Manadonese Malay - 2017 LAI (NT) no drama

Manadonese Malay - 2017 LAI (NT) drama

Perjanjian Baru Bahasa Manado @ Lembaga Alkitab Indonesia 2017

Abis itu, Yesus pigi ka daera Yudea deng daera di sabla kuala Yordan. Di situ lei ada banya orang datang bakumpul pa Dia. Kong sama deng biasa, Yesus mangajar lei pa dorang. Ada bebrapa orang dari golongan Farisi yang datang mo jebak pa Yesus, dorang batanya, “Kalu mo iko torang pe atoran agama, bole so tu laki-laki yang so kaweng se cere tu dia pe bini?”
Yesus manyao pa dorang, “Apa so tu atoran yang Musa da kase pa ngoni?”
Dorang bilang, “Musa kase isin pa laki-laki for kase cere de pe bini deng cara beking surat cere.”
Kong Yesus manyao pa dorang, “Musa da tulis tu atoran lantaran ngoni pe kapala batu. Mulai ni dunia ada, Tuhan Allah beking laki-laki deng parampuang. So itu, tu laki-laki mo se tinggal tu de pe papa deng mama, kong dia hidop sama-sama deng de pe bini, kong dorang dua itu jadi satu. Jadi dorang dua so nyanda hidop sandiri-sandiri, mar so jadi satu. So lantaran itu, tu laki-laki deng parampuang yang Tuhan Allah so beking jadi satu, nimbole manusia mo kase cere.”
Abis itu, Yesus deng De pe murit-murit maso ka satu ruma. Di situ Yesus pe murit-murit batanya lei pa Dia tentang tu De pe ajaran tadi.
Kong Yesus manyao pa dorang, “Kalu ada laki-laki yang kase cere de pe bini kong kaweng ulang deng parampuang laeng, dia so bersina. Bagitu lei deng tu bini yang kase cere de pe laki kong kaweng ulang deng laki-laki laeng, dia so bersina.”


Satu kali ada orang-orang bawa anak-anak kacili pa Yesus supaya Dia taru De pe tangan pa dorang for se berkat, mar Dia pe murit-murit cuma da mara akang pa dorang yang da bawa anak-anak kacili itu. Pe lia itu, Yesus mara kong bilang pa dorang, “Kase biar jo tu anak-anak itu datang pa Kita! Ngoni jang larang pa dorang lantaran tu orang-orang sama deng ini yang mo jadi orang-orang dari Tuhan Allah yang Berkuasa sbagai Raja. Kita bilang pa ngoni, sapa jo yang nyanda trima pa Tuhan Allah sama deng anak-anak kacili yang dong pe hati polos, so dorang itu yang nyanda mo jadi orang-orang dari Tuhan Allah yang Berkuasa sbagai Raja.”
Abis itu, Yesus polo pa tu anak-anak itu. Dia taru De pe tangan pa dorang kong se berkat pa dorang.


Waktu Yesus mulai se trus De pe perjalanan, ada satu orang balari kong datang berlutut di muka pa Dia. Tu orang itu batanya, “Guru yang pangbae, apa yang kita musti beking supaya kita bole mo dapa tu hidop kekal?”
Yesus manyao, “Kiapa so ngana bilang kalu Kita ini pangbae? Nyanda ada satu orang yang pangbae, cuma Tuhan Allah yang pangbae. Ngana so tau tu Tuhan Allah pe prenta-prenta ini: jang babunung, jang bersina, jang bapancuri, jang basaksi dusta, jang batipu pa orang, deng lei musti hormat pa ngana pe papa deng mama!”
Kong tu orang itu bilang pa Yesus, “Guru, samua tu prenta itu kita so beking dari lei kita masi nyong-nyong.”
Mar Yesus haga pa orang itu deng rasa kasiang kong bilang pa dia, “Mar masi ada satu yang ngana blum beking. Pigi jo kong jual samua tu ngana pe harta, kong tu doi ngana kase pa orang-orang miskin, deng bagitu Tuhan mo kase pa ngana harta di sorga. Abis itu, datang jo kamari kong iko pa Kita.”
Pe dengar tu Yesus da bilang itu tu orang itu trus murung, kong dia pigi deng hati sedi lantaran dia pe kaya skali.
Kong Yesus haga pa De pe murit-murit kong bilang pa dorang, “Pe susa skali orang kaya mo jadi orang dari Tuhan Allah yang Berkuasa sbagai Raja.”
Dia pe murit-murit heran da dengar tu Dia da bilang. Mar Yesus bilang lei, “Kita pe anak-anak, pe susa skali for orang mo trima tu Tuhan Allah mo Berkuasa sbagai Raja pa dia. Masi lebe gampang satu ekor onta mo maso ka lobang jarum, daripada orang kaya mo trima tu Tuhan Allah for mo Berkuasa sbagai Raja pa dia.”
Pe dengar itu, dorang jadi lebe heran kong dorang baku bilang satu deng laeng, “No kalu bagitu, sapa dang tu bole mo slamat dari hukuman dosa?”
Yesus haga pa dorang kong babilang, “For manusia nyanda mungkin mo se slamat de pe diri sandiri, mar for Tuhan Allah, Dia bole se slamat pa manusia lantaran samua Tuhan Allah bole beking.”
Kong Petrus babilang pa Yesus, “Guru, torang ini so kase tinggal samua tu tong pe kepunyaan for iko pa Guru.”
Yesus manyao, “Kita bilang pa ngoni, sapa jo yang so se tinggal tu de pe ruma, de pe kaka ade laki-laki ato parampuang, de pe mama ato de pe papa, de pe anak-anak ato de pe kobong lantaran dia da iko pa Kita deng lantaran tu Kabar Bae, skarang ini dia mo trima ulang sratus kali lipa dari tu dia da kase tinggal: ruma, kaka ade laki-laki ato parampuang, mama, anak deng kobong, mar biar lei bagitu dia tetap mo dapa banya siksa, kong nanti dia lei mo dapa tu hidop kekal. Mar banya orang yang orang ja bilang orang penting, dorang itu nyanda mo jadi apa-apa, kong tu orang yang orang ja bilang nyanda penting, dorang itu tu mo dapa hormat.”


