Sgaw Mason Bible © Bible Society of Myanmar, 1853.

ဒီးယွၤစံးဘၣ်စီၤမိၤရှ့, လဲၤဆူဖၤရိၤအအိၣ်, ဒီးစံးဘၣ် အီၤ, ယွၤပှၤဧ့ၤဘြံၤဖိအကစၢ်, စံးဝဲဒ်အံၤ, ပျၢ်ယပှၤ ဂီၢ်မုၢ်ဒ်သိးအကမၤယတၢ်တက့ၢ်. အဂ့ၢ်ဒ်အံၤ, ပျၢ် အီၤန့ၣ်နမ့ၢ်ဂ့ၢ်လိာ်, ဒီးနမ့ၢ်ဟံးန့ၢ်ဒံးအီၤဒီး, ကွၢ်ကွၢ်, ယွၤအစုအိၣ်လၢနဆၣ်ဖိကီၢ်ဖိအဒၢအလိၤ, လၢအအိၣ် လၢစံာ်ပူၤပှဲၤပူၤ, လၢကသ့ၣ်အလိၤ, လၢကသ့ၣ်ယီၤ အလိၤ, လၢကီၤလၤအူးအလိၤ, လၢဂီၤဖံးအလိၤ, ဒီး သိဒီးမဲာ်တဲးလဲးအလိၤ, တၢ်သံသတြိာ်နးမးလီၤ.
ဒီးယွၤကမၤ, ပှၤအံၣ်စရ့လးဖိ အဆၣ်ဖိကီၢ်ဖိအဒၢ လီၤဆီဒီးပှၤအဲၤကူပတူးဖိ အဆၣ်ဖိကီၢ်ဖိအဒၢန့ၣ်လီၤ. ဒီးလၢပှၤအံၣ်စရ့လးဖိအတၢ်ခဲလၢာ်အကျါန့ၣ် တၢ်တ သံဘၣ်နီတဒုဘၣ်.
ဒီးယွၤသ့ၣ်နံၤဖးသီဒီးစံးဝဲဒၣ်, ခဲဂီၤကိာ်ယွၤကမၤ တၢ်န့ၣ်တမံၤလၢကီၢ်ပူၤလီၤ. ဒီးမုၢ်ဆ့ၣ်ထီၣ်တနံၤန့ၣ် ယွၤမၤတၢ်န့ၣ်တမံၤ, ဒီးပှၤအဲၤကူပတူးဖိအဆၣ်ဖိကီၢ် ဖိအဒၢန့ၣ်သံဝဲခဲလၢာ်လီၤ.မ့မ့ၢ်ပှၤအံၣ်စရ့လးဖိအဆၣ် ဖိကီၢ်ဖိအဒၢန့ၣ်တသံဘၣ်နီတဒုဘၣ်.
ဒီးဖၤရိၤမၢလီၤတၢ်, ဒီးကွၢ်ကွၢ်, ပှၤအံၣ်စရ့လးဖိ အဆၣ်ဖိကီၢ်ဖိအဒၢန့ၣ်တသံဘၣ်နီတဒုဘၣ်. ဒီးဖၤရိၤ မၤကိၤအသး, ဒီးတပျၢ်ဘၣ်ပှၤဂီၢ်မုၢ်ဘၣ်.
ဒီးယွၤစံးဘၣ်စီၤမိၤရှ့ဒီးစီၤအၤဟရိၣ်, ဟံးန့ၢ်ဖၣ်က ပူၤအဖၣ်ဆါတၢၤဒုၣ်တဖၣ်, ဒီးမ်စီၤမိၤရှ့ဖှံထီၣ်ဆူမူခိၣ် လၢဖၤရိၤအမဲာ်ညါန့ၣ်တက့ၢ်. ဒီးကကဲထီၣ်တၢ်က မူၣ်လၢကီၢ်အဲၤကူပတူးဒီဘ့ၣ်ညါအပူၤ, ဒီးကကဲထီၣ် တၢ်ဝ့တၢ်ကျူၤဖးထီၣ်လၢတၢ်ပူၤလီၢ်လၢ ပှၤကညီအ လိၤ, ဒီးလၢဆၣ်ဖိကီၢ်ဖိအဒၢအလိၤ လၢကီၢ်အဲၤကူ ပတူးဒီဘ့ၣ်ညါအပူၤလီၤ.
