society in Mozambique, 2016.

Vathu vavangi va duketile kuxawutela ngu mibhalo mahungu awa ma nga humelela hagari kwathu; avava va nga hi xawutela tona ngu vale, kukhukhela makhatoni, va nga ti wona ngu maso awe, na kambe i di vatxhumayeli va Dipswi. Anani ni ti woni ti di ni fanelo ku kubhalela, ngu nzila yi yi lavekako, awe wa hombe Teyofilo, msana ka kusetxha totshe kha kwati, kukhukhela makhatoni ka tona, kasiku u txi ziva ditshuri do tsana ka tigondo ti u nga ti amukela.

Ka masiku a Herodha, mfumeli wa Judheya, ku ti ni mphaxeli, awu a nga ti dhanwa ku i Zakariya, wa mtxawa wa Abhiya. Msikati wakwe i ti wa lixaka la ka Aroni, ditina dakwe a ti dhanwa ku i Izabheli. I ti vathu vo lulama ngu wumbidi wawe masoni ka Txizimu, va txi veketa va si solwi ngu m'thu, sotshe sirumo ni milayo ya Mkoma. Va ti si nga ni vanana, nguko Izabheli i ti txifule, kambe ngu wumbidi wawe va ti kumbile.
Sekoko Zakariya, ngako a di ha mthumoni kwakwe ka wuphaxeli masoni ka Txizimu, madingano ni kuruma ka mlayo wa mtxawa wakwe, a to hokelwa ngu txikhati txakwe txa kuwulela wukhaloni ko sawuleka ka Dithepele da MKOMA, kasi kuya hisa dibaselo. Dotshe dibutho di ti ti khongela, di di hahanze ngu mbimo ya dibaselo. Sekoko Ngelozi ya Mkoma yi to ti wonekisa kwakwe, yi di emile ngu didhawa da txinene ka txiluvelo txa dibaselo. Ngako a txi yi wona, Zakariya a to wika msana, a txi telwa ngu dizowa. Aniko ngelozi yi m'gete, yi txi kha yona:
“U nga thave, Zakariya, mkombelo wako wu engisilwe. Izabheli msikati wako, a na kuvelekela mwanana wa m'zambi, awu u no m'raya ditina da Johani. U na va ni kutsaka, ni kunengela, se vavangi va na tsakela kuvelekwa kwakwe. Ene a na va i di wa hombe masoni ka MKOMA, kha na mbi sela vhinya mwendo wusuke wo levisa, a na tala ngu Moya wo Sawuleka a di ngadi mndani ka mame wakwe; Se a na wuyisa vanana vavangi va Israyeli ka MKOMA, Txizimu txawe. A na thangela masoni ka Mkoma ngu moya ni mtamo wo fana ni wa Elija; a na wuyisa timbilu ta vaveleki ti ta manana ni ta vanana vawe; a na wuyisa vaeyisi ka wuzivi wa valulami, kasiku e lulamisela Mkoma ngamu yi yi hanelako ene.”
Zakariya a xamute ka ngelozi a txi khene: “Ni na ti zivisa kutxani toneto, eko ni nga kumba, msikati wangu nene i ku txikosana kani?” Ngelozi yi xamute yi txi kha yona: “Ani ngani Gabriyele, wule a emako masoni ka Txizimu, ni rumetwe ku ta womba-womba ni nawe ni ku ta ku xawutela mahungu awa amanene. U na zumba u di txiduma, u si sikoti kuwombawomba kala ditshiku di ti no maheka ngu dona totshe tiya, nguko khwa tumela mapswi angu, aawa ma no tatiseka ngu mbimo yi yi lavekako.”
Se dibutho di ti verela Zakariya, di txi xamala kuswela kwakwe wukhaloni mule ko Sawuleka. Mbimo yi a nga huma, a to tandeka kuwombawomba navo, se vona ve tiziva ti to a woni txiwoniso Dithepeleni. A ti ko maha ngu kuxungametela, e zumba i di txiduma. Ma di pindile masiku a mthumo wakwe, a to wuya m'tini.
Msana ka masiku awa, msikati wakwe Izabheli a to mama txirumbu, se e zumba a txi ti sisa mtxhanu wa mitxima; A txi khene: “Ati ngu tiya Mkoma a nga ni mahela tona ka masiku awa ene a nga ni wona kasi ku ni thavisa tingana, hagari ka vathu.”

