Kiembu - 2002 KENBS (NT) Drama

Athuuri onthe a Kîamma nîmaaûkîrire na makîvira Jesû agacirithue nî Pilato. Nao nîmaambîrîrie kûmûthitanga makiugaga atîrî, “Tue tûranyitire mûndû ûyû akîvîtithia andû a vûrûri wetû. Arameeraga matikarutîre mûthamaki wa Roma mbeca cia gooti na akauga atî ke nîke Mesaya, mûthamaki.”
Nake Pilato nîwamûûririe atîrî, “We nîwe mûthamaki wa Ayahudi?”
Nake Jesû nîwamûcokerie atîrî, “We nîwe wauga guo.”
Pilato nîwacokire akîîra anene a athînjîri-Ngai wa vamwe na kîrîndî atîrî, “Nie ndirona ûndû wana ûmwe mûcûku nîngîthitanga mûndû ûyû naguo.”
Nwatî nîmaakinyîrîrie ûvoro ûcio mûno makiugaga atîrî, “Mûndû ûyû akîthomithia nîaraunjuga andû a vûrûri wonthe wa Judea. Ke aambîrîrie vûrûrirî wa Galili na rîu arî gûkû gwetû.”

Vîndî îrîa Pilato eegwire ûguo nîwaûririe atîrî, “Mûndû ûyû nî Mûgalili?” Rîrîa Pilato aamenyire atî Jesû aarî wa kuuma vûrûrirî ûrîa Herode aathanaga, nîwamûtûmire kûrî Herode. Vîndî îo Herode wa nake aarî Jerusalemu. Nake Herode nîwakenire mûno rîrîa oonire Jesû, nîûndû aarî mwîgu ngumo yake na nîwatûûrîte arî na mwîrîgîrîro mûno wa kwenda kwona Jesû akîringa ciama. Kwoguo Pilato nîwaûririe Jesû ciûria nyîngî, nwatî Jesû ndaamûcokeria. Nao anene a athînjîri-Ngai na arimû a Watho arîa maarûngamîte vo, nîmaathitangire Jesû mevotorete mûno. Nake Herode na athigari ake nîmaanyûrûririe Jesû na makîmwîka maûndû meengî ma ûûra nthoni. Nîmaacokire makîmwîkîra kanjû yarî ya goro na ya riiri na makîmûcokia kûrî Pilato. Kuuma mûthenya ûcio Herode na Pilato nîmaatuîkire arata wana ethîrwa vau mbererî maarî nthû.


Pilato nîwetire mûcemanio wa anene a athînjîri-Ngai, atongoria wa vamwe na kîrîndî, na akîmeera atîrî, “Mue mûndetere mûndû ûyû na mwambîra atî ke nîaravîtithagia andû. Nînarîkia kûmûcirithia mûrî vo na ndinona ekîte îvîtia wana rîmwe rîa marîa mûramûthitanga namo. Wana nginya Herode ndanoona ekîte îvîtia wana rîmwe nîûndû nîamûcokirie kûrî tue. Mûndû ûyû tî mwîku îvîtia wana rîmwe rîngîtûma atuîre kûûragwa. Kwoguo nîmûrivithia ivoko na njoke nîmûrekie.” [ Pilato nîwetîkîrîtue nî watho wa Ayahudi amarekerie mûndû ûmwe vîndî ya pasaka].
Nakîo kîrîndî kîonthe nîkîaugîrîrie atîrî, “Mûndû ûyû nîaûragwe na tûcoke twovorerwe Baraba!” (Baraba oovetwe nîûndû wa kunjuga andû îtûûrarî na nîûndû wa kûûragana.)
Pilato nîwarîrie kîrîndî wa rîngî nîûndû nîwendaga kûrekia Jesû. Nwatî kîrîndî nîkîaugîrîrie atîrî, “Mwambe mûtharavarî îgûrû! Mwambe mûtharavarî îgûrû!”
Wa rîngî Pilato nîwamaarîrie rita rîa kathatû na akîmaûria atîrî, “Mûndû ûyû ekîte wîvia ûrîkû? Nie ndirona ekîte îvîtia wana rîmwe rîngîtûma atuîrwe kûûragwa. Kwoguo nîmûrivithia ivoko na njoke nîmûrekie.”
Nwatî kîrîndî nîkîathiîre na mbere kugîrîria gîkinyîrîrîtie gîkiuga atî Jesû ambwe, na mûthiiarî kugîrîria kwao gûkîvootana. Kwoguo Pilato nîwacokire agîtua ciira akiuga mavingîrue ûrîa meendaga. Nîwamovorere mûndû ûrîa meendaga, ûrîa wovetwe nîûndû wa kunjuga andû îtûûrarî na wa kûûragana. Nîwacokire akîmanengera Jesû nîguo mamwîke ûrîa meendaga.