ဒီးအဝဲသ့ၣ်တဖၣ်န့ၣ် ဟံးန့ၢ်ဖၣ်ကပူၤအဖၣ်ဆါ, ဒီး ဆၢထၢၣ်လၢဖၤရိၤအမဲာ်ညါ, ဒီးစီၤမိၤရှ့ဖှံထီၣ်ဝဲဆူမူ ခိၣ်, ဒီးကဲထီၣ်ဝဲလၢတၢ်ဝ့တၢ်ကျူၤဖးထီၣ်လၢတၢ်ပူၤ လီၢ်လၢပှၤကညီအလိၤ, ဒီးဆၣ်ဖိကီၢ်ဖိအလိၤလီၤ.
ဒီးပှၤကွဲးလံာ်တဖၣ်န့ၣ် ဆၢထၢၣ်ဝဲလၢစီၤမိၤရှ့အ မဲာ်ညါတကဲဘၣ်လၢတၢ်ဝ့တၢ်ကျူၤအဃိလီၤ. အဂ့ၢ် ဒ်အံၤ, တၢ်ဝ့တၢ်ကျူၤန့ၣ်အိၣ်ဝဲလၢပှၤကွဲးလံာ်အလိၤ, ဒီးလၢပှၤအဲၤကူပတူးဖိခဲလၢာ်အလိၤလီၤ.
ဒီးယွၤဒုးဆူၣ်ထီၣ်ဖၤရိၤအသး, ဒီးတကနၣ်ဘၣ်အ ကလုၢ်, ဒ်ယွၤစံးတ့ၢ်စီၤမိၤရှ့အသိးန့ၣ်လီၤ.
ဒီးယွၤစံးဘၣ်စီၤမိၤရှ့, ခဲဂီၤကိာ်ဂဲၤဆၢထၢၣ်ဂီၤဂီၤ, ဒီးဆၢထၢၣ်လၢဖၤရိၤအမဲာ်ညါ, ဒီးစံးဘၣ်အီၤ, ယွၤ, ပှၤဧ့ၤဘြံၤဖိအကစၢ်စံးဒ်အံၤ, ပျၢ်ယပှၤဂီၢ်မုၢ်ဒ်သိးအက မၤယတၢ်တက့ၢ်. အဂ့ၢ်ဒ်အံၤ, အအံၤတစုယကဒုး ဘၣ်နၤ, ဒီးနခ့နပှၤ, ဒီးနပှၤဂီၢ်မုၢ်, လၢယတၢ်နးတၢ်ဖှီၣ် ခဲလၢာ်ဒ်သိးနကသ့ၣ်ညါ ပှၤဒ်ယၤအသိးတအိၣ်ဘၣ် လၢဟီၣ်ခိၣ်ချၢနီတဂၤဘၣ်လီၤ. အဂ့ၢ်ဒ်အံၤ, ခဲကနံၣ် အံၤယကယူာ်ထီၣ်ယစု, ဒီးတီၢ်နၤ, ဒီးနပှၤဂီၢ်မုၢ်လၢ တၢ်သံသတြိာ်, ဒီးနကဟးဂီၤကွံာ်လၢဟီၣ်ခိၣ်ချၢလီၤ.
ဒီးမ့ၢ်မးယဒုးဆၢထၢၣ်နၤလၢတၢ်အဂ့ၢ်အံၤ, ဒ်သိးယ ကဒုးနဲၣ်ယစိယကမီၤလၢနၤ, ဒီးဒ်သိးတၢ်ကစံၣ်တဲၤ တဲလီၤယမံၤလၢဟီၣ်ခိၣ်ချၢဒီဘ့ၣ်ညါအဂ့ၢ်လီၤ. နပာ် ထီၣ်ထီဒံးနသးလၢယပှၤဂီၢ်မုၢ်အဖီခိၣ်လၢနတပျၢ်ဘၣ် အီၤစ့ၢ်ကီးဧါ.
