Bulu ntam pɔpwɛ; Nkonya

Yesu lɔkʋsʋ tsu ɩnʋ yɔ Yudea ɔmátɔ, Yordan ntsu ɔbɩn. Ɔdɔm bɛtra befia bomli mʋ, ɔlɛtra suna amʋ́ atɔ fɛ alɩá ɔtɔbwɛ yaɩ.
Farisifɔ akʋ bɛba mʋ wa, bʋdekleá bɔ́sɔ mʋ kɩ. Mʋ́ sʋ bɛfɩtɛ mʋ bɛɛ, “Anɩ Mbla lɛha ɔkpa ánɩ́ oyin ɔbɛ́talɩ kina mʋ ka?”
Yesu lɛfɩtɛ amʋ́ ɔbɛɛ, “Nkalɩ anɩ nain Mose lɔwa mbla ha mlɩ?”
Bɛlɛ mʋ́ ɔnɔ bɛɛ, “Mose lɛha ɔkpa ánɩ́ oyin ɔwanlɩn ɔkakina ɔwʋlʋ pʋkina mʋ ka.”
Yesu lɛbla amʋ́ ɔbɛɛ, “Mlɩ klʋntɔ-odwin sʋ Mose lɔwanlɩn mbla anfɩ ha mlɩ. Tsu brɛá Bulu lɛlɛ ɔyɩ a, ɔtsɩ mʋ́a oyin ɔlɔbwɛ. Ɩnɩ sʋ oyin obótu si mʋ sɩ mʋa mʋ yin yɛmanta mʋ kasʋ, amʋ́ abanyɔ bɔ́bwɛ ɔyʋlʋ kʋlɛ nɩ. Bʋtra bʋmegyi abanyɔ, mboun babwɛ ɔbakʋlɛ. Ɩnɩ sʋ aha ánɩ́ Bulu labwɛ amʋ́ kʋlɛ a, ɔhaa mámaɩn amʋ́ abasʋ.”
Brɛá beyinki ba woyitɔ a, Yesu akasɩpʋ amʋ bɛtra fɩtɛ mʋ asʋn tsu asʋn anfɩ ɩwɩ. Yesu lɛbla amʋ́ ɔbɛɛ, “Nɩ oyin okina mʋ ka layetsia ɔtsɩ bamba a, alatɔ mbʋa. Alɩ kɛn nɩ ɔtsɩ okina mʋ klu layetsia oyin bamba a, alatɔ mbʋa nɩ.”


Aha akʋ bɛkpa nyebi ba Yesu bɛɛ, ɔpʋ ɩbɩ dɩnka amʋ́sʋ, tamɛ mʋ akasɩpʋ amʋ bɔwa ɩyɩn wa amʋ́. Brɛá Yesu lowun a, ɔblɔ lɛkɩta mʋ. Mʋʋ ɔlɛbla akasɩpʋ amʋ ɔbɛɛ, “Mlɩha nyebi amʋ ɔkpa abʋba mɩ wa. Mlɩmátin amʋ́ ɔkpa, tsufɛ aha anfɩ odu bʋ Bulu iwiegyi amʋ nɩ. Ɔnɔkwalɩ ndɛ mlɩ bla. Ɔha ánɩ́ ɔmɔhɔ Bulu iwiegyi amʋ fɛ kebi a, omóowie mʋ́tɔ.” Mʋʋ ɔlɛlata amʋ́ puta, pʋ ɩbɩ dɩndɩnka amʋ́sʋ, oloyula amʋ́ a.


