Yambetta - 2016 CABTAL (NT) Non Drama

Yambetta - 2016 CABTAL (NT) Drama

Wɔɔ́s wóow, Yə́sus yɛɛ́lón, aáság kɛɛn ələndin a ɛbá ɛ́ noom. Ɛ́fɔlɛ́ ɛ́ pɔɔd yááság kiim əgəə́yii kɔ a ɛbá yə́ə́ŋ, kiʼtúú kilúd. Ná yɛɛ́dála náan, yɛɛ́bág a kɛʼkɔ́m kɛ́ kɛ́yɛ́ɛ kɔ áay, əə́ləndin kɔ lɛ́ nyɔ́lɛ́ a məní, pɔɔd a kɛdɛ́ɛ́. Ayɛ́bodɛánánɛ pɛbán piíŋ a poʼkaʼtɛ́n a mɔɛn. Náan aa əyíbusiə́din nkaʼtɛ́n yɛ́ɛnɛ, ɔnɔ́: «Mɔɔd nyummú aa nyóon ayɛ́ɛ́n əmisə masám a pɔlɛ́m puə́ŋ. Alɛ anɛ́ɛ́n kɔ əgumisə əə, masám mə́mmú mááság kɛɛn ədə́əŋ a ɛbá yɛ́ ngə́, pɛsag pímíim, pɛánɛ́. Mə́mmú míídə́əŋ a kɛgon, mə́míim múús na toɛn lɛ́ nsí ɛlaŋ ɛdɛʼkɛ́ɛ ngíŋ kɔ a kɛnɔ kɛ́ɛg. Náa, ná yoóy yɛ́ɛ́nás, yɛ́báám əʼtíŋ yɛ́ɛy yá ə́yíím yúus, yááyómbɛ́lɛd, yə́ə́gú lɛ́ nsí ɛdɛʼkɛ́ɛ ngíŋ agɛɛlɛ lɛ́ ngaŋ ɛ́lɛŋ kosɔd. Mə́mmú tɛn míídə́əŋ a kɛnɔ kɛ́ kɛ́yɛ́ɛ na nɛ́ngany. Náa, ná mə́yúús, nɛ́ngany nɛ́ɛ́báʼkánan, niə́wííyi. Mə́mmú anɛ́ɛ́n míídə́əŋ a nsí ɛlaŋ. Mə́yúús, máálɛŋ kolog, əʼtíŋ ə́múúm yəlíg yəlíg yəlíg. Áyɛ́ɛ lɛ́, nɛ́ɛnɛ pɛcógód əʼtin áʼtáan, nímmú əʼtin ádáád, nímmú tɛn niʼtin na pɛówád.» Yə́sus yiíyíbə́ni ɔnɔ́: «Taa, wɛ nyɔ́ olɛɛ́ na ntóɛŋ ɛgoob, óyoob!»