ကွၢ်ကွၢ်, ခဲဂီၤကိာ်ဆၢအလီၢ်ခဲကနံၣ်အံၤယကမၢ တၢ်ဟဲစူၤဒီးသူၣ်နးနးကလဲာ်လီၤ. ဒီးတၢ်န့ၣ်တမၤဘၣ် အသးလၢအဲၤကူပတူးအပူၤ လၢမုၢ်တနံၤလၢအခီၣ်ထံး အိၣ်ထီၣ်တုၤခဲကနံၣ်အံၤလီၤ. ဒီးခဲကနံၣ်အံၤမၢလီၤ တၢ်, ဒီးဒုးအိၣ်ဖှိၣ်ချ့သဒံးနဆၣ်ဖိကီၢ်ဖိအဒၢ, ဒီးနတၢ် အိၣ်လၢခိခဲလၢာ်တက့ၢ်. ကယဲၢ်ပှၤကညီ, ဒီးဆၣ်ဖိ ကီၢ်ဖိအဒၢ, လၢတၢ်ကထံၣ်န့ၢ်အီၤလၢခိဒီးတအိၣ်ဖှိၣ် ဘၣ်လၢဟံၣ်ပူၤန့ၣ် သူၣ်ကဟဲလီၤဘၣ်အီၤ, ဒီးကသံ ဝဲခဲလၢာ်လီၤ.
ဒီးပှၤလၢအပျံၤယွၤအကလုၢ်လၢ ဖၤရိၤအခ့အပှၤအ ကျါန့ၣ်, မၢအကုၢ်အပှၤ, ဒီးအဆၣ်ဖိကီၢ်ဖိအဒၢတ ဖၣ်ဃ့ၢ်နုာ်လၢအဟံၣ်ပူၤလီၤ. ဒီးပှၤလၢအတပာ်ဘၣ် ယွၤအကလုၢ်လၢအသးကံၢ်ပူၤဘၣ်န့ၣ် ဒုးအိၣ်လီၤတဲာ် အကုၢ်အပှၤ, ဒီးအဆၣ်ဖိကီၢ်ဖိအဒၢလၢခိလီၤ.
ဒီးယွၤစံးဘၣ်စီၤမိၤရှ့, ယူာ်ထီၣ်နစုဆူမူခိၣ်, ဒ်သိး သူၣ်ကလီၤလၢကီၢ်အဲၤကူပတူးဒီဘ့ၣ်ညါအပူၤ, လၢပှၤ ကညီအဖီခိၣ်, လၢဆၣ်ဖိကီၢ်ဖိအဒၢအဖီခိၣ်, ဒီးလၢ ကယဲၢ်တၢ်မဲထီၣ်လၢခိ လၢကီၢ်အဲၤကူပတူးဒီဘ့ၣ်ညါ အပူၤ, ကိးမံၤဒဲးအဖီခိၣ်တက့ၢ်.
ဒီးစီၤမိၤရှ့ယူာ်ထီၣ်အနီၣ်ထိးဘိဆူမူခိၣ်, ဒီးယွၤမၢ လီသီၣ်, ဒီးသူၣ်လီၤ, ဒီးမ့ၣ်အူဃ့ၢ်ဝ့ၤဝီၤလၢဟီၣ်ခိၣ် အဖီခိၣ်, ဒီးယွၤမၢတၢ်ဟဲစူၤဒီးသူၣ်လၢ ကီၢ်အဲၤကူပ တူးအဖီခိၣ်လီၤ.
ဒီးသူၣ်န့ၣ်အိၣ်, ဒီးမ့ၣ်အူဃ့ၢ်ဝ့ၤဝီၤလၢသူၣ်လီၤအ ကျါနးနးကလဲာ်လီၤ. တၢ်ဒ်န့ၣ်အသိးတအိၣ်ဘၣ်လၢ ကီၢ်အဲၤကူပတူးဒီဘ့ၣ်ညါအပူၤ, လၢအကဲထီၣ်ပှၤတ ကလုာ်လံၤလံၤန့ၣ်ဘၣ်လီၤ. ဒီးသူၣ်န့ၣ်လီၤဘၣ်တၢ် အိၣ်လၢကီၢ်အဲၤကူပတူးဒီဘ့ၣ်ညါအပူၤ, ကယဲၢ်တၢ် အိၣ်လၢခိလၢပှၤကညီ ပၢၢ်လၢဆၣ်ဖိကီၢ်ဖိအဒၢ, ဒီး သူၣ်န့ၣ်ဘၣ်ကယဲၢ်တၢ်မဲထီၣ်လၢခိ, ဒီးမၤကၢ်လီၤသ့ၣ် လၢခိကိးထံးဒဲးလီၤ. မ့မ့ၢ်ကီၢ်ကိရှ့ၣ်ဖဲပှၤအံၣ်စရ့လး ဖိအိၣ်ဝဲန့ၣ်သူၣ်တအိၣ်ဘၣ်.
