Kinga: Ʉtesitamentɨ Ʉmpya mu nzovele jya Kɨkɨnga (New Testament+)

Ʉtesitamentɨ Ʉmpya mu nzovele jya Kɨkɨnga

ɄYɨɨsʉ akavavʉʉla ikange aVafalisayo na vavaha va vateeketsi kʉ sihwananitso isinge akata, “ɄLʉdeeva lwa Kʉkyanya lʉhwaniine nʉ nkʉlʉdeeva mpamato ʉvɨ aanotsiitse ʉvʉtegʉlanie wa mwana va mwene. Ʉnkʉlʉdeeva ʉjwa akavasuungʼa avavanda va mwene kukʉvɨɨlanga avaanu ʉwʉ aavapye ɨnyɨlango jya kwitsa kʉ vʉtegʉlanie. Lɨno aveene vakabeela ʉkwitsa.
“Pwʉ akavasuungʼa ikange avavanda avange, akavavʉʉla akata, ‘Lʉtagi mukavavʉʉle valya ʉwʉ ndɨkavapye ɨnyɨlango ʉkʉta, “Ndɨnotsiitse isiinu syoni sya vʉtegʉlanie: Ndɨhɨnzile isenga itsidutwive siitso. Mwitsage kʉ vʉtegʉlanie!” ’ Lɨno aveene navaavɨɨkɨle ʉntɨma ɨnyɨlango ɨjyo, vakalʉta kʉ mbombo tsa veene. Mpamato akabɨha kʉ kɨlɨmɨla kya mwene, ʉjyʉnge akabɨha kuvomba ʉvʉtsuluusi. Avaasigye vakaviibata avavanda va mwene avo, vakavatova siitso nʉ kʉvabuda. Pwʉ ʉnkʉlʉdeeva ʉjwa wʉ apʉliike itsivombiike kʉ vavanda va mwene, akaviipa siitso. Akavasuungʼa avasikali va mwene, vakalʉta kukʉvabuda avabudi avo nʉ kʉnyianya ʉvʉtsenge wa veene. Itso wʉ tsivombiike, ʉnkʉlʉdeeva ʉjwa akavavʉʉla avavanda va mwene akata, ‘Isiinu sya vʉtegʉlanie sinotsiiwe, napeene valya ʉwʉ ndɨkavapye ɨnyɨlango navakanogelanile. Pwʉ lɨno mubɨhe mu vʉtsenge, mukavavʉʉle vooni ʉwʉ mutsikwagana navo ʉkʉta viitse kʉ vʉtegʉlanie.’ Avavanda avo vakalʉta kʉ vʉtsenge. Vakiitsa na vaanu vooni ʉwʉ vaavaweene, avagalo na vagolosu. Pwʉ avahenza vakadɨga mu nyumba jya vʉtegʉlanie.
“Lɨno wʉ ʉnkʉlʉdeeva ʉjwa ingye mu nʼgati mu nyumba ɨjyo pakʉta avavone avahenza va mwene, akambona ʉmwa ʉmuunu mpamato ʉvɨ naaswale ɨmisabwa ɨgɨnogye pa lʉhekelo lwa vʉtegʉlanie. Akambʉʉtsa akata, ‘Gwe mmanyaani ʉve, wingye ndeeti ʉmʉ wʉ nʉswalili ɨmisabwa ɨgɨnogye pa lʉhekelo?’ Pwʉ ʉmuunu ʉjwa akalemwa ɨlya kʉtsova. Pwʉ ʉnkʉlʉdeeva ʉjwa akavavʉʉla avavombi va mwene akata, ‘Munkunge ʉmuunu ʉjʉ isilʉnde ni sivoko nʉ kʉntaaga kʉnzi kʉ ngʼiisi, ʉkwʉ jiilɨlaga nʉ kʉgadʉtsa amiino kʉ nongwa jya lʉvavo ʉlʉlʉti.’ Lola, ʉNgʉlʉve ikʉvɨɨlanga avaanu vongosu viingile mu Lʉdeeva lwa mwene, lɨno vadebe avikwingila.”