Ná yɛɛ́mán kosɔyɔ, paaʼkan pə́ə́ŋ pááság kaáyɛʼtɛnɛ a ɛbá yə́ə́ŋ, náa pɔ́nɔ́ na nyɔ́lɛ́: «A igə aa onyóŋɛ́nɛ́nɛ́ɛ́ kosɔyɔ a poʼkaʼtɛ́n a mɔɛn ə́?» Náa ɔnɔ́ na pɔ́lɛ́: «Pəŋi, Táán amáboyɛ́ɛ́lɛ lɛ́ pólɛŋ pɛbán pɛ́ a Nɛlaamɛʼ niə́ŋ pɛ́ pɛ́lɛɛ́ a nuníb. Náa, a pɔsɔ́g pɛ́ndɛ́ŋ, adiɛlɛnɛ náan lɛ́ pálɛŋ pɛ́lɛ́. Kɛ́lɛ́ɛ́ kɛɛn lɛ́, nyɔ́ ogódíí, pə́yiʼkini komosáayɛnɛ agɛɛlɛ lɛ́ yɛ́ɛn na mólɛ́ ilubənən. Nyɔ́ oʼkódií, pə́yiʼkini komogábɛn ɔmbɔ́ əgín yɛ́ ɔnɔ́ nyɔ́lɛ́ ogóódi. Ndɛ agosɔyɔ na pɔ́lɛ́ a poʼkaʼtɛ́n a mɔɛn lɛ́ pɔ́lɛ́báamɔɛ́d pálɛ lɛ́: Ɔmbɔ́ páásɛn əngis agodɛ́ʼtɛg, pádɛ́adála yoom.
Ɔmbɔ́ pádám ntóɛŋ agoob, pádɛ́agoob yoom, pɔ́dɛ́ɔgɔɔŋ tɛn nsiŋ. Taa, ombod ó pɔɔd ogo wó Ɛsayíi, ɔndɔɛgɛʼ pɛbán o Táán ayɛ́ɛ əgusəə a wóow. Ɔnɔ́:
“Táán ɔnɔ́: Pəŋi ndɛg yɛ́ɛnɛ! Polɛ́ɛ́ kɛɛn lɛ́ ɔmbɔ́ poádám ntóɛŋ agoob, podɛágoob yoom.
Ɔmbɔ́ poásɛn əngis agodála, podɛádála yoom.
Kɛ́lɛ lɛ́ ndɛg yɛ́ɛnɛ ɛlɛ na ntɛ́m yɛ́ nnasáŋ, ntóɛŋ yɔɔbɔn ndɔ́ɔ́lɔ́gɔ́, əngis yɔ́ɔ́bɔn na woog. Kɛ́lɛ náan lɛ́ ná pádɛʼtɛ́ʼtɛ́gánan, pádɛnjóóbánan, pádɛʼkásɛ ɔlaa wɔ́ɔ́bɔn əgimbuúlini ná mɛ Táán ndɛɛ́ lɛ́ ndɛŋ koboyɔ́ɔyɛ”
«Náa, kɔŋɛʼ igə na pəŋi lɛ́ əngis yááŋan álɛ agodɛ́ʼtɛganan moááŋ, ntóɛŋ yaaŋan yaágoóbanan kɔŋɛʼ. A fɔ́lɔ́b ndabodɛ́anɛ lɛ́ palɔɛgɛʼ pɛbán pá Táán piíŋ na pɔɔd piíŋ pá páyɛ́ɛ əguyə́ən ɔlaa ó Táán pɛ́ɛ́nyɔ́ŋɛn lɛ́ ná páádála pɛbán pɛ́ɛnɛ pɛ́ pəŋi polɛɛ́ agodála nɛ́gɔŋ, pádɛʼkáadála. Pɛ́ɛ́nyɔ́ŋɛn lɛ́ ná pámóób pɛbán pɛ́ɛnɛ pɛ́ pəŋi polɛɛ́ agoob nɛ́gɔŋ, pádɛʼkáagoob.»