Rîrîa athigari maaumagarîtie Jesû mathiîte kûmwamba, nîmaatûnganire na mûndû ûmwe wa kuuma îtûûrarî rîa Kurene wetagwa Simoni aumîte ya mîgûndarî. Nîmaamûnyitire makîmwigîrîra mûtharava nîguo aûkue aumîte Jesû vuva.
Andû eengî mûno nîmaaumire Jesû vuva na gatagatîrî kao vaarî na aka maarîragîra Jesû marî na kîeva kîîngî ngororî ciao. Nwatî Jesû nîwevûgûrire na kûrîa maarî na akîmeera atîrî, “Mue aka aya a Jerusalemu tigani kûndîrîra, îîrîrîreni mue ene na mûrîrîre ciana cienyu. Nîûndû mîthenya nîyûkîte rîrîa andû makaambîrîria kuga atîrî, ‘Na kaî aka arîa nthaata arîa mataanaciara na arîa matanongia, nîarathime-î.’ Kavinda kau nîrîo andû makaambîrîria kwîra irîma atîrî, ‘Tûgwîreni!’ na macoke meere tûrîma atîrî, ‘Tûkunîkîreni!’ Nîûndû angîthîrwa andû nîmareka maûndû ta mama vîndî îrîa mûtî ûrî mwîthî, gûgeekara atîa mûtî waûma?”
Na andû engî aîrî ageri ngero nîmaaumagarirue nîguo makaûragwe vamwe na Jesû. Rîrîa maakinyire vandû vetagwa, “Îvîndî rîa Kîongo,” nîmaambire Jesû vo wa vamwe na ageri ngero acio aîrî, ûmwe mwena wake wa ûrîo, na ûcio wîngî mwena wake wa ûmotho. Nake Jesû nîwaugire atîrî, “Ngai Vava, movere nîûndû matiîcî ûrîa mareka.”
Nao nîmaaûthîre nguo cia Jesû nîguo mamenye ûrîa makûigaana. Rîrîa andû maarûngamîte vau maroretie, atongoria a Ayahudi nîmaanyûrûririe Jesû makîmwîraga atîrî, “Nîaravonokagia andû arîa engî, tiga evonokie rîu angîthîrwa ke nîke Mesaya ûrîa Ngai athuurîte!”
Wa nao athigari nîmaathiîre kûrî Jesû, makîmûva ndivei ino ngagatu na makîmûnyûrûria makîmwîraga atîrî, “Îîvonokie rîu angîthîrwa we nîwe Mûthamaki wa Ayahudi!”
Na vau mûtharavarî îgûrû rîa kîongo Kîam Jesû, vaarî na kîmenyithia Kîamndîkîtwe atîrî: “Ûyû nîke mûthamaki wa Ayahudi!”
Na mûndû ûmwe wa arîa maambîtwe nîûndû wa kûgera ngero nîwamûrumire akîmwîraga atîrî, “Na kinthî we tîwe Mesaya? Îîvonokie na ûcoke ûtûvonokie!”
Nwatî mûndû ûcio wîngî nîwamûkaanirie akîmwîraga atîrî, “Anga ndwîtigagîra Ngai? We ûtuîrîrîtwe ûndû ûmwe nake? Tue tûtuîrîrîtwe îvera rîringanîte na ciîko irîa twîkîte. Nwatî mûndû ûyû tî mwîku ûndû wana ûmwe mûcûku.” Nake mûndû ûcio nîwacokire akîîra Jesû atîrî, “Jesû, ûkaandirikana vîndî îrîa ûgaatuîka Mûthamaki!”
Nake Jesû nîwamwîrire atîrî, “Na ma nîrakwîra atî, ûmûnthî ûyû, nîwîthîrwa ûrî îkenero vamwe nanie.”


Kuuma thaa thita cia mûthenya, riûa nîrîatigire kwara na vûrûri wonthe ûkîgîa nduma nginya thaa kenda, nakîo gîtambaa Kîam hekarû gîgîatûkana maita maîrî. Jesû nîwaugîrîrie na mûgambo mûnene atîrî, “Vava, nînakûnengera mwoyo wakwa.” Na arîkia kuga ûguo agîtuîkana.
Vîndî îrîa mûnene wa athigari îgana oonire ûrîa gwekîka, nîwakumirie Ngai akiugaga atîrî, “Na ma mûndû ûyû ararî mûthingu!”
Rîrîa andû onthe arîa maacemanîtie kwîroreria, moonire ûrîa gwekîka nîmeenûkire makîîriraga. Nao andû onthe arîa maamwîcî wa vamwe na aka arîa maamûrûmîrîrîte kuuma Galili, nîmaarûngamire vandû varaca maroretie.


Kwarî mûndû wetagwa Josefu waumîte Arimathea, îtûûra rîa Judea. Ke aarî mûndû mwaro na mûthingu. Nîwatûûraga etererete gûka kwa Ûthamaki wa Ngai. Wana ethîrwa aarî mûthuuri wa Kîamma Kîam Ayahudi, ke ndetîkanîtie na îtua na gîko Kîamo. Josefu nîwathiîre kûrî Pilato na akîvoya mwîrî wa Jesû. Nîwacokire akîûruta mûtharavarî, akîûrigica na cuka na akîwiga mbîrîrarî îrîa yacîtwe îthigarî. Nayo mbîrîra îo ndîethîrîtwe yanaigwa mwîrî wa mûndû wîngî. Mûthenya ûcio warî wa Jumaa nayo thavatû yarî vakuvî kwambîrîria.
Nao aka arîa maaumîte Jesû vuva kuuma Galili, nîmaathiîre marî vamwe na Josefu na makîona mbîrîra na ûrîa mwîrî wa Jesû waigirwe. Nîmaacokire makînûka, makîvarîria indo cianungaga waro na maguta maanungaga waro ma gwîtîrîria mwîrî wa Jesû.
Naguo mûthenya wa thavatû wakinya nîmaanogokire wata ûrîa Watho wathanîte.

Listen to Luka 23