लूका रा मकसद

1आदरणीय थियूफिलुस जी! मतयां लोकें तिन्हां गल्लां रा ब्योरा लिखणे री कोशिश किति सै जे अहांरे बिच हुईयां। 2ठीक सैई गल्लां सै जे अहांजो तिन्हां लोकां ते मिलियां, तिन्हें जे इन्हां गल्लां जो यीशु मसीह रिया सेवकाईया रे शुरु तेई देख्या था कने बाद बिच सै परमेशरा रे वचना रे सेवक बणे। 3इस खातर शुरु तेई इन्हां सारियां गल्लां जो पूरी सावधानिया ने कने ठीक-ठाक जाँच पड़ताल़ करने ते बाद, मिन्जो ये ठीक लगया भई हऊँ बी इन्हांजो तेरे खातर बारी-बारी लिखुं। 4तिसते जे भई तू तिन्हां गल्लां री हकीकत जाणी लो तिन्हांरी जे तिज्जो शिक्षा देई तरी।

यूहन्ने रे जन्मा री घोषणा

5तिन्हें दिनें ताहली जे यहूदिया प्रदेशा च हेरोदेस राजे रा राज था। तित्थी जकर्याह नौआं रा इक याजक था, सै जे अबिय्याह री याजकां री मण्डलिया च था। कने तिसरिया जनाना रा नौं इलिशिबा था सै जे हारून रे कुल़ा री थी। 6जकर्याह कने इलिशिबा ये दोन्नों जणे परमेशरा री नज़राँ च धर्मी थे, सै बड़े ध्याना ने प्रभुये रे हुक्मा जो कने विधियां जो मन्नां थे। 7पर इलिशिबा रे औत्र हुणे रिया वजह ने तिन्हारे कोई न्याणा नीं था, कने हुण सै दोन्नों जणे बड़े स्याणे हुईगरे थे। 8ताहली जे जकर्याह अपणी मण्डलिया री बारी औणे पर यरूशलेम रे मन्दरा च याजकां रा काम्म करी रां था। 9तां याजकां रे रीति-रिवाजां रे मुतावक तिसरे नौआं पर चिट्ठी निकल़ी कने तिसरा नौं आया भई प्रभुरे मन्दरा च जाईने तिसरिया हजूरिया च धूप बाल़ो। 10कने ताहली जे धूप बालणे रा बगत आया ताहली मते लोक मन्दरा रे अंगणा च कट्ठे हुईने प्राथना करी कराँ थे। 11ताहली जे जकर्याह प्रभुरे मन्दरा च था, तिस बगत तिने प्रभुरा इक स्वर्गदूत ‌धूप बालणे री चौकिया रे सज्जे पासे खढ़िरा देख्या। 12जकर्याह तिस स्वर्गदूता जो देखीने घबराईग्या कने डरा रे मारे तिसरा बड़ा बुरा हाल था। 13पर तिने स्वर्गदूते जकर्याह ने गलाया, “जकर्याह डरदा मत, इक पुत्र पाणे रे खातर तैं सै जे प्राथना परमेशरा ने कित्ती री, सै तेरी प्राथना परमेशरे सुणीलरी; कने तेरी जनाना इलिशिबा ते तिज्जो इक पुत्र जमणा! कने तू तिस पुत्रा रा नौं यूहन्ना रखयां। 14तिज्जो त बड़ा नन्द कने खुशी हूणी, कने सौगी तिसरे जमणे ते मते सारयां लोकां मौज करनी, 15तिस परमेशरा रे खातर खास काम्म करना। तिस कदीं बी अंगूरां रा रस कने कोई नशीली चीज़ नीं पीणी; कने तिस अपणी मौआ रे गर्भा ची पवित्र आत्मा ते भरी जाणा। 16ताहली जे तिस बड्डे हुई जाणा, ताहली तिस अपणे प्रचारा ते मते सारयां इस्राएली लोकां जो तिन्हारे प्रभु परमेशरा पासे लैई औणा। 17यूहन्ना परमेशरा रे सेवक एलिय्याह री आत्मा च कने सामर्थया च भरी ने तिसरे अग्गे-अग्गे चलना। ताकि परमेशरा रे औणे ते पैहले लोकां रे मनां जो परमेशरा जो ग्रहण करने खातर त्यार करी सक्को। तेरे पुत्रा, मौ-बुढ़यां रा मन अपणे बच्चयां री तरफ फेरना, कने तिस हुक्मा जो नीं मनणे औल़े लोकां जो हुक्म मनणे रा ज्ञान सखाणा।”