«Taa, yisí yɛ́ ɛlɛɛ́ a nkaʼtɛ́n ɛ mɔɔd nyóon nyɔ́ ayɛ́ɛ́n əmisə masám mə́ə́ŋ a pɔlɛ́m áa yɛ́ɛnɛ ɛlɛɛ́ lɛ́. Masám má mídə́əŋ a ɛbá yɛ́ ngə́ málɛ pɔɔd pá pálɛɛ́ lɛ́ ná páagoob Tɔsɔm tó a Nɛlaamɛʼ nɛ́ a mɔɛn, pádɛ́agoob nkə kɛ́ kɛ́lɛɛ́ kɔ. Ɔmbɛ́ əməʼkiim, áság kuliogi nkə kɛ́ kɛ́yɛ́ɛ kɛáʼkaágon a ntɛ́m yɔɔbɔn. Má mídə́əŋ a kɛgon, málɛ pɔɔd pá pálɛɛ́ lɛ́ ná páagoob Tɔsɔm, pə́əsiəd tólɛ́ na tɔnyɔ́g. Náa, wɔnɔ́ ná pɔ́lɛ́ pálɛɛ́ na mɔɛn na mɔɛn, pádɛágaáʼkɛnɛ lɛ́ tólɛŋ kaágon a ntɛ́m yɔɔbɔn. Əgín ná ntɔ́b yaáboóboan, ɔmbɔ́ lɛ́ pálɛ agoboónɔɛyɛ a oʼto ó Tɔsɔm tó Táán, pááság kodambɛlɛd, póóliogi ongoo. Masám má mídə́əŋ a nɛ́ngany, málɛ pɔɔd pá pálɛɛ́ lɛ́ páagoob Tɔsɔm. Náa, wɔnɔ́ ná ɔʼtɛ́m wɔ́ɔ́bɔn ólɛɛ́ a tugúm, páagaáságɛma pɛbán pɛ́ a nsí, pálɛ wɔnɔ́ əʼtíŋ yá ə́diə́guúmíí. Ɔʼtɛ́m wɔ́ɔ́bɔn wó páágɛ́nɛ́ɛ́ a moom, na ɛságág yɛ́ pálɛɛ́ na yɛ́lɛ́, pɛbán pɛ́ɛb pɛ́abáʼkanan Tɔsɔm wɔnɔ́ ná ándɛ nɛ́ngany nɛ́abáʼkanan moom móság kuwu. Má mídə́əŋ anɛ́ɛ́n a nsí ɛlaŋ málɛ pɔɔd pá pálɛɛ́ lɛ́ páagoob Tɔsɔm tó Táán, páyaáyɛ́ngɛg tólɛ́ a ɔʼtɛ́m. Tɔsɔm tóod túəgud a ntɛ́m yɔɔbɔn, páság kɛɛn wɔnɔ́ əʼtíŋ yá ə́yúúm yəlíg yəlíg yəlíg lɛ́ nɛ́ɛnɛ pɛcógód əʼtin áʼtáan, nɛ́ɛn əʼtin ádáád, nímmú niʼtin na pɛówád.»

Yə́sus əyíʼkíni kubuúsiədin nkaʼtɛ́n yimmú ɔnɔ́: «Nɛlaamɛʼ nɛ́ a mɔɛn nɛ́lɛ náanɛ wɔnɔ́ mɔɔd nyummú nyɔ́ ayɛ́ɛ́n a pɔlɛ́m puə́ŋ, aágóna ombod wə́ə́ŋ ó moom ólaŋ, aáság kuúli. Na udúg, ná mɔɔd ungim aándɛ a ɛnɔ, mɔɔd nyummú nyɔ́ ayɛ́ɛ agobɛnɛn sɔ́g nyóon, aáság kɛɛn əmisə ombɛ́n wó ɔmbɛ́ kɔ, aásán. Moom mó mɔɔd nyóon moáság kiim mólog, muə́bə́ə́ kuum. Ombɛ́n wó ɔmbɛ́ wóow tɛn wááság kiim ódɛ́ɛmɛn. Ná pɔɔd pá páyɛ́ɛ əgud a pɔlɛ́m pó mɔɔd nyóon pɛ́ɛ́dála náan, pááság kɛɛn aboan sə́dúg wɔɔbɔn, náa pɔ́nɔ́ na nyɔ́lɛ́: “Sə́dúk, moom mó wɛɛ́góna a pɔlɛ́m poáŋ, adɛ́ ombod ólaŋ aa óyɛ́ɛnɔ ə́? Ə́lə́ə́ anɛ́ɛ́n áa ombɛ́n wó ɔmbɛ́ wóow wó wə́ʼkuúsíí, wə́əgiim ólon ə́?” Náa sə́dúg wɔɔbɔn ɔnɔ́ na pɔ́lɛ́: “Mɔɔd nyɔ́ alɛɛ́ na ɛbɛnɛn na mɛ áa alɛɛ́ na pigólí pɛ́ɛb”. Náa pəgudin pɔ́nɔ́ na nyɔ́lɛ́: “Kóog anɛ́ɛ́n óoʼ, tíɛn əwuunə ombɛ́n ogo ə́?” Sə́dúg wɔɔbɔn aáság kubuyúlisini ɔnɔ́: “Ndóo, pudinguə́nə lɛ́, a niwuənəʼ nɛ́ɛn, polɛ págosan na mólaŋ kɛ́. Tíən, páyámanan ondáŋ agɛɛn əgiig a kɛnɛŋ kɛ́ nibug. Áay aa ndádɛ́anɛ na pəbug lɛ́ páyaŋ oliogoni ombɛ́n wó ɔmbɛ́, págonya, ná pɔ́dɔ́ɔg yug. A ngim yɛ́ɛy ná pə́bug anɛ́ɛ́n moom móam, páágan a nɛbɔɔ́”.»