Brɛá Yesu lɔpʋ ɔkpa ɔyɔ a, oyin ɔkʋ lɛsrɩ ba bɛda akpawunu mʋ ayabitɔ fɩtɛ mʋ ɔbɛɛ, “Osunapʋ yile, ntɔ nɔ́bwɛ asa nénya nkpa ánɩ́ ɩtamata?”
Yesu lɛfɩtɛ mʋ ɔbɛɛ, “Ntogyi sʋ fʋdɛ mɩ tɩ ɔha yile? Ɔhaa megyi ɔha yile, nkɛtɩ Bulu nkʋlɛ. Yɛ fʋyin Bulu mbla amʋ dodo? Ɔbɛɛ, mámɔ ɔha, mátɔ mbʋa, máwi atɔ, máka asʋn dɩnka fʋ basʋ, másisi ɔha, bu fʋ sɩ mʋ́a fʋ yin.”
Oyin amʋ lɛbla mʋ ɔbɛɛ, “Osunapʋ, tsu mɩ nyebitɔ ɔpá ndɛ ɩnɩ fɛ́ɛ́sʋ gyi.”
Yesu lɛkɩ mʋ diin, mʋ asʋn lɔwa mʋ ɔdwɛ. Mʋʋ ɔlɛbla mʋ ɔbɛɛ, “Ɩlasi toku kʋlɛá fɔ́bwɛ. Yɛfɛ fʋ ɩwɩsʋ atɔ fɛ́ɛ́, afʋye kɔba amʋ ha ahianfɔ, mɛnɩ fénya siadɩɛ ɔsʋsʋ. Fɔbwɛ mʋ́ ta a, ba afʋbobuo mɩ.” Brɛá oyin amʋ lonu asʋn anfɩ a, ɩwɩ lowu mʋ. Mʋ́ sʋ ɔlɛnatɩ diin, tsufɛ ɔhɩɛ ɔbʋ atɔ.
Yesu lɛkɩ bomli, ɔlɛbla mʋ akasɩpʋ amʋ ɔbɛɛ, “Ɩbɛ́hɩɛ wa ɔnlɩn asa ɩwɩ onyapʋ obówie Bulu iwiegyi amʋtɔ!”
Brɛá akasɩpʋ amʋ bonu asʋn anfɩ a, ɔnɔ lobwie amʋ́. Tamɛ Yesu lɛla bla amʋ́ ɔbɛɛ, “Mɩ abi, Bulu iwiegyi amʋtɔ wie ɩbɛ́hɩɛ wa ɔnlɩn! Ɩlɔpɔn ha kpɔsɔ ánɩ́ ɔbɔ́tsʋn ɔbɩn-atɔ ɔbɔtɔ, dʋn ánɩ́ ɩwɩ onyapʋ obówie Bulu iwiegyi amʋtɔ.”
Asʋn anfɩ lɛha ɔnɔ lɛhɩɛ bwie amʋ́. Mʋ́ sʋ bɛfɩtɛ aba bɛɛ, “Mʋmʋ ma mɛɛ Bulu ɔbɔ́hɔ nkpa?”
Yesu lɛkɩ amʋ́ diin, ɔlɛbla amʋ́ ɔbɛɛ, “Tɔá ɩdʋn nyankpʋsa bwɛ mɔdʋn Bulu, tsufɛ Bulu mʋ́ tɛtalɩ bwɛ togyitɔ.”
Mʋʋ Petro lɛbla mʋ ɔbɛɛ, “Yɛ anɩ mʋ́ anɩlasi togyitɔ tswɩ bobuo fʋ o!”
Yesu lɛbla mʋ ɔbɛɛ, “Ɔnɔkwalɩ ndɛ mlɩ bla. Ɔhagyiɔha ánɩ́ olesi mʋ woyi, mʋ apio, mʋ sɩ mʋa mʋ yin, mʋ abi ntɛ mʋ ɔsʋlʋ ɔmagya, mɩa mɩ asʋn wanklaan amʋ sʋ a, ɔbɛ́lanya mʋ woyi, mʋ apio, mʋ ayin, mʋ abi pʋ́ mʋ agyapadɩɛ amʋ odu tse lafa sei. Bɛ́dɩnka mʋsʋ ɛ sei, tamɛ obénya nkpa ánɩ́ ɩtamata brɛ amʋʋ ɩba amʋtɔ. Tamɛ agyankpapʋ tsɔtsɔɔtsɔ bébemli amapʋ, amapʋ ɛ bébemli agyankpapʋ.”


Yesu mʋa mʋ akasɩpʋ amʋ bɔpʋ ɔkpa bɔyɔ Yerusalem wulutɔ, ogyankpa. Ɩlɔwa amʋ́ wanwan, ifu lɛkɩta aha amʋʋ bʋbuo amʋ́ amʋ. Mʋʋ ɔlɛkpa akasɩpʋ duanyɔ amʋ ya ɩtsɛtɔ, ɔlɛtra bla amʋ́ tɔá ɩbɛ́ba mʋsʋ. Ɔbɛɛ, “Mlɩnu! Nɩ awie Yerusalem a, bɛ́lɛ mɩ, Nyankpʋsa-Mʋ-Bi anfɩ ha Bulu igyi ahapʋ dɛhɛn pʋ́ Mose mbla asunapʋ. Bɛ́ha mɩ lowu ɩpɔn, pʋ mɩ wa aha ánɩ́ bʋmegyi Yudafɔ ɩbɩtɔ. Bɔ́bwɛ mɩ ahinla, tu atsʋnɔ wʋlɩ mɩ, nwɛn mɩ mplɩ, mɔ mɩ; tamɛ ɛkɛ sasɩ a, Bulu ɔbɔ́kʋsʋa mɩ tsu afulitɔ.”