Se ka mtxima wa wutxhanu ni wumwewo wa txirumbu txa Izabheli, yi rumetwe ngelozi Gabrieli ngu Txizimu ka didhoropa da Galileya, adiya di dhanwako ku i Nazareta; Yi txi ya ka mbiri, yi nga ti thembisilwe ngu dizambi di di nga ti dhanwa ku i Josefa, wa kuhumela ka lixaka la Dhavhidha. Ditina da mbiri yileya i ti Mariya. Se, ngako ngelozi yi di wulete ahawa ene a nga ti kona, yi to kha yona: “Xewe, awe wo kateka, Mkoma ana ni nawe.” Ka mapswi awa, ene a to bhibhika khana, e khata kupimisa ti to maloselo awa nga txani? Se ngelozi yi wombile kwakwe yi txi kha yona:
“Mariya, u nga thave, nguko u mani dithomo masoni ka Txizimu; U na mana txirumbu, u txi veleka Mwanana wa m'zambi, awu u no m'raya ditina daku i Jesu; Ene a na va i di wa hombe, kambe a na dhanwa ku i ‘Mwanana wa Nyatxitimwi.’ Mkoma Txizimu a na mninga txikhalo txa tate wakwe Dhavhidha; A na fuma yotshe mbimo ka nyumba ya Jakobe, se mfumo wakwe kha wu na mbi va ni magwito.”
Mariya a nje khene ka ngelozi: “Ti na mahekisa kutxani tiya, eko ni si ziviko wamwamna kani?”
Se ngelozi yi to mu angula tiya: “Moya wo Sawuleka wu na txhika txitimwi kwako, se mtamo wa Nyatxitimwi wu na kufenengeta ngu mtsudi wakwe. Ngu toneto, Msawuleki wu a no velekwa a na dhanwa ku Mwanana wa Txizimu. Hambi dixaka dako Izabheli ana ni txirumbu nene, kukumbani kwakwe, se awuwa i mtxima wa wutxhanu ni wumwewo, kwakwe va nga ti mu womba ku njifule; Nguko ka Txizimu ti walo to tandeka.” Konaho, Mariya a to khene: “Ngani wuwa txithumi txa MKOMA, ti na maheke kwangu nga ti u wombisako tona.” Se ngelozi yi khukha yi mu siya.

Ka ale masiku, Mariya a to teka dipfhumba a txi tsula ngu kukuluveta, a txi ya ka ditiko da situnga, didhoropani ka Judha. A to wulela m'tini ka Zakariya, eya losa Izabheli. Neti Izabheli a txi engisa kuloswa ngu Mariya, mwanana a to sinyasinya mndani kwakwe, se Izabheli a to tala ngu Moya wo Sawuleka; se a txi angula ngu dipswi da kuengiseka a txi khene: “U katekile hagari ka vavasikati, wu katekile ni wona m'hando wa mndani kwako. Se ti khukhela hani ti to teka ani ni ta dingulwa ngu Mame wa Mkoma wangu kani? Txikhati txi ni nga engisa dipswi dako u txi ni losa, mwanana a sinyile mndani kwangu ngu litsako. U katekile awe u nga tumela, nguko ti na maheka kwako ati ti nga wombwa ngu Mkoma.”

Sekoko Mariya a to khene: “Dihika dangu da dhumisa MKOMA,
ni moya wangu wu tsakela Txizimu, Muhanyisi wangu,
Nguko a woni kutiveka hahatshi ka txithumi txakwe;
ngu toneto kukhukhela konkuwa,
ni na dhanwa ku ni wo kateka ngu totshe tixaka ta vathu.
Nguko Nyamitamo a mahile kwangu timhaka ta hombe;
ditina dakwe di sawulekile.
Ni wumbilu wakwe wu tshanganile
ka liveleko ni liveleko
la vale va mthavako.
A thumile ta hombe ngu diwoko dakwe,
a hangalasile ava va nga txi ti kukumukisa
ka mialakanyo ya timbilu tawe.
A va txhikisile hahatshi ka sikhalo sawe sa wukoma avale va mtamo,
a txi guleta ava va kutiveka hahatshi.
Avale va nzala a va khurisile ngu sa sinene,
e hangalasa avale va kutithemba,
na va si nga ni txilo manzani.
A vhunetete Israyeli, i ku txithumi txakwe,
na a txi alakanya wumbilu wakwe,
a nga wu thembisa ka vakokwani vathu,
ka Abrahamu ni liveleko lakwe kala kupinduka.”