Əyíbusiə́din nkaʼtɛ́n yimmú yɛ́ɛnɛ, ɔnɔ́: «Nɛlaamɛʼ nɛ́ a mɔɛn nɛ́lɛ tɛn náanɛ wɔnɔ́ nsám ɛ moʼtáadɛ yɛ́ mɔɔd nyummú ayɛ́ɛ́n agon a pɔlɛ́m puə́ŋ. A posám pó piɛd piim, mmuʼ yɛ́ yə́ə́ʼtə́b agaáyɛn nsám ɛ moʼtáadɛ ɛdɛɔ́gɔ. Náa, ɛmaʼkolog, ná yaáyam, yaagɛɛn kɛa kɛ́ kɛdám kɛ́ kiɛd, pɛsag píyiim awáaga aŋŋany kɔ a ntab yəəŋ.»


Yə́sus əyíbusiə́din nkaʼtɛ́n tɛn yimmú yɛ́ɛnɛ, ɔnɔ́: «Nɛlaamɛʼ nɛ́ a mɔɛn nɛ́lɛ náanɛ wɔnɔ́ mayaa má toan tó kunudi umbúb má ɔʼkɛ́ɛd alɛɛ́ agodɔb na ɛ́fɔlɛ́ yɛ́ umbúb óság kobágan.»


Pɛbán pɛ́ɛb piim, Yə́sus ayɛ́ɛ agosɔyɛla na pɔɔd əgín a poʼkaʼtɛ́n a mɔɛn. Ayɛ́ɛ adɛbodɛánɛ tɛn kɛbán fiɛ́d a nkaʼtɛ́n a mɔɛn lɛ́ ná nkə kɛ́ ɔndɔɛgɛʼ pɛbán o Táán yiísə́ə́ kɛ́as. Ɔndɔɛgɛʼ pɛbán o Táán anyóon yiísə́ə́ lɛ́: «Ndɛ́ɛ́ kosɔyɔ na pɔ́lɛ́ əgín a poʼkaʼtɛ́n a mɔɛn. Ndɛ́ɛ́ kolɔɛgɛ pɛbán pɛ́ pɛ́yɛ́ɛ pɛɔsɛ́gáán əgín kɔ ná nsí ɛyásáŋɛ́ɛ́»