Sebedeo abi Yakobo mʋa Yohane bɔkpʋkpɛ manta Yesu bla mʋ bɛɛ, “Osunapʋ, anɩdekleá fʋbwɛ tɔkʋ ha anɩ.”
Mʋʋ Yesu lɛfɩtɛ amʋ́ ɔbɛɛ, “Ntɔ mlɩdekle mlɩaa mbwɛ ha mlɩ?”
Bɛbla mʋ bɛɛ, “Ha anɩtɔ ɔkʋlɛ otsia fʋ gyɔpɩsʋ, ɔkʋlɛ ɛ otsia fʋ bɩnasʋ brɛá Bulu ɔwa fʋ numnyam.”
Tamɛ Yesu lɛbla amʋ́ ɔbɛɛ, “Mlɩmeyin tɔá mlɩdɛkʋlɩ! Mlɛ́talɩ wun ɩwɩɔsɩn amʋʋ nɛba bowun amʋ, ntɛ mlɛtalɩ wu lowu amʋʋ nówu amʋ?”
Bɛlɛ mʋ́ ɔnɔ bɛɛ, “Ee abɛ́talɩ.”
Mʋʋ ɔlɛbla amʋ́ ɔbɛɛ, “Mlówun ɩwɩɔsɩn amʋʋ nɛba bowun amʋ, wu lowu amʋʋ nówu amʋ ɛ, tamɛ mma tumiá nɛ́lɛ ɔha ánɩ́ obétsia mɩ gyɔpɩ ntɛ bɩnasʋ. Alɩ otsiakpa anfɩ mʋ́ ɩda gyo aha amʋʋ Bulu lala ɩnʋ yaɩ ha amʋ.”
Brɛá akasɩpʋ idu atrahɛ amʋ bonu asʋn anfɩ a, Yakobo mʋa Yohane ɩwɩ lɔwa amʋ́ ɔblɔ. Yesu lɛtɩ amʋ́ fɛ́ɛ́ ba mʋ ɩwɩ wa, ɔlɛbla amʋ́ ɔbɛɛ, “Mlɩyin ánɩ́ aha ánɩ́ obú bʋ amʋ́sʋ, bʋgyi ɔmátɔfɔsʋ agyipʋ bʋtɛhɩɛ amʋ́ aha, amʋ́ ahandɛ ɛ bʋtenya tumi amʋ́sʋ. Tamɛ mlɩtɔ mʋ́ a, ɩmába alɩ. Ɔha ánɩ́ odekleá ɔbɔ́bwɛ mlɩtɔ ɔhandɛ ɔbwɛ mlɩ fɛ́ɛ́ ɔkpábi. Nɩ mlɩtɔ ɔkʋ ɛ dekleá ɔbɔ́bwɛ mlɩ nkpa ogyapʋ a, ɔbwɛ mlɩ fɛ́ɛ́ ɔkpábi. Tsufɛ mɩ, Nyankpʋsa-Mʋ-Bi anfɩ ɛ mmɛba mbɛɛ, bʋsum mɩ. Aha osumkpa nɛba, ampʋ mɩ nkpa hɔ aha tsɔtsɔɔtsɔ nkpa.”


Boyowie Yeriko wulutɔ. Brɛá mʋa mʋ akasɩpʋ pʋ́ ɔdɔm kpɔnkpɔɔnkpɔntɩ amʋʋ bʋbuo mʋ amʋ bʋdɛdalɩ ɩnʋ a, bowun Timeo mʋ bi Bartimeo. Mʋ ansibi labwie, otsie ɔkpatɔ ɔdɛ atɔ kʋlɩ. Brɛá olonuá Yesu Nasaretyin amʋ dɛtsʋn a, ɔlɔwa kplʋn bɩ ɔbɛɛ, “Anɩ Wie Dawid mʋ na Yesu, wun mɩ nwɛ!”
Amʋ́tɔ aha tsɔtsɔɔtsɔ bɔkplʋn wa mʋ bɛɛ, ɔkpa ɔnɔ bun. Tamɛ mʋ mʋ́ ɔlɛlakplʋn dʋn alɩ ɔbɛɛ, “Anɩ Wie Dawid mʋ na, wun mɩ nwɛ!”
Yesu lesi lɩɩ, ɔlɛbla amʋ́ ɔbɛɛ, “Mlɩtɩ mʋ ha mɩ.”
Bokpoli ansibi obwiepʋ amʋ, bɛbla mʋ bɛɛ, “Fʋ klʋn ɩdɩ fʋ asɩ, afʋkʋsʋ ba. Ɔdɛ fʋ tɩ!”
Ɩnʋ oyin amʋ lɔtswɩ mʋ ɔsʋsʋ atadɩɛ tsalɩfwɩ, nwan kʋsʋ ba Yesu wa.
Yesu lɛfɩtɛ mʋ ɔbɛɛ, “Ntɔ fʋdekle fɛɛ, mbwɛ ha fʋ?”
Ɩnʋ ansibi obwiepʋ amʋ lɛbla mʋ ɔbɛɛ, “Osunapʋ, ha mɩ anwun atɔ!”
Ɩnʋ Yesu lɛbla mʋ ɔbɛɛ, “Natɩ, fʋ hogyi latsa fʋ ɩlɔ.”
Ɩnʋnʋ mʋ ansibi lobwii, ɔlɛkpla buo Yesu.

Listen to Marko 10