Mariya a zumbile ni Izabheli mitxima yiraru, ngu msana e tshumela e tsula m'tini kwakwe.

Ku ti ngako Izabheli a txi hokelwa ngu txikhati txa kuhefemula, a to veleka mwanana wa txizambzana. Vaakelani vakwe ni maxaka, ngako va di ti zivile ti to Mkoma a kombisile wumbilu wakwe kwakwe, va to tsaka nayo. Ka ditshiku da wutxhanu ni mararu, va tile va ta mu yisa wukwerani, va txi lava ku m'raya ditina da tate wakwe, Zakariya. Aniko mame wakwe a to angula a txi khene: “Lambi! Ene a na dhanwa ku i Johani.” Vona va ti kha vona: “Kha ku nga ho ni mmweyo hagari ka maxaka ako, awu a ku ni ditinedo.” Se vona, va txi maha ngu kuxungametela, va to wotisa ka tate wakwe ti to ene a lava ku a txi raywa ditina da mani. Ene a to kombela txileti a txi bhala ku khene: “Ditina dakwe i Johani.” Votshe va to xamala.
Kunukunuko txi to tuleka txisofu txakwe, li txi txhatxheka lidimi lakwe, a txi khata kuwombawomba, a txi dhumisa Txizimu. Votshe vaakelani vakwe va to telwa ngu kuthava, se timhaka tiya ti txi hangalaka ni dotshe ditiko da mmango wa Judheya. Votshe va va nga txi tiengisa, va ti ti veketa hakhana kwawe, va txi kha vona: “A nava i di wo txani ene mwanana wuwa kani?” Kunene mtamo wa Mkoma wu ti ni nene.

Konako Zakariya, tate wakwe, a to tala ngu Moya wo Sawuleka, a txi profeta a txi khene: “A na dhumiswe MKOMA, Txizimu txa Israyeli,
nguko a endete vathu vakwe, a txi va tirula.
A hi wusete Muhanyisi wa mtamo
ka nyumba ya Dhavhidha, txithumi txakwe.
Nga ti a nga womba kale ngu txisofu txa vaprofeti vakwe vo sawuleka.
Kufela ku a txi hi hanyisa ka valala vathu
ni ka manza a votshelele va va hi vengelako.
Kasiku e maha wumbilu ka vatate vathu,
a txi khumbuka txitumelelano txakwe txo sawuleka.
Ni txixambanyo txi, a nga maha ka tate wathu Abrahamu,
txa ku hi ninga tito, hi di hulukile manzani ka valala vathu,
hi txi mu thumela, hi si thavi txilo.
Ngu kubasa ka mbilu ni kululama masoni kwakwe,
ka otshe masiku a kuhanya kwathu.
Se awe, mwananawe,
u na dhanwa ku u mprofeti wa Nyatxitimwi;
nguko u na thangela masoni ka MKOMA,
kasi kululamisela tinzila takwe.
Kasi kuzivisa kuhanyiswa ka vathu vakwe
ni kudivalelwa ka sionho.
Ngu wumbilu wa hombe wa Txizimu txathu,
ha mana kuendelwa ngu wutxa wa kuta ngu txitimwi;
ku ta woninga ava va manekako mtemani
ni mtsudini ka lifo,
ni ku hi tsimbilisa ngu nzila ya kudikha.”

Se mwanana a ti ti kula, a txi mana mtamo moyani. Se a ti zumba txiwulani kala ditshiku da kutiwonekisa kwakwe ka Israyeli.

Listen to Luka 1