Ná ayɛ́ɛ aáʼkoman kosɔyɔ náan, aáság kodɛ́ɛmɛn agɛɛn a noádɛʼ na paaʼkan pə́ə́ŋ. Kɔ́gɔ́ɔg, paaʼkan pə́ə́ŋ pááság kumuŋíən pɔ́nɔ́: «Ɛ́bɛyásɛ́nɛn anɛ́ɛ́n nkaʼtɛ́n yɛ́ɛy yɛ ombɛ́n wó ɔmbɛ́ wó úyúús a pɔlɛ́m.» Náa ɔnɔ́: «Ɛlɛ lɛ́, Mɔɔ́n o mɔɔd aa alɛɛ́ mɔɔd nyɔ́ yɛɛ́góna ombod wə́ə́ŋ ó moom ólaŋ. Pɔlɛ́m pólɛ nsí yɛ́ɛnɛ. Ombod ólaŋ a wóow ólɛɛ́ pɔɔd pá pándagoóbɛnɛɛ́ Táán. Ombɛ́n wó ɔmbɛ́ ólɛ pá pálɛɛ́ agoóbɛn Omɔlɛɔ́g. Omɔlɛɔ́g nyóon aa alɛɛ́ nyɔ́ alɛɛ́ agɛmbɛnɛn. Nyɔ́lɛ́ aa yiímísə ombɛ́n wóow wó ɔmbɛ́. Nɛman nɛ́ nsí aa nɛ́lɛɛ́ kɛnɛŋ kɛ́ nibug. Pəbug a póob pálɛɛ́ məŋun má maʼtom má Táán. Wɔnɔ́ ná pɛ́ɛ́gónya ombɛ́n wó ɔmbɛ́ a kogɔ́lɔnɛ a yug, náan tɛn aa kɛ́lɛ́ɛ́ kaáyɛ́lɛɛ́ a nɛman nɛ́ nsí. Mɔɔ́n o mɔɔd alɛ́ɛ́ kiim ádom məŋun mə́ə́ŋ má maʼtom lɛ́ míim afadɛd pɔɔd piim pá páagɛɛlanɛ kɔbɛ́, na pá pálɛɛ́ agɛɛlanɛ lɛ́ pɔsɔ́g pə́də́əŋ a kɔbɛ́. Páadagɛdɛ pɔɔd póob piim a yug yɛ́ ɛgóón. Kɔ́gɔ́ɔg, pálɛ́ɛ́ kɛɛn əgín mandɛɛ na mandɛɛ, əgín pɛgɛg kaágáma. A pɔsɔ́g pá pɛ́ɛ́lɔ́b paladáán na Táán, pálɛ́ɛ́ konom wɔnɔ́ wɔɔ́s a Nɛlaamɛʼ nɛ́ Sɛ wɔɔbɔn Taa, wɛ nyɔ́ olɛɛ́ na ntóɛŋ ɛgoob, óyoob!» «Nɛlaamɛʼ nɛ́ a mɔɛn nɛ́lɛ náanɛ wɔnɔ́ yoom ɛ́ tugúm yɛ́ mɔɔd nyummú ɔyɔ́ɔ́ŋ a pɔlɛ́m, əə́siəd, amɛ́ɛn ɔgɔɔsɛg a kɛnɔ kɛ́ndɛ́ŋ. Na tɔnyɔ́g tóod tuim, aáság kuúli a noádɛʼ nuə́ŋ, aáman kolɛga moom muim mó yiígóodi, aányáŋɛn mɔɔnɛ́ agɛɛn agooŋɛnɛ kɛsom kɛ́ nsí kɛ́ɛg, a kɛnɔ kɛ́ yoom ɛgo ɛ́yɛ́ɛ.
«Taa, nɛ́lɛ tɛn náanɛ wɔnɔ́, mɔɔd wo undunə́ nyummú nyɔ́ ayɛ́ɛ əgiim yúunə pisig pɛ́ pɔnjɔ́ŋ pá mɔɔnɛ́. Ayɛ́ɛ́n ɔɔgɔɔŋ pɔnjɔ́ŋ pə́mmú, pisig pɛ́ pɔnjɔ́ŋ. Aáság kuúlini a noádɛʼ nuə́ŋ, aáman kɛɛn alɛga moom muə́ŋ, aányáŋɛn mɔɔnɛ́ agɛɛn agooŋɛnɛ pɔnjɔ́ŋ póob.»

Yə́sus aáság kiiʼkini kusiəd nkaʼtɛ́n yimmú, ɔnɔ́: «Nɛlaamɛʼ nɛ́ a mɔɛn nɛ́lɛ tɛn kə́mmú wɔnɔ́ nibúnjə́ nɛ́ mɔɔd alɛɛ́ agodagɛdɛ a məní. Nibúnjə́ nɛ́ɛn níəgiim nɛ́gómmɛ mbod ɛ pusú ngim yɛ́ ɛlɛɛ́ kɔ a məní. Kɛnɛŋ kɛ́ niə́ʼkuyə́gií, ná pálon na nɛ́lɛ́ a kɛdɛ́ɛ́, pə́ləndin a nsí əgiiyə pusú. Pólaŋ, pə́əsiəd, páagaag a kɛad. Nɛnyáá nɛ́ɛn, pə́əguúlisəni a məní. Yoom ímuʼ náan aa kɛ́lɛ́ɛ́ kɛɛnɛɛ́ a nɛman nɛ́ nsí. Məŋun má maʼtom má Táán, málɛ́ɛ́ kiim əgiiyə pɔɔd lɛ́, pá pabɛ́ ndɛ́ŋ, pá pálɛɛ́ sáád ndɛ́ŋ. Páadagɛdɛ pá pabɛ́ a yug yɛ́ ɛgóón. Kɔ́gɔ́ɔg, pálɛ́ɛ́ kɛɛn əgín mandɛɛ na mandɛɛ, pɛgɛg na pɛgɛg kaágáma.»