Pwʉ aVafalisayo vakahega apo, vakalʉta kukɨtsosanza ɨnzɨla jya kʉntegeeletsa ʉYɨɨsʉ mu mamenyu ga mwene. Pwʉ vakavasuungʼa kwa Yɨɨsʉ avakongi va veene paninie na vatangɨli va nkʉlʉdeeva ʉHelode. Vakalʉta, vakambʉʉtsa vakata, “IMmanyisi, tʉlʉmanyile ʉkʉta ʉve ʉlɨ nʼgolosu, witsova itsa jɨlweli tsyene, navukʉnʼdwada ʉmuunu ʉvaveetsaga. Ikange ʉwɨɨmɨkiwa wa muunu nakɨɨnu kya kʉvɨɨkɨla ʉntɨma kwave, apeene vumanyiisa ʉwajɨlweli wa nzɨla jya Ngʉlʉve. Pwʉ tʉvʉʉle ʉmwʉ vuvonela. Ndeeti, patʉnogye ʉkʉsonga ɨsongo kwa Kaisali evo baako?” Ʉmwene ʉYɨɨsʉ aalʉmanyile ʉvʉsumbe wa veene ʉvʉviivi, akavaanda akata, “Nyɨ vagelʉngʼania ʉnyie, kɨki mwigela ʉkʉnnegeeletsa? Mumbonie ʉne ɨhela ɨjyʉ musongela ɨsongo.” Pwʉ aveene vakampa ʉmwene ɨdinali mamato. Pwʉ ʉYɨɨsʉ akavavʉʉtsa akata, “Ɨkɨhwani nʉ vʉvɨge isilɨ pa hela ɨjɨ syani?” Aveene vakamwanda vakata, “Sya Kaisali.” ɄYɨɨsʉ akavavʉʉla akata, “Pwʉ mumpeetsage ʉKaisali isya Kaisali, nʉ Ngʉlʉve mumpeetsage isya Ngʉlʉve.” Wʉ vapʉliike ʉkwanda kwa Yɨɨsʉ, vakadega siitso. Pwʉ vakandeka baaho, vakahega.


Mu kɨgono kɨɨkyo, aVasadukayo vakalʉta kwa Yɨɨsʉ. AVasadukayo vaanu ʉwʉ vaamanyiisaaga ʉkʉta ʉNgʉlʉve nalatsʉʉse avaanu ʉkʉhʉma kʉ vʉswe. Avo vakambʉʉtsa ʉYɨɨsʉ vakata, “Gwe Mmanyisi, ʉMoose aatʉlagye mu ndagɨlo ʉkʉta, angave ʉmuunu iiswa nʉ kʉndeka ʉnʼdala va mwene kɨtsila kʉhola avaana, ʉlʉkololwe ilagɨlwa ʉkʉhaala ʉnʼdala ʉnswɨle ʉjwa pakʉta oolose ʉlʉjungu lwa lʉkololwe ʉvaasue. Lɨno, ʉnsɨkɨ mpamato, vaalepwo avanamuunu lekelakʉpamato (7). Ʉntatsi akategʉla ʉnʼdala, akaswa kɨtsila kʉhola ʉmwana. Pwʉ ʉlʉkololwe ʉva vɨɨlɨ akahaala ʉnʼdala ʉnswɨle ʉjwa. Ʉlʉkololwe ʉjwa namwene akaswa kɨtsila kʉhola ʉmwana. Tsyavombiike vʉle vʉle nakʉ va daatu ʉkʉsikila kʉ va lekelakʉpamato. Pwʉ kʉ vʉmalɨlo ʉnʼdala ʉjwa namwene akaswa. Pwʉ ʉtʉvʉʉle, pa kɨgono kɨlya ɨkyʉ avaswe vooni valatsʉʉka, ʉnʼdala ʉnswɨle ʉjwa alaava nʼdala vaani? Tuvʉʉtsa ewo ʉlwakʉva aatoolilwe na vagoosi vooni lekelakʉpamato!” ɄYɨɨsʉ akavaanda akata, “Ʉnyie mujagile lwoni pakʉva namugamanyili agaavɨgilwe mu Vʉvɨge ʉVʉvalatse. Ikange namugamanyili amaka ga Ngʉlʉve ʉmwʉ gaveelye. Lola, ʉnsɨkɨ ʉgwʉ avaswe valatsʉʉka, navalategʉlage pange kʉtegʉlwa, apeene valaava nda vasuungʼwa va Ngʉlʉve ʉwʉ valɨ kʉkyanya, manya navitegʉla nʉ kʉtegʉlwa. Lɨno pa kulongwi tsa kʉtsʉʉka avaswe, ndeeti, mukaanale namwɨmbili mu Vʉvɨge ʉVʉvalatse itsʉ ʉNgʉlʉve aavavʉʉlile ʉkʉta, ‘Ʉne neene Ngʉlʉve va Abulahamu, va Isaka nʉ Yakobo’? Pwʉ avaanu avaswe navikɨsaja kwa Ngʉlʉve, apeene avaanu avatsiige vʉʉmi wʉ vikɨsaja kʉ mwene!” Wʉ avaanu va lipʉga ɨlyo vapʉliike ago, vakadega siitso kʉ manyiiso tsa mwene.