18जकर्याह स्वर्गदूता ते पुच्छया, “येढ़ा किछ हूणा, इसा गल्ला जो हऊँ कियां जाणी सक्कां? काँह्भई ये गल्ल बौहत हैरान करने औल़ी कने भरोसा करने लायक नीं, काँह्भई हऊँ त बुड्डा हुईगरा, कने मेरी जनाना बी बुड्डी हुईगरी।”

19फेरी स्वर्गदूते तिसजो जबाब दित्या, “मेरा नौं जिब्राईल आ, हऊँ साक्षात परमेशरा रिया हजूरिया च खढ़िरा रेआं, तिने इ मिन्जो तुन्हांने गल्ल बात करने कने तिज्जो ये खुशखबरी सुनाणे खातर भेजीरा। 20कने इस बगत मैं जो किछ तेरने गलाया, तिस पर तैं भरोसा नीं कित्या, इस खातर त्याड़ुआं तक जे सै बालक नीं जम्मया, तिन्हां दिनां तक तू अपणे मुँआं ते नीं बोल्ली सकगा। काँह्भई सै गल्लां जे मैं गलाईयां सै गल्लां अपणे बगता च पूरी हूणी।”

21इस सारे बगता च, लोक जकर्याह रा मन्दरा ते बाहर औणे रा इन्तजार करया राँ थे, तिन्हांजो हैरानी हुईराँ थी भई तिसजो मन्दरा रे अन्दर इतणी देर काँह लगी राईं। 22ताहली जे सै बाहर निकल़ीने आया तां सै तिन्हां लोकां ने नीं गलाई सकया। कने सै जाणी गै भई तिने पक्का मन्दरा च कोई दर्शण देख्या, सै तिन्हाजो ईशारा करदा रेआ, कने मुँआं ते बोल्ली नीं सकया।

23ताहली जे जकर्याह री सेवा रे दिन पूरे हुईगे, तां सै यरूशलेम छड्डिने अपणे घरा जो चलिग्या। 24किछ दिनां ते बाद छोड़े इ तिसरी जनाना इलिशिबा भारहत्थी हुई; कने पंज्जां महीनेयां तक किसी ने नीं मिली कने घरें इ रैई, 25कने गलाणे लगी, “प्रभु कितना दयालु आ!” भई “मेरे कोई न्याणा नीं था, पर तिने मांह पर किरपा करीने मिन्जो लोकां च औत्तर हुणे री बेईज्जतिया ते बचाया।”

यीशुये रे जन्मा री भविष्यवाणी

26इलिशिबा रे भारहत्थी हुणे रे छेऊंये महीने, परमेशरे जिब्राईल नौआं रे स्वर्गदूता जो गलील प्रदेशा रे नासरत नगरा च, 27मरियम नौआं री इक क्वारी कुड़िया रे घरें भेज्या। तिसारी मंगणी यूसुफ नौआं रे माहणुये ने हुई थी, सै जे राजा दाऊद रे खानदाना रा था। 28जिब्राईल स्वर्गदूत मरियम रे सामणे खड़ीग्या कने तिसारी बडयाई करदे हुए बोलणे लगया, “नमस्कार! तेरे ऊपर प्रभुरी किरपा हुई, कने प्रभु तू सौगी आ।”

29इसा गल्ला जो सुणीने मरियम बौहत हैरान हुईने सोच बिचार करने लगी भई स्वर्गदूता री गलाई रिया गल्ला रा क्या मतलब हुया। 30स्वर्गदूते तिसाजो गलाया, “मरियम तू डरदी मत, काँह्भई परमेशर तेरते बौहत खुश आ। 31तू गर्भवति हूणा, कने तेरते इक बालक जमणा; कने तू तिसरा नौं यीशु रखयां। 32तिस सबनीं च महान हूणा, कने परमप्रधान परमेशरा रा पुत्र कहलाणा। प्रभु परमेशरा तिसजो तिसरे पूर्वज राजा दाऊद री राजगद्दी देणी। 33कने तिस इस्राएली लोकां रे राजा हूणा कने याकूब रे घराने पर सदा खातर राज करना; कने तिसरा राज कदीं खत्म नीं हूणा!”

34मरियमे स्वर्गदूता ने गलाया, “हऊँ त इक कवारी कुड़ी, मेरे न्याणा कियां हूणा?” 35इसा गल्ला पर स्वर्गदूते तिसाजो जबाब दित्या, “पवित्र आत्मा तेरे ऊपर उतरना, कने परमप्रधान परमेशरा री महान सामर्थ तू पर छाणी। इस खातर तेरते सै जे न्याणा जमणा सै पवित्र हूणा, कने सै परमेशरा रा पुत्र कहलाया जाणा। 36कने सुण, इक गल्ल होर दस्सूं, तेरी रिश्तेदार इलिशिबा, स्याणदे बगता च बी भारहत्थी हुईगी। लोक तिसाजो औत्र बोलां थे, पर ये तिसारे भारहत्थी हुणे रा छेंऊआं महीना हुईगरा। 37काँह्भई तू हैरान मत हुन्दी, परमेशर सब किछ करी सक्कां!”