Náa Yə́sus ɔnɔ́ na paaʼkan pə́ə́ŋ: «Pomóób nkə kɛ́ɛg kɛ́ ndɛɛ́ əgusəə ə́?» Pə́yímuyúlísíni pɔ́nɔ́ na nyɔ́lɛ́: «Ɛɛ́ɛ óo! Tɛmóób.» Əguyibənən, Yə́sus yiísə́ə́ ɔnɔ́ na pɔ́lɛ́: «Taa, náan aa ɔndɛŋ pɛcɛm ungim nyɔ́ aáʼkaágɛ́ɛ́ oʼto a Nɛlaamɛʼ nɛ́ a mɔɛn, alɛɛ́. Alɛ wɔnɔ́ mɔɔd o noádɛʼ nyɔ́ alɛɛ́ alónɛ a tugúm tuə́ŋ lɛ́ na moom mó mowa kɛ́, na mó piʼtug kɛ́.»


Ná Yə́sus ayɛ́ɛ aáʼkoman kusəə poʼkaʼtɛ́n póob, yɛɛ́dɛ́ɛ́mɛn áay, amɛ́ɛn a pálɛ́ɛg yɛ́ yɛɛ́yám a yɛ́lɛ́. Ayɛ́ɛ́n ɔsɔd a yoog ɛ pɛɔ́sɔ́gɔ́lɔ́n kɔ, əə́bə́ə́ kaaʼkananɛ pɔɔd Tɔsɔm tó Táán. Ungim nyɔ́ ayɛ́ɛ kɔ əyə́wúnə́níí na nɛaʼkananɛʼ niə́ŋ. Páyɛ́ɛ agosɔyɔ pɔ́nɔ́: «Yɛ́ɛy nsiŋ náan óoʼ, ə́lə́ə́ áa ɛlɛɛ́ əgumuyíimin əə́? Mangán móonɛ má alɛɛ́ agɛɛlɛ əə, ánɛ aa amoyɛ́ʼkɛ́nɛ́nɛ́ɛ́ toɛn tó kɛɛlɛ ə́? Ɔdɛɔ́gɔ mɔɔ́n ó kámɛ́ndaʼ yɛ́ɛnɛ aa alɛɛ́ náan əə́? Adɛ́njaŋ ŋŋí aa nyóonɛ alɛɛ́ Malɛ́a əə́? Adɛ́ pomóŋŋí aa póonɛ pálɛɛ́ lɛ́: Na Sɛ́ag, na Yósɛb, na Simɔ́ɔŋ, na Síud əə́? Adɛ́ pomóŋŋí pə́ə́ŋ pá pagɛ́ɛd tɛn aa póonɛ tɛlɛɛ́ alaa ondáŋ na pɔ́lɛ́ ə́? Oo, pɛbán anɛ́ɛ́n pɛ́ɛnɛ piim pɛ́ alɛɛ́ agɛɛlɛ əə, ə́lə́ə́ áa pɛ́lɛɛ́ əgumuyíimin əə́?» Táá, nkə kɛ́ kɛ́yɛ́ɛ́lɛ lɛ́ pádɛnjáág oʼto na nyɔ́lɛ́ a kɛ́ɛg aá. Yə́sus ayɛ́bodɛánɛ ɔnɔ́ na pɔ́lɛ́: «Pɔ́dɛɔ́gɔɔ́sɔ́dɛ ɔndɔɛgɛʼ pɛbán o Táán a nigúu niə́ŋ nɛ́ nyɔ́lɛ́nyɔ́amɔɛ́d na a yoog yəəŋ ɛ pɔɔd. A mɔnɔŋ mɛ́ndɛ́ŋ agá aa əə́gə́mən.» Yə́sus adɛʼkáagɛɛlɛ ɛ́fɔlɛ́ ɛ́ mangán a nigúu nɛ́ɛn lɛ́ pádɛʼkáagaag oʼto na nyɔ́lɛ́.

Listen to Maʼtɛ́as 13