ဒီးဖၤရိၤမၢလီၤတၢ်, ဒီးကိးက့ၤစီၤမိၤရှ့ဒီး စီၤအၤဟ ရိၣ်, ဒီးစံးဘၣ်အီၤ, အအံၤတစုယမၤကမၣ်လံတၢ်လံ. ယွၤတီဝဲလိၤဝဲ, ဒီးယၤ, ဒီးယပှၤဂီၢ်မုၢ်မ့ၢ်ပှၤတတီတ လိၤဘၣ်လီၤ. အါတ့ၢ်လံ, ဃ့ကညးယွၤဒ်သိးကစၢ် အလီသီၣ်တဖၣ်ဒီးသူၣ်န့ၣ် တသုတအိၣ်လၢၤတဂ့ၤ. ဒီးယကပျၢ်သု, ဒီးသုတအိၣ်တဆိးလၢၤဘၣ်.
ဒီးစီၤမိၤရှ့စံးဘၣ်အီၤ, တုၤယဟးထီၣ်လၢဝ့ၢ်ပူၤဒီး,ယ ကသလၣ်ထီၣ်ယစုဆူယွၤအအိၣ်လီၤ. လီသီၣ်ကတုာ် ဝဲ, ဒီးသူၣ်တအိၣ်လၢၤဘၣ်ဝဲ, ဒ်သိးနကသ့ၣ်ညါလၢ ဟီၣ်ခိၣ်အိၣ်ဒီးယွၤလီၤ. ဘၣ်ဆၣ်ဒီးနၤဒီးနခ့နပှၤတ ဖၣ်အံၤ, ယသ့ၣ်ညါလၢသုတပျံၤဒံးဘၣ်ကစၢ်ယွၤဘၣ်.
ဒီးတၢ်ဘၣ်ပအီခီမၤ, ဒီးဘုမုယီၤလီၤ. အဂ့ၢ်ဒ်အံၤ, ဘုမုယီၤအစဲၤအိၣ်ထီၣ်လံ. ဒီးပအီခီမၤသၣ်ထီၣ်လံ.
မ့မ့ၢ်ဘုကၠူၣ်ဒီးဘုကူးစမ့းန့ၣ်, တၢ်တဘၣ်ဘၣ်အီၤ ဘၣ်, အဂ့ၢ်ဒ်အံၤ, တဒိၣ်ထီၣ်ဒံးဘၣ်လီၤ.
ဒီးစီၤမိၤရှ့ဟးထီၣ်လၢဖၤရိၤအအိၣ်လၢဝ့ၢ်ပူၤ, ဒီးသ လၣ်ထီၣ်အစုဆူယွၤအအိၣ်, ဒီးလီသီၣ်, ဒီးသူၣ်တုာ် ဝဲ, ဒီးတၢ်စူၤတလူလီၤအသးလၢဟီၣ်ခိၣ်ချၢဘၣ်.
ဒီးတုၤဖၤရိၤထံၣ်ဝဲလၢတၢ်စူၤဒီး သူၣ်ဒီးလီသီၣ်တ ဖၣ်တုာ်ဝဲဒီး, မၤအါထီၣ်အတၢ်ဒဲးဘး, ဒီးမၤကိၤအ သး, အဝဲဒၣ်ဒီးအခ့အပှၤလီၤ.
ဒီးဖၤရိၤအသးဆူၣ်ထီၣ်, ဒီးတပျၢ်ဘၣ်ပှၤအံၣ်စရ့ လးဖိဘၣ်, ဒ်ယွၤစံးဘၣ်စီၤမိၤရှ့အသိးန့ၣ်လီၤ.

Listen to လံာ်စီၤမိၤရှ့ခံဘ့ၣ်တဘ့ၣ်. ၉