Yesus deng Dia pe murit-murit samantara bajalang ka kota Yerusalem. Waktu itu Yesus da bajalang di muka. Dia pe murit-murit kuatir deng lei tu orang-orang yang da iko pa Dia dari blakang so tako. Yesus pangge lei tu De pe dua blas murit kong bilang pa dorang apa tu mo jadi pa Dia. Yesus bilang, “Torang skarang da bapigi ka Yerusalem. Di sana, orang mo srahkan Anak Manusia pa imam-imam kapala deng ahli-ahli Taurat, kong dorang mo ambe keputusan for kase hukum mati pa Dia. Dorang mo srahkan Dia pa orang-orang bukang Yahudi. Dorang mo sosere pa Dia, mo luda akang, mo cambok kong mo bunung pa Dia. Mar de pe hari katiga, Dia mo hidop ulang.”


Abis itu Yakobus deng Yohanes, tu Zebedeus pe anak-anak, badekat pa Yesus kong bilang pa Dia, “Guru, ada yang torang mo minta pa Guru, kong kalu bole, Guru iyo akang.”
Yesus batanya pa dorang, “Apa so tu ngoni suka mo minta dari pa Kita?”
Kong dorang manyao, “Bagini kwa, Guru. Nanti kalu Guru so jadi Raja kong berkuasa, torang minta pa Guru supaya torang dua bole dudu di sabla pa Guru, tu satu di sabla kanan kong tu satu lei di sabla kiri.”
Yesus manyao, “Ngoni nyanda mangarti deng apa tu ngoni da minta. Kita nanti mo dapa banya siksa, kong apa ngoni mampu mo pikul tu siksa sama deng tu Kita mo pikul, sama deng mo minum tu cawan pendritaan yang Kita musti minum ato dapa baptis sama deng tu baptisan yang Kita da trima?”
Kong dorang manyao, “Torang mampu.”
Trus Yesus bilang pa dorang, “Memang ngoni mo pikul tu siksa sama deng tu Kita mo trima deng mo dapa baptis sama deng tu baptisan yang kita da trima. Mar sapa tu mo dudu di sabla kanan deng kiri pa Kita, itu bukang Kita pe hak for ator. Tu tampa itu Tuhan Allah so se sadia for orang-orang yang Dia so tentukan.”
Waktu tu spulu murit dengar tu Yakobus deng Yohanes da minta, dorang jadi mara pa dong dua. So itu, Yesus pangge pa dorang samua kong bilang, “Ngoni tau kalu tu pemimpin-pemimpin dari bangsa-bangsa yang nyanda kanal pa Tuhan Allah, dorang da kuasai deng ja beking siksa tu dong pe rakyat. Kong tu dorang pe penguasa-penguasa lei ja tekan tu rakyat for beking tu dorang pe mau. Mar ngoni jang sama deng dorang! Sapa tu suka jadi orang basar di antara pa ngoni, dia musti jadi orang yang ja layani pa ngoni. Kong sapa yang suka jadi paling penting di antara ngoni, dia musti ja layani samua orang sama deng budak. Bagitu lei deng tu Anak Manusia. Tu Anak Manusia datang ka dunia bukang for orang mo layani, mar Dia datang for layani banya orang deng datang for srahkan Dia pe diri for tubus banya orang pe dosa.”


Yesus deng Dia pe murit-murit sampe di kota Yerikho. Waktu dorang so mo kaluar dari kota Yerikho, ada banya orang baku iko deng dorang. Ada lei di situ satu orang buta da dudu baminta-minta di pinggir jalang. Tu orang itu de pe nama Bartimeus, tu Timeus pe anak. Waktu dia dengar Yesus tu orang Nazaret da balewat, dia babilang deng suara kuat, “Yesus, raja Daud pe keturunan, kasiang akang dang pa kita!”
Pe dengar dia babilang bagitu, tu orang banya togor pa dia supaya badiam.
Mar dia tare cuma babilang deng suara lebe kuat. “Raja Daud pe keturunan, kasiang akang dang pa kita!”
Pe dengar itu, Yesus brenti kong bilang, “Pangge jo kamari pa dia!”
So itu dorang pangge tu orang buta itu kong bilang pa dia, “Kase kuat ngana pe hati kong badiri jo, Yesus da pangge pa ngana.”
Kong Bartimeus se lapas de pe juba, dia iko badiri kong pigi pa Yesus. Kong Yesus batanya pa dia, “Apa dang yang ngana suka Kita mo beking for ngana?”
Bartimeus manyao, “Guru, kita suka supaya kita bole mo balia.”
Kong Yesus bilang pa dia, “Pigi jo, ngana percaya pa Kita jadi skarang ngana so bole balia.” Waktu itu jo, Bartimeus so bole balia, kong dia iko pa Yesus.

Listen to Markus 10