Lezgi - 2018 IBT (NT) Non Drama

Lezgi - 2018 IBT (NT) Drama

Ингье, Иса Месигьдин тухумдин тарих: Иса Месигь Давуд пачагьдин тухумдикай, Давуд пачагьни Ибрагьиман тухумдикай тир. Гьа икӀ Ибрагьималай Исакь хьана. Исакьалай Якьуб хьана. Якьубалай Ягьуд ва адан стхаяр хьана. Ягьудалай ПерецӀни Зерагь хьана, абурун диде Тамар тир. ПерецӀалай Гьесран хьана, Гьесраналай Арам хьана. Арамалай Аминадаб хьана, Аминадабалай Нагьшун хьана. Нагьшуналай Салман хьана. Салманалай Багьас хьана, Багьасан диде Рагьаб тир. Багьасалай Абид хьана, Абидан дидени Рут тир. Абидалай Ишай хьана. Ишаялай Давуд пачагь хьана. Давуд пачагьдилай Сулейман пачагь хьана. Сулейман пачагьдин дидени сифте Уьруьдик квай паб тир. Сулейман пачагьдилай Регьабам хьана. Регьабамалай Аби хьана. Абидилай Асеф хьана. Асефалай Яшафат хьана. Яшафаталай Ярам хьана. Ярамалай Узи хьана. Узидилай Ятам хьана, Ятамалай Ахаз хьана. Ахазалай Гьизкьи хьана.
Гьизкьидилай Манаше хьана, Манашедилай Аман хьана. Аманалай Яши хьана.
Яшидилай Ягьиагьакин ва адан стхаяр хьана. (Им чувудар Бабилда есирвиле гьатдалди хьайи вахт тир.)
Бабилдиз куьч хьайидалай кьулухъ Ягьиагьакиналай Шалатил хьана. Шалатилалай Зарубабел хьана.
Зарубабелалай Абигьуд хьана, Абигьудалай Элиаким хьана, Элиакималай Азур хьана.
Азуралай Садикь хьана. Садикьалай Ахим хьана, Ахималай Элигьуд хьана.
Элигьудалай Элазар хьана. Элазаралай МатӀан хьана, МатӀаналай Якьуб хьана.
Якьубалай Майраман гъуьл Юсуф хьана. Майрам Месигь лугьудай Исадин диде тир.
Гьа икӀ Ибрагьималай Давуд пачагьдал къведалди цӀукьуд несил авай. Давуд пачагьдин девирдилай та чувудар Бабилдиз есирвиле тухудалди цӀукьуд несил авай; чувудар Бабилдиз тухвай девирдилай та Месигьдал къведалдини цӀукьуд несил авай.

Иса Месигь икӀ дидедиз хьана: Адан диде Майрамак Юсуфа лишан кутунвай. Абурун мехъер хьанвачиртӀани, Майрам Пак Руьгьдикай руфунал залан хьанвайди малум хьана. Майраман чам Юсуф гьахъ-михьи кас тир, адаз Майрам беябур тавуна, ам чинеба элкъуьр хъийиз кӀан хьана. И фикирар ийизвайла, ахварай адан патав Реббидин малаик атана.
– Давуд пачагьдин эвлед Юсуф! – лагьана малаикди. – Ваз Майрам пабвиле къачуз кичӀе жемир, Адан руфуна авайди Пак Руьгьдилай хьанвайди я. Майрама Хва хада, тӀварни Адал Иса эцига: Ада Вичин халкь гунагьрикай хиласда.
Ибур вири пайгъамбарди Реббидин мецелай лагьай ихьтин гафар кьилиз акъатун патал хьайи крар я: «Яб це! Рушвал гумайди кӀвачел залан жеда, ада Хва хада, Адазни Имануэл, яни чахъ Аллагь гала, лагьана тӀвар гуда».
Ахварай аватайла, Юсуфа Реббидин малаикди лагьайвал авуна. Ада Майрам пабвиле къачуна. Амма папа Хва хадалди, Юсуф адав агатнач. Майрамаз Хва хьайила, Юсуфа Адаз Иса тӀвар гана.

Listen to МатӀай 1