38इसा गल्ला पर मरियमे गलाया, “हऊँ त प्रभुरी दासी, सब किछ तेरा इ बोल्लीरा ओ।” तिसते बाद स्वर्गदूत तिसा लाते चलिग्या।

मरियम रा इलिशिबा ने मिलणे जाणा

39फेरी किछ दिनां ते बाद मरियम त्यार हुईने यहूदा प्रदेशा रे पहाड़ी इलाके च इक नगरा जो गई। 40कने तिसा जगह जे जकर्याह रैयी कराँ था। तिसरे घरें जाईने तिसे तिसरिया जनाना इलिशिबा जो नमस्ते किति। 41येढ़ा हुया भई जियां जे इलिशिबे, मरियमा री नमस्ते सुणी, तियां इ न्याणा तिसारे गर्भा च फुरने लगया, कने इलिशिबा पवित्र आत्मा ने भरीगी। 42कने सै खुश हुईने जोरा री अवाज़ा च मरियमा ने बोलां इ, “परमेशरे तिज्जो सारियां जनानां च बौहत आशीषित कित्या, कने तेरा न्याणा बी आशीषित हुया! 43ये कितणी बड्डी ईज्जता री गल्ल इ भई मेरे प्रभुरी अम्मा मेरे साई इक हल्की जनाना ने मिलणे जो आई! 44तियां जे तैं मिन्जो नमस्ते किति, तियां इ तेरी अवाज़ सुणी ने मेरे पेट्टा च न्याणा मौज्जा ने उछल़णे लग्या! 45तिज्जो परमेशरे आशीषित कित्या, काँह्भई तैं विश्वास कित्या भई जो किछ प्रभुये तिज्जो गलाया, सै पूरा हूणा।”

मरियम रा प्रभुरे खातर गीत गाणा

46फेरी मरियमे गलाया :

“हऊँ परमेशरा री स्तुती कराँ इ।

47हऊँ मेरा छुटकारा करने औल़े

परमेशरा च आनन्दित हुई,

48भई तिन्हे अपणी दासिया रे हल्के मना पर नज़र कित्ती,

कने अज्जा ते हर इक जुगा रे लोकां मिन्जो धन्या बोलणा।

49कने तिस सर्वशक्तिमान परमेशरा रा नौं पवित्र आ,

तिने मेरे खातर बड्डे-बड्डे काम्म कित्तिरे।

50कने तिसरी दया तिन्हां लोकां पर बणी रैयां इ,

सै जे पीढ़िया ते पीढ़िया तक तिसते डरां ए।

51परमेशर अपणे शक्तिशाली सामर्था ने बड्डे-बड्डे काम्म कराँ!

देक्खा, सै लोक जे अपणिया समझा पर घमण्ड कराँ थे, परमेशरे तिन्हाजो हराईत्या।

52परमेशरे राजयां जो तिन्हां रिया राजगद्दियां ते थल्ले त्वारी दित्या;

कने पिड़ितां जो परमेशरे ऊच्चे संघासणां पर बठाल़ीने आदर दित्या।

53तिन्हे भूख्यां जो बधिया रोटी ख्वाईने रजाया

कने सेठां जो खाली हत्थ बाहर कड्डया।

54परमेशरे इस्राएल रे लोकां री मदद किति,

काँह्भई तिने अपणे वायदे जो याद कित्या,

55तेढ़ा जे परमेशरे अहांरे पूर्वजां यनि अब्राहम कने तिसरे कुलबे रे परति सै जे वायदा कित्या था तिस्सो पूरा कित्या।”

56मरियम तकरीवन तिन्न महीने इलिशिबा सौगी रैयी, इसते बाद सै अपणे घरा जो बापिस आई गी।

बपतिस्मा देणे औल़े यूहन्ने रा जन्म

57फेरी इलिशिबा रे न्याणा जमणे रा बगत पूरा हुया, कने तिसे इक मुण्डुये जो जन्म दित्या। 58कने ये खबर इकदम तिसारे पड़ेसियां कने रिस्तेदाराँ च फैलीगी भई प्रभुये स्याणदिया बेला बी तिसाजो न्याणा देईने बौहत दया किति, इस खातर लोकें तिसा सौगी मिलीने खुशी मनाई।