AVafalisayo wʉ vapʉliike ʉkʉta ʉYɨɨsʉ avalemile aVasadukayo pa kʉtsova, vakalʉndamana paninie, vakabɨha kwa Yɨɨsʉ. Mpamato mu vamanyisi va ndagɨlo, akanʼgela ʉYɨɨsʉ, akata, “Gwe Mmanyisi, lwʉ lʉlɨku ʉlʉlagɨlo ʉlʉlʉti mu ndagɨlo tsyoni tsa Ngʉlʉve?” ɄYɨɨsʉ akamwanda akata, “Ʉnʼganage ʉNtwa ʉNgʉlʉve vaako nɨ numbula jyako jyoni, na maka gaako gooni nʉ lʉhala lwako lwoni. Ʉlʉlagɨlo ʉlʉ lwʉ lʉlʉti kʉ ndagɨlo itsinge tsyoni, ikange lwʉ lʉtatsi. Ʉlʉlagɨlo ʉlwa vɨɨlɨ ʉlʉhwaniine nʉʉlʉ lwita, ‘Ʉnʼganage ʉnnino ndʉwʉ wɨganile jyʉve.’ Indagɨlo tsyoni tsa Moose ni manyiiso tsa vanyamalago tsyɨtotiike mu ndagɨlo itsi ivɨlɨ.”


Wʉ aVafalisayo avo vapitsiige valʉndamiine paninie baaho, ʉYɨɨsʉ akavavʉʉtsa akata, “Musaaga ndeeti ikulongwi tsa Kɨlɨsiti? Mwana vaani?” Vakamwanda vakata, “Mwana va nkʉlʉdeeva ʉDavʉdi.” Akavavʉʉtsa ikange akata, “Ɨngave ago ga lweli, kɨki ʉDavʉdi wʉ alongotsiiwe nʉ Mepo va Ngʉlʉve, aantambwe ʉKɨlɨsiti akata, Ntwa? Lola, ʉDavʉdi aatsovile akata,
‘ɄNtwa ʉNgʉlʉve aambʉʉlile ʉNtwa vango akata,
“Ʉtaame kʉ kɨvoko kyango kya kʉndyo,
ʉkʉsikila ʉnsɨkɨ ʉpwʉ ndikʉvalesa avalʉgʉ vaako,
nʉ kʉvalongotsa lwoni.” ’
“Ɨngave ʉDavʉdi ikʉmwɨlanga ʉKɨlɨsiti ʉkʉta Ntwa, jiiva ndeeti akilivuke ikange ave mwana va Davʉdi?” Naavepwo ʉmuunu ʉvaaweesiitse ʉkʉmwanda ʉYɨɨsʉ. Ikange, ʉkʉhʉma ʉnsɨkɨ ʉgwa naavepwo ʉmuunu ʉvɨ aagetsiitse ʉkʉmbʉʉtsa ʉYɨɨsʉ ɨlimenyu ɨlɨveetsaga.

Listen to Mataayo 22