59ताहली जे सै मुण्डुये अट्ठां दिनां रा हुया, तां यहूदी जातिया री रशमा रे मुतावक सारे रिश्तेदार कने मित्र तिसरा खतना (नामकरण) करने खातर कट्ठे हुए। सै तिस मुण्डुये रा नौं तिसरे पिता रे नौआं रे मुतावक जकर्याह रखणे लगे। 60पर इलिशिबे येढ़ा नौं रखणे रे खातर मना कित्या कने गलाया, “इस मुण्डुये रा नौं यूहन्ना रखा।”

61इसा गल्ला पर सारेयां लोकें रेहान हुईने पुच्छया, “कां? तेरे परिवारा च इस नौआं ते त कोई बी निआं।” 62फेरी तिन्हे तिस मुण्डुये रे पिता जो ईशारा करीने पुच्छया भई तू इसरा क्या नौं रखणा चाँह। 63तिने लिखणे रे खातर तख्ती मंगी, कने सारेयां लोकां जो हैरानिया च पाईने तिने लिख्या, “इस मुण्डुये रा नौं यूहन्ना इ हाया।” 64इकदम इ जकर्याह बोलणे लगया, कने सै परमेशरा रा गुणगान करने लगया। 65कने तिसरे अखा-बखा रे रैहणे औल़े जितने लोक थे सै सारे रेहान हुईगे; कने ऊथी केढ़ी-केढ़ी गल्लां हुईयां इसरा गलाण बोलण यहूदिया प्रदेशा रे सारे पहाड़ी लाके च फैल्लीग्या। 66सारे सुणने औल़े लोक अपणे-अपणे मना च सोच-बिचार करने लगे, “ये मुण्डु केढ़ा हूणा?” काँह्भई ये पक्की गल्ल इ भई प्रभुये री सामर्थ तिस मुण्डुये पर थी।

जकर्याह रा भविष्यवाणी करना

67यूहन्ना रा पिता जकर्याह पवित्र आत्मा ने भरीग्या कने तिने येढ़ि भविष्यवाणी किति :

68“प्रभु इस्राएल रे परमेशरा री स्तुति करा,

काँह्भई सै अपणे लोकां री मदद करने आईरा कने तिन्हाजो बचाईरा।

69कने अपणे सेबक राजा दाऊद रे कुल़ा च अहांरे खातर

इक महान छुटकारा करने औल़े जो भेज्या,

70तियां जे तिने बौहत पैहले ते अपणे

पवित्र भविष्यवक्तयां रे जरिये बोल्या था,

71भई सै अहांरे दुश्मणां ते,

कने अहांते नफरत करने औल़यां ते अहांजो बचांगा।

72भई अहांरे पूर्वजां पर दया करीने

अपणे पवित्र वायदे जो पूरा करो,

73सै वायदा जे तिन्हे अहांरे पूर्वज

अब्राहम सौगी कित्या था।

74कने तिसरे बरदाना ते अहें अपणे दुश्मणां रे

चुंगल़ा ते छडुआईने बिणा डरे

75तिसरे सामणे पवित्रता कने प्रभुरी इच्छा रे मुतावक

जिन्दगी भर तिसरी सेवा करदे रैईये।

76कने बालक, तू परमप्रधान परमेशरा री भविष्यवाणी करने औल़ा माहणु पुकारया जाणा,

काँह्भई तू प्रभुरे अग्गे-अग्गे चलना कने तिसरे औणे खातर लोकां जो त्यार करना।

77तू अपणयां लोकां जो ये सखाणा भई

सै कियां तिन्हांजो छुटकारा देणे रे खातर तिन्हांरे पापां जो माफ कराँ।

78ये अहांरे परमेशरा री दया री वजह ते हुणा,

तियां जे सूरज अहांजो रौशनी देणे रे खातर चमकां, तियां इ मसीह बी अहांले स्वर्गा ते औणा,

79भई सै जे परमेशरा जो नीं जाणदे सै तिन्हां लोकां साई ये सै जे अन्धेरे च बैठिरे, कने मौती ते डरीरे, तिन्हां पर परमेशरा रे सन्देशा री लोय चमको।

कने तिस अहांरी अगुवाई करनी, ताकि अहें परमेशरा सौगी शान्तिया ने रैई सक्को।”

80कने सै बालक यूहन्ना कद काठिया च कने आत्मा रिया शक्तिया च मजबूत हुन्दा गया, कने बड्डा हुणे ते बाद तदुआं तक जे तिने इस्राएल रे लोकां च अपणी सेवा नीं शुरु किति, तदुआं तक सै जंगला च रैया।

Listen to लूका 1